NSAN MATEO 26

1Nu mi uadi ra Jesu bi ma̱nga gatho nuya noyaya, bi 'ñembabi yá nxadi: 2―Ngu guí pa̱hʉ gue hønsɛ yo pa ri 'bɛdi pa da t'øt'a ra ngo dega pascua, ne nuya pa'ʉ gue'bʉ ma dra da Nú'a̱ To'o bi e bi Nja̱'i pa dra pont'i ne da tho. 3Ne nura pa'a̱ bi ma̱nga njabʉ ra Jesu, nuyá nda̱xjua nda̱ ya xodyo ne ya nda̱ gá macja̱ ne ya xahnate de ra ley, bi munts'i'ʉ ja rá ngu ra Caifá nú'a̱ to'o xi mrá da̱nga nda̱ gá macja̱. 4Nuni ja guehni bi 'ñʉ'ti'ʉ pa hanja da za da hyat'a ra Jesu pa da za da gʉ ne da hyo. 5Ne bi bensɛ'ʉ bi 'ñémbi'ʉ: ―Nubyá hinga ma ga øthʉ núna dí beñhʉ ga øthʉ ngue'a̱ ra ngo, pa hinda ñʉnts'a ya ja̱'i. 6Ha nura Jesu mi 'bʉhni ja ra t'ʉca hnini Betania ja rá ngu ra Simu nú'a̱ to'o xqui ña̱ni de ra lepra nú'a̱ ra hñeni tsit'atho ra ngø. 7Ha ra Jesu mi hudi ja ra mexa, ne de gue'a̱ bi zønga 'nara 'bɛhña̱ mi ha̱ 'na ngu ra zi xito xqui thoqui de 'nara hoga do rá thuhu ra alabastro, mi po 'nara dehe xi mi yʉni xá cʉhi ne xi mri muui ndunthi, ne bi go'tsua ja rá ña̱xu ra Jesu nú'a̱ ra dehe'a̱. 8Ha nu mi hyanda ya nxadi nú'a̱ mi øt'a nú'a̱ ra 'bɛhña̱'a̱, bi bø yá cuɛ ne bi 'ñena: ―¿Hanja bri fantho nuna dehe xi rá ma̱di? 9Nuna deheni xa za xa 'ba hma̱ha̱, ngue'a̱ ri muui ndunthi ra boja̱, ne xa t'umba hma̱ha̱ 'nara mfats'i ya hyoya. 10Nu'bʉ́ ra Jesu bi 'yøde nú'a̱ mi ma̱ñ'ʉ ne bi 'ñembabi: ―¿Hanja guí ma̱ñhʉ njabʉ de nú'a̱ bi 'yøt'a nuni ra zi 'bɛhña̱? Nuní xa 'yøt'a 'nara hño pa guequi. 11Oguí hyøcjʉ nú'a̱ xa goxcagui, ngue'a̱ nuya hyoya ma gui 'bʉhʉ nza̱ntho con gue'ʉ, pe nugui hingá nza̱ntho ma ga 'bʉi con gue'ahʉ. 12Nuní bi goxcagui nú'a̱ ra dehe yʉni xá cʉhi pa nu xcrá nt'agui. 13Xi majua̱ni dí xi'ahʉ gue habʉraza de ra ximhai da hma̱nga ma noya, nehe da hma̱ de nú'a̱ xa 'yøtcagui nuni ra zi 'bɛhña̱ pa 'nara feni de guehni. 14Nepʉ 'na de gue nú'ʉ 'rɛt'amayoho ya nxadi mrá thuhu ra Juda Iscariote bi ma bá c'a̱'tsa ya nda̱ gá macja̱, 15y nu'á̱ bi 'ñembabi'ʉ: ―¿Hangu guí 'racjʉ pa ga da'a'ihʉ ja ri 'yɛhʉ ra Jesu? Nu'bʉ́ 'bestho ra ora'a̱ bi gohui'ʉ 'nara cohi, ne ya nda̱ gá macja̱ bi umbabi ra Juda Iscariote 'natema'rɛt'a ya t'axboja̱. 16Y desde ra pa'a̱ ra Juda mi honi hanja da za da da ra Jesu ja yá 'yɛ'ʉ. 17Nepʉ bi dat'a ya pa de 'nayá ngo ya xodyo, gue'a̱ ra ngo de ya thuhme nsi ra nzoi. Y nú'a̱ ra mʉdi pa de ra ngo, yá nxadi ra Jesu bi ma bá tsʉdi pa bi 'yambabi ne bi 'ñembi: ―¿Habʉ guí ne ga hocje ra hñuni dega pascua? 18Ha ra Jesu bi da̱tuabi ne bi 'ñembabi: ―Rí maha ja ra hnini bá c'a̱'tshʉ 'nara 'ñøhø ne gui 'ñembabihʉ: “Bá pɛncahe ra Xahnate gue ga xi'ahe njaua ngu nú'a̱ bá ma̱: Ya ma da dat'a ma ora, ne pɛ'tsi te ga øthe ra hñuni dega pascua co ma nxadi ja ri ngu.” 19Nu'bʉ́ ya nxadi bi 'yøt'e ngu nú'a̱ xqui 'bɛpabi ra Jesu, hangue nu'ʉ́ ja bá hocni ra hñuni dega pascua. 20Nu mi nxuui ra Jesu bi hñudi ja ra mexa con gatho nú'ʉ 'rɛt'amayoho yá nxadi. 21Ha de mri ñuñ'ʉ, ra Jesu bi 'ñembabi'ʉ: ―Xi majua̱ni dí xi'ahʉ gue 'na de gue'ahʉ ma gui dagaguihʉ. 22Nu'bʉ́ gatho yá nxadi bi du yá mʉi, ne nu'ʉ́ 'na ngu 'na bi 'yambabi ra Jesu ne bi 'ñembi: ―Ma zi Hmu'i, ¿ha gue go guecagui? 23Y ra Jesu bi da̱tuabi'ʉ ne bi 'ñembabi: ―Nú'a̱ to'o drí ñu'mebya ja 'nadra manza, nú'á̱ go gue'a̱ ma da dagagui. 24Nú'a̱ To'o bi e bi Nja̱'i ya 'yo ra 'ñu pa da t'øt'e ngu nú'a̱ ma̱nga ra Ma̱ca T'ofo, pe huecate nú'a̱ ra ja̱'i to'o ma da da'a̱. Ma'na xá hño hinxa 'mʉhma̱ nú'a̱ ra ja̱'i'a̱. 25Nepʉ ra Juda nú'a̱ to'o mi ma da da ra Jesu bi 'yambabi ne bi 'ñembi: ―Xahnate, ¿ha gue go guecagui? Ra Jesu bi da̱tuabi ne bi 'ñembi: ―Ha̱ha̱, go nu'i. 26Nura ora mri ñuni'ʉ, ra Jesu bi gʉ ra thuhme, bi 'yapa Ajua̱ rá Dada da ja̱pi, ne bi heque, nepʉ bi umbabi yá nxadi, ne bi 'ñembabi: ―Tsihʉ nuna thuhme, nuna go guehna ma ndo'yo. 27Nepʉ bi gʉ ra vaso nú'a̱ mi po ra vinu, ne bi umba njama̱di Ajua̱ rá Dada, nepʉ bi umba yá nxadi ne bi 'ñembi: ―Tsihʉ nuna vinu grí gathohʉ. 28Nuna go guehna ma ji ma da mfani pa da put'a yá ts'oqui gatho ya ja̱'i. Nehe go guehna ra seña de ra 'ra'yo cohi. 29Pe dí xi'ahʉ gue ya hinga ma ga yopa tsi ma'na'qui nuna ra vinu dega obxi con gue'ahʉ nuua ja ra ximhai. Ma ga yopa tsi ma'na ra 'ra'yo vinu con gue'ahʉ, pe nuni mahets'i habʉ bí manda ma Dada. 30Ha nu mi uadi bi duta 'nara ja̱hña̱, bi ma'ʉ pa ja ra t'øhø 'bo Olivo. 31Nu'bʉ́ ra Jesu bi 'ñembabi'ʉ: ―Nura nxuuibya gatho'ihʉ ma da du ri mʉihʉ ne ma gui tsogasɛhʉua. Ngue'a̱ Ajua̱ ma Dada ma̱nga njaua ja ra Ma̱ca T'ofo: “Ma ga ho ra ma'yo, y nuyá dɛti ri su'a̱ ma da nxani habʉraza,” njabʉ ena. 32Hangue nugui ma da thogagui, pe nu xcrá yopa nte, ma ga 'bɛt'o de gue'ahʉ pa Galilea. 33Nu'bʉ́ ra Pedro bi da̱tuabi ne bi 'ñembi: ―Masque gatho ma'ra da 'uegue de gue'a'i, pe nugui hinhya'mʉ ga 'uegue de gue'a'i. 34Ra Jesu bi 'ñembabi ra Pedro: ―Xi majua̱ni dí xi'a'i gue núbya dí nxuui ma gui cøngagui hñu'qui ante da mafi ra me'nja̱. 35Nu'bʉ́ ra Pedro bi da̱di ne bi 'ñena: ―Masque ga tuui mahyɛgui pe hinhya'mʉ ga cøñ'a'i. Y gatho ma'ra ya nxadi bi ma̱ njabʉ nehe. 36Nepʉ ra Jesu bi zøhøni co yá nxadi ja nú'a̱ ra luga rá thuhu Getsemani, ne bi 'ñembabi'ʉ: ―Cohʉua, nugui ma ga thogui má ts'ʉ ringuehni pa ga apabi Ajua̱ ma Dada. 37Nu'bʉ́ nu'á̱ bi zixa hñu yá nxadi, ra Pedro ne nú'ʉ yoho yá t'ʉ ra Sebedeo, bi thogui má ts'ʉ ringuehni. De guehni ra Jesu bi mʉdi bi ntsø'mi ne xi bi du rá mʉi. 38Ne bi 'ñembabi nú'ʉ hñu yá nxadi: ―Xi tu ma mʉiga asta dí ne ga tu co ra dumʉi. Cohʉua, oxqui a̱ha̱hʉ, ma ga aphʉ Ajua̱ mahyɛgui. 39Y ra Jesu bi thogui má ts'ʉ de habʉ bi gohi yá nxadi, nepʉ bi mɛ rá hmi ja ra hai, ne bi 'yapa Ajua̱ rá Dada ne bi 'ñembi: ―Ma Dada'i, nu'bʉ da zahma̱, dá thoguitho nuna ts'othogui ma ga thogui, pe nu'bʉ hina, 'yøt'e nú'a̱ go ri pahague, hingo nú'a̱ go ga nega. 40Nu'bʉ́ ra Jesu bi mengui pa habʉ xqui gohi nú'ʉ hñu yá nxadi, ne nu'ʉ́ bi zʉdi mi a̱ha̱, hangue ra Jesu bi 'ñembabi ra Pedro: ―¿Ha gue hinxa za xcá tsɛthʉ ra t'a̱ha̱ ma̱di 'na ora mahyɛgui con guequi? 41Nuhuhʉ ne 'yaphʉ Ajua̱ pa gui tsɛthʉ ya ts'othogui. Xi majua̱ni dí xi'ahʉ gue ri mfenihʉ ja rá ts'ɛdi, pe nuri ndo'yohʉ otho rá ts'ɛdi pa gui tsɛthʉ. 42Ra Jesu bi menga ma'na'qui habʉ xqui 'yapa Ajua̱ rá mʉdi, ne bi 'ñena ma'na'qui njaua: ―Ma Dada'i, 'bʉ hinda za da thoguitho nú'ʉ ya ts'othogui ma ga thogui, nu'bʉ́ 'yøt'e nú'a̱ go ri pahague. 43Nepʉ ra Jesu bi yopa mengui ma'na'qui habʉ xqui zogui nú'ʉ hñu yá nxadi, ne bi zʉdi mi a̱ha̱ ne nixi mi tsa da zøt'a yá da ngue'a̱ xi mi tsɛdi ra t'a̱ha̱. 44Nu'bʉ́ ra Jesu bi zoguini'ʉ ma'na'qui, ne nu'á̱ bi yopa menga rá hñu'qui pa habʉ mi apabi Ajua̱, ne guet'a̱tho ya noya bi ma̱ ngu nú'ʉ xqui ma̱ñ'a̱. 45Nepʉ bi yopa menga ma'na'qui pa habʉ xqui zogui nú'ʉ hñu yá nxadi ne bi 'ñembabi'ʉ: ―Nubyá ha̱, dá zʉ ri t'a̱ha̱hʉ ne tsayahʉ xá hño. Ya bi zø ra ora gue ya ma dra da ja yá 'yɛ ya 'yøt'ats'oqui Nú'a̱ To'o bi e bi Nja̱'i. 46Nanjʉ maha, ngue'a̱ ya xa 'ñepʉ nú'a̱ to'o ma da dagagui. 47Ts'a ra ora mi ma̱nga njabʉ ra Jesu, bi zøhø ra Juda 'na de nú'ʉ 'rɛt'amayoho ya nxadi, mbra 'ñoui ndunthi ya ja̱'i, 'ra mbra hña̱ ya huai ha nu ma'ra mbra hña̱ ya za. Nuya ja̱'i'ʉ bá pɛhna yá nda̱xjua nda̱ ya xodyo ne ya nda̱ gá macja̱. 48Ra Juda nú'a̱ to'o xqui pa ra Jesu ya xqui umba 'nara seña nuya ja̱'i ne xqui 'ñembabi: ―Nú'a̱ gui hyanthʉ ga tsʉ'tsuabi rá hmi, nú'á̱ go di gue'a̱, ne gui da̱ma jʉhʉ. 49Nu'bʉ́ ra Juda bi ma bá tsʉdi ra Jesu. Nepʉ bi zɛnjua ne bi 'ñembi: ―¡Ajua̱ da ja̱p'a'i, Xahnate! Ne 'bestho bi zʉ'tsi. 50Nu'bʉ́ ra Jesu bi da̱tuabi ne bi 'ñembi: ―Xi'ague, ¿te rá 'bɛ xqui 'ñeque? Nu'bʉ́ ya ja̱'i 'bestho bi gʉ ra Jesu pa bi zixa nts'a̱hni. 51Y ngu bri jʉ ra Jesu, 'na de gue nú'ʉ mri 'ñoui'a̱ bi c'o'tsa rá mahuai ne bi hyɛcua 'nará gu 'nará 'bɛgo ra nda̱ gá macja̱. 52Nu'bʉ́ ra Jesu bi 'ñembabi nú'a̱ mi ha̱ ra mahuai: ―Pɛ'tsa ri huai ja rá nt'o, ngue'a̱ gatho nú'ʉ to'o hote co ra huai, co ra huai dí tho nehe. 53Nugui da zahma̱ ga apa ma Dada dua pɛncagui ya 'motho gá ɛnxɛ, y nu'á̱ dua pɛncahma̱ 'bestho. 54Pe nu'bʉ́, ya hinda za da nja ngu nú'a̱ ma̱nga ra Ma̱ca T'ofo nú'a̱ ena gue mahyoni ga thogui ngu nú'a̱ dí thoguibya. 55Nu'bʉ́ ra Jesu bi 'ñembabi ya ja̱'i: ―¿Sague drá be pa e gui jʉgaguihʉ co ya huai ne ya za? Hyastho ndí 'bʉi ja ra nija̱ pa ndí xahn'a'ihʉ ne hinhya'mʉ gá jʉgaguihʉ. 56Pe pɛ'tsi gatho da njabʉ pa da nja ngu nú'a̱ bi ma̱nga yá 'mɛhni Ajua̱ ja ra Ma̱ca T'ofo. Nu'bʉ́ gatho yá nxadi bi hyɛhni ra Jesu ne bi 'bat'i'ʉ. 57Nu'bʉ́ nú'ʉ to'o xqui gʉ ra Jesu bi zits'i pa habʉ mi 'bʉi ra da̱nga nda̱ gá macja̱ nú'a̱ mrá thuhu ra Caifá, nehe ja xqui munts'ini nuya xahnate de ra ley ne ya nda̱xjua nda̱. 58Ha nura Pedro mi 'bɛfatho zi yabʉ mri dɛna ra Jesu, bi zøni asta ja rá patio rá ngu ra da̱nga nda̱ gá macja̱. Nuni ja bi gohni'a̱ habʉ mi 'bʉi ya gʉnts'a̱hni pa da hyandi'a̱ te da t'ø'tua ra Jesu. 59Ha nuya nda̱ gá macja̱ ne ya nda̱xjua nda̱ mahyɛgui con gatho ma'ra ya nda̱ gá xodyo mi honi to'o da ma̱nbabi ra Jesu masque dega nc'uamba, pa da za da tho. 60Pe himbi za te bi ts'ʉtuabi, masque ndunthi ya ja̱'i bi gʉ'tsua ya nc'uamba. 61Pe 'mɛfa bi 'mʉhni yoho ya c'uamba ja̱'i bi 'ñena: ―Nuna 'ñøhøni bi 'ñena gue da za da yø'tuabi rá nija̱ Ajua̱ ne rá hñupa da za da yopa 'ba'ma ma'na'qui. 62Nu'bʉ́ nura da̱nga nda̱ gá macja̱ bi 'mai ne bi 'ñemba ra Jesu: ―¿Ha gue hinte gui tha̱di? ¿Ha gue majua̱ni nú'a̱ hma̱ de gue'i? 63Pe ra Jesu hinte bi da̱di. Nu'bʉ́ nura da̱nga nda̱ gá macja̱ bi 'ñembabi: ―De rá thuhu Ajua̱ nú'a̱ te, xi da xicje, ¿ha gue go gue'i grá Cristo rá T'ʉ'i Ajua̱ bá pɛhn'a'i pa gui nda̱? 64Nu'bʉ́ ra Jesu bi da̱tuabi ne bi 'ñena: ―Ha̱ha̱ go guecagui, ngu nú'a̱ gá ma̱. Nehe dí xi'ahʉ gue nuya pa xa 'ñepʉ ma gui hyanthʉ Nú'a̱ To'o bi e bi Nja̱'i ma da hñudi ja rá 'ñɛi Ajua̱ nú'a̱ ja rá ts'ɛdi. Y nehe ma gui hyanthʉ dua ehe ja ya guui. 65Nu'bʉ́ nura da̱nga nda̱ gá macja̱ bi dʉnga yá he ngue'a̱ bi beni gue ra Jesu xqui ña̱ma'ñʉ de Ajua̱, ne bi 'ñena: ―Nuna 'ñøhøni ri 'ñet'a Ajua̱. ¿Te ga 'bɛphʉ ma'ra to'o da xicjʉ de guehni? Ya gá 'yøsɛhʉ nú'a̱ te bi ma̱. 66¿Te guí ma̱ñhʉ? Ha nu'ʉ ma'ra bi da̱di ne bi 'ñena: ―Nuní go 'nara da̱nga nduthai, hangue rí 'ñepi da tho. 67Nu'bʉ́ 'ra de gue'ʉ bi zo'tsuabi rá hmi ne bi na'mbi, ha nu ma'ra bi mɛ'ti, 68ne bi 'ñembabi: ―Nu'i guí ena gue go gue'i grá Cristo xuá mɛhn'a'i Ajua̱ pa gui nda̱. Nu'bʉ́, 'bʉ grá ba̱di, xicje xa̱, ¿to'o nú'a̱ bi nap'a'i? 69Nura ora'a̱, ra Pedro mi huhnitho ja ra patio, nepʉ 'nara nxutsi mrá 'bɛgo bi ma bá tsʉdi'a̱ ne bi 'ñembabi: ―Ne'i go gue'i nguí 'ñoui ra Jesu nú'a̱ ra me Galilea, ¿ha ngue ha̱? 70Ha nura Pedro bi ncøni de ja yá thandi gatho ya ja̱'i mi 'bʉhni ne bi 'ñena: ―Nixi dí pa̱di nú'a̱ guí ma̱. 71Nepʉ nu'á̱ ya mi pa ja ra gosthi, ne ma'na ra nxutsi mrá 'bɛgo bi hyandi'a̱ ne bi 'ñembabi nú'ʉ ma'ra ya ja̱'i mi 'bahni: ―Nuna da̱meni mri 'ñoui ra Jesu me Nasare nehe. 72Nepʉ ra Pedro bi yopa ncøni ma'na'qui, ne bi jura bi 'ñena: ―Nixi stá pa̱di nú'a̱ ra 'ñøhø guí ma̱. 73'Mɛfa bi joni ya ja̱'i habʉ mi 'bai'a̱ ne bi 'ñembabi: ―Xi majua̱ni ne'a'i go gue'i 'na de gue'ʉ, ngue'a̱ mfa̱ta ri noya gri ña̱. 74Nu'bʉ́ ra Pedro bi mʉdi bi jura ne bi ntsante ne bi 'ñena: ―Hindí pa̱ nú'a̱ ra 'ñøhø guí ma̱ñhʉ. Y 'bestho nura ora'a̱ bi mafi ra menja̱. 75Nu'bʉ́ ra Pedro bi zo rá mfeni de nú'a̱ xqui xipa ra Jesu ne xqui 'ñembi: “Nu'i ma gui cøngagui hñu'qui ante da mafi ra menja̱.” Nu'bʉ́ ra Pedro bi bøni pa thi ne xi bi nzoni con gatho rá mʉi.

will be added

X\