NSAN MATEO 15

1Nu'bʉ́ 'raya xahnate de ra ley ne 'raya fariseo xqui 'ñehe de Jerusale pa da c'a̱'tsa ra Jesu, ne bi 'yambabi 'nara nt'ani bi 'ñembi: 2―¿Hanja nuyʉ ri nxadi hingui øt'e ngu mi øt'a ndu ma xitahʉ? Ngue'a̱ nuyʉ́ hingui xʉ'yɛ 'mɛt'o pa da ñuni. 3Y ra Jesu bi da̱tuabi'ʉ ne bi 'ñembi: ―Nequi ma ga an'ahʉ 'nara nt'ani. ¿Hanja go guí øthʉ nú'ʉ ri nza̱ihʉ ne hingo guí øtuabihʉ yá hmanda Ajua̱? 4Ngue'a̱ Ajua̱ bi manda njaua ne bi 'ñena: “Umba ra t'equ'ei ri dada ne ri na̱na̱ ne su'ʉ.” Nehe bi 'ñena: “Nu'a̱ tó'o da zanga rá dada ne rá na̱na̱, nu'á̱ pɛ'tsi da du.” 5Pe nu'ahʉ́ guí eñhʉ gue xá hño to'o da 'ñemba rá dada o rá na̱na̱: “Ya hinda za ga fax'a'i, ngue'a̱ nú'a̱ ma stá 'ra'ahma̱, ya stá ña̱'tuabi Ajua̱ ga umbi.” 6Hangue guí eñhʉ gue njabʉ hinguá hyoni da jamasu rá dada o rá na̱na̱ 'na. Hangue hinguí øthʉ nú'a̱ ri manda Ajua̱, go guí øt'asɛhʉ nú'a̱ go ri nza̱ihʉ. 7Nu'ahʉ xi gyá yohmihʉ. Hangue majua̱ni nú'a̱ xqui ma̱nga ra ba̱di Isaía de gue'ahʉ ne bi 'ñena: 8Nuna ra hninina̱ ri xøcambenigui dega netho, pe nuyá mfeni go bí 'yo yabʉ de guequi. 9Hinte ri muui yá søcambeni nú'a̱ øt'e, ngue'a̱ nu'ʉ yá nt'utuate udi'ʉ go de yá mfenisɛ, ne ma̱ñ'ʉ gue go stá utua'ʉ. 10Nepʉ ra Jesu bi zofo ra hmuntsja̱'i ne bi 'ñembi: ―Hñuxhʉ nt'øde xá hño ne dá zo ri mfenihʉ nú'a̱ ma ga xi'ahʉ: 11Hingue co nú'a̱ te cʉt'a ja rá ne ra ja̱'i ri nts'oqui, pe co nú'a̱ te pønga ja rá ne, con gue'a̱ ha̱, ri nts'oqui. 12'Mɛfa yá nxadi bi joni habʉ mi 'bai ra Jesu ne bi 'ñembi: ―¿Ha gue hinguí pa̱di gue xi bi bø yá cuɛ ya fariseo co nuya noya gá ma̱? 13Pe ra Jesu bi da̱tuabi yá nxadi ne bi 'ñembi: ―Gatho nú'ʉ ya nda̱po hingo bi mot'a numa Dada bí 'bʉi mahets'i, ma dra c'ʉ'tsi. 14Hyɛhʉbʉ ya fariseo dí 'yobʉ co yá ngoda, nu'ʉ́ ri zi yá migodaui. Nu'bʉ 'nara goda da gʉhna rá migodaui, da ma ri yoho'ʉ da zoui mahyɛgui ja ra o'tsi. 15Ra Pedro bi 'yambabi ra Jesu ne bi 'ñembabi: ―Xicje te rí bønga nú'a̱ ra 'bede gá ma̱ de hanja ri nts'oca 'na. 16Ra Jesu bi da̱di bi 'ñembi: ―¿Ha gue ni gue'ahʉ hingui tsoda ri mfenihʉ? 17¿Ha hinguí pa̱hʉ gue gatho nú'a̱ guí tsihʉ rí ma ja ri mʉihʉ ne thoguitho? 18Pe nu'bʉ guí beñhʉ ya ts'omfeni, go gue'ʉ da bønga ja ri nehʉ, y nú'a̱ go gue'a̱ da ja'ahʉ gui nts'oquihʉ. 19Ngue'a̱ ja yá ne ya ja̱'i ja guehni pønga yá ts'omfeni, ngu ra nthote, ra nzinga medintha̱ti, ra nt'eja̱'i, ra mfe, ra nt'e'tsate, ra nts'ante. 20Gatho nuyá ha̱, go guehya ri japi da nts'oca ra ja̱'i. Pe nu'a̱ tó'o hingui xʉ'yɛ 'mɛt'o pa da ñuni, hingo gue'a̱ 'nara ts'oqui øt'e. 21Nepʉ ra Jesu bi ma de guehni pa ja ra hai guetbʉ ra hnini Tiro ne Sidó. 22Ne ja bá nthɛuini 'nara 'bɛhña̱ mrá me Canaán y himrá me Israel. Mi mafi ne mi ena: ―Huegagui nú'i Ndada, rá T'ʉ'i ra nda̱ Davi. 'Nama t'ixu pɛ'tsa 'nara ts'onda̱hi ne xi nts'ɛdi. 23Pe ra Jesu hinte bi da̱di. Nu'bʉ́ ya nxadi bi joni habʉ mi 'bai ra Jesu ne bi ba̱ntebi bi 'ñembi: ―Pɛhni dá ma, ngue'a̱ xi mafiua møte ja ma xʉthahe. 24Ra Jesu bi da̱di ne bi 'ñembi'ʉ: ―Nuga xpá 'bɛncagui hønsɛ pa ga munts'a ya me Israel nja ngu ya zi dɛti xa 'mɛdi. 25Nepʉ nú'a̱ ra zi 'bɛhña̱ bi ndandiña̱hmu ja yá ua ra Jesu ne bi 'ñembi: ―Faxcagui, Ndada. 26Nu'bʉ́ ra Jesu bi da̱tuabi bi 'ñembi: ―Hindí 'ñepi da tha̱mba yá thuhme ya ba̱tsi pa go da t'umba ya tsat'yo. 27Nu'bʉ́ ra 'bɛhña̱ bi da̱di ne bi 'ñena: ―Majua̱ni guí ma̱, Ndada, pe nuya tsat'yo tsi ya xɛca thuhme nú'ʉ tagui de ja yá mexa yá hmu. 28Nu'bʉ́ ra Jesu bi da̱di ne bi 'ñembi: ―Nu'i na̱ná̱, xi ra da̱ngui ri jamfri, dá njabʉ ngu nú'a̱ xcá 'yadi. Nu'bʉ́ nurá t'ixu nura 'bɛhña̱'a̱ 'bestho bi ña̱ni nura ora'a̱. 29Ra Jesu bi ma de guehni ne bi zøni ja rá ña̱ni ra ndehe Galilea. De guehni bi bøxa maña̱ ra t'øhø ne ja bá hudini'a̱. 30Y bi mani ndunthi ya ja̱'i mi zi ya doua, ya do'yɛ, ya goda, ya gone, ne ndunthi ma'ra ya da'thi. Gatho'ʉ bi t'egui ja rá ua ra Jesu ne nu'á̱ bi 'yøthe'ʉ. 31Hangue nura hmuntsja̱'i mi 'bʉhni xi bi 'yø nu mi 'yøde bi ña̱ ya gone, ne mi hyandi bi nxøgue yá 'yɛ ya do'yɛ, ne bi 'ño ya doua, y ya goda bi hyandi. Hangue ra hmuntsja̱'i bi xøcambeni Ajua̱ nú'a̱ xøcambeni ya me Israel. 32Nepʉ ra Jesu bi zohna yá nxadi ne bi 'ñembabi: ―Xi drí hueca nuyʉ ya ja̱'i ngue'a̱ pɛ'tsa hñu pa drí 'ñohʉ ha hinte xa ziyʉ. Hindí ne da mayʉ co ra thuhu, ngue'a̱ xi'bʉ da uent'a má 'ñu. 33Nepʉ yá nxadi bi 'ñemba ra Jesu: ―Xi nuua ja ra mbonthi ¿habʉ ga tsʉhʉua ra thuhme pa ga 'uiñhʉ gatho nuyʉ ya ja̱'i xi ri ndunthi? 34Nu'bʉ́ ra Jesu bi 'yambabi'ʉ ne bi 'ñembi: ―¿Hangu ya thuhme guí pɛ'tshʉ? Nu'ʉ́ bi da̱di ne bi 'ñena: ―Hønda yoto ya thuhme dí pɛ'tshe ne 'raya t'ʉhua̱. 35Nu'bʉ́ ra Jesu bi japa ya ja̱'i da hñudi. 36Ne mri hña̱ nú'ʉ yoto ya thuhme ne nú'ʉ ya t'ʉhua̱, nepʉ bi umba njama̱di Ajua̱, nepʉ bi heque bi umba yá nxadi pa da hyecua ya ja̱'i. 37Gatho bi ñuni ne bi niña̱, y gatho nuya xɛni bi bongui bi hmunts'i ne bi ñuxa yoto ya 'bøts'e. 38Mi ngu goho 'mo ya 'ñøhø nú'ʉ bi ñuni, y nuya 'bɛhña̱ ne ya ba̱tsi himbi ma 'mede. 39Nepʉ ra Jesu bi 'ñehui ya ja̱'i, ne bi bøxa ja ra motsa pa bi ma ja ra hai Magdala.

will be added

X\