NSAN MARCO 7

1'Raya fariseo ne 'raya xahnate de ra ley nú'ʉ xqui 'ñehe de Jerusale bi munts'i ne bi ma bá c'a̱'tsa ra Jesu. 2Ne bi hyandi gue 'rayá nxadi ra Jesu bi ñuni nsinque xqui nxʉ'yɛ ngu yá nza̱i'ʉ, hangue bi ña̱ma'ñʉ'ʉ. 3(Ngue'a̱ ya fariseo ne gatho ma'ra ya xodyo xi xqui nza̱i da nxʉ'yɛ ante da ñuni ngue'a̱ njabʉ yá nza̱i ndu yá xita, y nu'bʉ hinda nxʉ'yɛ ngu yá nza̱i hinda ñuni. 4Ne 'bʉ ora da menga tai'ʉ, 'bʉ hinda nxʉ'yɛ hinda ñuni. Nehe mi ja ma'ra yá nza̱i nú'ʉ xqui 'ñutui ndu yá xita: da xʉt'a yá ntsi, nuya 'bada ne nuya ts'øe dega bøja̱, ne da mɛ'tsa yá mfidi pa da gohi strá nt'axi. Ngue'a̱ mi hu yá mʉi'ʉ gue co nú'ʉ ya t'øt'e mi øt'e da t'axca yá mfeni ja rá thandi Ajua̱.) 5Hangue nuya fariseo ne ya xahnate de ra ley bi 'yambabi ra Jesu ne bi 'ñembi: ―¿Hanja nuyʉ ri nxadi hingui øt'e ngu yá nza̱i ndu ma xitahʉ maya'bʉ? Nuyʉ́ ri ñuni masque hinxa nxʉ'yɛ. 6Nu'bʉ́ ra Jesu bi da̱tuabi'ʉ: ―Nu'ahʉ gyá yohmihʉ. Ra ba̱di Isaía bi ma̱ de gue'ahʉ maya'bʉ gue Ajua̱ bi 'ñena njaua: Nuna hninina̱ ri nsundagui hønsɛ dega noyatho, pe nuyá mfeni go bí 'yo yabʉ de gueque. 7Nu'ʉ́ xøcambenigui pe hinte ri muui yá søcambeni, nguetho nu'ʉ yá hmanda ri manda'ʉ go yá hmandasɛ, ne ma̱ñ'ʉ gue go stá 'bɛpca'ʉ. 8Xi majua̱ni ngu bi ma̱nga ra Isaía de gue'ahʉ, ngue'a̱ nu'ahʉ xcá tsocuahʉ yá hmanda Ajua̱ pa go grí dɛnbahʉ yá hmanda ndu ri xitahʉ. Nu'ahʉ nu'a̱ ri 'bɛfihʉ, hønsɛ ra nsʉt'a 'bada ne ma'ra ya ntsi, y ma'ra ya t'øt'e de ra nt'axqui. 9Nehe bi 'ñembabi'ʉ: ―Guí hu ri mʉihʉ gue xá hño nú'a̱ xcá tsocuahʉbʉ yá hmanda Ajua̱ pa go guí ø'tuahʉ yá nza̱i ndu ri xitahʉ. 10Nura Moise bi 'ñena: “Umba ra t'equ'ei ri dada ne ri na̱na̱ ne gui su'ʉ”, ne “nu'a̱ tó'o da zanga rá dada o rá na̱na̱ dá tho.” 11Pe nu'ahʉ guí eñhʉ gue xá hño to'o da xipa rá na̱na̱ ne rá dada njaua: “Nuna ra boja̱ ndí 'ra'ahʉ hma̱ha̱, nubya go ma ga umba Ajua̱ ngue'a̱ ra Corbán.” (Ra Corbán rí bøni da 'ñena 'nara 'baha xa t'eque pa Ajua̱.) 12Y njabʉ guí emfʉ ya ja̱'i gue ya hinte da umba yá dada ne yá na̱na̱, ne ya hinda su'ʉ. 13Njabʉ guí pumfrithohʉ nú'a̱ bi ma̱ Ajua̱, ne hønsɛ go guí ø'tuahʉ yá nza̱i ndu ri xitahʉ, y nehe njabʉ guí utua ri ba̱tsihʉ. Ne ndunthi ma'ra ya t'øt'e guí øthʉ mahyɛgui ngu nuna. 14Nu'bʉ́ ra Jesu bi yo zofo ra hmuntsja̱'i ma'na'qui ne bi 'ñembi'ʉ: ―'Yødehʉ guí gathohʉ ne dá zo ri mfenihʉ núna ma ga ma̱. 15Nu'a̱ cʉt'a ja rá ne ra ja̱'i hingo gue'a̱ japi da nts'oqui, pe nú'a̱ pøni de rá mfeni ha̱, go gue'a̱ japi da nts'oqui. 16Nu'a̱ tó'o ja rá t'øde pa da 'yøde, dá 'yøde núna dí ma̱. 17Nepʉ bi 'uegue'a̱ de ra hmuntsja̱'i, ne bi yʉt'a ja ra ngu nú'a̱ xqui mihi, y nuni ja bi 'yambani sɛhɛ yá nxadi te rí bønga nú'a̱ xqui xipa ya ja̱'i. 18Nu'bʉ́ ra Jesu bi 'ñembabi'ʉ: ―¿Ha gue ne'ahʉ hinte ri fa̱dihʉ? ¿Ha hinguí pa̱hʉ gue hingue nú'a̱ da zi ra ja̱'i go gue'a̱ da japi da nts'oqui? 19Ngue'a̱ nú'a̱ ts'i cʉt'atho ja rá mʉi 'na, ne pøni ne hingui ts'ocua rá mfeni. Njabʉ bi ma̱nga ra Jesu gue xá hño da ts'i gatho ya nzaqui. 20Nepʉ bi 'ñena: ―Nu'a̱ ri japi da nts'oca̱ ra ja̱'i, nú'ʉ ya ts'omfeni beni. 21Ngue'a̱ de ja rá ts'omfeni 'na, ja bí ehni gatho nuya ya ts'ot'øt'e: ra nts'inga medintha̱ti, ra nt'e'bɛhña̱, ra nthote, 22ra mfe, ra ts'onc'at'i, ra nts'o'mʉi, ra nthate, ra nts'o'yo, ra nts'ante, ra nt'ets'i, ne nú'ʉ to'o ri hyøcua nú'a̱ te pɛ'tsa ma'na, ne nú'ʉ hingui pa̱di nda'a̱ ra hño nda'a̱ ra 'ñʉ. 23Gatho nuya ya ts'oqui bí ehe de yá ts'omfeni ya ja̱'i, ne go guehya japi da nts'oqui. 24Nepʉ ra Jesu bi bøni de guehni ne bi ma ja ra hai guetbʉ ra hnini Tiro ne Sidó. Ne ja bá cʉt'ini ja 'nara ngu, y himi ne to xa ba̱di hma̱ha̱, pe 'bestho bi fa̱tho. 25Ha guetbʉ de guehni mi 'bʉhni 'nara 'bɛhña̱ nú'a̱ mi pɛ'tsa 'nará t'ixu gue mi pɛ'tsa 'nara ts'onda̱hi. Ne bi 'yøde gue xqui zøhni ra Jesu, hangue nu'á̱ 'bestho bi ma bá c'a̱'tsi ne bi ndandiña̱hmu ja yá ua'a̱. 26Nura 'bɛhña̱'a̱ himrá me Israel ngue'a̱ mrá me Sirofenicia. Nu'á̱ bi ba̱ntebi ra Jesu pa da 'yɛmba ra ts'onda̱hi nú'a̱ mi pɛ'tsa rá t'ixu. 27Pe ra Jesu bi 'ñembabi: ―'Mɛt'o mahyoni ga ø'tua ra hño ya me Israel, ngue'a̱ nu'bʉ 'mɛt'o ga ø'tua ra hño ya 'ra'ñoja̱'i ngu'i, nu'bʉ́ ga nja ngu nú'a̱ to'o ha̱mba yá hñuni ya ba̱tsi pa da umba ya tsat'yo. 28Nu'bʉ́ nú'a̱ ra 'bɛhña̱ bi da̱tuabi ne bi 'ñembi: ―Majua̱ni nú'a̱ guí ma̱ Ndada, pe ya tsat'yo tø'mtho nja'ti de ra mexa pa da gʉxa ya hangui nú'ʉ da dagui de habʉ ri ñuni ya ba̱tsi. 29Nu'bʉ́ ra Jesu bi da̱tuabi: ―Xcá tha̱di xá hño, hangue pengui, grí ma ri ngu ne bá nu ri t'ixu gue ya xa bønga ra ts'onda̱hi de gue'a̱. 30Y nu mi zønga rá ngu nú'a̱ ra 'bɛhña̱, bi zʉdi rá t'ixu mi 'bɛnga ja rá fidi ne ya xqui bønga ra ts'onda̱hi de gue'a̱. 31Nepʉ ra Jesu bi ma de guehni habʉ mi 'bʉ guetbʉ ra hnini Tiro, ne bi gat'a ja ra hnini Sidó ne bi thogui ja ra hai Decapoli pa bi yo menga ja ra ndehe Galilea. 32Ne nuni ja bá ts'impani 'nara 'ñøhø mrá gogu ne mrá 'bane, y nú'ʉ to'o mri zi'a̱ bi ba̱ntebi ra Jesu da hñuxa rá 'yɛ ja gue'a̱ pa da ña̱ni. 33Nu'bʉ́ ra Jesu bi gʉca nú'a̱ ra da'thi 'nambʉ de ra hmuntsja̱'i, ne bi dint'ua yá dedo ja yá gu, nepʉ bi zots'i yá dedo ne bi damba rá ja̱ne nú'a̱ ra 'ñøhø. 34Nepʉ bi nøts'e pa mahets'i bi 'yɛnga rá nga̱'tsi ne bi 'ñembi: ―¡Efata! ―nú'á̱ ne da 'ñena: ¡Dá xogui ri gu ne ri ne! 35Y 'bestho bi xo yá gu ne bi za bi 'yøde xá hño, ne bi tuqui rá ja̱ne ne bi za bi ña̱ xá hño. 36Ha ra Jesu bi hñu'mba ra hña̱ ya ja̱'i gue hinto da xipi, pe nu'ʉ́ ma'na bi ma bá 'yonga ra 'bede. 37Y ma'na xi mri 'yø ya ja̱'i ne bi 'ñena'ʉ: ―Gatho nú'a̱ øt'e xi xá hño, asta japi ya gogu da 'yøde, ne ya gone da ña̱.

will be added

X\