NSAN MATEO 18

1Ha nuya pa'ʉ yá nxadi bi 'yambabi ra Jesu ne bi 'ñembi: ―¿To'o ma dra da̱ngui nuni mahets'i habʉ bí manda Ajua̱? 2Nu'bʉ́ ra Jesu bi ma'ta 'nara zi ba̱tsi ne bi 'ba'ma madetho de gue'ʉ, 3ne bi 'ñembabi yá nxadi: ―'Bʉ hingui pata ri 'mʉihʉ ne gui njahʉ ngu nuna ra zi ba̱tsi, nu'bʉ́ hinda za gui cʉthʉ mahets'i habʉ bí manda Ajua̱ ma Dada. 4Nu'a̱ tó'o ne dra da̱ngui nuni mahets'i habʉ bí manda Ajua̱, mahyoni da nt'ʉqui ngu nuna ra zi ba̱tsi hingrá 'ñets'i. 5Ha nu'a̱ tó'o da umba ntsaya 'na ngu nuna ra zi ba̱tsi de ma thuhuga, ja ra uɛnda go guecagui ri 'raca ntsaya. 6Nu'a̱ tó'o da 'yʉ'ta 'na de gue nuya ya zi ba̱tsi camfrigui, nura ja̱'i'a̱ ma'na xá hño dra ts'ʉtua 'nara do strá hñʉ ja rá 'yʉga ne da thøt'a ja ra dehe. 7¡Huecate ra meximhai ngue'a̱ xi ja ya nt'ʉ'tate! Nza̱ntho ma da nja ya nt'ʉ'tate, pe ¡huecate ya 'yʉ'tate! 8Hangue nu'bʉ 'nari ua o 'nari 'yɛ da ja'i gui 'yøt'a 'nara ts'oqui, ma'na xá hño hyɛqui ne 'yɛmbʉ. Ngue'a̱ ma'na xá hño gri doua o gri do'yɛ gui tsønga mahets'i habʉ bí ja ra te pa nza̱ntho que dri xøgue gatho ri ndo'yo ne da t'ɛnt'a'i ja ra nidu habʉ zø ra tsibi nú'a̱ hinhya'mʉ da huet'i. 9Nehe nu'bʉ 'nari da da ja'i gui 'yøt'a 'nara ts'oqui, ma'na xá hño hña̱i ne 'yɛmbʉ. Ngue'a̱ ma'na xá hño dri 'bɛdi 'nari da gui tsønga mahets'i habʉ bí ja ra te pa nza̱ntho que dri xøgue ri da ne da t'ɛnt'a'i ja ra nidu habʉ zø ra tsibi. 10Jamasuhʉ hingui ʉtsahʉ nuyʉ ya zi ba̱tsi, ngue'a̱ nza̱ntho 'bʉi yá ɛnxɛyʉ ja rá thandi ma Dada bí 'bʉ mahets'i. 11Nú'a̱ To'o bi e bi Nja̱'i bá ehe pa da pøhø nú'ʉ xa 'mɛdi. 12Te guí beñhʉ 'bʉ 'nara ma'yo pɛ'tsa 'na nthebe ya dɛti ne da 'mɛdi 'na de gue'ʉ, ¿ha gue hingue da zohma̱ni ja ra t'øhø nú'ʉ goho'rate ne 'rɛt'amagʉto ya dɛti pa da ma da hyonga nú'a̱ ma'na xa 'mɛdi? 13Y nu sta zʉdi, nu'bʉ́ nú'a̱ ra ma'yo xi da johya ngue'a̱ bi zʉdi nú'a̱ 'nará dɛti xqui 'mɛdi, y nixi hingui oda rá mfeni nú'ʉ goho'rate ne 'rɛt'amagʉto hinxa 'mɛdi. 14Njabʉ nehe nuri Dadahʉ bí 'bʉi mahets'i hingui ne da 'mɛdi ni 'na de gue nuya ya zi ba̱tsi. 15Nubyá ma ga xi'ahʉ, nu'bʉ 'nari cu da 'yø't'a'i 'nara ts'ocate, grí ma gui c'a̱'tsi ne gui ña̱sɛui. 'Bʉ da 'yøde nú'a̱ gui xipi, nu'bʉ́ ya xcá yopa má̱hui ri cu. 16Pe nu'bʉ hinda 'yø't'a'i, nu'bʉ́ tsixa yoho o hñu ya cu pa da 'yøde nú'a̱ ma gui ma̱ñhʉ, pa njabʉ nú'ʉ́ go gue'ʉ da za da damajua̱ni. 17Ha nu'bʉ nú'a̱ ra cu'a̱ hinda 'yøte nú'ʉ yoho o hñu gui tsits'i, nu'bʉ́ xipabi gatho ya gamfri ja ra nija̱. Y nu'bʉ nixi con gue'ʉ hinda 'yøte'a̱, nu'bʉ́ dá t'øt'a ra uɛnda gue ya hingrá gamfri ne dá thandi ngu 'nara da̱ga 'yøt'ats'oqui. 18Xi majua̱ni dí xi'ahʉ gue nu'a̱ gui 'yøthʉ nuua ja ra ximhai, gue'a̱ rí t'øt'e mahets'i, ne nu'a̱ gui ma̱ñhʉ gue hinda t'øt'e nuua ja ra ximhai, gue'a̱ hinda t'øt'e nehe nuni mahets'i. 19Nehe ma ga xi'ahʉ gue nu'bʉ yoho de gue'ahʉ gui 'yøthʉ 'nara cohi nuua ja ra ximhai de nú'a̱ ma gui 'yadihʉ, nu'bʉ́ da 'ra'ahʉ ma Dada bí 'bʉi mahets'i nú'a̱ gui 'yadihʉ. 20Ngue'a̱ nu habʉ di 'bʉ yoho o hñu di xøcambenigui, nuni ja dí 'bʉhni madetho de gue'ʉ. 21Nu'bʉ́ ra Pedro bi joni habʉ mi 'bai ra Jesu ne bi 'ñembabi: ―Ma zi Hmu'i, ¿hangu ya 'mi'qui mahyoni ga pumbabi 'nama miqu'ei'be 'bʉ da 'yøtca 'nara ts'ocate? ¿Ha gue asta rá yoto 'mi'qui? 22Ra Jesu bi da̱di ne bi 'ñembi: ―Hindí eñ'i gue hønsɛ yoto 'mi'qui gui pumba ri miqu'eiui, nuga dí eñ'i gue asta hñu'rate ma 'rɛt'a 'mi'qui ya yoto pɛ'tsi gui pumbi, ne ya nixi gui 'yøthʉ ra uɛnda rá ndunthi ya 'mi'qui gui mpumbahʉ. 23Nubyá ma ga xi'ahʉ 'nara 'bede. Nura Nda̱ de mahets'i nja ngu 'nara hmu bi 'ñʉt'uɛndaui yá 'bɛgo. 24Y nu mi mʉdi ra hmu da 'yøt'a ra uɛnda, bi zønga 'nará 'bɛgo xi mi tupabi ndunthi ra boja̱. 25Ha nura 'bɛgo'a̱ himi tsa da gu'tuabi nú'a̱ mi tupabi rá hmu, hangue ra hmu bi manda da 'ba nura 'bɛgo co rá 'bɛhña̱ ne yá ba̱tsi ne gatho nú'a̱ te mi pɛ'tsi pa dra jo'tsuabi rá boja̱. 26Nu'bʉ́ nura 'bɛgo'a̱ bi ndandiña̱hmu ja rá ua rá hmu ne bi ba̱ntebi bi 'ñembi: “'Yøtca ra ma̱te gui tøbgagui ne ga ju't'a'i gatho nú'a̱ dí tu'a'i.” 27Nu'bʉ́ ra hmu bi yo rá mʉi de rá 'bɛgo, bi pumba gatho nú'a̱ mi tupi, ne bi hyɛgui bi ma. 28Ha nu mi ma de guehni nura 'bɛgo'a̱ bi nthɛui 'nará mi'bɛgoui nú'a̱ mi tupa 'na zi tʉquitho ra boja̱. Bi da̱ma mihi ne bi mʉdi bi mi'tua rá 'yʉga ne bi 'ñembi: “Nubyá ma gui jutqui gatho nú'a̱ guí tuqui.” 29Nu'bʉ́ nú'a̱ rá mi'bɛgoui mi tupabi, bi ndandiña̱hmu ja rá ua'a̱ ne bi ba̱ntebi bi 'ñembi: “'Yøtca ra ma̱te gui tøbgagui ne ga ju't'a'i gatho nú'a̱ dí tu'a'i.” 30Pe nu'á̱ himbi ne, bi zixa fadi asta himbi gu'tua gatho rá boja̱ nú'a̱ mi tupi. 31Nu'bʉ́ nu mi hyanda ma'ra yá mi'bɛgoui xi bi ʉ yá mfeni'ʉ ne bi ma bá xipabi yá hmu de gatho nú'a̱ xqui hyandi'ʉ. 32Nu'bʉ́ ra hmu bi zohna nú'a̱ ra nduthai xqui pumbabi ne bi 'ñembi: “Nu'i, 'na xi grá ts'oja̱'i. Gatho nú'a̱ ra boja̱ nguí tucagui go dá pun'a'i ngue'a̱ gá ba̱ntegui ga tøp'a'i. 33¿Ha gue himri 'ñep'a'i nehe xcá yo ri mʉi co ri mi'bɛgoui ngu dá yo ma mʉiga con gue'e?” 34Nu'bʉ́ nura hmu co rá cuɛ bi manda da ts'ixa fadi nú'a̱ ra ts'o'mʉi gá 'bɛgo pa da hna'mbabi asta hinda gu'tua gatho nú'a̱ mi tupa rá hmu. 35Nehe njabʉ ma Dada bí 'bʉ mahets'i ma da 'yøt'e con gue'ahʉ 'bʉ hingui pumbabihʉ nuri miqu'eihʉ 'bʉ da 'yø't'a'ihʉ 'nara ts'ocate.

will be added

X\