NSAN MATEO 20

1Nurá hmanda Ajua̱ ma ga hyɛcuahʉ ngu 'nara me ua̱'obxi. Nura me ua̱'obxi'a̱ xi mi pɛ'tsa ndunthi ya ua̱'obxi. Ne 'nara pa xi 'nitho bi ma bi hyonga 'raya mɛfi. 2Y bi gohui ra cohi nuya mɛfi gue da gu'tuabi nú'a̱ ta̱ha̱ 'nara mɛmapa. Nepʉ bi mɛhni da mpɛfi ja yá ua̱'obxi. 3Y mi nzʉnga gʉto bi ma ma'na'qui bá honga ma'ra ya mɛfi ne bi zʉdi 'raya ja̱'i mi 'bahni ja ra tai mi otho yá 'bɛfi. 4Ne bi 'ñembabi: “¿Ha hinguí ne gui faxcahʉ ra 'bɛfi ne ga ju't'ahʉ nú'a̱ rí 'ñepi gui ta̱hʉ?” Nepʉ nu'ʉ́ bi mɛui 'bestho. 5Nepʉ mi nde ma pa nura 'ñøhø bi ma ma'na'qui bá honga ma'ra ya mɛfi, nepʉ ngu nzʉnga hñu bi yopa ma ma'na'qui bá tsi ma'ra ya mɛfi ne bi ncohui da gu'tui nú'a̱ rí 'ñepi. 6Ngu nzʉnga cʉt'a bi ma ma'na'qui ne bi nthɛui ma'ra ya ja̱'i mi otho yá 'bɛfi ne bi 'ñembabi: “¿Hanja guí 'bathʉua gatho ra pa? ¿Ha gue otho ri 'bɛfihʉ?” 7Nu'ʉ́ bi da̱di ne bi 'ñembi: “Ngue'a̱ hinto xa 'racje ra 'bɛfi.” Nura hmu bi 'ñembabi: “Nu'bʉ́ faxcahʉ ra 'bɛfi nepʉ ga ju't'ahʉ nú'a̱ rí 'ñepi gui ta̱hʉ.” 8Ha nu mi yʉ ra hyadi nura hmu bi 'ñemba ra 'bɛtri: “Zohna gatho ya mɛfi, ne gatho gui ju'tuabi maxøgue 'na pa. Ju'tuabi 'mɛt'o nú'ʉ bi yʉt'a 'mɛfa, nepʉ 'mɛfa gui ju'tuabi nú'ʉ bi yʉt'a rá mʉdi.” 9Ha nu mi zøhø nú'ʉ xqui yʉt'a ra 'bɛfi nzʉnga cʉt'a nde, nu'ʉ́ bri ju'tuabi maxøgue 'na pa. 10Ne mi zøhø nú'ʉ xqui yʉt'a ra 'bɛfi desde mi xudi, nu'ʉ́ mi hu yá mʉi gue ma xa da̱ha̱ ma'na ndunthi, pe nu'ʉ́ bri ju'tuabi mahyɛgui ngu nú'ʉ xqui yʉt'a mi nde. 11Y nu mi hña̱nga yá tha̱ha̱, xi bi bø yá cuɛ co ra hmu, 12ne bi 'ñembi: “Núyʉ́ bi yʉt'a 'mɛfa ne hønsɛ 'na ora bi mpɛfi ne gá ju'tuabi ngu nú'a̱ dí ta̱he, ha nuje xi stá mpɛhe gatho ra pa co ra pahyadi.” 13Nu'bʉ́ ra hmu bi 'ñembabi 'na de gue'ʉ: “Xi'ague, ¿ha gue dí ø't'a 'nara nts'o'mʉi? ¿Ha gue hindá cohʉ ra cohi gue ga ju't'a nú'a̱ ta̱ha̱ 'nara mɛmapa? 14Hña̱xa nú'a̱ rí 'ñe'a'i y grí ma. Nuga dá ju'tuabi núyʉ bi yʉt'a 'mɛfa ngu nú'a̱ gá ta̱ha̱ ngue'a̱ dá ne dá øt'e njabʉ. 15¿Ha go ma gui hña̱gaguigue nú'a̱ ga ne ga øt'e co ma boja̱? ¿Hanja grí hyøcuabi rá tha̱ha̱ ri mimɛfiui ngue'a̱ nuga drá hoja̱'i con guehyʉ?” 16Ngue'a̱ nu'ʉ dri 'bɛfa go gue'ʉ dya mʉdi, y nu'ʉ ya mʉdi go gue'ʉ da 'mɛfa. Ndunthi da ts'ofo, pe ts'ʉtho nú'ʉ xa thahni. 17Nepʉ ra Jesu bi ma pa Jerusale, ne de má 'ñu bi 'ueque 'nambʉ nú'ʉ 'rɛt'amayoho yá nxadi pa bi umba nt'øde ne bi 'ñembi: 18―Pa̱hʉ gue nu xcrá tsøñhʉ Jerusale, ja ma dra jʉni Nú'a̱ To'o bi e bi Nja̱'i, ne dra t'ɛnt'ua ja yá 'yɛ ya nda̱ gá macja̱ ne ya xahnate de ra ley, ne nu'ʉ́ ma da hyøxa ra thai pa da tho. 19Nepʉ ma da 'yɛnt'ua ja yá 'yɛ nuya ja̱'i hingyá xodyo pa da 'yø'tua ra nt'eni ne da 'na'mbi, ne da pont'i, ne ja da duni, pe rá hñupa ma da yopa nte'a̱ ma'na'qui. 20Nepʉ rá na̱na̱ ra Cobo ne ra Xuua yá t'ʉ ra Sebedeo, bá 'ñoui yá t'ʉ habʉ mi 'bai ra Jesu ne bi ndandiña̱hmu pa da 'yadi nú'a̱ mi beni da 'yadi nú'a̱ ra 'bɛhña̱. 21Nu'bʉ́ ra Jesu bi 'ñemba nura 'bɛhña̱: ―¿Te rá 'bɛ guí ne gui 'yadi? Nepʉ ra 'bɛhña̱ bi da̱di bi 'ñena: ―Dí ne gue nuya yoho ma t'ʉ da hñudi con gue'e nu xcrí nda̱, 'na da hñudi ja ri 'ñɛi ha nu ma'na ja ri nga̱ha̱. 22Nu'bʉ́ ra Jesu bi da̱tuabi nú'a̱ ra 'bɛhña̱ ne bi 'ñemba ra Cobo ne ra Xuua: ―Nixi guí pa̱hʉ nú'a̱ guí ahʉ. ¿Ha guí hanthʉ gui tsɛthʉ ya ts'othogui ngu nú'a̱ ma ga tsɛtiga? Nu'ʉ́ bi da̱di: ―Ha̱ha̱, da za ga tsɛthe nehe. 23Nu'bʉ́ ra Jesu bi 'ñembabi: ―Xi majua̱ni ma gui thohʉ nehe ya ts'othogui ngu nú'ʉ ma ga thoguiga, pe nu'a̱ guí nehʉ gue gui hñudihʉ ja ma 'ñɛi ne ja ma nga̱ha̱, hingo tsa ga ma̱ngá. Numa Dada ha̱, go gue'a̱ tsa da ma̱ ne pa̱di to'o ma da umbabi nuya hudi'ʉ. 24Nu mi ba̱di nú'ʉ má 'rɛt'a ya nxadi de nú'a̱ te xqui 'yadi nú'ʉ má yoho ya nxadi mri ncu, nu'bʉ́ bi bø yá cuɛ'ʉ co nú'ʉ yoho mri ncu. 25Nepʉ ra Jesu bi zofo yá nxadi ne bi 'ñembi: ―Guí pa̱hʉ gue nuya nda̱ de ja ya hnini, nu'ʉ́ go ri da̱ma 'ñexasɛ pa da manda gatho ya ja̱'i, nehe nuyá mfats'i'ʉ øt'e njabʉ nehe. 26Pe nu'ahʉ oxqui njahʉbʉ. Ngue'a̱ 'bʉ 'na de gue'ahʉ gui nehʉ gui nda̱nguihʉ, mahyoni gui 'mɛgohʉ. 27Ha nu'a̱ tó'o ne gue go dra mʉdi de gue'ahʉ, nu'á̱ go gue'a̱ mahyoni da 'mɛgo. 28Gui njahʉ ngu Nú'a̱ To'o bi e bi Nja̱'i, nú'á̱ himbá ehe pa da 'ñe ya 'bɛgo, nu'á̱ bá ehe pa go bi 'mɛgo, ne pa da unga rá te pa da pumba yá ts'oqui ya ja̱'i. 29Y de mi bønga de Jericó ra Jesu co yá nxadi, xi ndunthi ya ja̱'i bi dɛni'ʉ. 30Y de má 'ñu mi huhni yoho ya zi goda. Ha nu mi 'yøde'ʉ gue mi pani ra Jesu, bi mafi ne bi 'ñembabi: ―Nu'i Ndada, rá T'ʉ'i ra nda̱ Davi, huegaguihe. 31Ya ja̱'i bi go'tuabi yá ne pa ya hinda sigui da mafi hma̱ha̱. Pe nu'ʉ́ ma'na xi mi mafi ne mi ena: ―Nu'i Ndada, rá T'ʉ'i ra nda̱ Davi, huegaguihe. 32Nu'bʉ́ ra Jesu bi 'mai ne bi 'ñembabi: ―¿Te 'bɛ guí ne ga ø't'ahʉ? 33Nu'ʉ́ bi da̱di ne bi 'ñena: ―Dí ne gui xoga ma dahe, Ndada. 34Nu'bʉ́ ra Jesu xi bi huequi'ʉ, ne bi hñu'tsua yá 'yɛ ja yá da, ne nu'ʉ́ 'bestho bi xo yá da ne bi hyandi. Nepʉ nu'ʉ́ bi dɛni'a̱.

will be added

X\