NSAN MATEO 19

1Nu mi uadi ra Jesu bi ma̱nga nuya noyaya, bi bøni de guehni Galilea ne bi ma ri'nandi ra da̱the Jordá pa habʉ mi o 'na xɛni rá hai Judea. 2Ne xi bi dɛni ndunthi ya ja̱'i ne ja bá øtheni ndunthi ya da'thi. 3Nepʉ ya fariseo bi ma bá c'a̱'tsa ra Jesu pa da xaxi ne bi 'ñembabi: ―¿Ha gue po nu'a̱raza ra t'øt'e da za da nxungüi rá 'bɛhña̱ 'nara 'ñøhø? 4Ne ra Jesu bi da̱tuabi ne bi 'ñembi: ―¿Ha gue hinxcá hñe'thʉ ja ri leyhʉ gue Ajua̱ go gue'a̱ bi hyoca ra 'ñøhø ne ra 'bɛhña̱ desde rá mʉdi? 5Nehe ma̱ gue ra 'ñøhø da 'uegue de rá dada ne rá na̱na̱ pa go da 'mʉhui rá 'bɛhña̱, y de ri yoho'ʉ da 'natho. 6Hangue dí xi'ahʉ gue nu'ʉ́ di 'natho, hingue di yoho. Hangue nu'a̱ da pɛhna Ajua̱, hinda za go da 'ueca 'nara ja̱'i. 7Ya fariseo bi 'ñembabi ra Jesu: ―Nu'bʉ́ ¿hanja ra Moise bi manda da thoca 'nara t'ofo dega nxuni pa da za da hyɛpʉ rá 'bɛhña̱ 'nara 'ñøhø? 8Nu'bʉ́ ra Jesu bi 'ñembabi: ―Ra Moise bi unga nsɛqui da njabʉ ngue'a̱ xi xá me ri corasohʉ, pe Ajua̱ desde rá mʉdi hingá njabʉ mi ne'a̱. 9Nuga dí xi'ahʉ gue nu'a̱ tó'o da nxungüi rá 'bɛhña̱ ne hinxa dimba 'nara ts'oqui xa 'yøt'e co ma'na ra ja̱'i, nu'bʉ́ nurá da̱me nú'a̱ ra 'bɛhña̱ 'bʉ da ntha̱tui ma'na ra 'bɛhña̱, nu'bʉ́ ya bi 'yøt'a 'nara ts'oqui. Nehe nú'a̱ to'o da ntha̱tui nú'a̱ ra 'bɛhña̱ xa thɛpʉ, nú'a̱ ra 'ñøhø ya ra zinga medintha̱ti. 10Nu'bʉ́ yá nxadi bi 'ñembabi ra Jesu: ―Nu'bʉ njabʉ, ma'na xá hño hinda ntha̱ta 'na 'bʉ. 11Bi da̱di ra Jesu ne bi 'ñembabi: ―Pe hinda za gatho da 'yøt'a njabʉ, hønsɛ nú'ʉ to'o xa 'mʉi pa hinda ntha̱ti. 12'Bʉi 'raya 'ñøhø hingui tsa da ntha̱ti ngue'a̱ desde bi 'mʉi ya mi njabʉ. Nehe 'bʉi ma'ra ya 'ñøhø hingui tsa da ntha̱ti ngue'a̱ nu'ʉ́ 'mɛfa ja xa njabʉ. Ne 'bʉi ma'ra ya 'ñøhø hingui ntha̱ti ngue'a̱ ma'na ri ho da mɛpabi Ajua̱ to'o ra Nda̱ de mahets'i. Nu'a̱ tó'o tsa da hña̱ni nuna ts'ofona̱, dá hña̱ni. 13Nepʉ bá ts'impabi 'raya zi ba̱tsi ra Jesu pa da hñuxa yá 'yɛ ja gue'ʉ ne da 'yapa Ajua̱ da ja̱p'ʉ. Pe nuyá nxadi bi zʉi nú'ʉ to'o mri zi ya zi ba̱tsi. 14Nu'bʉ́ ra Jesu bi 'ñembabi yá nxadi: ―Hophʉ da 'ñehe ya zi ba̱tsi, oguí ha̱cuabihʉ da 'ñe da zʉcagui, ngue'a̱ gatho nú'ʉ to'o 'bʉi ja rá hmanda Ajua̱ go gue'ʉ nja ngu nuya ya zi ba̱tsi. 15Y nu mi uadi ra Jesu bi hñuxa yá 'yɛ ja ya zi ba̱tsi, nu'á̱ bi ma de guehni. 16'Mɛfa bi 'ñe 'nara ba̱sja̱'i pa da 'yø'tua 'nara nt'ani ra Jesu ne bi 'ñembi: ―Nu'i Xahnate, 'nagrá hoja̱'i, ¿te 'bɛ da za ga øt'e pa da za ga pɛ'tsa ra te pa nza̱ntho? 17Bi da̱di ra Jesu ne bi 'ñembi: ―¿Hanja guí engui gue drá hoja̱'i? Hønsɛ Ajua̱ go gue'a̱ ra hoja̱'i. Pe nu'bʉ guí ne gui pɛ'tsa ra te pa nza̱ntho, 'yøt'a gatho nú'a̱ ri manda Ajua̱. 18Bi da̱di ra ba̱sja̱'i ne bi 'ñena: ―¿Te ma hmanda'ʉ? Ra Jesu bi 'ñembi: ―Oxqui hñote, oxqui nzinga medintha̱ti, oxqui mpe, oxqui jʉxa ya nc'uamba. 19Umba ra t'equ'ei ri dada ne ri na̱na̱ ne su'ʉ, ma̱di ri miqu'eiui ne gui su ngu grí nsu sɛhɛ. 20Bi da̱di ra ba̱sja̱'i ne bi 'ñembi: ―Desde stá mba̱tsi stá øt'a gatho núya guí xiqui. Xibya, ¿te ma'na ri 'bɛdi ga øt'ebya? 21Nepʉ ra Jesu bi 'ñembabi: ―Nu'bʉ guí ne gui 'bʉi xá hño, grí ma bá pa gatho nú'a̱ guí pɛ'tsi ne hecua ya hyoya, pa njabʉ da za gui hña̱nga 'nari da̱nga tha̱ha̱ nuni mahets'i. Nepʉ bá ehe gui tɛngagui. 22Nu mi 'yøde njabʉ nú'a̱ ra ba̱sja̱'i bi ma xi mi tu rá mʉi ngue'a̱ xi mrá rico. 23Nu'bʉ́ ra Jesu bi 'ñembabi yá nxadi: ―Xi majua̱ni xi xá hñei da yʉt'a 'nara rico ja rá hmanda Ajua̱. 24Xi majua̱ni dí xi'ahʉ gue ma'na xá hñei da yʉt'a 'nara rico ja rá hmanda Ajua̱ que da thogui 'nara cameyo ja rá gu 'nara 'yofri. 25Y nu mi 'yøde njabʉ ya nxadi xi bi 'yø ne bi 'ñena: ―Nu'bʉ njabʉ, ¿to'o ja da za da mpøhø? 26Ha ra Jesu bi nhyandui yá nxadi ne bi 'ñembabi: ―Co yá mfenisɛ ya ja̱'i hingui tsa da mpøhø, pe co rá ts'ɛdi Ajua̱ ha̱, hinte rá hñei. 27Nepʉ ra Pedro bi 'ñembi: ―Nu'i guí pa̱di gue nuje stá tsoguihe gatho nú'a̱ te ndí pɛ'tshe pa ga tɛn'ahe. Nu'bʉ́ ¿te ma tha̱ha̱ ma ga ha̱ñhe 'mɛfa? 28Nu'bʉ́ ra Jesu bi 'ñembabi: ―Xi majua̱ni dí xi'ahʉ gue nurá ñoho ra 'mʉi nu sta yopa 'ñehe Nú'a̱ To'o bi e bi Nja̱'i pa da manda co rá nsunda, nu'bʉ́ gue'bʉ nú'ahʉ xcá tɛngaguihʉ ma da thux'ahʉ gui mandahʉ nehe nú'ʉ 'rɛt'amayoho ya 'mʉi de Israel. 29Y gatho nú'ʉ to'o xa zogui yá ngu o yá cu o yá nju o yá dada o yá na̱na̱ o yá 'bɛhña̱ o yá ba̱tsi o yá hai po rá nguecagui, nu'ʉ́ ma da hña̱nga ma'na nthebe rá ndunthi de nú'a̱ xa zogui, ne ma da 'mʉi pa nza̱ntho. 30Ha nu'ʉ tó'o ya da̱nguibya, nura pa'a̱ ma da notsi'ʉ, ha nu'ʉ tó'o ya notsibya, nura pa'a̱ ma da nda̱ngui'ʉ.

will be added

X\