NSAN MATEO 24

1Nepʉ ra Jesu bi bøni de ra nda̱nija̱, ne ya mi 'ba'ñu'a̱ yá nxadi bi e bi zʉdi pa bi 'ñutuabi gatho nuya ngu de ra nda̱nija̱. 2Nu'bʉ́ ra Jesu bi 'ñembabi'ʉ: ―Xi majua̱ni dí xi'ahʉ, gatho nuya nguyʉ ma da nhuati ne hinda ma da gohi ni 'nara do maña̱ co ma'na rá midoui. 3De guehni bi ma ra Jesu co yá nxadi pa ja ra t'øhø 'bo Olivo, ne ja bá huhni ra Jesu. Nepʉ bi joni yá nxadi pa bi 'yamba sɛhɛ'a̱ ne bi 'ñembi: ―Dí ne xi gui xicje ha'mʉ ma da nja nú'a̱ gá ma̱, ne te ma nt'udi ma ga hanthe pa ga pa̱he gue ya ma gui yopa penguiua ma'na'qui, ne pa ga pa̱he ha'mʉ rá uadi ra ximhai. 4Nu'bʉ́ ra Jesu bi da̱tuabi ne bi 'ñembi: ―Jamasuhʉ oto sti ma da hya'ahʉ. 5Ngue'a̱ ma da 'ñehe ndunthi nú'ʉ to'o di ña̱ de ma thuhu ne di eñ'ʉ: “Nugui go drá Cristo bá pɛncagui Ajua̱ pa ga nda̱.” Y njabʉ ma da hyat'a ndunthi ya ja̱'i. 6Nehe ma gui 'yødehʉ da hma̱ de ya tuhni nú'ʉ ya ja, ne nú'ʉ hingui jatho. Pe nu'ahʉ́ osti ma da du ri mʉihʉ, ngue'a̱ pɛ'tsi te da njabʉ. Pe hingo gue'a̱ rá uadi ra ximhai ngue'a̱ ri 'bɛtho ma'ra te da nja. 7Ngue'a̱ ma da ntuhna ya hnini co ma'ra ya hnini. Ma da nja ra da̱nga thuhu ne ya da̱nga hñeni, ne ma da nja ya mbimhai habʉraza. 8Y gatho nuya dumʉiya, guehya ya mʉdi ʉgui. 9Nú'ʉ hingyá gamfri ma da gʉ'ahʉ da nap'ahʉ o da hyo'ahʉ, ne toraza da ʉtsa'ihʉ ngue'a̱ xcá camfriguihʉ. 10Ha nuya pa'ʉ ndunthi ma da 'bɛdi yá jamfri, ne ma da 'ñʉtsa 'na ngu ma'na, ne ndunthi ma da da yá miqu'eiui. 11Y ma da 'mʉ ndunthi ya hyate ba̱di, da 'ñena gue go xuá mɛhna Ajua̱, ne ma da hyat'a ndunthi ya ja̱'i. 12Ndunthi ya ja̱'i ma da 'bɛdi ra hma̱te ngue'a̱ ma'na xi ma da nda̱ngui ra ts'oqui gatho ja ra ximhai. 13Pe nu'a̱ tó'o hinda 'uegue de Ajua̱, nú'á̱ go gue'a̱ ma da mpøhø. 14Ma da nt'øde ra noya gue ra Nda̱ de mahets'i ma da 'ñehe pa da nda̱. Nuná ma da nt'øde ja gatho rá ngʉni ra ximhai pa njabʉ da 'yøde gatho ya ja̱'i de gatho ya hnini. Nepʉ de gue'a̱ ja dí uadi ra ximhai. 15Ra Dañe nú'a̱ mrá 'mɛhni Ajua̱ bi 'yofo de nú'a̱ ra ts'ot'øt'e ma da nja mbo ja ra nda̱nija̱ de Jerusale pa da nts'onga ra nda̱nija̱. ―Nu'a̱ tó'o da hñe'ta nuna t'ofona̱ mahyoni da ba̱di xá hño te ma̱.― Ha nu xcrí hyanthʉ da t'øt'a njabʉ mbo ra nda̱nija̱, nu'bʉ́ njabʉ gui pa̱hʉ gue ya bi zø ra ora. 16Nu'bʉ́ nu'ahʉ me Judeahʉ, ma gui 'bathʉ grí maha ja ya t'øhø. 17Y 'bʉ gri 'yohʉ ja rá patio ri nguhʉ, oxqui ma gui cʉthʉ 'mɛt'o pa te gui hña̱xhʉ, ngue'a̱ mahyoni gui da̱ma maha. 18'Bʉ gri 'yohʉ ra 'bɛfi ja ya hua̱hi, oxqui penjʉ ja ri nguhʉ pa gui hña̱xa ri hehʉ. 19Huecazite nú'ʉ ya 'bɛhña̱ di da'thi ne dya nzʉ nuya pa'ʉ. 20'Yaphʉ Ajua̱ gue nú'a̱ ra pa xcrí 'bathʉ, hindi ta ya tsɛ nixi dra pa dega tsaya. 21Ngue'a̱ nuya pa'ʉ ma da nja ndunthi ya ts'othogui nú'ʉ hinhya'mʉ xa hnequi desde bi mʉdi ra ximhai, ne nixi hinda ma da yopa nja ma'na'qui. 22Ajua̱ ma da 'yøt'e pa hinda njabʉ ndunthi ya pa, ngue'a̱ nu'bʉ da njabʉ ndunthi ya pa, nu'bʉ́ da du gatho. Pe po rá ngue ya gamfri, Ajua̱ ma da 'yøt'e pa da thogui 'bestho nú'ʉ ya pa dega ts'othogui. 23Nu'bʉ 'na to'o da 'ñeñ'ahʉ gue nuua ja 'bʉcua ra Cristo nú'a̱ bá pɛhna Ajua̱ pa da nda̱, o bí 'bʉi ringuehni, oxqui ma gui camfribihʉ. 24Ngue'a̱ ma da 'mʉi 'raya ja̱'i da 'ñena gue go di gue'ʉ ra Cristo nú'a̱ bá pɛhna Ajua̱ pa da nda̱, ne ma da 'mʉ ma'ra ya hyate ba̱di. Nú'ʉ́ ma da 'ñudi ndunthi ya da̱nga nt'udi ne da 'yøt'a ya t'øt'e 'ñena xi majua̱ni pa da hyat'a ya ja̱'i, ne da nehma̱'ʉ da hyat'a ya gamfri nehe. 25Ya stá 'bɛt'o'ihʉ ra noya de nú'a̱ ma da nja, hangue ostí ma da tha'ahʉ. 26Hangue 'bʉ da t'eñ'ahʉ gue ra Cristo bí 'bʉi ja ra mbonthi, oxqui ma gui mahani. O 'bʉ da t'eñ'ahʉ: “Ndi bá ehʉ ja 'bʉcua mbo ra ngu”, oxqui ma gui camfribihʉ. 27Ngue'a̱ nurá yo'ñehe Nú'a̱ To'o bi e bi Nja̱'i xcrá tha̱mfrihʉ da da̱ma zøhø ne da hnequi gatho ja ra ximhai nja ngu 'nara huɛi ri yot'a mbøxhyadi ne asta yʉhyadi. 28Nuya pa'ʉ ma da nja ngu ya pada ri munts'i habʉ 'bɛni nú'a̱ te xa du. 29Ngu da thogui nuya pa'ʉ dega ts'othogui, 'bestho ma da 'mɛxuui ra hyadi, ne ra za̱na̱ hinda ma da yot'i. Ya tsø ma da dagui de mahets'i, y mahets'i ma da hua̱t'i nts'ɛdi. 30Nepʉ ma da hnequi 'nara nt'udi nuni mahets'i de rá yo'ñehe Nú'a̱ To'o bi e bi Nja̱'i, ne gatho ya ja̱'i de ra ximhai ma da nzoni nu stí hyandi da zøhø, nu sta 'ñehe ja 'nara guui con gatho rá ts'ɛdi ne co rá nsunda pa da e da nda̱. 31Ma da nt'øde 'nara trompeta, nepʉ Nú'a̱ To'o bi e bi Nja̱'i ma da mɛhna yá ɛnxɛ gatho ja rá ngʉni ra ximhai pa da munts'a gatho nú'ʉ xa huahni'a̱. 32'Yøhʉ nuna ra 'bede de ra igo: Nu xcrí hyanthʉ gue ya ja yá 'roho ne ya ja yá xi, nu'bʉ́ gui pa̱hʉ gue ya ma da zøhø ya pa dega pahyadi. 33Hangue nu xcrí hyanthʉ da nja gatho ngu nú'a̱ dí xi'ahʉ, pa̱hʉ gue Nú'a̱ To'o bi e bi Nja̱'i ya ma dua yopa pengui. 34Xi majua̱ni dí xi'ahʉ gue gatho nuya ma da mʉdi da nja ante da du nuya ja̱'i 'bʉibya ja ra ximhai. 35Mahets'i ne ra ximhai ma da uadi da thogui, pe numa noya hinhya'mʉ da uadi, ma da nja pa nza̱ntho. 36Ni 'na hinto pa̱di ra pa nixi ra ora nurá yo'ñehe Nú'a̱ To'o bi e bi Nja̱'i, nixi nú'á̱, nixi ya ɛnxɛ bí 'bʉ mahets'i hingui pa̱di, hønsɛ ma Dada ha̱, go pa̱di ha'mʉ da 'ñehe. 37Ha nu sta yopa 'ñehe Nú'a̱ To'o bi e bi Nja̱'i, ma da nja ngu nú'ʉ ya pa de ra Noé. 38Nuya pa'ʉ ante da ñuxa ra dehe ja ra ximhai, ya ja̱'i mi ñuni mi tsithe ne mi øt'antha̱ti ngu xi yá nza̱i. Mi øt'a njabʉ asta nú'a̱ ra pa bi yʉt'a ra Noé ja ra da̱nga motsa nú'a̱ xqui hyoqui. 39Nepʉ mi da̱mfri'ʉ bi ñuxa ra dehe ja ra ximhai ne bi ja̱t'i gatho nú'ʉ ya ts'oja̱'i. Ma da njabʉ nehe nú'a̱ ra pa rá yo'ñehe Nú'a̱ To'o bi e bi Nja̱'i. 40Nuya pa'ʉ, 'bʉ yoho ya 'ñøhø di 'yo ra 'bɛfi 'nadbʉ ja ra hua̱hi, sta da̱mfri da ts'ixa 'na de gue'ʉ, ha nu ma'na da gohni. 41'Bʉ yoho ya gʉni di 'bʉ 'nadbʉ, sta da̱mfri da ts'ixa 'na de gue'ʉ, ha nu ma'na da gohni. 42Hangue ndø'mhʉ, ngue'a̱ hinguí pa̱hʉ ha'mʉ ma da zøhø ri Hmuhʉ. 43Ya guí pa̱hʉ, 'bʉ 'nara me ngu di pa̱hma̱ te ma ora da zøhø 'nara be, nu'bʉ́ hinda 'ña̱ha̱'a̱ pa hinda hopa ra be da xocua rá ngu pa da bepabi. 44Hangue ne'ahʉ xi da ndø'mhʉ, ngue'a̱ xcrí tha̱mfrihʉ da zøhø Nú'a̱ To'o bi e bi Nja̱'i. 45Nu'a̱ tó'o ra hoga 'bɛgo ne xi ra hoja̱'i tsa da t'ɛnt'ua rá 'yɛ rá ngu rá hmu, nehe da t'ɛnt'ua rá 'yɛ ya 'bɛgo nú'ʉ hoqui te da ts'i ora mahyoni. 46Nu'bʉ́ xi da johya nú'a̱ ra hoga 'bɛgo nu sta zøhø rá hmu da zʉdi di øt'a ngu nú'a̱ rí 'ñehe. 47Xi majua̱ni dí xi'ahʉ, nura hmu'a̱ ma da hñuxa dega 'bɛtri nú'a̱ ra 'bɛgo pa da supa gatho nú'a̱ te pɛ'tsi. 48Pe xi'bʉ nura 'bɛgo'a̱ da bøni dra ts'o'mʉi y da beni gue rá hmu hinga 'bestho da da̱ma mengui, 49nepʉ nu'á̱ da mʉdi da na'mba yá mi'bɛgoui, ne da ma da ñuniui ne da ntsiui ya tixfani. 50Ha sta da̱mfri da zøhø rá hmu nú'a̱ ra ora hindi tø'mi. 51Nu'bʉ́ nura hmu'a̱ ma xi da ncuɛ co nurá 'bɛgo'a̱, hangue da umba 'nara da̱nga castigo, ne da mɛhna habʉ 'bʉ ya yohmi pa ja dí nzonini ne ja dí gustri yá ts'i.

will be added

X\