NSAN MATEO 17

1Nurá 'rato ma pa ra Jesu bi zixa ra Pedro, ra Cobo, ne ra Xuua rá cu, ne bi ma ja 'nara t'øhø xá hñets'i pa da 'mʉsɛuini. 2Nu'bʉ́ nu'ʉ́ bi hyanda ra Jesu bi mpadi, nurá hmi'a̱ xi bi yot'i ngu ra hyadi y rá he xi xmá nt'axi ngu 'nara ñot'i. 3Ne 'bestho ra ora'a̱ ya nxadi bi hyandi bi zøhø ndu ra Moise ne ndu ra Elía nú'ʉ myá 'mɛhni Ajua̱ ne bi ña̱ui ra Jesu. 4Nu'bʉ́ ra Pedro bi 'ñembabi ra Jesu: ―Ma zi Hmu'i, xi xá hño ga 'bʉhʉua. 'Bʉ gui nehma̱, ga hoca hñu ya zi ja̱'tsi, 'na pa gue'e, 'na pa ra Moise, ha nu ma'na pa ra Elía. 5Y de mi ña̱ ra Pedro bi go'mi'ʉ 'nara t'axaguui mri huɛxqui, y nu ja ra guui'a̱ bi nt'øde 'nara noya bi 'ñena: ―Nuni go guehni ma hma̱ca T'ʉ, ne xi dí hopa rá 'mʉi. 'Yødehʉ nú'a̱ da ma̱ni. 6Y nu mi 'yøde ya nxadi nuna noyana̱ xi bi ntsu, ne co ra ntsu bi dagui ma'mɛmfo. 7Nu'bʉ́ ra Jesu bi joni pa bi dani'ʉ ne bi 'ñembi: ―Nanjʉ, oguí tsuhʉ. 8Y nu mi gʉxa yá da ya nxadi, ya hønsɛ ra Jesu bi hyandi mi 'bahni sɛhɛ. 9Ha nu mi ga̱i'ʉ de ja ra t'øhø ra Jesu bi hñu'mba ra hña̱ yá nxadi bi 'ñembi: ―Oto ma gui xiphʉ de nú'a̱ gá hyanthʉ bi nja, asta nú'a̱ ra pa da yopa nte Nú'a̱ To'o bi e bi Nja̱'i, nu'bʉ́ ha̱, gue'bʉ gui ma̱ñhʉ. 10Nu'bʉ́ yá nxadi bi 'yambabi ne bi 'ñembi: ―¿Hanja enga ya xahnate de ra ley gue 'mɛt'o ma da 'ñehe ra Elía ne 'mɛfa da 'ñehe Nú'a̱ To'o ma da 'ñe da Nja̱'iua? 11Nu'bʉ́ ra Jesu bi da̱di: ―Xi majua̱ni ra Elía ma da 'ñehe pa da hyocua yá mfeni ya ja̱'i. 12Pe nubyá dí xi'ahʉ gue ra Elía ya bi 'ñehe, pe himbi gamfri ya ja̱'i ua go mi gue'a̱, y nu'á̱ bi 'yø'tuabi gatho nú'a̱ go bi ne ya ja̱'i. Nehe ya ja̱'i ma da jabʉ Nú'a̱ To'o bi e bi Nja̱'i, ngue'a̱ nu'ʉ́ ma da 'yø'tuabi ra 'ñʉ'a̱. 13Nu'bʉ́ ya nxadi bi ba̱di gue mi xipabi de ra Xuua Xi'tsate. 14Nepʉ mi zønga ra Jesu co yá nxadi habʉ mi 'bʉ ra hmuntsja̱'i, bá ehe 'nara 'ñøhø bi ndandiña̱hmu habʉ mi 'bʉ ra Jesu ne bi 'ñembi: 15―Ndada, huega ma t'ʉ ngue'a̱ ra ndusɛhɛ ne xi nts'ɛdi. Ndunthi ya 'mi'qui tso ja ra tsibi ne tso ja ra dehe. 16Hangue por gue'a̱ stá tsimpabi ri nxadi pa da 'yøthe hma̱ha̱, pe nuyʉ́ hinxa za xa 'yøthe. 17Nu'bʉ́ ra Jesu bi da̱di ne bi 'ñena: ―¡Nu'ahʉ 'nagyá 'ña̱gamfrihʉ ne 'nagyá ts'oja̱'ihʉ! ¡Asta ha'mʉ gui camfrihʉ! ¡Asta ha'mʉ ma ga tsɛ't'a'ihʉ ri 'mʉihʉ! Bá tsincahʉua xa̱. 18Nu'bʉ́ ra Jesu bi zʉi ra ts'onda̱hi, ne 'bestho bi bøni de nú'a̱ ra ts'ʉnt'ʉ'a̱, ne nu'á̱ bi ña̱ni 'bestho. 19'Mɛfa ya nxadi bi ña̱sɛui ra Jesu 'nambʉ ne bi 'ñembi: ―¿Hanja nuje himbi za dá ɛñhe nú'a̱ ra ts'onda̱hi? 20Ra Jesu bi da̱di bi 'ñembi: ―Ngue'a̱ 'na tʉqui ri jamfrihʉ. Xi majua̱ni dí xi'ahʉ gue nu'bʉ gri pɛ'tshma̱hʉ ri jamfrihʉ masque ngu drá nda̱ngui 'nara zi nda gá mostasa, nu'bʉ́ asta da za gui 'ñembahma̱hʉ nuna t'øhø da mponi de guecua pa rí ma ma'na lado, y 'bestho da mponi de habʉ ja. 'Bʉ di ja ri jamfrihʉ, da za gui 'yøthʉ gatho nú'a̱ go gui nehʉ. 21Pe pa da bønga ya ts'onda̱hi ngu nú'a̱ dá ɛni, mahyoni gui 'yaphʉ Ajua̱ ne gui ayunahʉ. 22Ne de ya mi 'bʉhni ra Jesu nuni Galilea bi 'ñemba yá nxadi: ―Nú'a̱ To'o bi e bi Nja̱'i ma da t'ɛnt'ua ja yá 'yɛ ya ja̱'i, 23nepʉ nu'ʉ́ ma da hyo. Pe rá hñupa'a̱ ma da yopa nte. Pe mi 'yøpya'ʉ xi bi du yá mʉi nts'ɛdi. 24Nu mi zønga ra Jesu co yá nxadi ja ra hnini Ncapernau, nú'ʉ to'o mi cobra ra boja̱ de ra nija̱ bi 'ñe bi 'yamba ra Pedro bi 'ñembi: ―Xi ri xahnatehʉ, ¿ha gue hingui jut'a ra boja̱ pa ra nija̱? 25Ra Pedro bi da̱di ne bi 'ñembi: ―Ha̱ha̱, jut'i. Nepʉ ra Jesu co yá nxadi bi yʉt'a mbo ra ngu habʉ mi nza̱i mi oxi'ʉ. Y ra Jesu bi 'yambabi ra Pedro bi 'ñembi: ―Nu'i Pedro, xi nú'a̱ ra boja̱ ri cobra nú'ʉ ya nda̱ de ya hnini, ¿ha gue go ri cobrabi nú'ʉ ja te yá njaui o nú'ʉ hinte yá njaui? 26Ra Pedro bi 'ñembabi ra Jesu: ―Nú'ʉ hinte yá njaui go gue'ʉ ri cobrabi. Nu'bʉ́ ra Jesu bi 'ñembabi ra Pedro: ―Nu'bʉ́ nú'ʉ ja te yá njaui ya nda̱ hingui jut'i. 27Pe pa hinda bø yá cuɛ nú'ʉ to'o cobra ra boja̱, grí ma ja ra ndehe, hña̱xa ri ansuelo ne 'yɛnt'a ja ra dehe, y nurá mʉdi ra hua̱ gui jʉ, xocua rá ne, y ja gui hña̱hni nú'a̱ ra boja̱ rí 'ñepi ga juthʉ.

will be added

X\