1 Nurá hyax'a̱ xi 'nitho ya nda̱ gá macja̱ ne ya nda̱xjua nda̱ ne ya xahnate de ra ley, ne gatho ra hmunts'a nda̱ gá xodyo bi munts'i 'nadbʉ pa bi go 'nara cohi'ʉ te da 'yøt'e co ra Jesu. Nepʉ bi da̱t'i'ʉ bi zits'i bá ɛnt'ua ja rá 'yɛ ra nda̱ Pilato. 2 Nu'bʉ́ ra nda̱ Pilato bi 'yamba ra Jesu bi 'ñembi: ―¿Ha go gue'e grá Nda̱ de ya xodyo? Ha nura Jesu bi da̱di: ―Ha̱ha̱, gue'a̱ ngu nú'a̱ xcá ma̱. 3 Ha nuya nda̱ gá macja̱ xi mi ña̱pabi'a̱. 4 Hangue ra Pilato bi yopa 'yambabi ne bi 'ñembi: ―¿Ha gue hinte guí tha̱di de gatho nú'a̱ xcá 'yøde xa ma̱ñ'ʉ? 5 Pe ra Jesu hinte bi da̱di. Hangue ra Pilato xi bi 'yø. 6 Tat'a jɛya ra Pilato mri nza̱i da hyɛgui 'nara 'yofadi pa nú'ʉ ya pa de ra ngo, y nza̱ntho mi hɛgui nú'a̱ go da 'yadi nú'ʉ ya ja̱'i mi 'yo ja ra ngo. 7 Ha xqui njot'a fadi 'raya ja̱'i ngue'a̱ xqui 'ñøt'atuhni pa da 'yɛnga ya nda̱ de ra hnini ne xqui nhyote'ʉ. Y 'na de gue'ʉ mrá thuhu ra Barraba. 8 Nu'bʉ́ bi munts'a ya ja̱'i habʉ mi hu ra Pilato pa da 'yadi da thøgue 'nara 'yofadi ngu yá nza̱i. 9 Nu'bʉ́ ra Pilato bi 'yambabi'ʉ ne bi 'ñembi: ―¿Ha guí ne ga hɛc'a'ihʉ núni t'embi ra Nda̱ de ya xodyo? 10 Bi 'ñani njabʉ ra Pilato ngue'a̱ mi pa̱di gue co yá cuɛ ya nda̱ gá macja̱ bi gʉ ra Jesu ne bi dapabi, ngue'a̱ nu'á̱ xi ya mi dɛni ndunthi ya ja̱'i. 11 Pe nuya nda̱ gá macja̱ bi 'yʉ'ta ya ja̱'i pa bi 'yadi dra thɛgui ra Barraba. 12 Nu'bʉ́ nura Pilato bi yopa 'yamba ya ja̱'i ne bi 'ñembabi: ―Nu'bʉ́, ¿te 'bɛ guí adihʉ ga ø'tua ra Jesu núni guí emfʉ ra Nda̱ de ya xodyo? 13 Nu'bʉ́ ya ja̱'i 'ra gá mafitho bi 'ñena: ―¡Dá 'bont'i pa ja da duni! 14 Nu'bʉ́ ra Pilato bi yopa 'yambabi'ʉ ne bi 'ñembabi: ―¿Te ma ts'oqui xa 'yøt'ni? Pe nuya ja̱'i ma'na xi mri mantho ne mi eñ'ʉ: ―¡Dí ahe dra 'bont'i! 15 Nu'bʉ́ ra Pilato pa da pønga rá hmi co yá ja̱'i, bi hyɛgui ra Barraba, ne bi manda bri fɛt'a ra Jesu, nepʉ bi 'yɛnt'ua ja yá 'yɛ yá soldado pa da zits'i ma da pont'a ja ra ponza. 16 Hangue ya soldado bi zixa ra Jesu ja ra patio de ra ts'ʉtbi, y ja bi munts'ni gatho ya soldado. 17 Nepʉ nu'ʉ́ bi hyete ra Jesu co 'nara thɛnga he ngu nú'ʉ he ya nda̱, ne bi met'a ya 'bini pa bi hoca 'nara corona, ne bi hñu'tsua ja rá ña̱xu. 18 Ha mi ø'tua ra nt'eni'a̱ ne mi zɛngua mi embabi: ―¡'Bʉi pa nza̱ntho, nú'i ri t'equ'ei rá Nda̱'i ya xodyo! 19 Ne mi na'mbabi rá ña̱xu co 'nara ts'ʉt'o ne mi tsots'i. Nepʉ mri ndandiña̱hmu pa mri nda̱ne'ʉ, 'ñena xi majua̱ni mi numansu. 20 Nepʉ mi uadi bi 'yø'tua ra nt'eni bi møcuabi ra thɛnga he, ne bi yo hyetuabi nú'ʉ xi myá he. Nepʉ bi zits'i'ʉ pa da pont'i. 21 De mi bønga de ja ra hnini bi nthɛui'ʉ má 'ñu 'nara 'ñøhø xqui 'ñe ja ra mbonthi. Nura 'ñøhø'a̱ mrá thuhu ra Simu mrá me Cirene ne go mrá dada ra Jandro ne ra Rufo. Ha nuya soldado bi japa nú'a̱ ra 'ñøhø da ndudebi rá ponza ra Jesu. 22 De guehni bi ts'ixa ra Jesu ja 'nara luga rá thuhu Golgota nú'a̱ rí bøni da 'ñena Ña̱xmadu. 23 Nepʉ ya soldado bi umbahma̱ ra vinu xqui ntha̱nts'ui ra mirra, pe nu'á̱ himbi ne bi zi. 24 Nepʉ nu'ʉ́ bi pont'a ja ra ponza. Nepʉ bi nhyegue 'ra 'na nú'ʉ yá he, ne nu ma'na rá he bi ma ra ta̱ha̱ to'o da da̱ha̱. 25 Ne ngu mi nzʉnga gʉto xudi nura ora bri pont'i'a̱. 26 Nuyá nza̱i'ʉ, da thøta 'nara t'ofo ja ra ponza de nú'a̱ xa 'yøt'a nú'a̱ ra ja̱'i pa hanja bi t'ɛ'mbi bi tho. Hangue ja rá ponza ra Jesu bi thøte gue go ra Nda̱ de ya xodyo. 27 Nehe ja bri pont'ni mahyɛgui con gue'a̱ yoho ya be, 'na ja rá 'ñɛi, nu ma'na ja rá nga̱ha̱. 28 Hangue bi njabʉ ngu nú'a̱ xqui t'ofo ja ra Ma̱ca T'ofo habʉ ena: “Nu'á̱ bi thandi ngu 'nara da̱ga 'yøt'ats'oqui.” 29 Ha nuya ja̱'i nú'ʉ mi thohni nu'a̱raza mi xipa ra Jesu, ne mi bʉt'a yá ña̱xu ne mi embi: ―¡Ha̱ha̱! ne gue nu'i gá ena gue ma gui yø'ta ra nda̱nija̱ nepʉ rá hñupa gá ena gue xcá yopa 'ba'ma ma'na'qui, 30 mpøhø sɛhɛ ne ca̱i de nú'a̱ ra pont'i xa̱. 31 Ne ya nda̱ gá macja̱ mi øt'a buhlatho de ra Jesu mi 'ñémbi'ʉ: ―Nuní mi ena gue mi pøhø ya ja̱'i, pe nubyá hingui tsa go da mpøhø sɛhɛ. 32 'Bʉ xi majua̱ni go guehni ra Cristo nú'a̱ go rá Nda̱ ya me Israel, dá ga̱ibya de ra pont'i xa̱. Nu'bʉ ga hanthe da ga̱i, nu'bʉ́ ha̱, ga camfrihʉ nú'a̱ mi ma̱ni. Ne nú'ʉ xqui mpont'uini mahyɛgui mi ña̱ma'ñʉ'ʉ nehe de gue'a̱. 33 Nepʉ ngu nde ma pa bi 'mɛxuui maxøgue ra ximhai, ne asta ngu nzʉnga hñu nde ja bi yopa hnequi ma'na'qui. 34 Y nura ora'a̱, ra Jesu bi ña̱ xi nts'ɛdi ne bi 'ñena: ―Eloi, Eloi, ¿lama sabactani? ―nú'a̱ rí bøni da 'ñena: Ma Dada'i, ma Dada'i, ¿hanja xcá hyɛgasɛhɛua? 35 Ne 'raya ja̱'i mi 'bahni bi 'yøde nú'a̱ mi ma̱, ne bi 'ñena: ―'Yøhʉ, nuní ma'ta ndu ra ba̱di Elía. 36 Nepʉ 'nara 'ñøhø bi nest'ihi bi pobo 'nara esponja co ra ju'tsa vinu ne bi tøta ja 'nara ts'ʉt'o, ne bi umba ra Jesu pa da zʉt'i. Y nura 'ñøhø'a̱ bi 'ñembabi ya ja̱'i: ―Ga tø'mhʉ ga nuhʉ ua da zø ra Elía da ca̱'mi de ja ra pont'i. 37 Nepʉ ra Jesu bi dø 'nara hmafi xi nts'ɛdi ne bi du. 38 Y nura ora'a̱ bi xø nú'a̱ ra da̱nga dutu mi naxa mbo ra nda̱nija̱ pa mi juti nú'a̱ habʉ ma'na xi xmá nsunda, ne bi xøgue maña̱ asta bi zønga nja'ti. 39 Ha nú'a̱ ra nda̱ gá soldado mi 'bahni guetbʉ habʉ xqui 'bont'a ra Jesu bi hyanda xá hño hanja bi du'a̱, ne bi 'ñena: ―Xi majua̱ni go mi guehni rá T'ʉ Ajua̱. 40 Ne mi 'bahni nehe 'raya 'bɛhña̱ mi handatho de yabʉ, 'ra de gue'ʉ go mi gue'a̱ ra Maria Magdalena, ne ra Salomé, ne ma'na ra Maria rá na̱na̱ ra Jose ne ra Cobo nú'a̱ mba̱tsi de nú'a̱ ma'na ra Cobo. 41 Nú'ʉ ya 'bɛhña̱'ʉ xqui dɛna ra Jesu nú'bʉ mbi 'bʉ Galilea, ne go gue'ʉ mi pɛpi. Nehe mi 'bahni ndunthi ma'ra ya 'bɛhña̱ nú'ʉ xqui 'ñoui ra Jesu pa Jerusale. 42 Nura pa'a̱ bri pont'a ra Jesu, go mi 'nara pa dega nthoqui, ngue'a̱ rá hyax'a̱ go ra sabdo ra pa dega tsaya. 43 Hangue 'bestho nura pa'a̱, ya mi ma da yʉ ra hyadi, bi ma ra Jose nú'a̱ mrá me Arimatea bá nu ra nda̱ Pilato, ne bi yʉt'i nsinque ra ntsu pa bi 'yapa nsɛqui da zʉcua rá ndo'yo ra Jesu de ja ra ponza pa da duts'i ma da 'yagui. Nú'a̱ ra 'ñøhø'a̱ mi ja rá nsu ne xi mrá fa̱di ngue'a̱ go mrá nda̱ nehe de ra hmunts'a nda̱ gá xodyo. Ne'a̱ nehe mi tø'mtho ha'mʉ da zøhø rá 'mɛhni Ajua̱ pa da nda̱. 44 Pe ra Pilato mi hu rá mʉi gue hinxqui dutho, hangue nu'á̱ bi zohna ra nda̱ gá soldado pa bi 'yambi ua ya xqui du. 45 Y nu mi xipi gue ya xqui du, nu'bʉ́ ra Pilato bi umba nsɛqui ra Jose da duts'i. 46 Nu'bʉ́ ra Jose bi danga 'nara hoga t'axa dutu. Nepʉ bi zʉcua rá ndo'yo ra Jesu de ja ra ponza, ne bi mant'a ja nú'a̱ ra dutu, ne bi duts'i ma bá agui ja 'nara nt'agui nú'a̱ xqui se'ti ja 'nara medo. Nepʉ bi got'i co 'nara da̱nga xingdo. 47 Y ra Maria Magdalena y ma'na ra Maria rá na̱na̱ ra Jose bi hyandatho'ʉ habʉ bi t'acuabi rá ndo'yo ra Jesu.
