NSAN MATEO 10

1Nu'bʉ́ ra Jesu bi zohna nú'ʉ 'rɛt'amayoho yá nxadi xqui huahni, ne bi umba ra ts'ɛdi'ʉ pa da 'yɛnga ya ts'onda̱hi ne da 'yøthe gatho ya hñeni. 2Nuya guehya yá thuhu nú'ʉ 'rɛt'amayoho yá apostol xqui hñuts'i: rá mʉdi ra Simu nú'a̱ bi hñu'mbabi drá thuhu ra Pedro, ne ra Andre rá cu, ne ra Cobo, ne ra Xuua rá cu, di yoho'ʉ yá t'ʉ ra Sebedeo. 3Nepʉ ra Lipe, ne ra Tolo, ra Toma, ne ra Teo nú'a̱ mrá ngʉxboja̱, ne nú'a̱ ma'na ra Cobo rá t'ʉ ra Alfeo, ne ra Lebeo nú'a̱ bi thu'mbabi nehe ra Tadeo. 4Nepʉ nú'a̱ ma'na ra Simu nú'a̱ xqui 'ñoui ya cananista, ne ra Juda Iscariote nú'a̱ to'o bi da ra Jesu. 5Nu'bʉ́ gatho nú'ʉ 'rɛt'amayoho yá nxadi ra Jesu bi mɛhni ne bi 'ñembi'ʉ: ―Nubyá oxqui ma gui zohʉ nú'ʉ hingyá me Israel, nixi ya me Nsamaria. 6Rí maha go da bá zohʉ ya me Israel nú'ʉ go gue'ʉ rá hnini Ajua̱ xa 'mɛdi ngu ya zi dɛti. 7Rí maha gui umfʉ nt'øde gue ya xa zøhø ra Nda̱ de mahets'i pa da nda̱. 8'Yøthehʉ nú'ʉ to'o di tsʉ ra lepra, ne nú'ʉ di pɛ'tsa ma'ra ya hñeni, ne japhʉ da nte ma'na'qui nú'ʉ xa du, ne 'yɛmbahʉ ya ts'onda̱hi nú'ʉ to'o di pɛ'tsi. Ngu stá 'ra'athohʉ nuna ts'ɛdina̱, njabʉ nehe ma gui fats'ithohohʉ ya ja̱'i. 9Oxqui ma gui ha̱xhʉ ra boja̱ pa ja ra 'ñu, nixi ra t'axi nixi ra oro nixi ra cobre. 10Ne oxqui ha̱xhʉ ni 'nara 'bats'i, ni ri mponga dutuhʉ ni ri mponga zɛxthihʉ nixi ri bordohʉ, ngue'a̱ ra mɛfi rí 'ñepi da t'umbabi nú'a̱ te ø'tua ra 'bɛdi. 11Ne nu xcrí tsøñhʉ ja 'nara da̱nga hnini o 'nara t'ʉca hnini, gui hyoñhʉ 'nara ja̱'i nú'a̱ dra hoja̱'i, ne ja gui 'bʉhʉni ja rá ngu'a̱ asta hingui pøñhʉ de nú'a̱ ra hnini'a̱. 12Y nu xcrí cʉthʉ ja nú'a̱ ra ngu'a̱, gui 'yapabihʉ Ajua̱ da ja̱pi nuya mengu de nú'a̱ ra ngu'a̱. 13'Bʉ nuya mengu de nura ngu'a̱ da 'ra'ahʉ ntsaya, nu'bʉ́ Ajua̱ ma da ja̱pi'ʉ. Pe nu'bʉ hinda 'ra'ahʉ ntsaya, Ajua̱ hinda ma da ja̱pi'ʉ. 14'Bʉ ni 'nara mengu de nú'a̱ ra hnini'a̱ hinda gamfri nú'a̱ gui xiphʉ ne hinda hñuxa nt'øde, nu'bʉ́ pøñhʉ de nú'a̱ ra ngu'a̱ o de nú'a̱ ra hnini'a̱ ne gui fɛ'ma ri uahʉ pa da hyø nú'a̱ ra hai xa nthu'ti de nú'a̱ ra hnini'a̱. 15Majua̱ni dí xi'ahʉ, ra pa de ra nga̱xhmai nú'a̱ ra hnini hinda hñuxa nt'øde nú'a̱ gui xiphʉ, ma'na ma da nda̱ngui yá ts'oqui nura hnini'a̱ que ra hnini Sodoma ne Gomorra. 16Nubyá dí pɛhn'a'ihʉ gui maha gui 'yohʉ ngu ya zi dɛti madetho ja ya zate. Hangue xi da nsuhʉ ngu 'nara qu'eña̱, pe oguí øthʉ ra nts'o'mʉi, njahʉ ngu 'nara zi domitsu hingui øt'a ra nts'o'mʉi. 17Ne xi da nsuhʉ, ngue'a̱ ya ja̱'i ma da zix'ahʉ ja ya ts'ʉtbi, ne ma da zix'ahʉ ja yá nija̱'ʉ pa ja dí nap'a'ihʉni. 18Nú'ʉ́ ma da zix'ahʉ ja ya ts'ʉtbi y asta ja ya da̱nga nda̱ po rá nguecagui. Hangue njabʉ da za gui damajua̱nihʉ de guecagui ja yá thandi ya nda̱ ne nú'ʉ hingyá me Israel. 19Nu sta ts'ix'ahʉ nts'a̱hni, osta ma da du ri mʉihʉ de nú'a̱ te ma gui ma̱ñhʉ, nixi gui beñhʉ 'mɛt'o nú'a̱ ma gui ma̱ñhʉ, ngue'a̱ nura ora ma gui ña̱hʉ, Ajua̱ go da 'ra'ahʉ ya noya. 20Nu'ahʉ́ hingo ma gui ña̱sɛhʉ; nurá Ma̱ca Nda̱hi Ajua̱ ra Dada go gue'a̱ ma da xi'ahʉ te ma gui ma̱ñhʉ. 21Nuya pa'ʉ nuya ja̱'i ma da 'ñʉtsasɛui yá cu ne da da pa da tho. Ya dada ma da da yá ba̱tsi y ya ba̱tsi ma da nø'tua yá dada, ne da da pa da tho nehe. 22Gatho ya meximhai ma da ʉtsa'ihʉ ngue'a̱ guí ma̱ñhʉ ma noya. Pe nu'a̱ tó'o da zɛti asta rá nga̱ts'i, nú'á̱ go gue'a̱ da mpøhø. 23Nu'bʉ da t'ʉtsa'ihʉ ja 'nara hnini, pøñhʉ de guehni, rí maha ma'na ra hnini. Majua̱ni dí xi'ahʉ, hingri juatho gui 'yohʉ gatho ya hnini de ra hai Israel ha Nú'a̱ To'o bi e bi Nja̱'i ya da yopa zøhø ma'na'qui. 24'Nara xahnate ma'na ja rá nsu que rá nxadi; 'nara hmu ma'na ja rá nsu que rá 'bɛgo. 25Nura nxadi mahyoni da thogui ngu tho rá xahnate, nehe ra 'bɛgo mahyoni da thogui ngu tho rá hmu. Nja ngu 'nara dada 'bʉ da t'embabi gue go ra Beelsebú, nu'bʉ́ ya mengu rá ngu da t'embabi'ʉ mahyɛgui nehe. 26Hangue dí xi'ahʉ oxqui tsuhʉ nú'a̱ ma gui thoguihʉ. Masque 'bʉ te da t'ø't'a'ihʉ mant'a̱gui, pe rá nga̱ts'i ra pa ja ma da hnequini gatho nú'a̱ te xa t'ø't'ahʉ, ngue'a̱ gatho nú'a̱ te t'øt'e mant'a̱gui ma da fa̱di. 27Nú'a̱ dí u't'a'ihʉ sɛhɛ mant'a̱gui ma gui utuahʉ gatho ya ja̱'i. Nehe nú'a̱ dí xi'asɛhʉ zi njante ma gui ma̱ñhʉ nts'ɛdi pa da 'yøde gatho ya ja̱'i. 28Oxqui tsuhʉ to'o da hyo'ahʉ, ngue'a̱ nuri almahʉ hinda za to da hyop'ahʉ. Nu'a̱ tó'o mahyoni gui tsuhʉ, nu Ajua̱, ngue'a̱ nu'á̱ ha̱, tsa da mɛhn'a ri almahʉ ne ri ngøqu'eihʉ ja ra nidu. 29Nuya zi ts'ints'ʉ hints'ʉ ri muui asta 'ba yoho por ñodmi, ne hingui tagui tusɛ'ʉ 'bʉ hingo rá paha Ajua̱ ra Dada. 30¿Xihma̱'ihʉ? Nu'ahʉ ma'na grí muuihʉ ja rá thandi Ajua̱, ngue'a̱ asta nuri sta̱hʉ 'mede. 31Hangue oxqui ma gui ntsuhʉ, ngue'a̱ ma'na grí muuihʉ que ya zi ts'ints'ʉ. 32Nu'a̱ tó'o ma da damajua̱ni de guequi ja yá thandi ya ja̱'i, nequi nehe ma ga damajua̱ni de gue'a̱ ja rá thandi ma Dada bí 'bʉi mahets'i. 33Pe nu'a̱ tó'o da ncøni de guequi ja yá thandi ya ja̱'i, nequi nehe ma ga xipa ma Dada nú'a̱ bí 'bʉi mahets'i gue himbi ne bi gamfrigui. 34Oguí hu ri mʉihʉ gue ngue'a̱ stá ehe ya hinda nja ra tuhni ja ra ximhai; nu'á̱ ma da nja ngue'a̱ stá ehe. 35Nuya t'ʉ da nø'tua yá dada, ne ya t'ixu da nø'tua yá na̱na̱, ha nuya ts'ihuɛ da nø'tua yá suegra. 36Y njabʉ nuyá ncontra ya ja̱'i ma da bønsɛ de ja yá ngu'ʉ. 37Nu'a̱ tó'o ma'na go ri ma̱di rá dada o rá na̱na̱ que guecagui, nú'á̱ hinda za da dɛngagui. Nehe nu'a̱ tó'o ma'na go ri ma̱di rá t'ʉ o rá t'ixu que guecagui, ne'a̱ hinda za da dɛngagui. 38Nehe nu'a̱ tó'o hinda 'ñɛi pa da dɛngagui masque da tho ya nt'ʉtsate ne ya 'bɛtsa, nú'á̱ hinda za da dɛngagui. 39Nu'a̱ tó'o ri ma̱di rá te nuua ja ra ximhai, ma da 'bɛdi rá te pa nza̱ntho, pe nu'a̱ tó'o da dɛngagui masque da du po rá nguequi, ma da zʉdi rá te pa nza̱ntho. 40Nu'ʉ tó'o da 'ra'ahʉ ntsaya, go guequi ri 'raca ntsaya. Ha nu'ʉ tó'o da 'raca ntsaya, go ri umba ntsaya ma Dada nú'a̱ to'o bá pɛncagui. 41Nu'a̱ tó'o da umba ntsaya 'nará 'mɛhni Ajua̱, ma da hña̱nga ra tha̱ha̱ nehe ngu ma da hña̱ni 'nará 'mɛhni Ajua̱. Ha nu'a̱ tó'o da umba ntsaya 'nara ja̱'i ngue'a̱ øte Ajua̱, ne'a̱ ma da hña̱nga ra tha̱ha̱ ngu nú'a̱ ma da hña̱ni nú'a̱ øte Ajua̱. 42Nú'ahʉ ma nxadi'ihʉ, 'bʉ tó'o da 'ra'ahʉ ma̱di ts'ʉ ra dehe gui tsihʉ ngue'a̱ ma nxadi'ihʉ, majua̱ni dí xi'ahʉ gue nura ja̱'i'a̱ hinda ma da 'bɛdi rá tha̱ha̱.

will be added

X\