NSAN MARCO 6

1Ra Jesu bi bøni de guehni bi ma ja rá hai, bi mɛui yá nxadi. 2Ne ja ra pa dega tsaya bi yʉt'a ja ra nija̱ pa bi nxahnate, ne ndunthi nú'ʉ to'o mi øde, mi 'yø ne mi ena: ―¿Habʉ xa ba̱di nú'a̱ ma̱ni? ¿To'o xa umbabi ra da̱nga mfa̱di? ¿Habʉ xpá hña̱ nú'a̱ ra ts'ɛdi pa da 'yøt'a nú'ʉ ya da̱nga nt'udi øt'e? 3Nuni go guehni ra yaxi, nurá t'ʉ ra Maria, ne go yá cu ra Cobo, ra Jose, ra Juda ne ra Simu, ne yá nju 'bʉcua con guecjʉ. Ne nu'ʉ́ mri 'yøtho, himbi gamfri. 4Hangue ra Jesu bi 'ñembabi'ʉ: ―'Nará 'mɛhni Ajua̱ da t'umba ra t'equ'ei habʉ hingo rá hai, ha nu go rá hai hinto umba ra t'equ'ei, nixi ya mengu rá ngu. 5Ra Jesu himbi za bi 'yøt'a ndunthi ya nt'udi ja rá hai ngue'a̱ hinto mi ne da gamfri. Hønsɛ bi hñuxa yá 'yɛ ja ts'ʉtho ya da'thi pa bi ña̱ni'ʉ. 6Y nu'á̱ bi 'yø ngue'a̱ ni 'na tʉqui himbi ne bi gamfri nuya ja̱'i, ne bi bøni de guehni bi ma ja ma'ra ya t'ʉca hnini pa da xahna ya ja̱'i. 7'Mɛfa ra Jesu bi zohna nú'ʉ 'rɛt'amayoho yá nxadi ne bi umba ra ts'ɛdi pa da 'yɛmba ya ts'onda̱hi to'o di pɛ'tsi. Nepʉ bi mɛhni'ʉ dega yoho. 8Ne bi xipabi'ʉ gue hinte da hña̱ts'i pa ja ra 'ñu, nixi yá 'røza̱, nixi nú'a̱ te da zi, ni ra boja̱, hønsɛ yá bordo ha̱. 9Nehe bi xipi gue da di'ta yá thiza ne da hña̱xa 'nada ra pat'i. 10Nehe bi 'ñembabi: ―Nu xcrí tsøñhʉ ja 'nara ngu, ja gui 'bʉthʉni asta hingui pøñhʉ de nú'a̱ ra hnini'a̱. 11Y nu'bʉ gui tsøñhʉ ja 'nara hnini ne hinto da 'ra'ahʉ ntsaya nixi da 'yøde nú'a̱ gui ma̱ñhʉ, nu'bʉ́ pøñhʉ de guehni. Y de xcrí pøñhʉ, gui hua̱t'a ri thizahʉ pa hingui hña̱xhʉ nixi ra hai de nura hnini'a̱, y njabʉ da ba̱di'ʉ de nú'a̱ xa 'yøt'ʉ. Majua̱ni dí xi'ahʉ gue nu sta zø ra pa da nja ra nsʉca uɛnda, nura pa'a̱ ya mengu de guehni ma'na ma da ncastiga que ya mengu de ra ts'ohnini Sodoma ne Gomorra. 12Mi uadi bi ma̱nga ra Jesu njabʉ, yá nxadi bi ma de guehni pa da zo ya ja̱'i pa da ñobri'ʉ de yá ts'oqui. 13Ne mi ɛni ndunthi ya ts'onda̱hi, ne mi co'tsua ra aceite ya da'thi ne mi ña̱ni'ʉ. 14Ha nuya pa'ʉ habʉraza xi xqui nt'øde de nú'ʉ ya da̱nga t'øt'e mi øt'a ra Jesu, asta ra nda̱ Erode bi zo rá gu nehe. Hangue bi 'ñena: ―Go gue'a̱ ra Xuua Xi'tsate ya xa yopa nte de ra du, hangue nubyá ma'na ja rá ts'ɛdi pa da za da 'yøt'a nuya da̱nga nt'udi. 15Ma'ra ya ja̱'i mi ena: ―Go gue'a̱ ra ba̱di Elía. Y nu ma'ra mi ena: ―Go gue'a̱ 'nará 'mɛhni Ajua̱ ngu nú'ʉ mi 'bʉi maya'bʉ. 16Ha nu mi 'yøde ra nda̱ Erode njabʉ, bi 'ñena: ―Gue'a̱ ra Xuua nú'a̱ dá tacua rá ña̱xu ne ya xa yopa nte ma'na'qui. 17Bi beni njabʉ ngue'a̱ xqui mɛhni to bi gʉ ra Xuua pa bi got'a fadi, ngue'a̱ xqui hña̱cuabi hma̱ha̱ gue hinda 'yøt'e drá 'bɛhña̱ ra Erodía, ngue'a̱ ra Erodía mrá 'bɛhña̱ ra Lipe nú'a̱ to'o mrá cu ra Erode. 18Ra Xuua xqui hña̱cuahma̱ ra Erode ne xqui 'ñembi: ―Hingui ho gui tsimba rá 'bɛhña̱ ri cu. 19Hangue ra Erodía xi bi ʉtsa ra Xuua ne mi ne to da gats'i pa da hyo, pe himi tsa, 20ngue'a̱ ra Erode mi su ra Xuua pa hinte da t'ø'tuabi, ngue'a̱ mi pa̱di gue mrá hoja̱'i ne xmá nt'axi rá mfeni hangue mi pɛ'tsua ra t'equ'ei. Ne mi ho da 'yøde nú'a̱ mi ma̱, pe himi tso rá mfeni nú'a̱ mi øde hangue himi pa̱di te da beni. 21Pe bi zø ra pa bi nja ngu nú'a̱ mi ne ra Erodía. Nu mi da rá pa ra Erode bi 'yøt'a 'nara ngo ne bi 'ñehe gatho yá mfats'i ne ya nzaya ne ya t'ʉca nda̱ to'o mi manda ra hai Galilea. 22Nuni ja ra ngo bi yʉt'a rá t'ixu ra Erodía ne bi nei ja yá thandi'ʉ. Ha ra nda̱ Erode ne nú'ʉ to'o mi huhui ja ra mexa bi hopa rá hnei. Hangue ra Erode bi 'ñemba ra nxutsi: ―'Yacagui gatho nú'a̱ gui ne y ga 'ra'a'i. 23Ne bi jurabi ne bi ña̱'tuabi da umbi asta made de habʉ gatho mri manda 'bʉ da 'yadi. 24Nepʉ bi bønga ra nxutsi ne bá amba ra Erodía nurá na̱na̱'a̱ ne bi 'ñembi: ―¿Te ga adi 'bʉ? Y rá na̱na̱ bi 'ñembi: ―Xipi da 'ra'i rá ña̱xu ra Xuua Xi'tsate. 25Nu'bʉ́ nu'á̱ bi da̱ma mengui ja ra nda̱ ne bi 'ñembi: ―Dí ne gui 'racagui nubya 'bestho rá ña̱xu ra Xuua Xi'tsate ja 'nara manza. 26Nu'bʉ́ ra nda̱ bi du rá mʉi nts'ɛdi. Pe ya xqui jurabi nú'a̱ ra nxutsi ne xqui 'yøde gatho to'o mi huhuini ja ra mexa, hangue mi pɛ'tsi te da 'yøt'e nú'a̱ xqui ma̱. 27Hangue bi da̱ma mɛhna 'nara soldado pa da hña̱mpa rá ña̱xu ra Xuua. 28Nepʉ nú'a̱ ra soldado bi ma ja ra fadi bá tacua rá ña̱xu ra Xuua, ne bi 'yɛnts'a ja 'nara manza pa bá ha̱mpa ra nxutsi, nepʉ ra nxutsi bi hña̱'tsua rá na̱na̱. 29Y nu mi 'yøde yá nxadi ra Xuua bi ma ja ra fadi pa bi du'tsua rá ndo'yo pa bá agui'ʉ. 30Nú'ʉ 'rɛt'amayoho yá nxadi ra Jesu xqui mɛhni da ma da zofo ya ja̱'i, 'mɛfa bá pengui de habʉ xqui ma, ne bi munts'i'ʉ habʉ mi 'bʉi ra Jesu, ne bi xipi gatho te xqui 'yøt'e'ʉ ne nú'a̱ xqui 'ñudi'ʉ. 31Nu'bʉ́ ra Jesu bi xipabi'ʉ: ―Maha ga 'ueguehʉ 'nambʉ sɛhɛ pa ga ntsayahʉ. Mi ma̱nga njabʉ ngue'a̱ ndunthi ya ja̱'i mi pa y mi tsøhø habʉ mi 'bʉi'ʉ ne mi otho ra pongui pa da ntsaya nixi pa da ñuni. 32Hangue bi ma'ʉ co 'nara motsa pa bi 'rani ri'nandi habʉ hinto mi 'bʉi. 33Pe ndunthi ya ja̱'i bi hyandi mi ma'ʉ ne bi hyandatho'ʉ ra Jesu habʉ rí zøni, hangue nu'ʉ́ ne ndunthi de nú'ʉ mi 'bʉ ja ya t'ʉhnini bi nest'ihi bá gat'i ja rá hyo ra ndehe ne go rá mʉdi bi zøñ'ʉ. 34Y nu mi zønga ra motsa ja ra ña̱nga ndehe, bi ga̱i ra Jesu ne bi hyanda nú'a̱ ra hmuntsja̱'i xqui zønini, ne xi bi huequi'ʉ ngue'a̱ mi ngu ya dɛti jo'o yá ma'yo, hangue nu'á̱ bi mʉdi bi xahni'ʉ ndunthi ya t'øt'e. 35Ha nu de ya mi nde, ya nxadi bi joni habʉ mi 'bai ra Jesu ne bi 'ñembabi: ―Ya bi nde ne nuua habʉ dí 'bʉhʉ go ra mbonthi. 36Xipa ya ja̱'i da ma da dai te da zi ja ya ngu ne ja ya hnini nú'ʉ ja guetbʉ de guecua, ngue'a̱ otho te da ziuayʉ. 37Pe ra Jesu bi da̱di: ―Go da umfʉ te da ziyʉ. Nu'bʉ́ ya nxadi bi 'ñembi: ―¿Ha gue ga mahe ga tañhe yo nthebe denario dega thuhme pa ga 'uiñheyʉ? 38Pe ra Jesu bi 'yambabi'ʉ ne bi 'ñembi: ―¿Hangu ya thuhme guí ha̱hʉ? Nuhʉ xa̱. Y nu mi hyandi'ʉ bi 'ñembabi: ―Nsøcta cʉt'a ya thuhme ne yoho ya zi hua̱ dí ha̱he. 39Nu'bʉ́ ra Jesu bi xipa ya ja̱'i da 'yøt'a ya t'ʉca hmunts'i ne da hñudi'ʉ ja ra 'bot'ɛi. 40Hangue bi 'yøt'a ya t'ʉca hmunts'i dega nthebe ne dega ndenthebe, ne bi hñudi'ʉ. 41Nu'bʉ́ ra Jesu bi gʉ nú'ʉ cʉt'a ya thuhme ne nú'ʉ yoho ya hua̱, ne bi nøts'e mahets'i ne bi umba njama̱di Ajua̱ rá Dada. Nepʉ bi hyeca ya thuhme ne bi hyecua yá nxadi pa da umba ya ja̱'i, ne bi xɛni nú'ʉ yoho ya hua̱ pa bi thecua gatho nú'ʉ ya hmuntsja̱'i. 42Y gatho bi ñuni asta bi niña̱'ʉ. 43Nepʉ bi hmunts'a gatho ya xɛca thuhme ne ya xɛca hua̱ nú'ʉ bi bongui, ne bi ñuxa 'rɛt'amayoho ya 'bøts'e. 44Ha mi ngu cʉt'a 'mo ya 'ñøhø nú'ʉ bi ñuni, y nuya 'bɛhña̱ ne ya ba̱tsi himbi ma 'mede. 45Nepʉ ra Jesu bi xipa yá nxadi gue da 'mɛt'o'ʉ co ra motsa pa ri'nandi pa rí mani ja ra hnini Betsaida, y nu'á̱ bi gohini mi edi ya ja̱'i pa da ma ja yá ngu. 46Y mi uadi bi 'ñedi'a̱, bi bøxa ja ra t'øhø pa bá apabi Ajua̱ rá Dada. 47Y ya mi 'mɛxuui ra pa'a̱ ra motsa ya mi 'yo madetho ra ndehe, ha nura Jesu mi 'bʉtritho ja ra t'øhø sɛhɛ. 48Y bi hyanda yá nxadi gue ya xqui zabi'ʉ de mi 'yonga ra motsa ngue'a̱ mi tsɛdi ra bʉnthi ne himi hopi da 'ño. Y nurá hyax'a̱ hamxuditho ra Jesu bi ma pa ri'nandi mi 'yotho maña̱ ja ra dehe, ne mi ma da tho'tshma̱ yá nxadi. 49Pe yá nxadi bi hyandi mi 'yo maña̱ ja ra dehe ne xi bi mafi'ʉ ngue'a̱ mi hu yá mʉi gue mi 'nara pite. 50Ri gatho'ʉ bi hyandi ne xi mi tsu'ʉ. Pe ra Jesu 'bestho bi zofo ne bi 'ñembi'ʉ: ―¡Oguí tsuhʉ, go gueque, oguí tu ri mʉihʉ! 51Nepʉ bi bøxa ja ra motsa con gue'ʉ ne 'bestho bi ntsaya ra bʉnthi, hangue yá nxadi xi bi 'yø nts'ɛdi. 52Himi pa̱di'ʉ te ma ts'ɛdi mi ha̱, nixi xqui zoda yá mfeni hanja xqui japi da xu ya thuhme, ngue'a̱ xmá me yá coraso'ʉ. 53Nu mi 'rats'i'ʉ pa ri'nandi bi zøni ja ra hai Genesare ne ja bi da̱t'ni yá motsa. 54Y ngu bi ga̱i'ʉ de ra motsa, ya ja̱'i 'bestho bi ba̱di gue go mi gue'a̱ ra Jesu. 55Nepʉ nu'ʉ́ bi da̱ma ma ja ya ngu gatho rá nthets'i nura hai'a̱ pa bá tsi ya da'thi co yá 'bebo ne bi ts'its'i pa habʉ xqui t'øde mi 'bʉ ra Jesu. 56Y habʉraza mi pa'a̱ ja ya da̱nga hnini o ja ya t'ʉca hnini, ya ja̱'i mi tsi ya da'thi mi pɛgui ja ya 'ñu, ne ora mi thohni ra Jesu mi ba̱ntebi ya ja̱'i gue da hopa ya da'thi da dambabi masque hønsɛ rá ña̱ni rá he. Ne toraza mi thambabi, 'bestho mi ña̱ni de yá hñeni.

will be added

X\