NSAN MATEO 16

1Ya fariseo ne ya saduceo bi ma'ʉ bá honga ra Jesu pa da xaxi. Ha nu mi zʉdi bi xipabi da 'ñutuabi 'nara nt'udi pa da gamfri'ʉ ua xi xqui 'ñehe'a̱ de mahets'i. 2Nu'bʉ́ ra Jesu bi da̱di ne bi 'ñembi'ʉ: ―Nu'ahʉ 'bʉ guí hanthʉ xa thɛnga mahets'i dega nde, nu'bʉ́ guí eñhʉ: “Xudi ma da hñoga pa.” 3Y nu'bʉ guí hanthʉ dega xudi xa thɛnga ya guui, nu'bʉ́ guí eñhʉ gue ma da nja ra bʉnthi 'ye. 'Nagyá yohmihʉ, ¿hanja go guí pa̱ gui hyanthʉ mahets'i pa gui pa̱hʉ te 'bɛ ma da nja hyastho, y hanja hingo guí huxhʉ nguɛnda de ya nt'udi nú'ʉ xqui 'ñehe de mahets'i pa gui pa̱hʉ gue ra Nda̱ de mahets'i ya xa zøhø? 4Nu'ahʉ́ gyá ts'oja̱'ihʉ xcá 'ueguehʉ de Ajua̱, hangue guí adihʉ 'nara nt'udi gui hyanthʉ pa gui camfrihʉ. Pe nuga hinga ma ga u't'a'ihʉ 'nara nt'udi ngu nú'a̱ guí adihʉ. Nura nt'udi ma gui hyanthʉ, hønsɛ de ra Joná rá 'mɛhni Ajua̱. Ha nu mi uadi ra Jesu bi ma̱nga njabʉ, nu'á̱ bi 'uegue de gue'ʉ ne bi ma de guehni. 5Nepʉ ra Jesu ne yá nxadi bi 'raxa ja ra ndehe pa ri'nandi, y yá nxadi bi pumfri da hña̱ts'i te da zi'ʉ. 6Ne ra Jesu bi 'ñembabi'ʉ: ―Jamasuhʉ de yá nzoi ya fariseo ne ya saduceo. 7Nu'bʉ́ nu'ʉ́ bi 'ñémsɛ'ʉ 'na ngu 'na: ―Nuní bi ma̱nga njabʉ ngue'a̱ hindá ha̱hʉ ra thuhme pa ga tsihʉ. 8Ha nura Jesu bi ba̱di nú'a̱ mi ma̱ñ'ʉ ne bi 'ñembabi: ―Nu'ahʉ xi ts'ʉtho ri jamfrihʉ. ¿Hanja guí tu ri mʉihʉ de nú'a̱ te gui tsihʉ? 9¿Hanja hingo tso ri mfenihʉ nú'a̱ dá xi'ahʉ? ¿Ha hinguí beñhʉ nú'ʉ cʉt'a ya thuhme dá hecuabi nú'ʉ cʉt'a 'mo ya 'ñøhø, ne hangu bi bongui xa̱? 10Nehe ¿ha gue hinguí beñhʉ nú'ʉ má yoto ya thuhme dá hecuabi nú'ʉ má goho 'mo ya 'ñøhø, ne hangu bi bongui xa̱? 11¿Hanja hingo bi zo ri mfenihʉ de ra nzoi dá xi'ahʉ? Hindá xi'ahʉ de ra thuhme ngu guí beñhʉ. Dá xi'ahʉ gue gui jamasuhʉ de yá nzoi ya fariseo ne ya saduceo. 12Nu'bʉ́ ha̱, ja bi zo yá mfeni'ʉ gue ra Jesu mi xipabi da jamasu de yá nt'utuate ya fariseo ne ya saduceo, hingo mi xipabi de yá nzoi ya thuhme. 13Mi zøngüi yá nxadi ja ra hai guetbʉ Cesarea de Filipo, ra Jesu bi 'yambabi'ʉ bi 'ñembi: ―Xi ya ja̱'i ¿te ma̱ de Nú'a̱ To'o bi e bi Nja̱'i, to'o gue'a̱ ena? 14Nu'ʉ́ bi da̱di bi 'ñena: ―'Ra ena gue go gue'a'i grá Xuua Xi'tsate, ma'ra ena gue go gue'a'i grá ba̱di Elía, ha nu ma'ra ena gue go gue'a'i grá Jeremía o 'na de gue nú'ʉ ma'ra yá 'mɛhni Ajua̱. 15Nepʉ bi yopa 'yambabi'ʉ ma'na'qui ne bi 'ñembi: ―Xi'ahʉ, ¿to'o guí beñhʉ go gueque? 16Ra Pedro bi da̱di ne bi 'ñena: ―Nu'i go gue'a'i grá Cristo nú'i bá pɛñ'a'i Ajua̱ pa gui nda̱, ne go rá T'ʉ'i Ajua̱ nú'a̱ te. 17Nu'bʉ́ ra Jesu bi 'ñembabi: ―Nu'i Simu rá t'ʉ'i ra Joná, xa ja̱p'a'i ma Dada bí 'bʉi mahets'i, ngue'a̱ go bi xi'asɛhɛ'a̱ to'ogui, hingo bi xi'a'i 'nara ja̱'i. 18Nubyá dí xi'i gue grá Pedro, ne nuri thuhu rí bøni da 'ñena 'nara do. Ne nu'i guí nja ngu ra do habʉ ma ga hoca ma nija̱. Y numa nija̱ ma'na ma da nja rá ts'ɛdi que ra du. 19Nu'i go ma ga hux'a'i ngu grá hña̱nsoqui pa gui xocua ra gosthi to'o da yʉt'a ja rá hmanda Ajua̱, pa njabʉ nu'a̱ gui 'yøt'a nuua ja ra ximhai, gue'a̱ rí t'øt'e mahets'i, ne nu'a̱ gui ma̱ gue hinda t'øt'e nuua ja ra ximhai, gue'a̱ hinda t'øt'e nehe nuni mahets'i. 20Nu'bʉ́ nu'á̱ bi hñu'mba ra hña̱ yá nxadi gue hinda ma̱ñ'ʉ gue go mi gue'a̱ ra Cristo nú'a̱ bá pɛhna Ajua̱ pa da nda̱. 21Desde gue'bʉ ra Jesu bi mʉdi bi xipabi yá nxadi gue mi mahyoni da ma'a̱ pa Jerusale nuni habʉ mi pɛ'tsi da sufri ja yá 'yɛ ya nda̱xjua nda̱ ne ya nda̱ gá macja̱ ne ya xahnate de ra ley. Nehe bi xip'ʉ gue mi pɛ'tsi da du'a̱, pe rá hñupa mi pɛ'tsi te da yopa nte. 22Nu'bʉ́ ra Pedro bi njʉquiui ra Jesu 'nambʉ, ne bi mʉdi bi zʉi ne bi 'ñembi: ―Hina, ma zi Hmu'i, Ajua̱ hinda ne gui thogui njabʉ. 23Nu'bʉ́ ra Jesu bi mpʉnts'i ne bi 'ñemba ra Pedro: ―¡'Uegue de gueque nu'i Satá! Ngue'a̱ nu'i guí ne gui hña̱gagui ga ø'tua rá paha ma Dada. Nura mfeni guí beni go yá mɛti ya ja̱'i, hingo rá mɛti Ajua̱. 24Nu'bʉ́ ra Jesu bi 'ñembabi yá nxadi: ―Nu'a̱ tó'o ne da dɛngui pa dua nxadi, hingui tsa da 'yøt'a rá paha sɛhɛ. Nú'á̱ mahyoni da 'ñɛi pa da dɛngagui masque da tho ya nt'ʉtsate ne ya 'bɛtsa. 25Ngue'a̱ nu'a̱ tó'o ma̱di rá te ne hinda zɛta ya nt'ʉtsate, nú'á̱ da 'bɛdi rá te pa nza̱ntho, ha nu'a̱ tó'o da zɛta ya nt'ʉtsate po rá ngueque, nu'á̱ ma da zʉdi rá te pa nza̱ntho. 26¿Ne te di muui 'nara ja̱'i 'bʉ drá mɛti gatho nú'a̱ te ja ja ra ximhai ne nu'á̱ go da 'mɛdi? Ngue'a̱ ni 'na de nuya hño'ʉ hinda za da pøhøbi rá te. 27Nu'a̱ Tó'o bi e bi Nja̱'i ma da yopa 'ñehe co rá nsunda rá Dada, ne ma da tsi yá ɛnxɛ. Y nú'a̱ ra pa'a̱ ma da gu'tuabi 'na ngu 'na ngu tengu nú'a̱ xa 'yøt'e. 28Xi majua̱ni dí xi'ahʉ gue 'ra de gue'ahʉ hingui ma gui tuhʉ asta hingui hyanduahʉ rá nsunda ra Nda̱ de mahets'i Nú'a̱ bi e bi Nja̱'i.

will be added

X\