NSAN MATEO 22

1Ra Jesu bi yopa zofo ya nda̱ gá macja̱ ne ya nda̱xjua nda̱, ne bi xipa ma'na ra 'bede, ne bi 'ñembi: 2―Ra Nda̱ de mahets'i ma ga hyɛcuahʉ ngu 'nara nda̱ bi 'yøt'a 'nara ngo ngue'a̱ bi ntha̱ta rá t'ʉ. 3Bi mɛhna yá 'bɛgo pa da tsi nú'ʉ mi thø'mi da 'mʉ ja ra ngo. Pe nu'ʉ́ himbi ne bi 'mʉhni. 4Nepʉ nú'a̱ ra nda̱ bi mɛhna ma'na'qui ma'ra yá 'bɛgo ne bi 'ñembi: “Bá xiphʉ nú'ʉ to'o dí tø'mhe gue ya stá hñocje, ne ya stá hohe ya nda̱mfri ne ma'ra ya hnoca mbo'oni. Ya gatho xa nthoqui, 'ñemfʉ da 'ñehe ra ngo.” 5Pe nú'ʉ to'o mi thø'mi hingo bi jamasu nú'a̱ bi xipa nuya 'mɛhni, 'na bi mada ra 'bɛfi ja yá hua̱hi, ha nu ma'na bi ma da nu rá 'bɛfi ja ra hnini, 6ha nu ma'ra bi gʉmpa yá 'mɛhni ra nda̱, bi na'mbi nepʉ bi hyo. 7Ha nu mi ba̱di ra nda̱ nú'a̱ te xqui t'ø'tuabi yá 'mɛhni, xi bi bø rá cuɛ. Hangue nu'á̱ bi mɛhna yá soldado pa bi hyo nú'ʉ ya hyote, nepʉ bi ts'a̱'tuabi yá hnini'ʉ. 8Nepʉ ra nda̱ bi 'ñembabi yá 'bɛgo: “Ya ja gatho pa ra ngo, pe nú'ʉ to'o ndí tø'mi himbi ne bi 'ñehe, bi nts'oc'baha. 9Hangue nubyá grí maha ja ya da̱'ñu, ne bá tsihʉ gatho nú'ʉ gui tsʉhʉbʉ.” 10Nu'bʉ́ bi ma ya 'bɛgo bá munts'a gatho nú'ʉ bi zʉdi ja ya 'ñu, ya ts'o'mʉi ne ya hoja̱'i. Njabʉ bi ñuxa nura da̱nga ngu habʉ bi nja ra ngo. 11Nu'bʉ́ ra nda̱ bi yʉt'a mbo habʉ mi ja ra ngo pa bi zɛngua nú'ʉ xqui zøhø. Ne bi hyanda 'na mi 'bʉhni nú'a̱ hinxqui hye ra he dega ngo. 12Hangue nu'á̱ bi 'ñembabi: “Amigo, ¿hanja gá cʉt'iua hingá he nú'a̱ ra he dega ngo?” Pe nu'á̱ hinte bi da̱di. 13Nu'bʉ́ ra nda̱ bi 'ñembabi yá 'bɛgo: “Tha̱'tuahʉ yá ua ne yá 'yɛ nuna ja̱'i, ne bá føthʉbʉ møte ja ra 'bɛxuui pa ja dí nzonini ne ja dí gustri yá ts'i.” 14Nu mi uadi ra Jesu bi metuabi ra 'bede'ʉ bi 'ñembi: ―Ngue'a̱ ndunthi da ts'ofo, pe ts'ʉtho nú'ʉ xa thahni. 15Nu'bʉ́ nu mi 'yøde ya fariseo nuya noyaya, nu'ʉ́ bi njʉqui pa bi ma̱mbi hanja da za da xaxa ra Jesu dega noya. 16Nu'bʉ́ bi mɛhna yá mfats'i'ʉ mahyɛgui co 'rayá mfats'i ra nda̱ Erode pa bá ø'tua 'nara nt'ani ne bi 'ñembi: ―Xahnate, dí pa̱he gue nu'i guí ma̱nga nú'a̱ majua̱ni, ne guí udi xi xá hño rá noya Ajua̱, ne hinto guí tsu, nixi guí huahna ya ja̱'i. 17Hangue dá e ga an'ahe te guí xicje, ¿ha gue xá hño ga juthe nú'a̱ ra boja̱ adi ra nda̱ Cesa, o hina? 18Pe ra Jesu bi ba̱tuatho yá ts'omfeni'ʉ, hangue bi 'ñembi: ―Nu'ahʉ́ 'nagyá yohmihʉ, ¿pa te guí xaxcahʉ? 19'Ñutcahʉua nú'a̱ ra boja̱ adi ra nda̱ Cesa. Nu'bʉ́ nu'ʉ́ bi 'ñutuabi nú'a̱ ra boja̱ mi adi. 20Ha ra Jesu bi hyandi bi 'ñembabi: ―¿To'o rá c'oi núna huxcua ja ra boja̱, ne te rá 'bɛ ma̱ngua? 21Ha nu'ʉ́ bi da̱di ne bi 'ñena: ―Rá c'oi ra nda̱ Cesa. Nu'bʉ́ ra Jesu bi 'ñembabi: ―Umfʉ ra nda̱ Cesa nú'a̱ rí 'ñepabi'a̱, y nehe umfʉ Ajua̱ nú'a̱ rí 'ñepabi. 22Nu mi 'yøde njabʉ'ʉ, xi bi 'yø nts'ɛdi. Nepʉ bi zohni ra Jesu, bi ma'ʉ. 23Nú'a̱ ra pa'a̱, bi zøhø habʉ mi 'bʉ ra Jesu 'raya saduceo nú'ʉ mi camfri gue hinda yopa nte nú'ʉ xa du. Nu'ʉ́ bi 'yambabi ra Jesu ne bi 'ñembi: 24―Xahnate, ra Moise bi ma̱ gue 'bʉ 'nara 'ñøhø da du ne hinda zogui ni 'nará ba̱tsi, nu'bʉ́ 'na de gue nú'ʉ yá cu nú'a̱ ra 'ñøhø bi du da ntha̱tui nú'a̱ ra 'bɛhña̱ bi gohi sɛhɛ pa da pøtua rá 'bai ndu rá cu, ne da mɛ'tsua ya ba̱tsi pa da thu'mbabi rá thuhu ndu rá cu. 25Nuje dá pa̱he yoto ya 'ñøhø mri ncu, nu'a̱ rá mʉdi bi ntha̱ti pe 'mɛfa bi du, ne himbi zocuabi ni 'nara ba̱tsi. Nepʉ 'mɛfa nurá 'bɛhña̱ bi ntha̱tui 'nará cu ndu rá da̱me. 26Nehe bi du nú'a̱ rá ñoho ra 'ñøhø, nehe nú'a̱ rá hñu, ne bi njabʉ gatho nú'ʉ yoto ya 'ñøhø bi ntha̱tui 'nadra 'bɛhña̱, ne 'mɛfa bi uadi bi du 'rama'na gatho nú'ʉ yoto. 27Y rá nga̱ts'i bi du ra 'bɛhña̱ nehe. 28Nu'bʉ́ xi sta yopa nte gatho nú'ʉ xa du, ¿to'o xi majua̱ni drá 'bɛhña̱ nú'a̱ ra 'bɛhña̱ bi ntha̱tui gatho nú'ʉ yoto ya 'ñøhø mri ncu? 29Nu'bʉ́ ra Jesu bi da̱tuabi ne bi 'ñembi: ―Xi xá nts'o ri mfenihʉ ngue'a̱ hinguí pa̱hʉ ra Ma̱ca T'ofo nixi rá ts'ɛdi Ajua̱. 30Ngue'a̱ nura pa da yopa nte nú'ʉ xa du, ya hinda ma da ntha̱ti ya ja̱'i, ngue'a̱ nu'ʉ́ ma da nja ngu ya ɛnxɛ nú'ʉ bí 'bʉi mahets'i. 31Pe de nú'a̱ rá ñoho ra 'mʉi, ¿ha gue hinxcá hñe'thʉ nú'a̱ bi ma̱nga Ajua̱ ne bi 'ñena?: 32“Nuga go rá Ajua̱gui ra Abrá, ne ra Isaac, ne ra Cobo.” Ajua̱ go gue'a̱ ra Ajua̱ de nú'ʉ te, hingue de nú'ʉ xa du. Hangue ra Abrá ne ra Isaac ne ra Cobo bí te ja rá thandi Ajua̱. 33Ne nu mi 'yøde ya ja̱'i nurá nt'utuate ra Jesu, xi bi 'yø. 34Nu mi ba̱di ya fariseo gue ra Jesu xqui go'tua yá ne ya saduceo, nu'bʉ́ bi munts'i'ʉ pa da nu te da 'yøt'e. 35Nepʉ 'na de gue'ʉ mrá xahnate de ra ley bi ma bá xaxa ra Jesu, bi 'yø'tua 'nara nt'ani ne bi 'ñembi: 36―Xahnate, ¿nda'a̱ gue'a̱ ra hmanda ma'na ra da̱ngui de gatho nú'ʉ ya hmanda huxa ja ra ley? 37Ha ra Jesu bi da̱di ne bi 'ñembi: ―“Ma̱di Ajua̱ ri Hmu con gatho ri mʉi, con gatho ri ts'ɛdi, ne con gatho ri mfeni.” 38Nuna go guehna xi ra da̱ngui ne ra mʉdi hmanda. 39Y nurá ñoho ra hmanda ngut'atho, nú'a̱ ena gui ma̱di ri miqu'eiui ne gui su ngu grí nsu sɛhɛ. 40Ne gatho nú'a̱ bi ma̱nga ra Moise ja ra ley, ne nú'a̱ bi ma̱nga ma'ra yá 'mɛhni Ajua̱, ne nuya yoho ya da̱nga hmanda, go ri 'natho. 41De mi 'bʉhnitho ya fariseo, ra Jesu bi 'yø'tuabi 'nara nt'ani nehe, 42ne bi 'ñembabi: ―Xi'ahʉ, ¿te xi guí ma̱ñhʉ de ra Cristo rá 'mɛhni Ajua̱ nú'a̱ ma da nda̱? ¿To'o guí emfʉ gue rá t'ʉ'a̱? Ya fariseo bi da̱di ne bi 'ñena: ―Rá t'ʉ ra nda̱ Davi. 43Nepʉ ra Jesu bi 'ñembabi'ʉ: ―Nu'bʉ́ ¿hanja ra Davi po rá ts'ɛdi ra Ma̱ca Nda̱hi bi ma̱ gue ra Cristo go gue'a̱ rá Hmu? Ngue'a̱ ra Davi bi 'ñena: 44Ajua̱ ra Dada bi 'ñembabi ma zi Hmu: “Bá ehe gui hñudiua ja ma 'ñɛi asta hinga tsiñ'a'i gatho ri ncontra pa da gohi'ʉ de nja'ti ri ua.” 45Ha nu'bʉ go drá t'ʉhma̱ ra Davi nura Cristo, nu'bʉ́ ¿hanja bi 'ñenga ra Davi gue go rá Hmu? 46Nu'bʉ́ ya fariseo himbi za te bi da̱di, y desde ra pa'a̱ ya ni 'na de gue'ʉ himbi za bi 'yø'tua ma'ra ya nt'ani ra Jesu.

will be added

X\