NSAN MATEO 9

1Nu'bʉ́ ra Jesu bi yopa bøxa ja ra motsa ne bi 'raxa ri'nandi ra ndehe pa bi yopa menga ja rá hai. 2Mi zønga rá hai bi ts'i'tsua 'nara 'ñøhø mrá ts'onate himi tsa da 'ña̱ni ne xqui t'ɛnts'a ja 'nara 'bebo. Y nu mi hyanda ra Jesu gue xi mi ja yá jamfri nú'ʉ ya ja̱'i to'o mi ndude ra da'thi, nu'bʉ́ bi 'ñembabi ra da'thi: ―Ma zi t'ʉ'i, johyabya ngue'a̱ ya stá pun'a'i ri ts'oqui. 3Nu'bʉ́ nu 'raya xahnate de ra ley mi 'bʉhni bi mʉdi bi benga ya ts'omfeni ne mi 'ñémbi 'na ngu ma'na: “Nuna 'ñøhøni ri 'ñet'a Ajua̱.” 4Ra Jesu bi ba̱tho nú'a̱ mi beñ'ʉ y bi 'ñembabi: ―¿Hanja guí beñhʉ nú'ʉ ya ts'omfeni de guequi? 5Pa guequi hinte rá hñei ga pumba yá ts'oqui nuna 'ñøhø nixi pa ga embi: “Nangui ne 'ño”. 6Pe pa gui pa̱hʉ gue Nú'a̱ To'o e bi Nja̱'i ja rá ts'ɛdi nuua ja ra ximhai pa da pumba yá ts'oqui ya ja̱'i, ma ga øt'a njaua pa gui pa̱hʉ. Nepʉ bi 'ñemba nú'a̱ ra da'thi: ―Nangui, jʉxa ri mfidi rí ma ri ngu. 7Nu'bʉ́ ra da'thi 'bestho bi nangui bi ma rá ngu. 8Y mi hyanda ya ja̱'i nú'a̱ bi nja, nu'ʉ́ xi bi 'yø, ne bi xøcambeni Ajua̱ ngue'a̱ nú'á̱ xqui umba ra ts'ɛdi 'nara ja̱'i pa bi 'yøt'e njabʉ. 9Nepʉ ra Jesu bi ma de guehni y bi hyanda 'nara 'ñøhø rá thuhu ra Teo mrá ngʉxboja̱ mi hudi ja rá mexa. Y ra Jesu bi 'ñembabi: ―Bá ehe tɛngagui. Nepʉ ra Teo 'bestho bi 'mai ne bi dɛni'a̱. 10Nepʉ ra Jesu bi ma ja rá ngu ra Teo ne ja bi hñudini bi ñuniui yá nxadi co ma'ra ya 'ña̱tsa ngʉxboja̱ ne ma'ra ya ts'oja̱'i xqui zønini. 11Y mi hyanda ya fariseo gue ra Jesu bi hñuhui bi ñuniui ya ts'oja̱'i, nu'bʉ́ nuya fariseo'ʉ bi 'yambabi yá nxadi ra Jesu ne bi 'ñembabi: ―Xi ri xahnatehʉ ¿hanja ri ñuniui gatho nuyʉ ya ts'oja̱'i? 12Nu mi 'yøde ra Jesu bi ma̱nga njabʉ ya fariseo, nu'bʉ́ bi 'ñembabi: ―Nura ja̱'i hinte ma hñeni pɛ'tsi hingui øt'a ra thoni pa ra 'ñethi, pe nu'ʉ tó'o ri hñeni ha̱, honga ra 'ñethi. 13Rí ma gui nxadihʉ pa gui pa̱hʉ te ma̱nga ja ra Ma̱ca T'ofo nu habʉ bi 'ñena Ajua̱: “Nugui ma'na dí ne gui mpɛ'tsuahʉ ra nthecate 'na ngu 'na que gui tsincahʉ ya mbo'ni pa gui hyohʉ gui 'bahaguihʉ.” Nugui hinstuá ehe pa ga zofo ya hoja̱'i, nugui stuá ehe pa ga zofo ya 'yøt'ats'oqui pa da ñobri'ʉ. 14Nepʉ de gue'a̱ yá nxadi ra Xuua Xi'tsate bi 'ñehe bi 'yambabi ra Jesu ne bi 'ñembabi: ―¿Hanja nuje ne ya fariseo dí ayunahe ndunthi ya i'qui, ha nuri nxadigue hinhya'mʉ ri ayuna'ʉ? 15Y ra Jesu bi 'ñembi: ―'Bʉ da nja 'nara ntha̱ti ne ra na̱vio da mbitabi yá amigo, nuyá amigo rí 'ñepi da johyaui ra na̱vio ne hinda du yá mʉi. Nehe numa nxadi nja ngu nuyá amigo ra na̱vio. Pe sta zø ra pa ga ma de guecua, nu'bʉ́ ha̱, da za da ayuna ma amigo co ya dumʉi. 16Hinxá hño da 'bø'ta 'nara zɛdutu co 'nara 'ra'yo dutu, ngue'a̱ 'mɛfa da nunts'a ra 'ra'yo dutu ne da gʉt'a ra zɛdutu, nepʉ njabʉ ma'na da ntʉnga ra zɛdutu. 17Nehe hinxá hño da sit'a ra vinu ja 'nara zɛbota, ngue'a̱ nu'bʉ di tsɛdi ra vinu, nu'bʉ́ da ntʉ́nga ra zɛbota ne nú'a̱ te di po da mfani ne ma'na da ts'oca ra zɛbota. Hangue mahyoni da sit'a ra vinu ja 'nara 'ra'yo bota pa njabʉ masque xi di ja rá ts'ɛdi ra vinu, hinda ntʉ́nga ra bota. 18Ngu bi uadi bi ma̱nga njabʉ ra Jesu, bi zøhø habʉ mi 'bʉi'a̱ 'nara nda̱ de ja yá nija̱ ya xodyo, ne bi ndandiña̱hmu ne bi 'ñembi: ―Dá e ga xi'i gue ja ts'ʉ rí du ma t'ixu. Hangue dí ba̱nte'i gui ma gui hñu'tsua ts'ʉ ri 'yɛ pa da yopa nte. 19Nu'bʉ́ ra Jesu 'bestho bi ma co yá nxadi ne bi mɛui nú'a̱ ra nda̱'a̱. 20Y de mi 'yo'ʉ ja ra 'ñu mi pani 'nara 'bɛhña̱ mi hena 'nara hñeni mi xo'tua ya ji y ya mi pɛ'tsa 'rɛt'amayoho njɛya mi njabʉ. Nu'á̱ bi joni ja rá xʉtha ra Jesu pa bi dʉnbabi rá he. 21Ngue'a̱ mi bensɛ ja rá mfeni nura 'bɛhña̱'a̱ ne mi ena: “Dí camfri gue 'bʉ hønsɛ ga thʉnbabi rá ña̱ni rá he ga ña̱ni 'bestho de ma hñeni.” 22Ha ra Jesu bi mpʉnts'i bi hyandi ne bi 'ñembi: ―Ma zi t'ixu'i, johyabya ngue'a̱ co ri jamfri xcá ña̱ni. Y nura 'bɛhña̱ 'bestho bi ña̱ni ra ora'a̱. 23Nepʉ bi zønga ra Jesu co yá nxadi ja rá ngu nú'a̱ ra nda̱ ja xqui du rá t'ixu. Y mi 'bʉhni ya mɛ'mda mi pɛ'mda, ne ndunthi ya ja̱'i xi mi zoni. 24Y ra Jesu bi 'ñemba ya ja̱'i: ―Pøñhʉ ts'ʉ pa thi. Nura nxutsi a̱ha̱, hingue xa du. Pe ya ja̱'i mi thentho ra Jesu. 25Pe ngu bi bøni'ʉ pa thi, ra Jesu bi yʉt'i habʉ mi 'bɛnga ra nxutsi ne bi mipa rá 'yɛ, nepʉ nu'á̱ 'bestho bi nangui. 26Y gatho nú'a̱ ra hai de guehni bi ntʉnga ra noya de nú'a̱ ra nxutsi xqui yopa nte de ra du. 27Nepʉ nu mi ma ra Jesu de guehni, yoho ya goda bi dɛni'a̱ ne bi ña̱ nts'ɛdi'ʉ bi 'ñena: ―¡Nú'i rá T'ʉ'i ra nda̱ Davi, pɛscahe ra nthecate! 28Pe ra Jesu bi thotho ne bi ma bá cʉt'a ja 'nara ngu, ha nuya goda bi dɛni'a̱ y bi yʉt'i'ʉ nehe. Nepʉ ra Jesu bi 'ñembabi'ʉ: ―¿Ha guí camfrihʉ gue da za ga øthe'ihʉ? Nu'ʉ́ bi 'ñembi: ―Ha̱ha̱, Ndada, da za. 29Nu'bʉ́ ra Jesu bi hñu'tsua rá 'yɛ ja yá da'ʉ ne bi 'ñembi: ―Dá njabʉ ngu nú'a̱ xcá camfrihʉ. 30Y 'bestho ra ora'a̱ bi xogui yá da'ʉ. Nepʉ ra Jesu bi hñu'mba ra hña̱ ne bi 'ñembi: ―Oxqui ma gui ma̱ñhʉ to'o bi 'yøthe'ihʉ. 31Pe nu mi bøni de guehni'ʉ bi xipa gatho nuya mengu de guehni gue go ra Jesu xqui 'yøthe'ʉ. 32Y ngu bi bønga ya goda de guehni, bá ts'impa ra Jesu 'nara gone mi pɛ'tsa 'nara ts'onda̱hi. 33Nepʉ ra Jesu bi 'yɛmba nú'a̱ ra ts'onda̱hi mi pɛ'tsa nura gone, ne nu'á̱ 'bestho bi za bi ña̱. Nuya ja̱'i xi bi 'yø, ne mi 'ñémbi'ʉ 'na ngu ma'na: ―Masque nújʉ go guecjʉ rá hniniguihʉ Ajua̱, pe hinhya'mʉ stá hanthʉ 'nara nt'udi xi ra da̱ngui ngu nú'a̱ stá hanthʉbya. 34Pe nuya fariseo bi 'ñena'ʉ: ―Nuní ha̱npa rá ts'ɛdi ra nda̱ de ya ts'onda̱hi pa ɛnga ya ts'onda̱hi. 35Nura Jesu mi 'yo gatho ja ya da̱nga hnini ne ya t'ʉca hnini, ne mi cʉt'a ja ya nija̱ pa ja mi utuateni, ne mi øthe gatho ya da'thi, ne mi zofo ya ja̱'i mi embi gue ya xqui zøhø ra Nda̱ de mahets'i pa da nda̱. 36Y mi hyanda ra Jesu gatho nuya ja̱'i, xi bi huequi'ʉ ngue'a̱ 'ñena ya zi dɛti jo'o to'o da su y mi tu yá mʉi ngue'a̱ himi pa̱di to'o da dɛni'ʉ. 37Nu'bʉ́ ra Jesu bi 'ñembabi yá nxadi: ―Majua̱ni dí xi'ahʉ, nuua xi ja ndunthi ra sofo pe jo'o ya mɛfi. 38Hangue 'yapabihʉ Ajua̱ nú'a̱ to'o rá mɛti nuna ra 'bɛfi pa da mɛhna ya mɛfi da gʉxa nuna sofona̱.

will be added

X\