1 Ha nu mi bønga ra Jesu de ja ra nda̱nija̱, 'na de nuyá nxadi bi 'ñembabi: ―¡Ma zi Xahnate'i, hyanthma̱gue hangu rá hño nuyʉ ya da̱nga ngu xa thoqui co nuyʉ ya da̱ta do! 2 Nu'bʉ́ ra Jesu bi da̱di ne bi 'ñena: ―Nubya guí hanthʉ hangu yá nda̱ngui nuyʉ ya ngu, pe nuga dí xi'ahʉ gue ma da zø ra pa da yøt'e gatho, ne ni 'nara do hinda ma da gohi di ntøque co rá midoui. 3 Nepʉ ra Jesu bi ma ja ra t'øhø 'bo Olivo nú'a̱ ri nhyandui ra nda̱nija̱, ne ja bi hñuhni'a̱. Ha nura Pedro ne ra Cobo ne ra Xuua ne ra Andre bi ña̱sɛui 'nambʉ ne bi 'ñembabi: 4 ―Dí ne gui xicje ha'mʉ ma da yøt'e nuna nija̱ y te ma nt'udi ma da hnequi nu sta nja nú'a̱ guí ma̱. 5 Hangue nura Jesu bi mʉdi bi xipabi'ʉ ne bi 'ñembabi: ―Jamasuhʉ hinda ma da hya'ahʉ ya c'uamba ja̱'i de nú'a̱ ma da xi'ahʉ. 6 Ngue'a̱ ndunthi de gue'ʉ ma da 'ñehe y da bepca ma thuhu ne da 'ñena: “Nuga go gueque drá Cristo xpá mɛncagui Ajua̱ pa ga nda̱.” Njabʉ nu'ʉ́ ma da hyat'a ndunthi ya ja̱'i pa da gamfribi'ʉ nú'a̱ da ma̱ñ'ʉ. 7 Ma gui 'yøhʉ nehe de nú'ʉ ya da̱nga tuhni ya di ja, ne de nú'ʉ ma da nja. Pe nu'ahʉ nu xcrí 'yøhʉ, oxqui ma gui tsuhʉ, ngue'a̱ mahyoni da njabʉ, pe hingo di gue'a̱ ya rá nga̱ts'i ra pa. 8 Ngue'a̱ ma da ntuhna ya hnini co ma'ra yá mihniniui, ne ya nda̱ co ma'ra yá minda̱ui, ne ma da nja ya mbimhai habʉraza, ne da nja ra da̱nga thuhu, ne xi da nja ya ñʉnts'i. Nuya go guehya ya mʉdi ts'othogui ma da nja. 9 Hangue nsuhʉ, ngue'a̱ ma da hnap'ahʉ mbo ja ya nija̱, ne da ts'ix'ahʉ ja ya ts'ʉtbi ne ja ya gobierhnu ne ja ya da̱nga nda̱ ngue'a̱ guí camfriguihʉ. Y ja yá thandi'ʉ ma gui dahʉ majua̱ni de gueque. 10 Y mahyoni da nt'øde ma noya gatho ja rá ngʉni ra ximhai, nepʉ ja da nja ra nga̱xhmai. 11 Pe nu sta zø ra ora da ts'ix'ahʉ pa dra da'ahʉ ja yá 'yɛ ya ts'ʉtbi, oxqui ma gui tu ri mʉihʉ nú'a̱ te rá 'bɛ gui tha̱dihʉ, nixi gui beñhʉ 'mɛt'o nú'a̱ te ma gui ma̱ñhʉ, ngue'a̱ nura ora'a̱ go Ajua̱ ma da xi'ahʉ hanja gui tha̱hʉ, ne gue'a̱ gui ma̱ñhʉ. Ngue'a̱ hingo ma gui ña̱sɛhʉ, nura Ma̱ca Nda̱hi ma go da ña̱'a̱. 12 Nu'ʉ tó'o 'bʉ yá cu ma da da pa da tho, ha nuya dada ma da da yá ba̱tsi, ha nuya ba̱tsi asta ma da ña̱pa yá dada nehe pa da tho. 13 Gatho ya ja̱'i ma da ʉtsa'ihʉ ngue'a̱ guí camfriguihʉ. Pe nu'ʉ tó'o da zɛta gatho nuya ya ts'othogui asta rá nga̱ts'i, go gue'ʉ da mpøhø. 14 Ma da njabʉ ngu nú'a̱ bi ma̱nga maya'bʉ ra Dañe rá 'mɛhni Ajua̱. Ma da hnequi nú'a̱ xi strá nts'o ne dra ts'omba rá nda̱nija̱ Ajua̱. (Dá zo ri mfenihʉ nú'a̱ guí he'thʉbya.) Ha nu xcrí hyanthʉ nú'a̱ ra ts'oja̱'i sta 'mai habʉ hindí 'ñepi da 'mai, nú'ahʉ gri 'bʉhʉ Judea gui 'bathʉ 'bestho ja ya t'øhø. 15 Nura pa'a̱ sta njabʉ, nu'a̱ tó'o di 'yo ja rá patio de rá ngu odi cʉt'a mbo pa da hña̱xa nú'a̱ te mahyoni ja ra 'ñu. 16 Y nu'a̱ tó'o di 'yo ja rá hua̱hi dri mpɛfi nú'a̱ ra ora'a̱, odi pa ja rá ngu pa da hña̱xa rá pat'i. 17 ¡Huecate nú'ʉ ya 'bɛhña̱ di da'thi ne nú'ʉ dya nzʉ nuya pa'ʉ, ngue'a̱ pa gue'ʉ xi strá hñei pa da 'bat'i! 18 'Yaphʉ Ajua̱ gue nura pa'a̱ hindya pa dega tsɛ. 19 Ngue'a̱ nuya pa'ʉ ma da nja ya da̱nga ts'othogui nú'ʉ hinhya'mʉ xa nja desde bi hyoca ra ximhai Ajua̱, ne de gue'a̱ ya hinhya'mʉ ma da yopa nja ma'na'qui ngu nú'ʉ ma da nja ya pa'ʉ. 20 Hangue Ajua̱ bi beni gue hingá ndunthi ya pa ma da njabʉ, ngue'a̱ nu'bʉ hina, hinto da zɛti. Pe po rá ngue nú'ʉ xa huahni, nu'á̱ bi beni gue ma'na xá hño ts'ʉtho ya pa ma da njabʉ. 21 Ha nuya pa'ʉ 'bʉ to da 'ñeñ'ahʉ: “Bá e gui hyanthʉ 'bʉcua ra Cristo bá pɛhna Ajua̱ pa da nda̱”, o 'bʉ to da 'ñeñ'ahʉ: “Maha ringuehni habʉ bí 'bʉ ra Cristo”, oxqui camfribihʉ. 22 Ngue'a̱ ma da 'mʉi ndunthi ya hyate ja̱'i, 'ra da 'ñena gue go di gue'ʉ dya Cristo bá pɛhna Ajua̱ pa da nda̱, nu ma'ra da 'ñena gue dyá 'mɛhni Ajua̱ pa da ña̱ de gue'a̱. Nu'ʉ́ ma da 'yøt'a ndunthi ya da̱nga nt'udi ne da nehma̱ da hyat'a nú'ʉ xa huahna Ajua̱ nehe. 23 Pe nu'ahʉ́ beñhʉ xá hño de nú'a̱ dí xi'ahʉ ne nsuhʉ. Oxqui hophʉ to da hya'ahʉ. 24 Nú'ʉ ya pa sta thogui nuya ya ts'othogui, ra hyadi ma da 'mɛxuui, ne ra za̱na̱ ya hinda ma da yot'i. 25 Ya tsø ma da dagui de mahets'i y gatho nú'a̱ te bí ja mahets'i da mbi. 26 Nepʉ Nú'a̱ To'o bi e bi Nja̱'i ma da thandi da 'ñehe xi strá nsunda ja ya guui con gatho rá da̱nga ts'ɛdi. 27 Nepʉ da mɛhna yá ɛnxɛ pa da munts'a gatho nú'ʉ to'o xa thahni nú'ʉ di 'bʉi gatho rá ngʉni ra ximhai. 28 Nu'ahʉ ora guí hanthʉ ra 'bai gá igo ya da bøhø yá 'roho, nu'bʉ́ guí pa̱hʉ gue ya xa 'ñepʉ 'bestho ra pahyadi. 29 Njabʉ nehe nu xcrí hyanthʉ sta nja nuya ya ts'othogui, pa̱hʉ gue rá nga̱ts'i ra ximhai ya 'bʉi guetbʉ. 30 Xi majua̱ni dí xi'ahʉ, gue nuya ja̱'i 'bʉibya hinda ma da du asta hinda mʉdi da nja gatho ngu nú'a̱ dí xi'ahʉ. 31 Mahets'i ne ra ximhai da uadi da thogui, pe numa noya hinda uadi da thogui, pɛ'tsi da njabʉ ngu nú'a̱ stá ma̱. 32 Hinto pa̱di ra pa nixi ra ora ha'mʉ da nja ra nga̱xhmai, nixi ya ɛnxɛ de mahets'i hingui pa̱di, nixi rá T'ʉ Ajua̱, hønsɛ Ajua̱ ra Dada go gue'a̱ pa̱sɛ. 33 Hangue ndø'mhʉ nza̱ntho ne 'yaphʉ Ajua̱, ngue'a̱ hinguí pa̱hʉ ha'mʉ da zø ra ora. 34 Nuga dí nja ngu 'nara 'ñøhø ma da ma yabʉ ya hai, pe ante da ma, da 'yɛnt'ua ja yá 'yɛ yá 'bɛgo gatho nú'a̱ te pɛ'tsi, ne cada 'na de gue'ʉ da xipabi te da mɛfi, ha nura nsugosthi da t'umbabi ra 'bɛfi pa da ndø'mi nu sta mengui'a̱. 35 Hangue nu'ahʉ nza̱ntho ndø'mhʉ nehe, ngue'a̱ hinguí pa̱hʉ ha'mʉ ga pengui, ua dega xudi o dega nde o made ra xuui o 'na hmafi ra menja̱. 36 Ngue'a̱ xi'bʉ xcrí tha̱mfrihʉ ga tsøhø ne ga tsʉ'ahʉ gri a̱ha̱hʉ. 37 Núna dí xi'ahʉbya, guehna dí xipabi nehe gatho ma'ra pa da ndø'mi'ʉ.
