NSAN MARCO 4

1Ra Jesu bi yopa mʉdi da xahna ya ja̱'i ja ra ña̱nga ndehe, ne ja bi thets'ini ndunthi ya ja̱'i, hangue nu'a̱ bi 'yøt'e, bi bøts'e bi hñudi ja 'nara motsa mbo ja ra dehe, ne gatho ra hmuntsja̱'i bi gohi ja ra ña̱nga ndehe. 2Ne mi utua ya ja̱'i ndunthi ya t'øt'e co ya 'bede, ne bi 'ñembabi'ʉ: 3―'Yødehʉ núna ma ga xi'ahʉ de 'nara mot'i. 4De nu mi xanga ya nda, 'ra bi zo ja ra 'ñu y ya ts'ints'ʉ bi 'ñehe bi gondi. 5Ma'ra ya nda bi zo ja ra 'bodo habʉ xmá nxini ra hai hangue bi da̱ma føts'e. 6Pe nu mi nzø ra hyadi bi huixqui ne bi 'yot'i'ʉ ngue'a̱ mi otho ndunthi yá 'yʉ. 7Ma'ra ya nda bi zo ja ya 'bo'bini, y ya 'bini bi da̱ma nte ne bi xumi nú'ʉ ya nda xqui føts'e, hangue bi 'yot'i ne himbi hogui. 8Pe nu ma'ra ya nda bi zo ja ra hoga hai, bi føts'e ne bi nte, ne bi unga yá sofo, 'ra bi unga 'natema'rɛt'a ya nda, ma'ra bi unga hñu'rate, ha nu ma'ra asta bi unga 'na nthebe ya nda. 9Nu'bʉ́ ra Jesu bi 'ñembi'ʉ: ―Nu'a̱ tó'o ja rá nt'øde pa da 'yøde, dá 'yøde núna dí ma̱. 10Y nu de ya xqui ma ra hmuntsja̱'i, nu'bʉ́ nú'ʉ 'rɛt'amayoho yá nxadi ne nú'ʉ ma'ra xqui gohi, bi 'yambabi'ʉ ra Jesu bi 'ñembi: ―¿Te ne da ma̱ nú'a̱ ra 'bede gá xicje? 11Y nu'á̱ bi 'ñembi'ʉ: ―Go rá paha Ajua̱ gui pa̱hʉ nú'a̱ himi fa̱di maya'bʉ de hanja ri manda Ajua̱, pe nu'ʉ ma'ra ya ja̱'i nú'ʉ hingui dɛna Ajua̱ ma da 'yøde co ya 'bedetho. 12Ma da nja ngu ma̱nga ra Ma̱ca T'ofo, gue masque da hyandi'ʉ, pe hinda zo yá mfeni, masque xi da 'yøde, pe hinda ba̱di'ʉ, hangue hinda ma da ñobri pa hindra pumbabi yá ts'oqui. 13Nehe bi 'ñembabi'ʉ: ―¿Ha gue himbi zo ri mfenihʉ nuna ra 'bede de ra mot'i? Nu'bʉ́ ¿hanja da za gui pa̱hʉ ma'ra ya 'bede nú'ʉ ma ga xi'ahʉ? 14Nu'a̱ ra mot'i go gue'a̱ to'o ma̱nga ra ma̱ca noya. 15Y nu'ʉ ya nda bi zo ja ra 'ñu go gue'ʉ to'o bi 'yøde ra ma̱ca noya, y ra Satá 'bestho bi 'ñehe bi patua yá mfeni pa da pumfri nú'a̱ ra ma̱ca noya xqui sipabi. 16Ha nu'ʉ ya nda bi zo ja ra 'bodo go gue'ʉ to'o bi 'yøde ra ma̱ca noya y 'bestho bi da̱ma gamfri y ne xi bi johya. 17Pe ngu nú'ʉ bi 'ñotho yá 'yʉ, go gue'ʉ to'o camfri 'raya zi patho, ne sta tho ya nt'ʉtsate o ya ts'othogui po rá ngue ra ma̱ca noya, nu'bʉ́ 'bestho da 'uegue'ʉ. 18Ha nu'ʉ ya nda bi zo ja ya 'bo'bini go gue'ʉ to'o bi 'yøde ra ma̱ca noya, 19pe nu'ʉ́ ri ho ndunthi ya ts'ojohya de ra ximhai, ne beni hanja da za da mɛ'tsa ndunthi ya t'øt'e ne da da̱ha̱ ndunthi ra boja̱. Hangue nuya ya ts'onc'at'i hingui hopi da te yá jamfri, ne nú'a̱ bi 'yøde da 'mɛditho. 20Ha nu'ʉ ya nda bi zo ja ra hoga hai bi unga yá sofo, 'ra bi unga 'natema'rɛt'a ya nda, ne ma'ra bi unga hñu'rate, ha nu ma'ra 'na nthebe, nu'ʉ́ go gue'ʉ to'o bi gamfri ra ma̱ca noya ne xi bi hnequi yá hoga 'bɛfi. 21Ra Jesu bi yopa zofo ra hmuntsja̱'i ne bi 'ñembabi: ―Hinto da tsøgue 'nara ñot'i ne da ye'mba 'nara 'bøts'e o da ja nja'ti de ra fidi. Hina, dra tøte habʉ da nøgue pa da yot'i xá hño. 22Njabʉ nehe nú'a̱ ja mant'a̱guibya, 'mɛfa ma da hnequi, ne nú'a̱ hingui tsa da fa̱dibya, 'mɛfa ma da fa̱di. 23Nu'a̱ tó'o ja rá nt'øde pa da 'yøde, dá 'yøde núna dí ma̱. 24Nehe bi 'ñembi'ʉ: ―Ngu t'ena, co nura t'ɛni guí ɛñhʉ, con guet'atho ma da t'ɛñ'ahʉ, y asta ma'na da thu'ts'a'ihʉ ri t'ɛnihʉ. Hangue dí xi'ahʉ, jamasuhʉ hanja gui 'yødehʉ nú'a̱ dí ma̱, ngue'a̱ nu'bʉ gui jamasuhʉ, ma da zo ri mfenihʉ, pe nu'bʉ hingui jamasuhʉ, hinda za gui pa̱hʉ. 25Ngue'a̱ nu'a̱ tó'o da ba̱di nú'a̱ dí ma̱, ma'na da t'umbabi ra mfa̱di, pe nu'a̱ tó'o hinxa ba̱di, nú'á̱ ma da tha̱cuabi nú'a̱ ra mfa̱di pɛ'tsi. 26Nehe bi xipabi'ʉ: ―Rá hmanda Ajua̱ nja ngu 'nara 'ñøhø pot'a ya nda. 27Y nú'a̱ ra mot'anda'a̱ a̱ha̱ dega xuui ne nangui dega xudi bí c'a̱'tsa rá 'bot'i. Ne nú'a̱ ra 'bot'i'a̱ da føts'e ne da nte, pe nú'a̱ ra 'ñøhø hingui pa̱di hanja xa njabʉ. 28Ra hai øt'e pa da føts'e, da nte, da hneca rá 'bai, ne 'mɛfa da bø yá da̱xi. 29Ne ya sta ña̱ts'i, 'bestho nura mot'i'a̱ da ma da xofo ngue'a̱ ya bi zø ra pa dega sofo. 30Nepʉ ra Jesu bi 'ñena: ―Ma ga xi'ahʉ ma'na ra 'bede ri nhyɛcuaui rá hmanda Ajua̱. 31Rá hmanda Ajua̱ nja ngu 'nara nda dega mostasa, nú'á̱ ma'na go ra zi notsi de gatho ma'ra ya nda. 32Pe nu sta 'bot'a nú'a̱ ra nda, ma'na da nte ne da ntʉngui que gatho ma'ra ya nda̱po, ne da nja yá da̱nga 'yɛza asta ya ts'ints'ʉ da za da nøhni. 33Ra Jesu mi xipabi'ʉ ra ma̱ca noya co ndunthi ya 'bede asta habʉ bi za bi zo yá mfeni'ʉ. 34Mi zofo ya hmuntsja̱'i co ya 'bedetho nú'ʉ ri nhyɛcuaui rá hmanda Ajua̱, pe nu'bʉ mi 'bʉsɛui yá nxadi mi xipabi'ʉ te rí bøni nú'ʉ ya 'bede xqui xipabi'ʉ. 35Y nu mi put'a ra nde ra pa'a̱, ra Jesu bi 'ñembabi yá nxadi: ―Ma ga 'raxhʉ ri'nandi ra ndehe. 36Hangue bi 'ñedi'a̱ de ra hmuntsja̱'i, ne nu'á̱ ne yá nxadi bi gʉ ra motsa habʉ mi o'a̱ pa da 'rax'ʉ ri'nandi, ne ma'ra ya ja̱'i bi dɛni'ʉ co ya t'ʉca motsa. 37Y ya de mi 'yo'ʉ ja ra ndehe, bi mʉ 'nara da̱nga bʉnthi ne mi tonts'a ra dehe ja ra motsa asta mi ne xa ñuxhma̱. 38Ha ra Jesu mi a̱ha̱ ja ra ts'a̱t'a motsa ne xqui 'yɛnts'a rá ña̱xu ja 'nara nthuhña̱, ne yá nxadi bi ma bá a, ne bi 'ñembabi: ―¡Xahnate! 'Matho hinguí tu ri mʉi gue ma ga cʉihʉ ja ra dehe. 39Nu'bʉ́ ra Jesu bi nangui ne bi zʉi ra bʉnthi, ne bi 'ñemba ra ndehe: ―¡'Bʉtho! Y 'bestho bi tsaya ra bʉnthi ne ya himbi 'ña̱ni ra ndehe. 40Nu'bʉ́ ra Jesu bi 'ñembabi'ʉ: ―¿Hanja guí tsuhʉ? ¿Ha gue otho ri jamfrihʉ? 41Nu'bʉ́ nuyá nxadi'a̱ bi 'yø'ʉ, ne mi 'ñémsɛ'ʉ 'na ngu ma'na: ―¿Te ma ts'ɛdi ha̱ni 'bʉ? ngue'a̱ asta ra nda̱hi ne ra ndehe øtuabi.

will be added

X\