NSAN MATEO 21

1Nu mi zøni ra Jesu co yá nxadi nuni Betfagué ja rá ua ra t'øhø 'bo Olivo ya mi guetbʉ pa Jerusale, nú'á̱ bi mɛhna yoho yá nxadi da 'mɛt'o, 2ne bi 'ñembabi'ʉ: ―Rí maha pa nuna t'ʉca hnini bí jani. Ha nu xcrí tsøñhʉni ma gui tsʉhʉni 'nara zi burru di tha̱tni ne dri zi rá ba̱tsi. Xcrí tsʉhʉ güi xo'thʉ ne güi tsincahʉ gatho yoho. 3'Bʉ di 'bʉpʉ 'na, ne da nja te da xi'ahʉ, 'ñembabihʉ njaua: “Ra zi Hmu bí honi.” Nu'bʉ́ nura ja̱'i 'bestho da ho'ahʉ güi tsincahʉ. 4Gatho bi njabʉ pa bi nja ngu xqui ma̱nga rá 'mɛhni Ajua̱ bi 'ñena: 5Rí maha Jerusale nú'a̱ ra hnini thu'mbabi nehe gue rá thuhu Sion, ne xiphʉ ya mengu de guehni: “Ndi hyanthʉ bra 'ñehni ri Nda̱hʉ, e da zʉ'ahʉ, ne hingrá 'ñets'i ngue'a̱ bra tøgue 'nara zi t'ʉbru rá ba̱tsi 'nara burru nú'a̱ ya pa̱ ra ndu.” 6Nu'bʉ́ yá nxadi bi ma ne bi 'yøt'a nú'a̱ xqui 'bɛpabi. 7Nepʉ bá tsimpabi nú'a̱ ra zi burru mri 'ñoui rá ba̱tsi. De guehni ya nxadi bi xi'tsua yá pat'i'ʉ, nepʉ ra Jesu bi tøgue. 8Y nura hmuntsja̱'i, 'ra mi ha̱nca yá pat'i pa mi pøgue ja ra 'ñu, ha nu ma'ra mi tot'a ya 'yɛza pa mi pøgue nehe ja ra 'ñu. 9Ne ndunthi mri 'bɛt'o ne ndunthi mi 'bɛfa, mi mafi'ʉ ne mi ena: ―¡Xá nsunda rá 'ñehe rá T'ʉ ra nda̱ Davi! ¡Ajua̱ da ja̱pi núni xpá mɛhni pa da nda̱ ja guecjʉ! ¡Xá nsunda Ajua̱ bí 'bʉi mahets'i! 10Y ngu bi yʉt'a ja ra hnini Jerusale xi bi nthøxni ya ja̱'i ne mri 'ñémbabi'ʉ 'na ngu 'na: ―¿To'oni 'bʉ? 11Nu'bʉ́ nú'ʉ to'o mi dɛni, bi da̱di ne bi 'ñena: ―Nuni go guehni ra Jesu rá 'mɛhni Ajua̱ ne ra me Nasare de Galilea. 12Nepʉ ra Jesu bi yʉt'a ja ra nda̱nija̱, ne bi 'yɛni gatho nú'ʉ to'o mri mpa ne mri ntai, ne bi pʉnts'ua yá mexa ya mpataboja̱, ne bi pʉnts'ua yá thuhni ya ma domitsu. 13Y bi 'ñembabi: ―Xa nt'ofo gue ma ngu ra ngu dega søcambeni, pe nu'ahʉ́ xcá 'yøt'athohʉ ra ngu dega mfe. 14Ne mi 'bʉhni 'raya goda ne ya doua ja ra nda̱nija̱. Nú'ʉ́ bi joni habʉ mi 'bai ra Jesu, y nu'á̱ bi 'yøthe'ʉ, ne bi ña̱ni. 15Ha nuya nda̱ gá macja̱ ne ya xahnate de ra ley bi hyanda nuya da̱nga t'øt'e bi 'yøt'a ra Jesu. Ne bi 'yøde nuya ba̱tsi mi mafi ja ra nda̱nija̱ ne mi eñ'ʉ: “¡Xá nsunda rá 'ñehe rá T'ʉ ra nda̱ Davi!” Nu'bʉ́ nuya nda̱ gá macja̱ ne ya xahnate de ra ley xi bi bø yá cuɛ'ʉ. 16Ne bi xipabi ra Jesu bi 'ñembi: ―¿Ha gue hinguí øde nú'a̱ te ma̱nga nuyʉ ya ba̱tsi? Nu'bʉ́ ra Jesu bi da̱tuabi'ʉ ne bi 'ñembi: ―Ha̱ha̱, dí øde. Xi nu'ahʉ ¿ha gue hinxcá hñe'thʉ ja ra Ma̱ca T'ofo habʉ ena njaua?: Asta ya ba̱tsi ne ya 'uɛne nú'ʉ tsʉtho, Ajua̱ bi 'yøt'e pa bi xøcambeni'a̱ xi xá hño. 17Nu'bʉ́ ra Jesu bi zoguini ya nda̱ gá macja̱ ne ya xahnate de ra ley, ne bi ma Betania pa ja bá oxini. 18Rá hyax'a̱ bi menga pa Jerusale, ne de má 'ñu bi zʉ ra thuhu. 19Y ja rá hyo ra 'ñu bi hyandi mi 'bahni 'nara 'bai gá igo, ne bi ma pa habʉ mi 'bai pa bi hyonga 'raya igo pa da zihma̱, pe hinte mi tøgue ni 'na, hønsɛ yá xi mi c'amtho. Nu'bʉ́ bi 'ñembabi ra 'bai gá igo: ―Hinhya'mʉ ma da nøgue ri igo. Y 'bestho nura ora'a̱ bi 'yot'a nú'a̱ ra 'bai gá igo. 20Y nu mi hyanda ya nxadi nú'a̱ xqui nja, xi bi 'yø ne bi 'ñemba ra Jesu: ―¿Hanja 'bestho bi 'yot'a nuna 'bai gá igo? 21Ra Jesu bi da̱tuabi ne bi 'ñembi: ―Xi majua̱ni dí xi'ahʉ, 'bʉ xi gri pɛ'tshʉ ndunthi ra jamfri ne hingri dʉhʉhʉ, nu'bʉ́ da za gui 'yøthʉ ya t'øt'e ngu núna dá øt'e. Nehe da za gui 'ñemfʉ nuna ra t'øhø da mponi rí ma pa ja ra ndehe, ne da mponi. 22Gatho nú'a̱ gui 'yadihʉ ne guí camfrihʉ, gatho da za gui hña̱ñhʉ. 23Nepʉ ra Jesu bi yʉt'a ma'na'qui ja ra nda̱nija̱ Jerusale, ne bi nxahnate. Y nura ora mi xahnate, bi joni habʉ mi 'bai'a̱ yá nda̱xjua nda̱ ya xodyo ne ya nda̱ gá macja̱, ne bi 'yambabi: ―¿To'o rá 'mɛhni'i pa gui 'yøt'a nuya ya t'øt'eya? ¿To'o bi 'ra'a nsɛqui pa gui 'yøt'a njabʉ? 24Nu'bʉ́ ra Jesu bi da̱di ne bi 'ñembabi'ʉ: ―Nequi ma ga ø't'ahʉ 'nara nt'ani. Nu'bʉ gui xicjʉ, nequi ga xi'ahʉ to'o rá 'mɛhnigui pa dí øt'a njaua. 25Xi nú'a̱ ra sistehe mi øt'a ra Xuua Xi'tsate, xi'a̱ ¿to'o go bá pɛhn'a̱, Ajua̱ o ya ja̱'i? Nu'bʉ́ nu'ʉ́ bi mʉdi bi 'ñámbasɛ'ʉ ne mri 'ñémbabi: ―¿Te ga tha̱tuahʉbya? Nu'bʉ ga emfʉ gue Ajua̱ go bá pɛhni, nu'bʉ́ nu'á̱ da 'ñengaguihʉ: “Nu'bʉ́ ¿hanja hingá camfrihʉ nú'a̱ mi ma̱ñ'a̱?” 26Ha nu'bʉ xi ga emfʉ gue ra Xuua go bá pɛhna ya ja̱'i, nu'bʉ́ nu'ʉ́ da nja te da 'yøtcahʉ, ngue'a̱ gatho'ʉ beni gue ra Xuua go mrá 'mɛhni Ajua̱. 27Nu'bʉ́ ya nda̱ gá macja̱ ne ya nda̱xjua nda̱ bi da̱tuabi ra Jesu ne bi 'ñembi: ―Hindí pa̱he. Nu'bʉ́ ra Jesu bi 'ñembabi: ―Nequi hinga xi'ahʉ to'o bá pɛncagui pa dí øt'a nuya ya t'øt'e. 28Nepʉ ra Jesu bi yopa 'ñembabi ya nda̱ gá macja̱: ―¿Te guí nuhma̱guehʉ? 'Nara 'ñøhø mi pɛ'tsa yoho yá t'ʉ, ne bi 'ñemba 'na de gue'ʉ: “Rí ma ra 'bɛfibya ja ra ua̱'obxi.” 29Nu'bʉ́ nura t'ʉ'a̱ bi da̱di ne bi 'ñena: “Hina, papá, hinga ma.” Pe 'mɛfa bi ntsø'msɛ ne bi ma ra 'bɛfi. 30Nepʉ ra dada bi 'ñembabi nú'a̱ ma'na rá t'ʉ: “Rí ma ra 'bɛfibya ja ra ua̱'obxi.” “Ha̱ha̱, papá, ga ma”, bi 'ñembi. Pe nixi himbi ma. 31Hangue de ri yoho ya t'ʉ, ¿nda'a̱ gue'a̱ bi 'yøtua nú'a̱ bi 'bɛpabi rá dada? Bi da̱di ya nda̱ gá macja̱ ne bi 'ñena: ―Nú'a̱ ra t'ʉ bi mɛhna rá mʉdi. Nu'bʉ́ ra Jesu bi 'ñembabi'ʉ: ―Xi majua̱ni dí xi'ahʉ gue ya da̱ga 'yøt'ats'oqui ne ya ts'oja̱'i go gue'ʉ ri 'bɛt'o que gue'ahʉ pa da yʉt'a ja rá hmanda Ajua̱. 32Ngue'a̱ ra Xuua Xi'tsate bi 'ñehe bi 'ñu't'ahʉ ra hñoja̱'i, pe nu'ahʉ́ hingá ne gá camfrihʉ nú'a̱ bi ma̱ñ'a̱. Pe nuya da̱ga 'yøt'ats'oqui ne ya ts'oja̱'i, nu'ʉ́ ha̱, bi gamfri nú'a̱ bi ma̱nga ra Xuua ne bi ñobri'ʉ. Pe nu'ahʉ́ masque gá hyanthʉ bi ñobri'ʉ, pe hingá ne gá ñobrihʉ y nixi gá camfrihʉ nú'a̱ bi ma̱ñ'a̱. 33Nepʉ ra Jesu bi yopa 'ñemba ya nda̱ gá macja̱: ―'Yøhʉ ma'na ra 'bede ma ga xi'ahʉ: Mi 'bʉ 'nara 'ñøhø xi mi pɛ'tsa ndunthi ya hai, y nuya hai'ʉ ja bi ga̱xni ndunthi ya obxi ne bi guts'i. Nepʉ ja bi hyocni yoho ya ngu, 'na pa habʉ da thɛ'ma ra ngui gá obxi, ha nu'a̱ ma'na pa ra dø'ma hua̱hi. Y nepʉ bi umba hñandi yá ua̱'obxi 'rayá mɛfi. Nepʉ nu'á̱ bi ma yabʉ. 34Ha nu mi nja ra nthʉqui, nura me ua̱'obxi bi mɛhna 'rayá 'bɛgo pa da c'a̱'tsa ya hyanthua̱hi pa da hña̱nga nú'a̱ made mri 'ñepabi. 35Pe nú'ʉ ya hyanthua̱hi bi gʉmpa yá 'bɛgo ra me ua̱'obxi, 'na bi na'mbabi, nu ma'na bi hyo, ha nu ma'na bi tɛdo. 36Nepʉ rá ño'qui, ra me ua̱'obxi bi mɛhna ma'na ndunthi yá 'bɛgo, pe nehe'ʉ bri jabʉ ngu bi t'ø'tuabi nú'ʉ yá mʉdi. 37Rá nga̱ts'i ra me ua̱'obxi bi mɛhnasɛ rá t'ʉ ne bi 'ñena: “Numa t'ʉ ha̱, ma da t'øte.” 38Pe nu mi hyanda ya hyanthua̱hi nura t'ʉ, nu'ʉ́ bi 'ñémbi 'na ngu 'na: “Nuni go guehni ma da ts'ocuabi ya hai. Maha ga hohʉ pa go ga cohʉ nuya hai.” 39Nu'bʉ́ ya hyanthua̱hi bi gʉ ra t'ʉ ne bi gʉqui de ra ua̱'obxi, ne bi hyo. 40Xi nura me ua̱'obxi, ¿te ma da 'yø'tuabi nú'ʉ ya hyanthua̱hi nu sta yopa mengui ja rá hai? 41Nu'bʉ́ ya nda̱ gá macja̱ bi da̱di ne bi 'ñena: ―Ra me ua̱'obxi hinda hueca nuya ts'oja̱'i. Ma da hyo'ʉ, y nuya ua̱'obxi ma da umba hñandi ma'ra yá mɛfi. Ne nu'ʉ́ ha̱, ma da umba ra me ua̱'obxi made nú'a̱ rí 'ñepabi. 42Nu'bʉ́ ra Jesu bi 'ñembabi ya nda̱ gá macja̱: ―Ha gue hinxcá hñe'thʉ ja ra Ma̱ca T'ofo nú'a̱ mi ma̱nga rá 'mɛhni Ajua̱ ma'mɛt'o ne bi 'ñena: Nú'a̱ ra do bi føthma̱bʉ 'na lado nuya hyøngu, nubya gue'a̱ ra mʉdi do de rá nija̱ Ajua̱. Y nusɛ'a̱ go bi mɛgui nura do'a̱ pa da hyø rá nija̱, ne dí hanthʉ gue xi rá nsunda nú'a̱ bi 'yøt'e. 43Hangue dí xi'ahʉ gue ma da tha̱n'ahʉ nú'a̱ ra ts'ɛdi guí pɛ'tshʉ pa gui cʉthma̱hʉ ja rá hmanda Ajua̱, ne ma go da t'umbabi ma'ra ya ja̱'i nú'ʉ to'o ma da 'yø'tua nú'a̱ da 'bɛpabi Ajua̱. 44Nu'a̱ tó'o da fe'tsa nura do'a̱ da cuent'ua yá ndo'yo, y nu'a̱ tó'o da zɛ'mi da qu'ɛ'ti. 45Y nu mi 'yøde ya nda̱ gá macja̱ ne ya fariseo nuya ya noyaya, nu'ʉ́ bi unga nguɛnda gue go mi sipabi'ʉ. 46Hangue nu'ʉ́ mi ne da gʉhma̱ ra Jesu, pe mi tsu ya ja̱'i ngue'a̱ nuya ja̱'i mi beni gue ra Jesu go 'nará 'mɛhni Ajua̱.

will be added

X\