NSAN MATEO 8

1Nu mi ga̱i ra Jesu de ja ra t'øhø habʉ mi utuate, xi bi dɛna ndunthi ya ja̱'i. 2Ne bi nthɛui 'nara ja̱'i mi tsʉ 'nara hñeni rá thuhu ra lepra nú'a̱ tsit'atho ra ngø. Nura ja̱'i'a̱ bi ndandiña̱hmu ja rá ua ra Jesu ne bi 'ñembi: ―Ndada, 'bʉ gui nehma̱, da za gui 'yøthegui. 3Nu'bʉ́ ra Jesu bi hñuxa rá 'yɛ ne bi 'ñembi: ―Ha̱ha̱ dí ne ga øthe'i, y ya gá ña̱ni. Y ngu bi uadi bi ma̱nga njabʉ, 'bestho bi ña̱ni ra da'thi. 4Nepʉ ra Jesu bi 'ñembi: ―Oto xqui ma gui xipi. Rí ma ja ra nija̱ ha̱, pa da hyant'a ra macja̱, ne gui unga ri 'baha nú'a̱ bi ma̱nga ra Moise, pa njabʉ da ba̱di ya ja̱'i gue ya xcá ña̱ni. 5Nepʉ ra Jesu bi yʉt'i ja ra hnini Ncapernau y ja bi nthɛuini 'nara nda̱ gá soldado de ra hai Nroma. 6Y nura nda̱'a̱ bi ba̱ntebi ra Jesu ne bi 'ñembi: ―Ndada, 'nama 'bɛgo bi nts'onate ne hingui tsa da 'ña̱ni, ne xi tsi'ti. 7Nu'bʉ́ ra Jesu bi da̱tuabi ne bi 'ñembi: ―Maha, ma ga øthe. 8Nu'bʉ́ nura nda̱ gá soldado bi da̱tui ne bi 'ñembi: ―Hina, hiní 'ñepcagui gui cʉt'a mbo ma ngu. Nugui nu'a̱ dí pa̱di gue hønsɛ co ri noya gui ma̱, numa 'bɛgo da ña̱ni. 9Ngue'a̱ nugui 'bʉi to'o ri mandagui nehe, pe nequi drí manda. Dí pɛ'tsa ya soldado ja ma hmanda, y 'bʉ ga emba 'na de gue'ʉ: “Rí mani”, da ma, o 'bʉ ga emba ma'na: “Bá ehe”, nu'á̱ da 'ñehe. Ha nu'bʉ ma 'bɛgo ga embi: “Pɛ nuna 'bɛfina̱”, nu'á̱ da mɛfi. 10Mi 'yøde njabʉ ra Jesu xi bi 'yø ndunthi ne bi 'ñembabi nú'ʉ mri dɛni: ―Majua̱ni dí xi'ahʉ, nugui hinstá tsʉdi ni 'nara me Israel nú'a̱ xi di ja rá jamfri ngu nura jamfri pɛ'tsa nuna 'ñøhøni. 11Dí xi'ahʉ gue ndunthi ya ja̱'i maxøgue ra ximhai nú'ʉ hingyá me Israel ma da yʉt'a mahets'i habʉ bí manda Ajua̱ ne da hñu ja ra mexa mahyɛgui co ra Abrá, co ra Isaac, ne co ra Cobo. 12Pe ya me Israel nú'ʉ rí 'ñepa hma̱ha̱ da hñu ja ra mexa, Ajua̱ hinda ma da hopi da yʉt'a mahets'i. Nu'a̱ ma da nja, ma da mɛhni'ʉ ja ra 'bɛxuui, y nuni ja di zohma̱ni ne ja di gusthma̱ni yá ts'i. 13Nepʉ ra Jesu bi 'ñemba ra nda̱ gá soldado: ―Rí ma ri ngu ngue'a̱ nuri jamfri xa muui ndunthi, ne xa njabʉ ngu xcá ne. Y nurá 'bɛgo ra nda̱ gá soldado 'bestho bi ña̱ni nura ora'a̱. 14'Mɛfa de gue'a̱ ra Jesu bi ma ja rá ngu ra Pedro, y ja mi 'bɛnini rá to ra Pedro mi umba ra nzø. 15Nepʉ ra Jesu bi hñu'tsua rá 'yɛ y 'bestho bi tsaya ra nzø mi tsʉdi. Nepʉ 'bestho bi nangui ra 'bɛhña̱ ne bi hyocui te bi zi'ʉ. 16Ya de mi put'a nde ra Jesu bá ts'impabi ndunthi ya da'thi, 'ra mi pɛ'tsa ya ts'onda̱hi. Y co 'nada ra noya bi ma̱ bi 'yɛnga nú'ʉ ya ts'onda̱hi mi pɛ'tsi'ʉ, ne bi 'yøthe gatho nú'ʉ to'o mi hñeni. 17Gatho nuya bi 'yøt'a ra Jesu pa bi nja ngu nú'a̱ xqui ma̱nga maya'bʉ ra ba̱di Isaía ja ra Ma̱ca T'ofo bi 'ñena: “Nu'á̱ go gue'a̱ bi hña̱ga ma hñenihʉ, ne bi hña̱sca gatho ma ʉguihʉ.” 18Ne 'mɛfa bi hyanda ra Jesu ndunthi ya ja̱'i xqui the'tsi'a̱. Nu'bʉ́ nu'á̱ bi 'ñemba yá nxadi: ―Maha ri'nandi ra ndehe. 19Y ante da ma'ʉ, 'nara xahnate de ra ley bi joni habʉ mi 'bai ra Jesu ne bi 'ñembabi: ―Xahnate, nugui dí ne ga tɛn'a'i pa habʉ gatho gui ma ga ma nehe. 20Ra Jesu bi da̱tui bi 'ñembi: ―Ya haho ja yá hña̱do, ne ya ts'ints'ʉ ja yá 'bafi, pe Nú'a̱ To'o bi e bi Nja̱'i otho ni habʉ da mɛ rá ña̱xu. 21Nepʉ 'na de yá nxadi ra Jesu bi 'ñembi: ―Ma zi Hmu'i, 'raca nsɛqui ga ma ga agui ma dada, nepʉ ga pengui ga tɛn'a'i. 22Ra Jesu bi da̱tui bi 'ñembi: ―Bá ehe tɛngagui, tsopʉ nú'ʉ xa du go dá 'yagui nú'ʉ yá mi'ña̱gamfriui. 23Nepʉ de gue'a̱ ra Jesu bi bøxa ja ra motsa co yá nxadi pa bi ma ri'nandi ra ndehe. 24Ne de mi 'yo'ʉ ja ra ndehe mi da̱mfri'ʉ bi nja 'nara da̱nga bʉnthi xi nts'ɛdi asta mi ne da pʉnts'a ra motsa ne mi tonts'a ra dehe pa mbo. Ha nura Jesu mi a̱ha̱. 25Nu'bʉ́ yá nxadi 'bestho bi ma bá ats'i ne bi 'ñembi: ―Ma zi Hmu'ihe, ña̱ngaguihe ngue'a̱ ya ma da mpʉnts'a ra motsa mbo ra dehe. 26Y nu'á̱ bi 'ñembabi'ʉ: ―¿Pa te guí tsuhʉ? ¿Ha gue otho ri jamfrihʉ? Nu'bʉ́ ra Jesu bi 'mai pa bi zʉi ra bʉnthi ne ra ndehe. Y 'bestho ra ora'a̱ bi ntsaya. 27Nu mi hyanda njabʉ yá nxadi xi bi 'yø ne mi 'ñémbi'ʉ: ―¡Te ma ts'ɛdi ha̱ní gue asta ra nda̱hi ne ra dehe øtua rá noya! 28Nepʉ bi zønga ra Jesu ri'nandi ra ndehe co yá nxadi ja 'nara hai rá thuhu Gadara, y ja bi nthɛuini yoho ya 'ñøhø bi bønga habʉ mi ja ya nt'agui. Nú'ʉ ya 'ñøhø'ʉ mi pɛ'tsa ya ts'onda̱hi xi xmá nts'o, ha xi mi pite ndunthi, nixi mi tsa to da 'ranga nú'a̱ ra 'ñu'a̱ habʉ mi 'bʉ'ʉ. 29Nuya 'ñøhø'ʉ bi ña̱ nts'ɛdi ne bi 'ñemba ra Jesu: ―¿Te guí hongua habʉ dí 'bʉhe nú'i Jesu rá T'ʉ'i Ajua̱? Hingui tsøta ra ora pa gui huatcahe, nu'bʉ́ ¿hanja xcá ehe gui xaxcahe? 30Guetbʉ de guehni mi 'yoni 'na tax'o ya ts'ʉdi mi ñuni. 31Y ya ts'onda̱hi bi 'yapa nsɛqui ra Jesu ne bi 'ñembi: ―'Bʉ ma gui 'yɛnje de guecua, 'racje nsɛqui ga cʉthe ja nuyʉ ya ts'ʉdi bí 'yoni. 32Nu'bʉ́ ra Jesu bi 'ñembi: ―Ha̱ha̱, rí maha, ja da bá cʉthʉni. Nu'bʉ́ 'bestho ya ts'onda̱hi bi bøni de nú'ʉ yoho ya 'ñøhø ne bi ma bá cʉt'a ja ya ts'ʉdi. Nepʉ nura ora'a̱ gatho ya ts'ʉdi bi nest'ihi bi hñøt'a ja 'nara ma'ye pa bi ma bá zo ja ra ndehe y gatho bi ja̱t'i. 33Y nuya mapts'ʉdi bi nest'ihi co ra ntsu asta bi zønga ja ra hnini ne bi xipa ya ja̱'i te bi 'yø'tua ra Jesu nú'ʉ yoho ya 'ñøhø xqui 'yɛmbabi'ʉ ya ts'onda̱hi. 34Nu'bʉ́ gatho ya mengu de nú'a̱ ra hnini'a̱ bi ma bá c'a̱'tsa ra Jesu pa bi 'yapa ra favo da ma de guehni pa da ma ma'na ra hnini.

will be added

X\