NSAN MARCO 3

1Ra Jesu bi yʉt'a ma'na'qui ja ra nija̱, ne xqui zønini 'nara 'ñøhø xqui 'yot'a 'nará 'yɛ. 2Y ya fariseo mi aca ra Jesu ua da 'yøthebi rá 'yɛ nura pa dega tsaya, pa da za da ña̱pabi. 3Nu'bʉ́ ra Jesu bi 'ñemba nú'a̱ ra 'ñøhø xqui 'yot'a rá 'yɛ: ―Bá ecua, 'bai ja yá thandi ya ja̱'i. 4Nepʉ bi 'yamba ya fariseo ne bi 'ñembi: ―¿Ha dí 'ñepi 'nara ja̱'i da 'yøt'a 'nara hño ra pa dega tsaya, o da 'yøt'a nú'a̱ hinxá hño? ¿Ha gue xá hño da ña̱mba rá te 'nara ja̱'i, o da hyo'a̱? Pe ya fariseo hinte bi da̱tuabi. 5Nu'bʉ́ ra Jesu bi bø rá cuɛ, ne bi du rá mʉi ndunthi ngue'a̱ nuya fariseo'ʉ himi ja yá nthecate. Hangue bi 'ñemba ra da'thi: ―Tʉnga ri 'yɛ. Y nu'á̱ bi 'yøt'a njabʉ ne 'bestho bi ña̱nga rá 'yɛ. 6Nu'bʉ́ bi bønga ya fariseo ne bi ma bá c'a̱'tsua yá mfats'i ra nda̱ Erode pa bi 'ñʉ'ti'ʉ hanja da za da hyohma̱'ʉ ra Jesu. 7Pe nura Jesu bi ma ja ra ña̱nga ndehe co yá nxadi, ne bi dɛni'a̱ ndunthi ya ja̱'i me Galilea. 8Nehe mi dɛni'a̱ ya me Judea, ne ya me Jerusale, ne ya me Idumea, ne ya me Tiro, ne ya me Sidó co nú'ʉ ya me ri'nandi ra da̱the Jordá. Mi ehe da c'a̱'tsi'a̱ ngue'a̱ xqui 'yøde'ʉ de nú'ʉ ya da̱nga nt'udi mi øt'e. 9Ha ra Jesu bi xipa yá nxadi gue da da̱t'a 'nara motsa guetbʉ ja ra ña̱nga ndehe, ngue'a̱ xi xmá nts'i'mi ja ra hmunts'i co rá ndunthi ya ja̱'i. 10Ra Jesu xqui 'yøthe ndunthi ya da'thi, hangue ringue'a̱ gatho nú'ʉ to'o mri hñeni mri 'ñent'i pa da zʉdi da dani'a̱. 11Y nu'ʉ tó'o mi pɛ'tsa ya ts'onda̱hi, mi hyanda ra Jesu bi ndandiña̱hmu'ʉ ja rá thandi, ne mi mafi mi ena'ʉ: ―Nu'i go gue'e rá T'ʉ'i Ajua̱. 12Nu'bʉ́ ra Jesu bi 'bɛpabi nú'ʉ ya ts'onda̱hi gue hinda xipa ya ja̱'i mi to'o'a̱. 13Nepʉ ra Jesu bi bøxa ja 'nara t'øhø ne bi zohna nú'ʉ to'o xqui huahni, ne nu'ʉ́ bi ma bá munts'ini con gue'a̱. 14Y nu'á̱ bi hñuxa 'rɛt'amayoho ya nxadi pa da 'ñoui, ne pa da mɛhni da zofo ya ja̱'i. 15Ne bi umba ra ts'ɛdi pa da 'yøthe ya da'thi ne da 'yɛnga ya ts'onda̱hi. 16Y nuya guehya yá thuhu nú'ʉ 'rɛt'amayoho yá nxadi: ra Simu nú'a̱ 'mɛfa bi thu'mbabi ra Pedro; 17ra Cobo ne ra Xuua yá t'ʉ ra Sebedeo nú'ʉ bi thu'mbabi ya Boanerge nú'a̱ ne da 'ñena xi ja yá ts'ɛdi ngu ra ngani. 18Bi thuts'i nehe ra Andre, ra Lipe, ra Tolo, ra Teo, ra Toma, ra Cobo rá t'ʉ ra Alfeo, ra Tadeo, ne ra Simu nú'a̱ xqui 'ñoui nú'a̱ ra hmunts'i rá thuhu ya cananista, 19ne ra Juda Iscariote nú'a̱ to'o bi da ra Jesu. Nu mi ga̱i ja ra t'øhø ra Jesu ne yá nxadi bi yʉt'i'ʉ ja nú'a̱ ra ngu xqui mihi. 20Nu'bʉ́ bi yopa munts'a ma'na'qui ndunthi ya ja̱'i asta himi tsa da ñunga ra Jesu ne yá nxadi. 21Nepʉ bi 'yøde nuya mengu rá ngu ra Jesu gue hinte xqui zi'a̱, hangue bi 'ñehe'ʉ pa da zits'i'a̱ ngue'a̱ mi eñ'ʉ gue xqui 'bɛ rá mfeni. 22Nehe 'raya xahnate de ra ley xqui 'ñehe de Jerusale mi 'ñémbi'ʉ: ―Nuni ra Jesu pɛ'tsa ra Beelsebú nú'a̱ ra nda̱ de ya ts'onda̱hi, ne ha̱mpa rá ts'ɛdi'a̱ pa da 'yɛnga nú'ʉ ma'ra yá mits'onda̱hiui. 23Hangue ra Jesu bi ma'ta nuya xahnate'ʉ pa bi xipa 'nara 'bede ne bi 'ñembi: ―¿Ha gue da za ra ts'onda̱hi da 'yɛnga yá mits'onda̱hiui? 24Nu'bʉ 'nara hnini da hegue sɛhɛ, da nhuata gatho ra ts'ʉtbi. 25Y nu'bʉ 'nara 'mʉi da 'ñʉtsa 'na ngu ma'na, hinda za da 'mʉi 'nadbʉ'ʉ. 26Y nu'bʉ ra ts'onda̱hi da ntuhni co yá mits'onda̱hiui, nu'bʉ́ da nhuata yá ts'ʉtbi'ʉ. 27Nixi hinto da za da yʉt'a ja rá ngu 'nara 'ñøhø nú'a̱ xi o rá ts'ɛdi, ne da bepabi nú'a̱ te pɛ'tsi nu'bʉ hingue 'mɛt'o da du'ti. Njabʉ ha̱, da za da bepabi. 28Majua̱ni dí xi'ahʉ, gatho ya ts'oqui ne ya ts'one da za dra punbabi ya ja̱'i, 29pe nu'a̱ tó'o da ña̱ma'ñʉ de nú'a̱ øt'a ra Ma̱ca Nda̱hi, otho rá pumbate, ne da duxa rá ts'oqui pa nza̱ntho. 30Bi ma̱ njabʉ ngue'a̱ ya xahnate de ra ley ya mi ña̱ma'ñʉ de rá 'bɛfi ra Ma̱ca Nda̱hi, ngue'a̱ xqui ma̱ñ'ʉ gue ra Jesu mi pɛ'tsa 'nara ts'onda̱hi. 31Ne 'mɛfa bi zøhø rá na̱na̱ ra Jesu co yá høcu, bi 'mai'ʉ møte ne bi mɛhni to da tsi'a̱. 32Ne ndunthi ya ja̱'i xqui munts'i ja ra ngu ne mi huhni ja rá nthets'i ra Jesu. Nepʉ ra 'mɛhni bi xipabi ne bi 'ñembi: ―'Bahni ri na̱na̱ ne ri cu møte bí tøp'a'i. 33Ha nu'á̱ bi da̱di: ―¿To'o ma na̱na̱ga, ne to'o ma cuga? 34Nu'bʉ́ bi nhyani ne bi hyanda gatho nú'ʉ mi huhni ja rá nthets'i ne bi 'ñena: ―Nuyʉ go guehyʉ ma na̱na̱ ne ma cu. 35Ngue'a̱ nu'ʉ tó'o da 'yø'tua rá paha Ajua̱, go gue'ʉ ma cu, ma nju ne ma na̱na̱.

will be added

X\