NSAN MARCO 14

1Mri 'bɛdi nsøca yo pa pa ra ngo nú'a̱ rá thuhu ra pascua, ne nú'a̱ ra ngo dega ts'ithuhme nsinque rá nzoi. Ha ya nda̱ gá macja̱ ne ya xahnate de ra ley ya mi nu hanja da za da hyat'a ra Jesu pa da gʉ da hyo. 2Ne bi 'ñémbabi'ʉ: ―Hinga øthʉ núna dí beñhʉ de ra pa dega ngo, xi'bʉ da bø yá cuɛ ya ja̱'i ne da ñʉnts'i'ʉ. 3Ha nuya pa'ʉ ra Jesu bi 'mʉhni Betania ja rá ngu ra Simu nú'a̱ to'o xqui ña̱ni de ra lepra nú'a̱ ra hñeni tsit'atho ra ngø. Mi huhni ra Jesu ja ra mexa mri ñuni, nepʉ bi zøhø 'nara 'bɛhña̱ bra hña̱ 'na ngu ra zi xito xqui thoqui de 'nara hoga do rá thuhu ra alabastro, mi po 'nara hoga ñʉni xi xmá ma̱di mrá thuhu ra nardo. Ha nú'a̱ ra 'bɛhña̱ bi do'tsua rá 'yʉga nú'a̱ ngu ra zi xito, ne bi xi'tsuabi ja rá ña̱xu ra Jesu nú'a̱ ra ñʉni'a̱. 4Nepʉ 'ra de nú'ʉ mi 'bʉhni bi bø yá cuɛ ne mri 'ñémbabi 'na ngu ma'na: ―¿Hanja bi 'yøt'a njabʉ nuna 'bɛhña̱ hønsɛ bi manitho nuna hoga ñʉni? 5Nu'bʉ xa 'ba hma̱ha̱ xa muui ngu hñu nthebe denario, y nú'a̱ ra boja̱'a̱ xa za xa thecuahma̱ ya hyoya. Njabʉ bi ma̱nga nú'ʉ to'o mi ña̱ma'ñʉ de nú'a̱ ra 'bɛhña̱. 6Nu'bʉ́ nura Jesu bi 'ñembabi'ʉ: ―Ote guí xiphʉ. ¿Pa te guí ña̱ma'ñʉhʉ de guehni? Xá hño nú'a̱ xa 'yøtcagui. 7Ngue'a̱ nuya hyoya nza̱ntho ma da 'mʉi con gue'ahʉ, ne nu'a̱raza ra pa gui ne gui umfʉ 'nara mfats'i, da za gui umfʉ. Pe nuga hinga nza̱ntho ma ga 'bʉcua con gue'ahʉ pa gui 'yøtcahʉ ra hño. 8Nuna zi 'bɛhña̱ bi 'yøt'e nú'a̱ xa zʉpa rá ts'ɛdi, xa goscagui ja ma ndo'yo nuna ra hoga ñʉni pa ma nt'agui. Bi 'ñenga ra Jesu njabʉ ngue'a̱ nu'ʉ́ ya myá nza̱i mi jo'tsua nuna hoga ñʉni nú'ʉ xa du. 9Nepʉ ra Jesu bi 'ñena: ―Xi majua̱ni dí xi'ahʉ, habʉraza da hma̱nga ra ma̱ca noya, da hma̱ de nuna xa 'yøtca nuna zi 'bɛhña̱ pa 'nara feni de guehni. 10Nepʉ nura Juda Iscariote 'na de nú'ʉ 'rɛt'amayoho yá nxadi ra Jesu, bi ma bá ña̱ui ya nda̱ gá macja̱ pa da dapabi'ʉ ra Jesu. 11Ha nu mi 'yøde ya nda̱ gá macja̱ njabʉ, xi bi johya'ʉ ne 'bestho bi ña̱'tuabi ra boja̱. Hangue nu'á̱ xi mi 'yo rá mfeni hanja da 'yøt'e'a̱ pa da da ra Jesu. 12Ra mʉdi pa de ra ngo dega ts'ithuhme nsi rá nzoi gue'bʉ mi tho ya t'ʉca dɛti pa ra ngo dega pascua. Ha nura pa'a̱ ya nxadi bi 'ñembabi ra Jesu: ―¿Habʉ guí ne grá hñocje pa ga tsihʉ ra nt'oxi de ra pascua? 13Nu'bú ra Jesu bi 'ñembabi yoho yá nxadi: ―Grí maha ja ra hnini ne ja ma grí nthɛhʉni 'nara 'ñøhø di ha̱ 'na xøni ra dehe, ne nú'á̱ go gue'a̱ gui tɛñhʉ'a̱. 14Ne nura ngu habʉ da yʉt'i'a̱, gui 'ñemfʉ nú'a̱ ra me ngu: “Bá pɛncahe ra Xahnate ne bi xicje ga xi'ahe njaua: ¿Habʉ ja ra ngu xcá 'uegagui pa ga tsihe ra nt'oxi de ra pascua co ma nxadi?” 15Y nu ja rá tøngu'a̱ ma da 'ñu't'ahʉ 'nara da̱nga ngu. Nuni ja jani gatho nú'a̱ te ma ga hoñhʉ, ne ja gui hyocjʉni nú'a̱ te ga tsihʉ. 16Hangue nú'ʉ yoho ya nxadi bi ma de guehni pa ja ra hnini y bi zʉdi'ʉ ngu xqui xipabi ra Jesu. Y ja bi hyocni'ʉ ra nt'oxi de ra pascua. 17Y ya de mi put'a ra nde bi zønga ra Jesu con gatho nú'ʉ 'rɛt'amayoho yá nxadi ja nú'a̱ ra tøngu'a̱. 18Nepʉ ya de mi huhni mri ñuni mahyɛgui co yá nxadi, bi 'ñena: ―Majua̱ni dí xi'ahʉ, nú'ahʉ guí 'bʉhʉua guí nt'oxihʉ con gueque, 'na de gue'ahʉ ma gui dagaguihʉ. 19Ha nuyá nxadi xi bi du yá mʉi, ne 'rama'na de gue'ʉ mi ambabi ra Jesu ne mi embabi: ―¿Ha gue go guecagui? 20Nepʉ ra Jesu bi da̱di ne bi 'ñembabi: ―'Na de gue nú'ahʉ guí 'rɛt'amayohohʉ ma nxadi'ihʉ guí tʉhʉhʉbya habʉ dí tʉhʉga, 'na de gue'ahʉ ma gui dagaguihʉ. 21Nú'a̱ To'o bi e bi Nja̱'i ma da thogui gatho ngu nú'a̱ xa t'ofo ja ra Ma̱ca T'ofo, pe ¡huecate nú'a̱ ra 'ñøhø to'o ma da da'a̱! Ma'na xá hño nixi xa 'mʉhma̱. 22Ha nu de mri ñuni'ʉ, ra Jesu bi gʉ ra thuhme ne bi umba njama̱di Ajua̱ rá Dada, bi hyeque ne bi umba yá nxadi, ne bi 'ñembabi: ―Na̱, tsihʉ, nuna go guehna ma ndo'yo. 23Nepʉ bi gʉ 'nara vaso mi po ra vinu, bi umba njama̱di Ajua̱ ma'na'qui ne bi umbabi yá nxadi pa bi zi gatho'ʉ. 24Ne bi 'ñembabi'ʉ. ―Nuna go guehna ma ji ma ga fani pa da mʉdi ra 'ra'yo cohi, nú'a̱ ma da mfani pa gatho ya ja̱'i. 25Majua̱ni dí xi'ahʉ gue ya hinga ma ga yopa tsi ra vinu dega obxi de guecua. Nu'á̱ ma ga yopa tsi ma'na'qui asta nú'a̱ ra pa grá 'bʉhʉ nuni habʉ bí manda Ajua̱ ma Dada, gue'bʉ grá yopa tsi, pe ma'na'ño. 26Nepʉ nu'ʉ́ bi duta 'nara ja̱hña̱, y de guehni bi ma pa ja ra t'øhø 'bo Olivo. 27Nepʉ ra Jesu bi 'ñembabi'ʉ: ―Nura nxuuibya gatho'ihʉ ma da du ri mʉihʉ ne ma gui 'uehʉ de gueque. Ma da nja ngu bi ma̱nga Ajua̱ ma Dada ja ra Ma̱ca T'ofo habʉ ena: “Ma ga ho ra ma'yo, y nuyá dɛti da nxani,” njabʉ bi 'ñena. 28Pe nu xcrá yopa nte de ra du, nuga ma ga 'bɛt'o de gue'ahʉ pa grá ma Galilea. 29Nepʉ ra Pedro bi 'ñembabi: ―Masque gatho nuyʉ ma'ra da 'uegue, pe nuga hinga 'uegue de gue'e. 30Nu'bʉ́ ra Jesu bi 'ñembabi ra Pedro: ―Majua̱ni dí xi'a'i, nubya dí nxuui ma gui cøngagui hñu'qui ante rá yo hmafi ra menja̱. 31Nepʉ ra Pedro xi bi nja rá nøt'e bi 'ñena: ―Masque da thogagui, pe nuga hinga cøñ'a'i. Y gatho nú'ʉ ma'ra ya nxadi guet'atho mi ma̱ñ'ʉ nehe. 32Nepʉ bi ma'ʉ ja 'nara luga rá thuhu Getsemani, ne ra Jesu bi 'ñembabi 'ra de yá nxadi: ―Ja da hñuhʉua, nuga grá maua ga apabi Ajua̱ ma Dada. 33Y bi zixa ra Pedro, ra Cobo ne ra Xuua pa bi mɛui. Nu'bʉ́ nu'á̱ bi mʉdi xi bi du rá mʉi de nú'a̱ ma da thogui. 34Ne bi 'ñembabi nú'ʉ yá nxadi bi zits'i: ―Xi dí tu ma mʉiga asta dí ne ga tagui ga tu. Ja da tø'mhʉua ne oxqui ma gui a̱hʉ. 35Ha nu'á̱ bi thogui má ts'ʉ de habʉ bi gohi'ʉ, ne bi ndandiña̱hmu, ne bi mɛgui rá hmi ja ra hai pa bi 'yapabi Ajua̱ gue nu'bʉ xa zahma̱ hinxa thoguihma̱ nuya ya ts'othogui. 36Y bi 'ñena: ―Ma Dada'i, hinte xá hñei pa nú'a gui ne gui 'yøt'e. 'Yøt'e pa hinga thogui nuya ya ts'othogui. Pe oxqui øt'a ngu nú'a̱ go dí nega, 'yøt'a ngu nú'a̱ ri ma̱ca pahague. 37Nepʉ mi mengui bi zʉdi nú'ʉ hñu yá nxadi xqui do'ma ra t'a̱ha̱, ne bi 'ñembabi ra Pedro: ―Nu'i nugue Simu, ¿hanja xcá a̱ha̱? ¿Ha gue hinxa za xcá 'yapa Ajua̱ 'na ora con gueque? 38Oxqui a̱ha̱hʉ, 'yaphʉ ndunthi Ajua̱ pa stí 'ñepʉ ya ts'othogui gui tsɛthʉ. Ngue'a̱ guí behma̱hʉ ne ja ri pahahʉ pe nuri ndo'yohʉ otho rá ts'ɛdi. 39Nepʉ bi yopa ma ma'na'qui pa bá apabi Ajua̱ co nú'ʉ ya noya bi ma̱nga ra mʉdi. 40Nepʉ de mi yopa mengui bi zʉdi yá nxadi xqui yopa do'ma ra t'a̱ha̱, ne nixi himi tsa da zøt'a yá da, ne ya himi pa̱di te da da̱di'ʉ. 41Ha nu mbá penga rá hñu'qui bi 'ñembabi yá nxadi: ―Nubyá ha̱, a̱ha̱hʉ xá hño, ne tsayahʉ, ngue'a̱ ya bi zø ra ora gue Nú'a̱ To'o bi e bi Nja̱'i dra da ja yá 'yɛ ya 'yøt'ats'oqui. 42Ya nanjʉ, maha. Ya xa 'ñepʉ nú'a̱ to'o ma da dagagui. 43Ts'a ra ora mi ma̱nga njabʉ ra Jesu, 'bestho bi zøhø ra Juda, 'na de nú'ʉ 'rɛt'amayoho yá nxadi, ne mbra 'ñoui 'nara hmuntsja̱'i, 'ra mi ha̱ ya mahuai, ne nu ma'ra mi ha̱ ya za, xqui mɛhna̱ ya nda̱ gá macja̱ ne ya xahnate de ra ley ne ya nda̱xjua nda̱ pa da gʉ ra Jesu. 44De má 'ñu ra Juda xqui 'ñembabi nú'ʉ ya ja̱'i mbra 'ñoui: ―Ma ga 'ra'ahʉ 'nara seña. Nú'a̱ ra 'ñøhø ga tsʉ'tsua rá hmi go di gue'a̱ ra Jesu. 'Bestho gui jʉhʉ, ne gui tsixhʉ, oxqui thøhʉ. 45Y ngu bi zøhø ra Juda habʉ mi 'bai ra Jesu, 'bestho bi joni ne bi 'ñembabi: ―Ma Xahnate'i. Y nura ora'a̱ bi zʉ'tsua rá hmi. 46Nepʉ nú'a̱ ra hmuntsja̱'i 'bestho bi gʉ nts'a̱hni ra Jesu. 47Ra ora'a̱ 'na de gue nú'ʉ mi 'ñoui ra Jesu bi gʉca rá mahuai ne bi dacuabi rá gu 'nará 'bɛgo ra nda̱ gá macja̱. 48Nepʉ nura Jesu bi 'ñembabi nú'ʉ ya ja̱'i to'o xqui gʉ'a̱: ―¿Sague drá be pa e gui jʉgaguihʉ co ya huai ne ya za? 49Nuga hyastho ndí 'bʉi ja ra nda̱nija̱ con gue'ahʉ ndí utuate ne hingá jʉgaguihʉ. Pe pa da njabʉ ngu nú'a̱ xa t'ofo maya'bʉ ja ra Ma̱ca T'ofo hangue gue'a̱ guí øthʉ njabʉbya. 50Nepʉ gatho yá nxadi bi ma hnest'ihi bi zopʉsɛ ra Jesu. 51Pe 'nara ts'ʉnt'ʉ xqui tɛ́t'atho 'nara dutu mi dɛna ra Jesu. Nepʉ ya ja̱'i mi nehma̱ da gʉ'a̱, pe hina ngue'a̱ hønsɛ rá dutu bi mipabi. 52Hangue nu'á̱ bi zopʉ rá dutu ne bi ma hnest'ihi nsinque rá dutu. 53Nepʉ ra Jesu bi ts'its'i habʉ mbi 'bʉ ra da̱nga nda̱ gá macja̱, ne bá munts'ni gatho ma'ra ya nda̱ gá macja̱ ne ya nda̱xjua nda̱ ne ya xahnate de ra ley. 54Ha nura Pedro mri dɛna ra Jesu dega yabʉtho, nepʉ bi yʉt'i'a̱ ja rá patio rá ngu ra da̱nga nda̱ gá macja̱, ne ja bi hñuhni co ya gʉnts'a̱hni mi mpa'ta ja ra tsibi. 55Ha nuya nda̱ gá macja̱ ne gatho ra hmunts'a nda̱ gá xodyo mi ne da hyo ra Jesu, hangue nu'ʉ́ mi honga yoho ya testigo nú'ʉ 'nat'a da ma̱ pa da ña̱pabi pa ya da 'yɛ'mbi da hyo, pe himbi nthɛ yá noya nú'ʉ ya testigo. 56Ndunthi ya ja̱'i mi jʉ'tsua ya nc'uamba ra Jesu, pe 'rama'na'ño nú'a̱ mi ma̱ñ'ʉ. 57'Ra bi 'mai ja yá thandi ya nda̱ ne mi ma̱ñ'ʉ 'nara nc'uamba bi 'ñena: 58―Nuje stá øhe xa ma̱nga njaua: “Ma ga yø'ta nuna ra nda̱nija̱ bi hyoca ya ja̱'i, pe rá hñupa ya stá 'ba'ma ma'na nú'a̱ hingá nthoqui co yá 'yɛ ya ja̱'i.” 59Pe nixi nú'ʉ to'o mi ma̱nga njabʉ himbi nthɛ yá noya. 60Nu'bʉ́ ra da̱nga nda̱ gá macja̱ bi 'mai ne bi 'yambabi ra Jesu: ―¿Ha hinte guí tha̱di de nú'a̱ gá øde bi hma̱ de gue'e? ¿Ha gue majua̱ni nú'a̱ bi hma̱? 61Pe ra Jesu ni 'nara noya hinte bi da̱di. Hangue ra da̱nga nda̱ gá macja̱ bi yopa 'yambi bi 'ñembi: ―¿Ha gue go gue'e grá Cristo rá T'ʉ'i Ajua̱ nú'a̱ xá nsunda xpá mɛñ'a'i pa gui nda̱? 62Nu'bú ra Jesu bi da̱di ne bi 'ñena: ―Ha̱ha̱ go gueque. Ne ma gui hyanthʉ Nú'a̱ To'o bi e bi Nja̱'i da hñudi ja rá 'ñɛi Ajua̱ nú'a̱ ja rá ts'ɛdi. Nepʉ ma gui hyanthʉ da yopa menguiua ja ya guui. 63Hangue nu mi 'yøde njabʉ ra da̱nga nda̱ gá macja̱ bi dʉnga yá he ngue'a̱ go gue'a̱ 'nara seña gue pa gue'á̱ ra Jesu xqui ña̱ma'ñʉ de Ajua̱. Nepʉ bi 'ñena: ―¿Pa te ga 'bɛphʉbya ma'ra to'o da e da ma̱mbabi? 64Nu'ahʉ́ ya gá 'yøhʉ nú'a̱ bi ma̱ gue nuní ri 'ñet'a Ajua̱. Xibya, ¿te guí beñhʉ de nú'a̱ xa ma̱ni? Ne gatho nú'ʉ mi 'bʉhni bi 'ñena: ―Rí 'ñepi da tho. 65Nepʉ 'ra de gue'ʉ bi mʉdi bi zots'i ra Jesu. Ne bi go'mbabi rá hmi ne xi mi na'mbi, ne bi 'yambabi'ʉ bi 'ñembi: ―Nú'i grá ba̱di, ¡xicjebya to'o bi nap'a'i! Nehe ya gʉnts'a̱hni mi faste mi na'mbabi. 66Ha nura Pedro mi 'bʉ nja'ti ja ra patio. Nepʉ bi zøhø 'nara nxutsi mrá 'bɛgo ra da̱nga nda̱ gá macja̱, ne bi uat'a ja ra tsibi. 67Nepʉ bi hyandi gue mi 'bahni ra Pedro mri mpa'ti, xi bi nʉ'ti xá hño, nepʉ bi 'ñembabi: ―A, go gue'e nehe nguí 'ñoui ra Jesu me Nasare, ¿ha ngue ha̱? 68Pe ra Pedro bi ncøni ne bi 'ñena: ―Hina, nixi dí pa̱di to'o'a̱, ne nixi dí pa̱di nú'a̱ guí ma̱. Nepʉ bi bøni bá 'ba ja ra gosthi. Y nura ora'a̱ bi mafi ra menja̱. 69Ha nú'a̱ ra nxutsi bi yopa nʉ'ta ma'na'qui ra Pedro, nepʉ bi yopa 'ñemba nú'ʉ ya ja̱'i mi 'bahni: ―Nuni ra 'ñøhø go guehni 'na de nú'ʉ mri 'ñoui ra Jesu. 70Ra ora'a̱ ra Pedro bi yopa ncøni ma'na'qui. Ne 'mɛfa nú'ʉ ya ja̱'i mi 'bahni bi 'ñembabi: ―Xi majua̱ni go gue'e 'na de nú'ʉ mri 'ñoui ra Jesu, ngue'a̱ ne'i grá me Galilea ngue'a̱ mfa̱tho ora guí ña̱. 71Nepʉ ra Pedro bi mʉdi bi ntsante ne bi jura bi 'ñena: ―Hindí pa̱di to'o nú'a̱ ra 'ñøhø guí ma̱ñhʉ. 72Y 'bestho ra ora'a̱ bi mafi ra menja̱ rá ño'qui. Nu'bʉ́ ra Pedro 'bestho bi beni de nú'a̱ xqui xipabi ra Jesu gue xqui 'ñembi: “Ante rá yo hmafi ra menja̱, ya xcá cøngagui hñu'qui.” Nu'bʉ́ ra Pedro xi bi du rá mʉi ne bi nzoni.

will be added

X\