NSAN MATEO 27

1Nurá hyax'a̱ gatho yá nda̱xjua nda̱ ya xodyo ne ya nda̱ gá macja̱ bi gohi 'nara cohi pa hanja da za da hyo ra Jesu. 2Nepʉ bi du'ti'ʉ pa bi zits'i bá ɛnt'ua ja rá 'yɛ ra Poncio Pilato nú'a̱ to'o mrá nda̱ de Judea. 3Ra Juda nú'a̱ to'o xqui da ra Jesu, nu mi hyandi'a̱ gue ma da tho ra Jesu, xi bi du rá mʉi ne bi ma bá co'tsua yá boja̱ nuya nda̱ gá macja̱ ne ya nda̱xjua nda̱, nú'a̱ 'natema'rɛt'a ya t'axboja̱ xqui t'umbi. 4Ne bi 'ñena: ―Nugui stá øt'a 'nara da̱nga ts'oqui, ngue'a̱ stá da 'nara 'ñøhø nú'a̱ hinte tu, ma da tho, da manga rá ji. Nepʉ nu'ʉ́ bi da̱di ne bi 'ñembi: ―¿Nu'á̱ te go tsa ga pa̱cahe de gue'a̱? Nu'á̱ go rí ma ri uɛndague. 5Nu'bʉ́ ra Juda bi føta nú'a̱ ra boja̱ mbo ra nija̱, nepʉ bi ma bá nzʉdisɛ dega 'yʉga pa bi nhyo sɛhɛ. 6Nu'bʉ́ nuya nda̱ gá macja̱ bi munts'a nú'a̱ ra boja̱'a̱ ne bi 'ñeñ'ʉ: ―Nuna boja̱na̱ hingui tsa ga ʉthʉ ja ra 'mɛ'tsboja̱ de ra nija̱, ngue'a̱ guehna 'nara njut'i de rá ji 'nara ja̱'i. 7Nepʉ bi go 'nara cohi gue con gue nura boja̱'a̱ da dañ'ʉ 'nara hai rá thuhu ra Hai dega Hyoca Traste, pa ja da t'aguini ya nzøhøja̱'i. 8Hangue asta mapaya nura hai'a̱ rá thuhu ra Hai dega Ji. 9- 10Njabʉ bi nja ngu nú'a̱ xqui ma̱nga ra ba̱di Jeremía bi 'ñena: “Bri jʉ nú'a̱ 'natema'rɛt'a ya t'axboja̱ pa bi thanga 'nara hai nú'a̱ mrá mɛti 'nara hyoca traste. Njabʉ bi 'bɛpcagui Ajua̱ ga øt'e. Ngue'a̱ ya me Israel bi 'ñena gue nú'a̱ ra ja̱'i'a̱ da 'ba po 'natema'rɛt'a ya t'axboja̱.” 11Ra Jesu ya mi 'bahni ja rá thandi ra Pilato nú'a̱ to'o mrá nda̱ de Judea. Ha ra Pilato bi 'ñani, bi 'ñembabi: ―¿Ha go gue'i grá da̱nga Nda̱ de ya xodyo? Ha ra Jesu bi da̱tuabi: ―Ha̱ha̱ go guecagui, ngu nú'a̱ gá ma̱. 12Nepʉ ya nda̱ gá macja̱ ne ya nda̱xjua nda̱ bi ña̱pabi ra Jesu, pe nu'á̱ hinte bi da̱di. 13Nu'bʉ́ ra Pilato bi 'ñembabi ra Jesu: ―¿Ha hinguí øde gatho nú'a̱ te hma̱ de gue'i? 14Pe ra Jesu hinte bi da̱tuabi. Por guehna ra Pilato xi bi 'yø. 15Nú'a̱ ra nza̱i de Judea gue ra nda̱ pɛ'tsi da hyɛgui 'nara 'yofadi nú'ʉ go da huahna ya ja̱'i nú'ʉ ya pa de rá ngo ra pascua. 16Ha nuya pa'ʉ mi ofadi 'nara 'ñøhø mrá thuhu ra Barraba nú'a̱ xqui t'øde ndunthi de gue'a̱ ngue'a̱ xi mrá ts'oja̱'i. 17Y nu'bʉ́ nura ora bi munts'a ya ja̱'i, ra Pilato bi 'yambabi'ʉ ne bi 'ñembi: ―¿To'o guí nehʉ ga hɛgui, ra Barraba o nuni ra Jesu t'embi ra Cristo ra nda̱? 18Ngue'a̱ ra Pilato mi pa̱di hanja ya nda̱ gá xodyo xqui zi'tsuabi ra Jesu ngue'a̱ mi tsu da hña̱nbabi'a̱ yá nsu. 19Ha nu de mi huhni ra Pilato ja rá hudi, nurá 'bɛhña̱ bá pɛnpa ra noya ne bi 'ñembi: “Ote xqui ma gui hñøt'e de gue nú'a̱ ra hoga ja̱'i'a̱, ngue'a̱ manxuui dá 'uipa 'nará t'i xi xá nts'o.” 20Pe ya nda̱ gá macja̱ ne ya nda̱xjua nda̱ bi 'yʉ'ta gatho ya ja̱'i pa da 'yadi'ʉ gue go da thɛgui ra Barraba, ne go da tho ra Jesu. 21Nu'bʉ́ ra Pilato bi 'yambabi ma'na'qui ya ja̱'i ne bi 'ñembi: ―¿Nda'a̱ de ri yoho guí nehʉ ga hɛgui? Nu'bʉ́ ya ja̱'i bi da̱di ne bi 'ñena: ―Nura Barraba. 22Hangue ra Pilato bi yopa 'yambabi'ʉ ne bi 'ñembi: ―Nu'bʉ́ ¿te ga øt'e co nuni ra Jesu xa thu'mbi ra Cristo ra nda̱? Nu'bʉ́ ya ja̱'i bi da̱di ne bi 'ñena: ―¡Manda da tho ja ra pont'i! 23Nu'bʉ́ ra Pilato bi 'ñembabi'ʉ: ―¿Pe te ma ts'oqui xa 'yøt'ni? Pe nu'ʉ́ ma'na xi mi mafi nts'ɛdi mi ena: ―¡Manda da tho ja ra pont'i! 24Nu mi hyanda ra Pilato gue ma'na 'yo mri ñʉnts'i ya ja̱'i ne himi tsa te da 'yøt'e'a̱, nu'bʉ́ bi manda da tha̱mpa ts'ʉ ra dehe, ne bi nxʉ'yɛ ja yá thandi gatho ya ja̱'i, ne bi 'ñena: ―Nugui hingo ma ga tha̱di de nurá ji ma da manga nuna ra hoga 'ñøhø nu stí du. Nu'ahʉ ya go guí pa̱hʉ te ma gui tha̱dihʉ. 25Nu'bʉ́ bi da̱di gatho ya ja̱'i ne bi 'ñena: ―¡Nuje ne gatho ma ba̱tsihe ma go ga tha̱dihe de nú'a̱ ra ji ma da mfani! 26Nu'bʉ́ ra Pilato bi hyɛgui ra Barraba, ne bi manda bri fɛt'a ra Jesu, nepʉ bi 'yɛnt'uabi'a̱ ja yá 'yɛ yá soldado pa da hyo'ʉ. 27Nu'bʉ́ ya soldado bi zixa ra Jesu pa habʉ mi 'bʉi ra da̱nga ts'ʉtbi, ne ja bá cot'athoni gatho ya soldado. 28Nepʉ bi møque'ʉ ne bi hyetuabi 'nara thɛnga he. 29Ne bi hñu'tsuabi ja rá ña̱xu 'nara corona dega 'mini xqui 'bet'e, ne bi 'yɛnt'ua ja rá 'yɛ ra 'ñɛi 'nara ts'ʉt'o. Nepʉ bi ndandiña̱hmu'ʉ ja rá thandi'a̱, ne mi ø'tuatho ra nt'eni mi embi: ―¡'Bʉi pa nza̱ntho, nu'i ri t'equ'ei rá Nda̱'i ya xodyo! 30Nepʉ bi zots'i'ʉ ne bi hña̱mba nú'a̱ ra ts'ʉt'o mi o ja rá 'yɛ ne con gue'a̱ bi na'mba ja rá ña̱xu. 31Nepʉ de mi uadi'ʉ bi 'yø'tua ra nt'eni ra Jesu, bi møcuabi nú'a̱ ra thɛnga he xqui hyetuabi, nepʉ bi yopa hyetua nú'ʉ yá dutu xi mi he. Nepʉ bi zits'i'ʉ pa da pont'i ja ra pont'i pa ja dí duni. 32Ne de má 'ñu bi nthɛui'ʉ 'nara 'ñøhø mrá thuhu ra Simu mrá me Cirene. Nepʉ nú'a̱ ra 'ñøhø'a̱ bri japi bi duxa nú'a̱ ra pont'i habʉ mi ma da ts'ʉta ra Jesu. 33Njabʉ bi zøni ja ra luga rá thuhu Golgota nú'a̱ rí bøni da 'ñena Ña̱xmadu. 34Nuni ja bá t'umbabini ra Jesu ra vinu xqui ntha̱nts'i co 'nara nda̱po xi xmá nju, pe mi za gue xmá nju himbi ne bi zi. 35Nu mi uadi ya soldado bi pont'a ra Jesu, nu'bʉ́ nu'ʉ́ bi rifabi yá dutu pa bi hñegue'ʉ. Njabʉ bi nja ngu nú'a̱ xqui ma̱nga rá 'mɛhni Ajua̱ nú'a̱ bi 'ñena: “Nú'ʉ́ bi rifagui ma dutu pa bi hñegue'ʉ.” 36Nepʉ ya soldado ja bi hñudini pa bi su ra Jesu. 37Y xqui t'ofo ja ra pont'i maña̱ de ja rá ña̱xu nda'a̱ ra ts'oqui xqui 'yøt'e ngu mi ma̱ñ'ʉ pa ja bi duni. Y nú'a̱ xqui t'ofoni mi ma̱ gue nu'á̱ go ra Nda̱ de ya xodyo. 38Nehe bri pont'a yoho ya be habʉ bri pont'a ra Jesu, 'na ja rá 'ñɛi, ne nú'a̱ ma'na ja rá nga̱ha̱. 39Y nú'ʉ to'o mi thoguini mi bʉt'a yá ña̱xu ne mi xaxi, 40mi embabi: ―Nú'i xcá ma̱ gue gui yø'ta ra nija̱, nepʉ rá hñupa gui yopa 'ba'mi, mpøhø de gue'asɛ, ne ca̱i de ra pont'i 'bʉ xi majua̱ni go gue'i rá T'ʉ'i Ajua̱. 41Nehe ya nda̱ gá macja̱ ne ya xahnate de ra ley, co ya fariseo ne ya nda̱xjua nda̱ mi nønga ra Jesu ne mi 'ñémsɛ'ʉ: 42―Ma'ra ha̱, bi za bi pøhø, pe nubyani hinda za da mpøhø sɛhɛ. Nu'bʉ go xi guehma̱ni yá Nda̱ ya me Israel, dá ga̱ibya de ra pont'i pa ga camfrihʉ. 43Nuni xa hñuxa rá jamfri ja Ajua̱, hangue dá ña̱mbya Ajua̱ 'bʉ gue xi majua̱ni Ajua̱ ri ma̱di, cabo xa xicsɛhʉni ne xa 'ñena gue go guehni rá T'ʉ Ajua̱. 44Nehe nú'ʉ yoho ya be xcrí pont'i mahyɛgui co ra Jesu bi xaxi'ʉ nehe. 45Y ngu mi 'nɛt'yoho ra hyadi, bi mʉdi bi 'mɛxuui gatho ra ximhai ne asta mi nzʉnga hñu nde ja bi yopa hnequi ma'na'qui. 46Ne nura ora'a̱ ra Jesu bi ña̱ nts'ɛdi ne bi 'ñena: ―Elí, Elí, ¿lama sabactani? ―Rí bøni da 'ñena, ma Dada'i, ma Dada'i, ¿hanja xcá hyɛgasɛua? 47Nu'bʉ́ 'ra de gue nú'ʉ mi 'bʉhni bi 'yøde ne bi 'ñena'ʉ: ―Nuni ra 'ñøhø ma'ta ndu ra ba̱di Elía. 48Nu'bʉ́ 'na de gue nú'ʉ mi 'bʉhni 'bestho bi nest'ihi bá ha̱ 'nara zi sponja ne bi pobo co ra ju'tsa vinu. De guehni bi tøta ja 'nara ts'ʉt'o, nepʉ bi go'tsuabi ja rá ne. 49Pe nu ma'ra bi 'ñena: ―Tsopʉ, ma ga nuhʉ ua da zø ra Elía pa da ña̱ni. 50Nu'bʉ́ bi yopa ña̱ nts'ɛdi ma'na'qui ra Jesu, nepʉ ra ora'a̱ 'bestho bi du. 51Nura ora'a̱ bi xø nú'a̱ ra dutu mi naxa mbo ra nda̱nija̱ pa mi cot'a habʉ xi xmá nsunda, bi mʉdi de maña̱ pa rí ga'ti. Ne xi bi nja 'nara mbimhai nts'ɛdi y asta bi xø ya do. 52(Nehe bi xoxa ya nt'agui ne bi yopa nte ndunthi ya gamfri nú'ʉ ya xqui du. 53Ne nu de ya xqui yopa nte ra Jesu, nu'bʉ́ nú'ʉ xqui bønga de ja ya nt'agui, bi 'ño ja ra hnini Jerusale habʉ bá handa ndunthi ya ja̱'i.) 54Ngu bi du ra Jesu, ra nda̱ gá soldado ne yá mfats'i nú'ʉ mi su'a̱ bi za'ʉ ra mbimhai ne bi hyanda gatho nú'ʉ te bi nja, hangue xi bi ntsu'ʉ ne bi 'ñena: ―Xi majua̱ni nuni ra 'ñøhø go mi guehni rá T'ʉ Ajua̱. 55De zi yabʉtho mi 'bahni ndunthi ya 'bɛhña̱ mi handa nú'a̱ te bi nja. Nuya 'bɛhña̱'ʉ go gue'ʉ xqui mɛpabi ra Jesu ne xqui 'ñoui de Galilea. 56'Ra de gue'ʉ, ra Maria Magdalena, ne ra Maria nurá na̱na̱ ra Cobo ne ra Jose, ne rá na̱na̱ nú'ʉ yoho yá t'ʉ ra Sebedeo. 57De ya mi ma da yʉ ra hyadi 'nará nxadi ra Jesu mrá me Arimatea mrá thuhu ra Jose ne xi mrá rico, 58bi ma bá c'a̱'tsa ra Pilato pa bi 'yapa nsɛqui da ma da 'yacuabi rá ndo'yo ra Jesu. Nu'bʉ́ ra Pilato bi manda da t'umbabi nsɛqui pa da ma da 'yagui. 59Nu'bʉ́ ra Jose bi ma bá tumpa rá ndo'yo ra Jesu, ne bi mant'i co 'nara t'axa dutu. 60Nepʉ bi ma bá agui ja ra nt'agui nú'a̱ xqui hyoqui'a̱ ja 'nara hña̱do pa go xa nt'aguini hma̱ha̱'a̱. Nepʉ bi got'a ra nt'agui co 'nara da̱nga do, ne bi ma'a̱. 61Ne guetbʉ ja ra nt'agui mi huhni ra Maria Magdalena ne nú'a̱ ma'na ra Maria. 62Rá hyax'a̱, ya xqui thogui nú'a̱ ra pa de ra nthoqui, bi ma ya nda̱ gá macja̱ ne ya fariseo bá c'a̱'tsa ra Pilato, 63ne bi 'ñembi: ―Nú'i ma nda̱'ihe, dí beñhe gue nú'a̱ ra hyate 'ñøhø nú'bʉ mi tetho bi 'ñena gue rá hñupa mi ma da yopa nte. 64Hangue dí nehe gui pɛhna to'o da su ra nt'agui hñu pa, pa hinda 'ñehe yá nxadi dega xuui ne da be. Nu'bʉ́ ha̱, nuya nxadi ma da 'ñembabi ya ja̱'i gue xa yopa nte'a̱, ne ma'na strá nts'o nuna nc'uambana̱ de nú'a̱ rá mʉdi. 65Bi da̱di ra Pilato ne bi 'ñena: ―Ma ga 'ra'ahʉ ya soldado gui tsixhʉ pa gui suhʉ xá hño ra nt'agui asta habʉ da za. 66Nu'bʉ́ nuya nda̱ gá macja̱ co ya fariseo bi ma bá su ra nt'agui ne bi hñu'tsua 'nara seyo ra do, ne bi zohni'ʉ ya soldado pa bi su.

will be added

X\