NSAN MARCO 8

1Ja nuya pa'ʉ xi bi munts'a ndunthi ya ja̱'i ma'na'qui, ne mi otho te da zi'ʉ, hangue ra Jesu bi zofo yá nxadi ne bi 'ñembabi: 2―Xi dí hueca nuya ya ja̱'i ngue'a̱ ya xa 'mʉi hñu pa con gueque ne otho te da zi. 3'Bʉ ga pɛhni da ma yá ngu njabʉtho co ra thuhu, xi'bʉ rí umba ra hødu má 'ñu ngue'a̱ 'ra xqui 'ñehe de yabʉ. 4Pe yá nxadi bi 'ñembabi: ―¿Hanja da za ga 'uiñhʉ nuyʉ ya ja̱'i gue nuua habʉ dí 'bʉhʉ go ra mbonthi? 5Nu'bʉ́ ra Jesu bi 'yambabi yá nxadi ne bi 'ñembi: ―¿Hangu ya thuhme guí ha̱hʉ? Nu'ʉ́ bi da̱tbi ne bi 'ñembi: ―Hønsɛ yoto. 6Nu'bʉ́ ra Jesu bi xipa ya ja̱'i da hñudi. Nepʉ bi gʉ nú'ʉ yoto ya thuhme ne bi umba njama̱di Ajua̱ rá Dada. Nepʉ bi hyeque ne bi umba yá nxadi pa da xɛnbabi ya hmuntsja̱'i. 7Nehe mi ha̱'ʉ 'raya t'ʉca hua̱ ne bi umba ra Jesu. Nepʉ nu'á̱ bi 'yapa Ajua̱ da ja̱pi, ne bi xipa yá nxadi da umba ya ja̱'i ya zi xɛca hua̱. 8Y gatho ya ja̱'i bi ñuni asta xi bi niña̱. Nepʉ ya nxadi bi munts'a ya xɛni nú'ʉ bi bongui y bi ñuxa yoto ya 'bøts'e. 9Ha mi ngu goho 'mo ya 'ñøhø nú'ʉ bi ñuni, y nuya 'bɛhña̱ ne ya ba̱tsi himbi ma 'mede. Nepʉ ra Jesu bi 'ñedi'ʉ. 10Ne nu'á̱ 'bestho bi bøxa ja ra motsa co yá nxadi ne bi 'rats'i bi ma ja ra hai Dalmanuta. 11Nepʉ 'raya fariseo bi ma bá tsʉdi ra Jesu ne bi mʉdi bi xaxi, ne bi xipi gue da 'yøt'e pa da hnequi 'nara nt'udi de mahets'i pa da hyandi'ʉ ua xi majua̱ni mrá 'mɛhni Ajua̱. 12Nu'bʉ́ ra Jesu xi bi 'yɛnga 'nara nga̱'tsi ne bi 'ñena: ―¿Hanja nú'ahʉ guí 'bʉhʉ mapaya guí ahʉ ga øt'a 'nara nt'udi? Xi majua̱ni dí xi'ahʉ gue nuga hinga u't'ahʉ ni 'nara nt'udi. 13Nu'bʉ́ nu'á̱ 'bestho bi zohni'ʉ ne bi yopa bøxa ja ra motsa pa bi ma ri'nandi ra ndehe. 14Ha nuyá nxadi xqui pumfri da hña̱xa 'raya thuhme, hønsɛ 'natho mi hña̱'ʉ ja ra motsa. 15Nepʉ ra Jesu bi zofo'ʉ ne bi 'ñembi: ―Jamasuhʉ de yá nzoi ya fariseo ne rá nzoi ra Erode. 16Nu'bʉ́ yá nxadi bi 'ñémsɛ'ʉ 'na ngu 'na: ―Nuní xicjʉ njabʉ ngue'a̱ hindí ha̱hʉ ra thuhme. 17Pe ra Jesu bi ba̱tho te mi beñ'ʉ ne bi 'ñembabi'ʉ: ―¿Hanja guí 'ñémfʉ gue otho ra thuhme? ¿Ha gue nsøctho'a̱ oda ri mfenihʉ? ¿Ha gue hingui tsoda ri mfenihʉ de nú'a̱ ra ts'ɛdi dí pɛ'tsi? Xi xá me ri corasohʉ. 18Ja ri dahʉ pe hinguí hanthʉ, ne ja ri guhʉ pe hinguí øhʉ, nixi guí beñhʉ nú'a̱ stá øt'e co nú'ʉ ya thuhme. 19Xi nú'bʉ ndá xɛni nú'ʉ cʉt'a ya thuhme ne dá 'uinga cʉt'a 'mo ya ja̱'i, ¿hangu ya 'bøts'e gá xɛca thuhme bi bongui xa̱? Y nu'ʉ́ bi da̱di bi 'ñena: ―'Rɛt'amayoho 'bøts'e. 20Nepʉ bi 'ñena: ―Nehe xi nú'bʉ ndá xɛni nú'ʉ yoto ya thuhme ne dá 'uinga goho 'mo ya ja̱'i, ¿hangu ya 'bøts'e gá xɛca thuhme bi bongui xa̱? Y nu'ʉ́ bi 'ñena: ―Yoto 'bøts'e. 21Nu'bʉ́ ra Jesu bi 'ñembi'ʉ: ―¿Y ne njabʉ hinxa zoda ri mfenihʉ de nuna ra ts'ɛdi dí hña̱? 22Nu'bʉ́ ra Jesu ne yá nxadi bi zøni ja ra hai Betsaida, ne ja guehni bá ts'impabi 'nara goda, y nú'ʉ to'o bá tsi bi ba̱ntebi gue da hñuxa rá 'yɛ ja gue'a̱ pa da ña̱ni. 23Nu'bʉ́ ra Jesu bi cʉhna ra goda pa bi gʉca møte de ra hnini, ne bi go'tsuabi rá jini ja yá da, ne bi hñuxa yá 'yɛ ja gue'a̱, ne bi 'ñembi: ―¿Ha gue ja te guí handi? 24Y nu'á̱ bi zøt'a yá da ne bi 'ñena: ―Dí handa ya ja̱'i di 'yo pe di hnequi ngu ya za. 25Nu'bʉ́ ra Jesu bi yopa hñu'tsua yá 'yɛ ja yá da nú'a̱ ra goda, ne nu'á̱ bi ña̱ni ne xi bi hyandi xá hño gatho. 26Nepʉ ra Jesu bi mɛhni da ma rá ngu, ne bi hña̱cuabi gue hinda yʉt'a ja ra hnini pa hinda xipa ya ja̱'i de guehni. 27'Mɛfa ra Jesu bi ma co yá nxadi ja ya t'ʉca hnini nú'ʉ mi ja guetbʉ ra da̱hni Cesarea de Filipo. Y de má 'ñu nú'á̱ bi 'yamba yá nxadi ne bi 'ñembi: ―¿Ha hingá øhʉ ya ja̱'i ma̱ to'oguiga? 28Nu'bʉ́ nu'ʉ́ bi da̱di ne bi 'ñena: ―'Ra ena gue go gue'e grá Xuua Xi'tsate, ma'ra ena grá ba̱di Elía, ha nu ma'ra ena gue go gue'e 'na de nú'ʉ ma'ra yá 'mɛhni Ajua̱ nú'ʉ mi 'bʉi maya'bʉ. 29Nu'bʉ́ ra Jesu bi 'yambi'ʉ ne bi 'ñembi: ―Xi'ahʉ, ¿te guí ma̱ñhʉ de gueque? Y ra Pedro bi da̱di ne bi 'ñembi: ―Nu'i go gue'e grá Cristo xpá mɛñ'a'i Ajua̱ pa gui nda̱. 30Nu'bʉ́ ra Jesu bi hñu'mba ra hña̱ gue hinda xipa ma'ra ya ja̱'i mi to'o'a̱. 31Nepʉ ra Jesu bi mʉdi bi xipabi yá nxadi nú'a̱ ma da t'ø'tuabi, ne bi 'ñembi'ʉ: ―Nú'a̱ To'o bi e bi Nja̱'i pɛ'tsi ma da sufri ndunthi. Ya nda̱xjua nda̱ ne ya nda̱ gá macja̱ ne ya xahnate de ra ley ma da ʉtsa asta da hñu yá mʉi da hyo, pe rá hñupa da yopa nte de rá du. 32Bi xipi'ʉ co ya noya hinxá hñei, hangue ra Pedro bi gʉqui 'nambʉ ne bi mʉdi bi zʉi pa hinda 'yøt'e njabʉ. 33Nu'bʉ́ ra Jesu bi mpʉnts'i ne bi hyanda gatho yá nxadi ne bi zʉi ra Pedro bi 'ñembi: ―¡'Uegue de gueque, nu'i guí ha̱mpa rá ts'ɛdi ra Satá hangue guí xica njabʉ! Ngue'a̱ nu'í hinguí ma̱ ngu nú'a̱ ma̱nga Ajua̱, nu'í guí øt'a nú'a̱ go yá paha ya ja̱'i. 34Nepʉ bi zohna yá nxadi ne ya ja̱'i ne bi 'ñembabi'ʉ: ―Nu'a̱ tó'o da ne da dɛngagui, hinda za da 'yøt'e nú'a̱ go rá paha sɛhɛ. Mahyoni da dɛngagui masque da tho ya nt'ʉtsate ne ya 'bɛtsa asta rá du. 35Nu'a̱ tó'o da ña̱nga rá te por hinda dɛngagui, nú'á̱ ma da 'bɛdi rá te. Pe nu'a̱ tó'o da 'ñɛi pa da du po rá ngueque ne po ra ma̱ca noya, nú'á̱ da zʉ rá te pa nza̱ntho. 36¿Te rá 'bɛ da da̱ha̱ 'nara ja̱'i 'bʉ da mɛ'tsa gatho ya hño de ra ximhai, y ne da 'mɛdi rá te? Otho. 37Ngue'a̱ ni 'na de nuya hño'ʉ hinda za da pøhøbi rá te. 38Nu'a̱ tó'o da gøngagui ne da ntsa da ma̱nga ma noya ja yá thandi ya 'yøt'ats'oqui gá ja̱'i ne ya 'ña̱gamfri, 'mɛfa necagui ma ga ma̱ gue hindí pa̱di'a̱ nehe nu xcrá yopa pengaua. Nura pa'a̱ ma ga 'ño'be ya ɛnxɛ, ne ga hnequi co rá nsunda Ajua̱ ma Dada.

will be added

X\