NSAN MATEO 2

1Nú'ʉ ya pa mrá nda̱ ra Erode, gue'bʉ bi 'mʉi ra Jesu ja ra hnini Belé de ra hai Judea. Ne de nuya pa'ʉ 'raya hoga ba̱di bi 'ñehe de yabʉ ya hai ngue mbøxhyadi. Bi 'ñehe'ʉ ne bi zøhø ja ra hnini Jerusale. 2Nepʉ bi 'ñani'ʉ bi 'ñena: ―¿Habʉ de guecua di 'bʉi rá nda̱ ya xodyo nú'a̱ ja guehya xa 'mʉi? Ngue'a̱ stá hanthe 'nara tsø de bøxhyadi y dí pa̱he gue go gue'a̱ 'nara nt'udi gue xa 'mʉi 'nara nda̱, hangue stá ehehe pa ga nsundahe'a̱. 3Y nu mi 'yøde ra nda̱ Erode njabʉ, xi bi ntsu ne bi du rá mʉi, ne gatho ya me Jerusale bi ntsu nehe, ne bi du yá mʉi. 4Ra nda̱ Erode 'bestho bi zohna ya nda̱ gá macja̱ ne ya xahnate de rá ley ra Moise pa bi 'yambabi'ʉ te mi ma̱nga yá hɛ'mi, habʉ dí 'mʉi ra Cristo nú'a̱ ma da nda̱. 5Y nu'ʉ́ bi 'ñembi: ―Ma da 'mʉi Belé de ra hai Judea, ngue'a̱ njabʉ bi 'yofo rá 'mɛhni Ajua̱ gue bi 'ñena: 6Nú'ahʉ gyá menguhʉ Belé de ra hai Judá, ma'na xa t'e'ts'a ri nsuhʉ de gatho ma'ra ya hnini de ra hai Judá, ngue'a̱ de gue'ahʉ ma da bønga 'nara nda̱ nú'a̱ da supa rá hnini Ajua̱ nú'a̱ rá thuhu Israel. 7Nu'bʉ́ ra Erode bi ña̱sɛui 'ramats'ʉ ya ba̱di ne bi 'yambabi'ʉ ha'mʉ xqui hyanda ra tsø. 8Nepʉ bi 'ñembi: ―Rí maha Belé, 'yohʉ gui 'ñanihʉ xá hño habʉ di 'bʉi ra ba̱tsi, y nu xcrí tsʉhʉ güi penjʉ gui xicaguihʉ pa ga ma ga nsundaga nehe. 9Y nu mi 'yøde nú'a̱ bi ma̱nga ra nda̱, nu'ʉ́ bi ma. Nepʉ nú'a̱ ra tsø xqui hyant'ʉ mbøxhyadi mi 'bɛt'o de gue'ʉ mi utua ra 'ñu asta himbi tsøni habʉ mi 'bʉi ra zi ba̱tsi ja bi 'maini ra tsø. 10Nepʉ ya ba̱di bi hyanda ra tsø bi 'mai ja 'nara zi ngu, ne xi bi johya'ʉ. 11Y bi yʉt'i'ʉ ja ra ngu ne bi hyanda ra zi ba̱tsi co ra Maria nurá na̱na̱'a̱, ne bi ndandiña̱hmu'ʉ pa bi nsunda ra zi ba̱tsi, ne bi xo'tsa yá 'mɛ'tsi mi hña̱, ne bi umba ya 'baha dega oro ne ra t'uts'i ne 'nara ñʉni mi yʉni xá cʉhi mrá thuhu ra mirra. 12Ha nuya ba̱di bi xipabi Ajua̱ dega t'i gue hinda mengui'ʉ pa da xipabi ra Erode habʉ xqui zʉdi ra zi ba̱tsi. Hangue nu'ʉ́ bi pacua ra 'ñu pa bi mengui ja yá hai. 13Nu mi menga ya ba̱di, Ajua̱ bi mɛhna 'nará ɛnxɛ pa bi zofo ra Jose dega t'i ne bi 'ñembi: ―Nangui ne tsixa ra zi ba̱tsi co rá na̱na̱, pøñhʉ yabʉ de guecua. Rí maha ja ra hai Egipto gui 'ba'tuahʉ ra nda̱ Erode ngue'a̱ nu'á̱ ma da hyonga ra zi ba̱tsi pa da hyo, y ja bá 'bʉhʉni asta hinga xi'a'i güi penjʉ. 14Nu'bʉ́ ra Jose bi nangui 'bestho ra xuui'a̱ ne bi zixa ra zi ba̱tsi co rá na̱na̱ pa bi ma Egipto. 15Y ja bá 'bʉhni'ʉ asta himbi du ra Erode. Hangue bi nja ngu nú'a̱ xqui ma̱nga rá 'mɛhni Ajua̱ gue Ajua̱ bi 'ñena: “Dá pɛnpa ra noya ma T'ʉ pa da bøni de Egipto.” 16Nepʉ ra Erode xi bi bø rá cuɛ nts'ɛdi ngue'a̱ xqui hyat'a ya ba̱di. Hangue bi manda da tho gatho ya zi ba̱tsi nú'ʉ mi 'bʉi gatho rá ngʉni Belé, nú'ʉ mi pɛ'tsa yo njɛya pa rí ga̱i, ngue'a̱ xqui xipa ya ba̱di gue ya mi pɛ'tsa ngu yo njɛya de xqui hyanda ra tsø. 17Y bi njabʉ ngu nú'a̱ xqui ma̱nga ra Jeremía rá 'mɛhni Ajua̱ ne bi 'ñena: 18Bi nt'øde ya da̱nga ts'oni ja ra hai de Ramá ne ya hmafi, ngue'a̱ ra Raque xqui thopabi gatho yá zi ba̱tsi, hangue mi zoni ne himbi za to bi hyo'ti. 19Nepʉ ya de bi du ra Erode, nu'bʉ́ Ajua̱ bi mɛhna ma'na'qui 'nará ɛnxɛ pa bi zofo ra Jose dega t'i nuni Egipto, ne bi 'ñembi: 20―Nangui ne tsixa ra zi ba̱tsi co rá na̱na̱ ne rí maha ja ri haihʉ Israel ngue'a̱ ya xa du nú'a̱ to'o mi honga ra zi ba̱tsi pa xa hyo hma̱ha̱. 21Nu'bʉ́ nu'á̱ bi nangui bi zixa ra zi ba̱tsi co rá na̱na̱ y bi mengui pa ja yá hai Israel. 22Pe ra Jose bi 'yøde gue ra Arquelao rá t'ʉ ra Erode go mrá mpøte de rá 'bɛfi rá dada ne bi nda̱ ja ra hai Judea, hangue mi tsu da zøni ja nú'a̱ ra hai'a̱. Nu'bʉ́ Ajua̱ bi xipi dega t'i gue da ma ja ra hai Galilea. 23Y bi zøni'ʉ bi 'mʉhni ja 'nara hnini rá thuhu Nasare, pa bi njabʉ ngu nú'a̱ xqui ma̱nga 'rayá 'mɛhni Ajua̱ gue ra Jesu ma da t'embabi gue ra me Nasare.

will be added

X\