NSAN MARCO 9

1Nehe ra Jesu bi 'ñembabi'ʉ: ―Xi majua̱ni dí xi'ahʉ, 'ra de gue'ahʉ guí 'bʉhʉua gri tethohʉ ma gui hyanduahʉ rá ts'ɛdi ra Nda̱ de mahets'i sta 'ñehe. 2Rá 'rato ma pa, ra Jesu bi zixa ra Pedro, ra Cobo ne ra Xuua, ne bi ma sɛhɛ'ʉ ja 'nara t'øhø xá hñets'i. Y ne de guehni ja bi mpadini rá 'bai ra Jesu ja yá thandi'ʉ. 3Nurá he xi bi huɛxqui ne xi bi t'axqui ngu ra tsɛ, y jo'o ni 'nara meni nuua ja ra ximhai da japi da t'axca 'nara he ngu'a̱. 4Nepʉ de guehni nuyá nxadi bi hyandi'ʉ gue mi ña̱ui'a̱ ndu ra Elía ne ndu ra Moise nú'ʉ myá 'mɛhni Ajua̱. 5Hangue nura Pedro bi 'ñembabi ra Jesu: ―Ma Xahnate'i, ¡pøde xá hño ga 'bʉhʉua! Xi'bʉ ga hocje hñu ya zi ja̱'tsi, 'na pa gue'e, ma'na pa ra Moise, ha nu ma'na pa ra Elía. 6Nuya nxadi xi bi ntsu, hangue ra Pedro ngu bi 'bɛ rá mfeni ne himi pa̱ nú'a̱ mi ma̱. 7Nepʉ bi go'mi'ʉ 'nara guui, ne de guehni ja ra guui bi nt'øde 'nara noya bi 'ñena: ―Nuna guehna ma hma̱ca T'ʉ. 'Yøhʉ nú'a̱ ma̱. 8Y 'mɛfa ya nxadi bi hyandi gue ya mi jo'oni nú'ʉ ma'ra, hønsɛ ra Jesu mi 'basɛni. 9Y nu mi ga̱i'ʉ de ra t'øhø, ra Jesu bi hñu'mba ra hña̱ nú'ʉ hñu yá nxadi, ne bi 'ñembi: ―Oto xqui ma gui xiphʉ de nú'a̱ xcá hyanthʉ asta hinda yopa nte de rá du Nú'a̱ To'o bi e bi Nja̱'i. 10Hangue nú'ʉ hñu ya nxadi hinto bi xipabi de nú'a̱ xqui hyant'ʉ. Pe nu'ʉ́ mri 'ñámbi 'na ngu ma'na, ne mi eñ'ʉ: ―¿Te rí bønga nú'a̱ ra noya bi 'ñena gue asta hinda yopa nte'a̱ de rá du? 11Nu'bʉ́ nu'ʉ́ bi 'yambabi'a̱ ne bi 'ñembabi: ―¿Hanja enga ya xahnate de ra ley gue 'mɛt'o ma da 'ñehe ra Elía nepʉ ja da 'ñehe ra Cristo nú'a̱ rá 'mɛhni Ajua̱ pa da e da nda̱? 12Nu'bʉ́ nura Jesu bi da̱di ne bi 'ñembabi'ʉ: ―Ha̱ha̱, go rá mʉdi ma da 'ñehe ra Elía pa da zofo ya ja̱'i da ñobri de yá ts'oqui ja rá thandi Ajua̱, nepʉ ja da 'ñehe Nú'a̱ To'o bi e bi Nja̱'i. ¿Xi te ma̱nga ja ra Ma̱ca T'ofo de Nú'a̱ To'o bi e bi Nja̱'i? Nu'a̱ ma̱, ma̱ gue ma da tho ya ʉgui ne da t'ʉtsa. 13Pe de nú'a̱ gá 'yangahʉ de ra Elía, dí xi'ahʉ gue ya xa zøhø'a̱, y nuya ja̱'i bi 'yø'tuabi nú'a̱ go bi ne'ʉ, ngu xa nt'ofo ja ra Ma̱ca T'ofo njabʉ bi t'ø'tuabi'a̱. 14Nu de ya xqui menc'ʉ de ja ra t'øhø y ya mi ma da zøhø habʉ mi 'bʉi nú'ʉ ma'ra ya nxadi, bi hyanda 'nara da̱nga hmuntsja̱'i xqui got'atho nú'ʉ ma'ra ya nxadi, ne mi 'bahuini ya xahnate de ra ley mri ntsanoyaui'ʉ. 15Ha nu mi hyanda ya ja̱'i bi zønga ra Jesu, himi pa̱di te da beñ'ʉ, ne bi nest'ihi bi ma bá zɛngua. 16Ha nura Jesu bi 'yambabi yá nxadi ne bi 'ñembi: ―¿Te ma noya nguí ma̱ñhʉ con guehyʉ? 17Nepʉ 'nara ja̱'i nú'a̱ mi 'ba ja ra hmuntsja̱'i bi da̱di ne bi 'ñena: ―Ma Xahnate'i, dra zin'aua 'nama t'ʉ pɛ'tsa 'nara ts'onda̱hi xa japi xa ngone. 18Y nura ora da 'ñá̱mbabi ri japi da dagui habʉraza, ne asta ri gust'a yá ts'i ne ɛnts'a ra fʉgui ja rá ne, y ya xi xa papa rá mʉi. Ya stá xipa ri nxadi pa da 'yɛmbahma̱ nura ts'onda̱hi'a̱, pe nuyʉ hinxa za xa 'yɛmbabi. 19Nu'bʉ́ nura Jesu bi da̱di ne bi 'ñena: ―¡Gyá 'ña̱gamfrihʉ! ¿Asta ha'mʉ gui camfrihʉ? ¿Asta ha'mʉ ma ga tsɛ't'a ri 'mʉihʉ? Bá tsincahʉua nú'a̱ ra ts'ʉnt'ʉ. 20Nu'bʉ́ nu'ʉ́ bi zi'tsuabi nú'a̱ ra ts'ʉnt'ʉ, ha nura ts'onda̱hi nu mi hyanda ra Jesu mi 'bahni, bi japa nú'a̱ ra ts'ʉnt'ʉ bi dagui ne mi ta̱ni ne mi ɛnts'a ra fʉgui ja rá ne. 21Nu'bʉ́ ra Jesu bi 'yamba rá dada nú'a̱ ra ts'ʉnt'ʉ ne bi 'ñembi: ―¿Hangu pɛ'tsi de xa mʉdi njani? Ha nu'á̱ bi 'ñena: ―Desde mi notsi ya mi njani. 22Ndunthi ya 'mi'qui ra ts'onda̱hi høt'a ja ra tsibi o ja ya mothe pa da hyo hma̱ha̱. Hangue 'bʉ da za te gui 'yø'tuahma̱, huegahe gui faxcahe. 23Nepʉ ra Jesu bi 'ñembabi: ―Nu'i guí ena: 'Bʉ da za. 'Bʉ ja ri jamfri ha̱, gatho da za. 24Nu'bʉ́ rá dada nú'a̱ ra ts'ʉnt'ʉ bi da̱di nts'ɛdi ne bi 'ñena: ―¡Dí camfri, pe faxcagui pa ma'na ga camfri! 25Nu'bʉ́ ra Jesu bi hyandi gue ra hmuntsja̱'i mi 'yo rí ts'i'mi'a̱, hangue nu'á̱ 'bestho bi 'ñembabi ra ts'onda̱hi: ―Nú'i ts'onda̱hi go xcá japi xa ngone ne xa ngogu nuna ts'ʉnt'ʉ, pe nubyá nuga dí 'bɛp'a'i gui pøni de guehni ne hinhya'mʉ gui yopa cʉt'a ma'na'qui. 26Nepʉ nú'a̱ ra ts'onda̱hi bi mafi, ha nú'a̱ ra ts'ʉnt'ʉ bi 'ñá̱mba ra ndusɛ ma'na'qui, y ra ora'a̱ bi bønga ra ts'onda̱hi. Ha nú'a̱ ra ts'ʉnt'ʉ mi 'bɛni 'ñena xqui du. Ne ndunthi ya ja̱'i bi 'ñena gue xqui du. 27Pe ra Jesu bi mipa rá 'yɛ pa bi gʉts'i'a̱, nepʉ nura ts'ʉnt'ʉ 'bestho bi 'mai. 28Y nu mi yʉt'a ra Jesu ja ra ngu nú'a̱ xqui mihi, yá nxadi bi 'yambabi ne bi 'ñembabi: ―¿Hanja himbi za dá ɛñhe nú'a̱ ra ts'onda̱hi? 29Nu'bʉ́ nu'á̱ bi 'ñembabi'ʉ: ―Ya ts'onda̱hi ngu nú'a̱ dá ɛnibya, nu'ʉ́ da za da 'yɛni 'na, pe mahyoni da ayuna 'na ne da 'yapabi Ajua̱ con gatho rá mʉi. 30Nepʉ nu'ʉ́ bi bøni de guehni, bi gat'i ja ra hai Galilea, y ra Jesu himi ne to xa ba̱di ua mi 'yoni, 31ngue'a̱ mi xahna yá nxadi, mi embabi'ʉ: ―Nú'a̱ To'o bi e bi Nja̱'i ma da t'ɛnt'ua ja yá 'yɛ ya ja̱'i, ha nu'ʉ́ ma da hyo, pe rá hñupa ma da yopa nte de rá du. 32Pe nuyá nxadi himbi ba̱di te mri bønga nuya noya bi xipabi'ʉ, ne mi tsu da 'yambabi. 33Nepʉ bi yopa mengui'ʉ pa Ncapernau ne bi yʉt'i mbo ja ra ngu nú'a̱ xqui mihi. Nu'bʉ́ ra Jesu bi 'yambabi yá nxadi ne bi 'ñembi: ―¿Te rá 'bɛ nguí ma̱ñhʉ má 'ñu? 34Pe nu'ʉ́ hinte bi da̱di, ngue'a̱ de má 'ñu mi ntsanoyasɛ'ʉ ne mri 'ñámbi to'o 'na de gue'ʉ da ua'a̱ da ma̱. 35Nu'bʉ́ ra Jesu bi hñudi ne bi zofo nú'ʉ 'rɛt'amayoho yá nxadi ne bi 'ñembabi: ―Nu'a̱ tó'o da ne da nda̱ngui, osta ma da 'ñets'i. Nu'a̱ da 'yøt'e, dá mɛpa nú'ʉ ma'ra. 36Nepʉ bi 'ba'ma 'nara zi ba̱tsi madetho de yá nxadi, nepʉ bi dɛts'i ne bi 'ñembabi'ʉ: 37―Nu'a̱ tó'o da umba ntsaya de ja ma thuhu 'nara zi ba̱tsi ngu núna drí dɛts'i, ja ra uɛnda go 'raca ntsaya. Y nu'a̱ tó'o 'raca ntsaya, ja ra uɛnda go umba ntsaya Ajua̱ ma Dada nú'a̱ to'o bá pɛncaguiua. 38Nu'bʉ́ ra Xuua bi 'ñembi: ―Ma Xahnate'i, stá hanthe 'nara ja̱'i gue de ri thuhu mi ɛnga ya ts'onda̱hi, y nuje dá ha̱cuahe gue ya hinda 'yøt'a njabʉ, ngue'a̱ nura ja̱'i'a̱ hingui 'yo 'nadbʉ con guecjʉ. 39Pe ra Jesu bi da̱di: ―Oguí ha̱cuahʉ, ngue'a̱ nu'a̱ tó'o da 'yøt'a 'nara nt'udi de ma thuhuga, nu'á̱ hinga 'bestho ma da pata rá mfeni nixi da ña̱ma'ñʉ de gueque. 40Ngue'a̱ nú'ʉ hingui ʉtsaguihʉ, go gue'ʉ 'bʉi con guecjʉ. 41Ha nu'a̱ tó'o da 'ra'ahʉ ma̱di ts'ʉ ra zi dehe de ja ma thuhu ngue'a̱ guí tɛngahʉ, nura ja̱'i'a̱ ma da hña̱nga rá tha̱ha̱. 42Nu'a̱ tó'o da ts'ocua rá mfeni 'na de gue nuya ya zi ba̱tsi xa gamfrigui, nú'a̱ ra ja̱'i'a̱ ma'na xá hño da ts'ʉtua ja rá 'yʉga 'nara do strá hñʉ ne dra thøt'a ja ra ndehe. 43Nu'bʉ 'nari 'yɛ ja'a'i gui 'yøt'a 'nara ts'oqui, ma'na xá hño hyɛqui, ngue'a̱ ma'na xá hño gui cʉt'a habʉ bí ja ra te pa nza̱ntho co 'nada ri 'yɛ, que di ja yoho ri 'yɛ ne gui ma ja ra nidu habʉ hinhya'mʉ ma da huet'a ra tsibi. 44Y nuni ja bí 'bʉhni nehe ya zu'ue nú'ʉ da zipa yá ngø nú'ʉ to'o da zønini, ne bí zø ra tsibi pa nza̱ntho. 45Ha nu'bʉ 'nari ua ja'a'i gui 'yøt'a 'nara ts'oqui, ma'na xá hño hyɛqui, ngue'a̱ ma'na xá hño gui cʉt'a habʉ bí ja ra te pa nza̱ntho co 'nada ri ua, que di ja yoho ri ua ne gui ma ja ra nidu habʉ hinhya'mʉ ma da huet'a ra tsibi. 46Y nuni ja bí 'bʉhni nehe ya zu'ue nú'ʉ da zipa yá ngø nú'ʉ to'o da zønini, ne bí zø ra tsibi pa nza̱ntho. 47Ha nu'bʉ 'nari da ja'a'i gui 'yøt'a 'nara ts'oqui, ma'na xá hño hña̱i, ngue'a̱ ma'na xá hño gui cʉt'a habʉ bí manda Ajua̱ co 'nada ri da, que di ja yoho ri da ne gui ma ja ra nidu habʉ hinhya'mʉ ma da huet'a ra tsibi. 48Y nuni ja bí 'bʉhni nehe ya zu'ue nú'ʉ da zipa yá ngø nú'ʉ to'o da zønini, ne bí zø ra tsibi pa nza̱ntho. 49Ngue'a̱ gatho'ihʉ mahyoni gui tsɛthʉ ya ts'othogui ne hingui 'yøthʉ nú'a̱ go ri hnesɛhʉ, pa njabʉ gui pøñhʉ xá hño ja rá thandi Ajua̱. Ma gui njahʉ nehe ngu ya 'baha nú'ʉ t'umbabi Ajua̱, nú'ʉ́ pɛ'tsi da da̱ ja ra tsibi pa da hogui ne t'ʉ'tsua ra u. 50Xá hño ra u, pe nu'bʉ ya da 'bɛ rá hño, ¿hanja da za da cʉqui? Hingui tsa. Nu'ahʉ njahʉ ngu ra hoga u, 'yøthʉ xá hño, ne 'bʉhʉ co 'nara hoga'mʉi 'na ngu 'na.

will be added

X\