NSAN MARCO 5

1Nepʉ ra Jesu ne yá nxadi bi zøni ja ra hai Gadara de ri'nandi ra ndehe. 2Y ra Jesu bi ga̱i de ra motsa, y 'bestho bi nthɛui 'nara 'ñøhø xqui 'ñehe de habʉ ja ya nt'agui ne mi pɛ'tsa ya ts'onda̱hi. 3Nura 'ñøhø'a̱ ya xi ja mi 'bʉhni ja ya nt'agui, ne hinto mi tsa da za̱mi masque dra tha̱t'i co ya cadena. 4Ndunthi ya 'mi'qui xcrí tha̱t'i co ya cadena ja yá 'yɛ ne ja yá ua, pe nu'á̱ mi c'ʉctho ne mi øt'e ya xɛnitho, ne hinto mi ja rá ts'ɛdi pa da za̱mi. 5Ma pa ra xuui mi 'yo ja ya t'øhø ne ja ya nt'agui ne nza̱ntho mi mafi ne mi ntsɛni sɛhɛ co ya do. 6Pe nú'a̱ ra 'ñøhø mi hyanda ra Jesu de yabʉ, bi nest'ihi bi ma bá tsʉdi ne bi ndandiña̱hmu. 7Nepʉ bi mafi nts'ɛdi ne bi 'ñena: ―Nu'i Jesu, rá T'ʉ'i Ajua̱ de mahets'i, ¿te 'bɛ guí ne con guecje? Dí ba̱nte'ihe ja rá thuhu Ajua̱ gue ote xqui ma gui 'yøtcahe. 8Bi ma̱ njabʉ ngue'a̱ ra Jesu ya xqui 'ñembabi: ―¡Nu'ahʉ ts'onda̱hihʉ, pøñhʉ de nuna ra 'ñøhø! 9Nepʉ ra Jesu bi 'yambi: ―¿Te rá hu'ahʉ? Y nu'ʉ́ bi da̱di bi 'ñena: ―Xa thu'mgahe ya 'motho ngue'a̱ xi dí ndunthihe. 10Nepʉ nuya ts'onda̱hi'ʉ xi bi ba̱ntebi ra Jesu gue hinda 'yɛni de ra hai Gadara. 11Ne guetbʉ ja ra t'øhø mi 'yoni 'nara da̱nga taxo ya ts'ʉdi mi ñuni. 12Hangue nú'ʉ ya ts'onda̱hi bi ba̱ntebi ra Jesu ne bi 'ñembi: ―'Racje nsɛqui ga ma ga cʉtheni ja ya ts'ʉdi. 13Nu'bʉ́ ra Jesu bi umba nsɛqui bi ma'ʉ pa bi yʉt'a ja ya taxo ts'ʉdi. Y nuya taxo ts'ʉdi'ʉ bi nest'ihi bi nhyøt'a ja ra ndehe ne bi ja̱t'i'ʉ. Ne nú'a̱ ra taxo mi ngu yo 'mo. 14Nu'bʉ́ nú'ʉ ya mapts'ʉdi bi nest'ihi bi ma'ʉ pa mbo ra hnini ne gatho rá nthets'i pa mi xipa ya ja̱'i de nú'a̱ te xqui nja. Nepʉ ndunthi ya ja̱'i bi 'ñehe pa da hyandi te xqui nja. 15Nú'ʉ́ bi zøhø habʉ mi 'bʉi ra Jesu ne mi 'bʉhni nehe nú'a̱ ra 'ñøhø to'o mi pɛ'tshma̱ ya ts'onda̱hi, ne bi hyandi'ʉ mi huhni, ya mi he rá dutu ne ya mi ja rá mfeni. Nu'bʉ́ xi bi 'yø'ʉ ngue'a̱ nu'ʉ́ mi pa̱di gue nura 'ñøhø'a̱ xi mi pɛ'tsa ndunthi ya ts'onda̱hi hma̱ha̱. 16Nepʉ nuya ja̱'i to'o xqui hyandi te bi tho ya ts'ʉdi ne ra 'ñøhø to'o mi pɛ'tsa ya ts'onda̱hi, bi metuabi ma'ra, ne xi bi 'ño ra 'bede. 17Hangue ya me Gadara bi mʉdi bi ba̱ntebi ra Jesu gue da bøni de guehni. 18Y nu mi yopa bøxa ra Jesu ja ra motsa, ra 'ñøhø nú'a̱ to'o mi pɛ'tsa ya ts'onda̱hi bi ba̱ntebi'a̱ gue da hopi da mɛui. 19Pe ra Jesu himbi hopi, bi 'ñembi: ―Grí ma ri ngu ne bá xipa gatho ri ja̱'i de gatho nú'ʉ ya t'øt'e xa 'yø't'a'i Ajua̱ ngue'a̱ bi huec'a'i. 20Hangue bi ma nú'a̱ ra 'ñøhø nuni ja ra hai Decápoli ne ja bi 'mʉhni bi xipa ya ja̱'i de nú'a̱ te xqui 'yø'tuabi ra Jesu, ne gatho to'o bi 'yøde xi bi 'yø'ʉ. 21Ra Jesu ne yá nxadi bi yopa 'raxa ma'na'qui pa ri'nandi ra ndehe, ne ja bi mani 'nara hmuntsja̱'i pa bá tsʉdi'a̱ ja ra ña̱nga ndehe habʉ bi zøhø. 22Nehe bi zønini 'nara 'ñøhø mrá thuhu ra Jairo y mi gue'a̱ 'na de nuya nda̱ de ja yá nija̱'ʉ. Y nu mi hyanda ra Jesu bi ndandiña̱hmu ja yá ua'a̱. 23Nepʉ bi ba̱ntebi bi 'ñembi: ―Ma zi t'ixu ya ma da du. Maha pa gui hñu'tsua ri 'yɛ pa nu'á̱ da ña̱ni y hinda du. 24Hangue ra Jesu bi mɛui'a̱, ne 'nara da̱nga hmunts'i bi dɛni ne xi xmá nts'i'mi. 25Nehe mi pani 'nara 'bɛhña̱ mi xo'tua ya ji, ya mi pɛ'tsa 'rɛt'amayoho njɛya mi tsʉ nura hñeni'a̱. 26Xqui degue gatho rá boja̱ ja ya medico y ni ts'ʉ hinxqui zamahño, ma'na mi 'yo mri za'yɛ. 27Nú'a̱ ra 'bɛhña̱'a̱ xqui 'yøde nú'a̱ mi øt'a ra Jesu, hangue bi dɛni ja ra hmuntsja̱'i, bi joni ne bi dambabi rá he. 28Ngue'a̱ mi bensɛ'a̱ gue masque hønsɛ rá he da dambabi, nu'á̱ da ña̱ni. 29Y nu mi dambabi rá he, 'bestho bi tsaya ra ji, ne bi za gue ya xqui ña̱ni de rá hñeni. 30Y ra Jesu 'bestho bi ba̱tho gue co rá ts'ɛdi xqui ña̱nga 'nara da'thi, hangue bi ñegui ne bi 'ñena: ―¿To'o xa dangagui ma he? 31Pe yá nxadi bi 'ñembabi: ―Guí handi gue ra hmuntsja̱'i ri ts'ip'a'i ne guí ena gue to xa dañ'a'i. 32Nu'bʉ́ ra Jesu bi nhyani ja gatho ra hmuntsja̱'i pa da ba̱di to'o xqui dambabi rá he. 33Y nura 'bɛhña̱'a̱ ya mi pa̱di te xqui nja, hangue bi joni co ndunthi ra ntsu ne mi hua̱t'i'a̱, nepʉ bi ndandiña̱hmu ja yá ua ra Jesu ne bi xipabi te xqui ja'a̱. 34Nepʉ ra Jesu bi 'ñembi: ―Ma zi t'ixu'i, ya guí 'bʉi xá hño ngue'a̱ xi xcá camfrigui. Grí ma te rá 'ñentho ne ya hinda ma da yopa menga ri hñeni. 35Y de mi ña̱ui ra Jesu nura 'bɛhña̱, bi zøhø 'nara 'mɛhni xqui 'ñehe de rá ngu nú'a̱ ra nda̱ de ra nija̱, ne bi 'ñembi: ―Ya bi du ri t'ixu. ¿Pa te gui xuhña ra xahnate gui tsixa ja ri ngubya? 36Pe ra Jesu ngu mi 'yøde nú'ʉ ya noya bi ma̱nga ra 'mɛhni, bi 'ñemba ra Jairo: ―Odi tu ri mʉi, hønsɛ xi da camfrigui. 37Nepʉ bi zixa ra Pedro, ra Cobo ne ra Xuua rá cu ra Cobo, ne himbi hopa ma'ra ya ja̱'i da dɛni. 38Y nu mi zøni'ʉ ja rá ngu nú'a̱ ra nda̱, bi hyandi mi 'bʉhni ndunthi ya ja̱'i mi mantho ne xi mi zoñ'ʉ. 39Nu'bʉ́ ra Jesu bi yʉt'a ja ra ngu ne bi 'ñemba ya ja̱'i: ―¿Hanja guí zoñhʉ ne guí manthohʉ? Nura nxutsi a̱ha̱tho, hingue xa du. 40Pe ya ja̱'i bi dentho. Nu'bʉ́ ra Jesu bi 'bɛpa gatho ya ja̱'i da bøni de ra ngu, nepʉ bi zixa rá na̱na̱ ne rá dada ra nxutsi, ne co nú'ʉ mi 'ñoui bi yʉt'a habʉ mi 'bɛni. 41Y bi mipa rá 'yɛ, ne bi 'ñembi: ―Talitha, cumi. ―Nura noya'a̱ ne da 'ñena: Ma zi t'ixu'i, dí xi'a'i gui nangui. 42Nepʉ 'bestho bi nangui ne bi 'ño. Hangue ya ja̱'i xi bi 'yø nts'ɛdi. Y nú'a̱ ra nxutsi'a̱ mi pɛ'tsa 'rɛt'amayoho njɛya. 43Pe ra Jesu bi hñu'mba ra hña̱ gatho nú'ʉ mi 'bʉhni gue ni 'na hinto da xipi de nú'a̱ xqui 'yøt'a̱. Nepʉ bi manda gue da t'umba te da zi nú'a̱ ra nxutsi.

will be added

X\