1 Nepʉ rá Ma̱ca Nda̱hi Ajua̱ bi zixa ra Jesu ja ra 'yo'mtha pa ja da nthɛuini ra ts'onda̱hi pa da japi hma̱ha̱ da 'yøt'a 'nara ts'ot'øt'e. 2 Nuni ja bi beheni ra Jesu hinte bi zi ñote ma pa ne ñote xuui, ne 'mɛfa bi zʉ ra thuhu. 3 Nepʉ de gue'a̱ bi zøni ra ts'onda̱hi há mi 'bʉi'a̱, ne bi mʉdi bi xaxi ne bi 'ñembabi: ―'Bʉ go gue'e rá T'ʉ'i Ajua̱, japa nuya ya do da nthuhme xa̱. 4 Pe nu'á̱ bi da̱ti ne bi 'ñembabi: ―Xa nt'ofo ja ra Ma̱ca T'ofo gue ra ja̱'i hingue hønsɛ po ra thuhme da 'mʉi, gatho nú'a̱ ma̱ Ajua̱ go gue'a̱ umba rá te ra ja̱'i. 5 Nepʉ ra ts'onda̱hi bi zixa ra Jesu ja ra ma̱ca hnini Jerusale, ne bi pø'tsa maña̱ ja ra nda̱nija̱. 6 Ne bi 'ñembabi: ―'Bʉ xi majua̱ni rá T'ʉ'i Ajua̱, 'yɛnga ra sagui pa nja'ti, ngue'a̱ xa nt'ofo ja ra Ma̱ca T'ofo ne ena njaua: Ajua̱ da pɛhna yá ɛnxɛ pa da su'a'i ne da mip'a ri 'yɛ pa njabʉ hingui tsama'ñʉ ri ua nu xcrí tsønga ja ra hai. 7 Nepʉ ra Jesu bi 'ñembabi'a̱: ―Xa nt'ofo nehe ja ra Ma̱ca T'ofo: “Oguí xaxa Ajua̱ ri Hmu pa gui 'ñena gue da max'a'i.” 8 Nepʉ ma'na'qui ra ts'onda̱hi bi zixa ra Jesu ja 'nara t'øhø xi mrá hñets'i pa bi yopa xaxi, ne bi 'ñutuabi gatho ya hnini de rá ngʉni ra ximhai con gatho yá hño nú'a̱ mi ja. 9 Y bi 'ñembi: ―Gatho nuyʉ ya hnini guí handi ga 'ra'i 'bʉ gui ndandiña̱hmu ne gui nsundagui. 10 Nepʉ ra Jesu bi 'ñembi: ―'Uegue de gueque Satá. Xa nt'ofo ja ra Ma̱ca T'ofo gue Ajua̱ ri Hmu go gue'a̱ gui nsunda, ne hønsɛ'a̱ gui pɛpabi. 11 Nepʉ ra ts'onda̱hi 'bestho bi 'uegue de ra Jesu, ne bi zø yá ɛnxɛ Ajua̱ bi umbabi te da zi. 12 'Mɛfa bi 'yøde ra Jesu gue ra Xuua Xi'tsate mi ofadi. Nu'bʉ́ nu'á̱ 'bestho bi mengui pa ja ra hai Galilea. 13 Y ja bá 'bʉhni ja ra hnini Nasare. Nepʉ de guehni bi ma bá 'bʉ Ncapernau guetbʉ ja rá ña̱ni ra ndehe habʉ mi ja yá hai ra Sabuló ne ra Neftalí. 14 Y bi njabʉ ngu nú'a̱ xqui ma̱nga ra ba̱di Isaía de nú'a̱ ra hai'a̱ ne bi 'ñena: 15 De yʉhyadi de ra da̱the Jordá ja jani rá hai ra Sabuló ne rá hai ra Neftalí, ja thohnitho ra 'ñu rí ma pa ja ra ndehe, ja guehni ra hai Galilea habʉ 'bʉi ndunthi ya ja̱'i nú'ʉ hingyá xodyo. 16 Y nuya mengu de nú'a̱ ra hai'a̱ xqui 'mɛdi hma̱ha̱ ja 'nara da̱nga 'bɛxuui, pe nubyá ha̱, ya bi nja ra hyats'i ja nú'a̱ ra hai'a̱. Njabʉ gue'a̱ xqui ma̱nga ra ba̱di Isaía. 17 Desde ya pa'ʉ ra Jesu bi mʉdi bi zofo ya ja̱'i ne bi 'ñembabi: ―Ntsø'mhʉ ne ñobrihʉ ngue'a̱ ya xa zøhø ra Nda̱ de mahets'i pa da nda̱. 18 Y ra Jesu mi 'yo ja ra ña̱nga ndehe Galilea y bi hyandi mi 'yoni yoho ya 'ñøhø mri ncu, 'na de gue'ʉ rá thuhu ra Simu nú'a̱ bi thu'mbabi nehe ra Pedro, ha nu'a̱ ma'na rá thuhu ra Andre, nú'ʉ́ mi ɛnt'a yá xit'a̱ ja ra ndehe ngue'a̱ myá mɛhua̱. 19 Nepʉ ra Jesu bi zofo'ʉ ne bi 'ñembi: ―Bá ehʉ tɛngaguihʉ y ga u't'a'ihʉ gui mpɛhua̱hʉ dega ja̱'i. 20 Nu'bʉ́ 'bestho nu'ʉ́ bi zopʉ yá xit'a̱ nepʉ bi dɛni. 21 Y bi 'ño 'na tʉi'ʉ nepʉ bi hyandi mi 'yoni má yoho ya 'ñøhø mri ncu, 'na rá thuhu ra Cobo y nu ma'na rá thuhu ra Xuua yá t'ʉ ra Sebedeo, mi o mbo ra motsa co yá dada mi pø'ta yá xit'a̱. De guehni ra Jesu bi zofo'ʉ. 22 Nepʉ 'bestho bi zohni'ʉ yá motsa ne yá dada ne bi dɛna ra Jesu. 23 Nu'bʉ́ ra Jesu bi ma bá gat'i gatho rá ngʉni Galilea y mi cʉt'a ja yá nija̱ ya mengu de guehni pa mi xahni, y mi ha̱cuabi gatho nu'a̱raza ra hñeni mi pɛ'tsi'ʉ, y mi 'yo mi zofo'ʉ mi embi gue ya xqui zøhø ra Nda̱ de mahets'i pa da nda̱. 24 Y bi ntʉnga ra noya gatho ja ra hai Siria, y bá ts'impabi gatho ya da'thi nú'ʉ mi pɛ'tsa nu'a̱raza ra hñeni ne nú'ʉ mi pɛ'tsa ya ts'onda̱hi ne nú'ʉ xqui 'bɛ yá mfeni ne nú'ʉ mi doua, y gatho mi øthe'a̱. 25 Y ndunthi ya ja̱'i bi dɛna ra Jesu, ya me Galilea, ya me Decapoli, ya me Jerusale, ya me Judea, ne ya me ri'nandi ra da̱the Jordá.
