NSAN MARCO 12

1Ra Jesu bi sigui bi ña̱ui ya nda̱ gá macja̱ ne ya xahnate de ra ley ne ya nda̱xjua nda̱, ne bi mʉdi bi xipa 'raya 'bede, ne bi 'ñembabi: ―'Nara pa 'nara 'ñøhø bi ga̱xa 'raya 'bai gá obxi, ne bi guts'i xá hño. Ne bi hyoqui habʉ da sit'a ra ngui gá obxi nú'a̱ da thɛ'mi, ne bi hyoca 'nara nthø'ma ua̱'obxi xi rá hñets'i. Nepʉ nú'a̱ ra ua̱'obxi'a̱ bi umba nhyandi 'raya ja̱'i, ha nú'a̱ ra me ua̱'obxi bi bøni bi ma yabʉ ya hai. 2Ha nu mi zøhø ra pa de ya xqui da̱ ya obxi, ra me ua̱'obxi bi mɛhna 'nara 'bɛgo pa ma da c'a̱'tsa nú'ʉ to mi ha̱ nhyandi ra ua̱'obxi pa da hyeca nú'a̱ ra sofo ya xqui gʉts'i. 3Pe nú'ʉ to'o mi ha̱ nhyandi ra ua̱'obxi bi gʉ nú'a̱ ra 'bɛgo bi na'mbi ne bi co'tsi bi mengui, hinte bi umbabi de ra sofo. 4Nu'bʉ́ nura me ua̱'obxi bi mɛhna ma'na rá 'bɛgo, pe nú'ʉ ya hyanthua̱hi bi mfats'i bi tɛdo nú'a̱ ra 'bɛgo asta bi zɛmba rá ña̱xu, ne bi xipa ndunthi ya ts'onoya, ne himbi umba nú'a̱ mri 'ñepabi rá hmu. 5Nepʉ ra me ua̱'obxi bi yopa mɛhna ma'na rá 'bɛgo, pe nú'ʉ ya hyanthua̱hi bi gʉ nú'a̱ ra 'bɛgo ne bi hyo. Nepʉ 'mɛfa ra me ua̱'obxi bi mɛhna má ndunthi ya 'bɛgo. Pe 'ra de gue'ʉ bi hna'mbabi, ha nu ma'ra bi tho. 6Y ya xi rá nga̱ts'i bi mɛnsɛ rá hma̱ca 'ra t'ʉ, ne bi 'ñena: “Nuga dí pa̱di gue nu'bʉ ga pɛnsɛ ma t'ʉ, nuya hyanthua̱hi ma da mɛ'tsua ra t'equ'ei.” 7Pe nu mi hyanda ya hyanthua̱hi gue bi zønga rá t'ʉ ra me ua̱'obxi, nu'ʉ́ bi 'ñʉ'ti ne bi 'ñémsɛ'ʉ: “Go guehni ma da gohui yá hai rá dada. Pe ma ga hohʉ pa njabʉ go da gocjʉ ya hai.” 8Hangue nu'ʉ́ bi gʉmpa rá t'ʉ nú'a̱ ra me ua̱'obxi bi hyo'ʉ ne bá føta møte de ra ua̱'obxi. 9¿Pe te guí beñhʉ ma da 'yøt'a nú'a̱ ra me ua̱'obxi co nú'ʉ ya ts'o hyanthua̱hi? Nu'á̱ 'nara pa ma da zøhø ne ma da hyo gatho nú'ʉ ya ts'o hyanthua̱hi ne go ma da umba nhyandi ma'ra ya ja̱'i nura ua̱'obxi'a̱. 10¿Ha gue hinxcá hñe'thʉ ja ra Ma̱ca T'ofo habʉ enga njaua?: Nú'a̱ ra do bi føtbʉhma̱ 'na lado nuya hyøngu, nubya gue'a̱ ra mʉdi do de rá nija̱ Ajua̱. 11Y nusɛ'a̱ go bi mɛgui nura do'a̱ pa da hyø rá nija̱, ne dí hanthʉ gue xi rá nsunda nú'a̱ bi 'yøt'e. 12Nepʉ nuya nda̱ gá macja̱ ne ya xahnate de ra ley ne ya nda̱xjua nda̱ bi beñ'ʉ gue da gʉhma̱ ra Jesu pa da got'a fadi ngue'a̱ bi ba̱di'ʉ gue nu'á̱ mi ña̱ de gue'ʉ ora mi xipa ra 'bede de ya ts'o hyanthua̱hi. Pe nu'ʉ́ mi tsu te da 'yø'tuabi'ʉ nú'ʉ ya hmuntsja̱'i mi 'bʉhni, hangue bi zohni ra Jesu ne bi ma'ʉ. 13Nepʉ nu'ʉ́ bá pɛhna 'raya fariseo ne 'rayá mfats'i ra nda̱ Erode pa da xaxa ra Jesu pa da nu ua te da zʉtuabi pa njabʉ da za da ña̱pabi. 14Nepʉ nuya 'mɛhni bi zøhø habʉ mi 'bʉi'a̱ ne bi 'ñembabi: ―Xahnate, dí pa̱he gue go gue'e guí ma̱nga majua̱ni ne hinguí ø'tua ncaso nú'a̱ ma̱nga ya ja̱'i ne hinguí pata ri noya pa da ma̱'a'i ya ja̱'i, ngue'a̱ nu'i guí udi xá hño nú'a̱ ri ho Ajua̱ da t'øt'e. Dí ne gui xicaguihe, ¿ha gue xá hño ga ju'tuabihe ra boja̱ ra nda̱ Cesa o hina? ¿Ha gue ga ju'tuahe o hina? 15Pe ra Jesu 'bestho bi ba̱tua yá ts'omfeni nuya ja̱'i'ʉ, hangue bi 'ñembabi'ʉ: ―Nuga dí pa̱di te rá 'bɛ guí beñhʉ con gueque. Bá ha̱ncahʉua 'nara boja̱ pa ga handi. 16Nu'bʉ́ nu'ʉ́ bá ha̱npabi'a̱ nú'a̱ ra boja̱ mi adi. Y nu mi hyandi nú'a̱ ra boja̱ bi 'yambabi'ʉ ne bi 'ñembi: ―¿To'o rá c'oi ne to'o rá thuhu núna tøcua ja ra boja̱? Y nu'ʉ́ bi da̱di ne bi 'ñena: ―Rá c'oi ra nda̱ Cesa ne go rá thuhu'a̱. 17Nu'bʉ́ bi da̱di ra Jesu ne bi 'ñembabi'ʉ: ―Nu'a̱ rá uɛnda ra nda̱ Cesa gui umbabihʉ ra nda̱ Cesa, ha nu'a̱ rá uɛnda Ajua̱ go da umbabihʉ Ajua̱. Y nu mi 'yøde'ʉ gue bi da̱di njabʉ, xi bi 'yø'ʉ. 18Nepʉ nu mi uadi ra Jesu bi ña̱ui ya fariseo ne yá mfats'i ra nda̱ Erode, bi zøhø 'raya saduceo nú'ʉ to'o camfri gue hinto ma da yopa nte de ra du. Bi 'ñehe pa bi 'yamba 'nara nt'ani'a̱, ne bi 'ñembabi: 19―Xahnate, ra Moise bi zogui nt'ofo gue 'bʉ 'nara 'ñøhø da du ne da zogui rá 'bɛhña̱, pe 'bʉ ni 'nara ba̱tsi hinda zocuabi, nu'bʉ́ nurá cu de nú'a̱ ra 'ñøhø bi du mahyoni da ntha̱tui rá 'bɛpo, pa nu'bʉ da mɛ'tsa 'nara ba̱tsi, da thu'mbabi rá thuhu ngu rá thuhu nú'a̱ ndu rá mʉdi da̱me nú'a̱ ra 'bɛhña̱, pa njabʉ hinda 'mɛdi rá thuhu nú'a̱ ra 'ñøhø xa du. 20Nde nu'bʉ́, 'na'qui mi 'bʉi yoto ya 'ñøhø mri ncu. Nepʉ nú'a̱ mada̱ bi ntha̱ti, pe bi du ne himbi zocuabi ni 'nara ba̱tsi. 21Nepʉ nú'a̱ rá ñoho ra cu bi ntha̱tui rá 'bɛpo, nepʉ ne'a̱ bi du ha nixi gue'a̱ ni 'nara ba̱tsi himbi zocuabi nehe. Y rá hñu bi njabʉ nehe. 22Ne bi njabʉ gatho nú'ʉ yoto ya cu bi du pe ni 'na de gue'ʉ himbi zocuabi ni 'nara ba̱tsi. Nepʉ rá nga̱ts'i, bi du ra 'bɛhña̱ nehe. 23¿Xi de stí yopa nte de ra du nú'ʉ yoto ya 'ñøhø, nda'a̱ de gue'ʉ xi drá da̱me nú'a̱ ra 'bɛhña̱'a̱? ngue'a̱ gatho nú'ʉ yoto bi ntha̱tui de guecua ja ra ximhai. 24Ha nura Jesu bi da̱di ne bi 'ñembi'ʉ: ―Nixi guí pa̱hʉ nú'a̱ guí ma̱ñhʉ ngue'a̱ hinguí pa̱hʉ nú'a̱ ma̱nga ja ra Ma̱ca T'ofo ne nda'a̱ rá ts'ɛdi Ajua̱. 25Ngue'a̱ nu sta yopa nte gatho nú'ʉ ya ja̱'i xa du, ya hinda ma da ntha̱ta ya 'ñøhø nixi ya 'bɛhña̱, ngue'a̱ nuni mahets'i gatho ya ja̱'i ma da 'mʉ ngu ya ɛnxɛ. 26Nehe, pa gui camfrihʉ gue ma da yopa nte nú'ʉ xa du, ma ga ben'ahʉ nú'a̱ bi 'yofo ra Moise ja nú'a̱ ra xɛni habʉ ma̱ de nú'a̱ ra nda̱po mi zø, ne ja guehni Ajua̱ bi zofo ne bi 'ñembi: “Nuga go guecagui rá Ajua̱gui ra Abrá, ne ra Isaac, ne ra Cobo.” Njabʉ xa nt'ofo. 27Pe Ajua̱ go gue'a̱ ra Ajua̱ de nú'ʉ te, hingo ra Ajua̱ de nú'ʉ xa du. Hangue dí pa̱hʉ gue nura Abrá ne ra Isaac ne ra Cobo masque ya jo'oua'ʉ pe bí ja yá te'ʉ. Hangue nu'ahʉ hinte ri fa̱dihʉ. 28Nehe xqui zøhni 'nara xahnate de ra ley ne bi 'yøde mi ña̱ui ra Jesu ya saduceo, ne bi 'yøde gue ra Jesu xqui da̱di xá hño nú'ʉ ya nt'ani xqui t'ø'tuabi. Hangue ne'a̱ bi uat'i pa bi 'yamba 'nara nt'ani ne bi 'ñembabi: ―¿Nda'a̱ ra hmanda ma'na ra da̱ngui de gatho? 29Nu'bʉ́ nura Jesu bi da̱tuabi ne bi 'ñembi: ―Ma ga xi'i nú'a̱ ra hmanda ma'na ra da̱ngui de gatho ne ena: “Hñuxhʉ nt'øde nú'ahʉ me Israelhʉ, Ajua̱ ma Zidadahʉ hønsɛ 'natho. 30Y nú'á̱ gue'a̱ mahyoni gui ma̱dihʉ con gatho ri mʉihʉ ne con gatho ri mfenihʉ ne con gatho ri ts'ɛdihʉ.” Nuna guehna ra mʉdi hmanda ma'na ra da̱ngui de gatho. 31Ha nuna ma'na ngú'atho ena njaua: “Ma̱di ri miqu'eiui ne gui su ngu grí nsusɛhɛ.” Otho ma'ra ya hmanda ma'na ya da̱ngui de núya dí xi'a'i. 32Nepʉ nú'a̱ ra xahnate de ra ley bi 'ñena: ―Xahnate, majua̱ni nú'a̱ gá ma̱ gue Ajua̱ hønsɛ 'natho ne jo'o ma'na. 33Ha̱ha̱ xá hño to da ma̱di Ajua̱ con gatho rá mʉi, con gatho rá mfeni, con gatho rá ts'ɛdi, ne da ma̱di rá miqu'eiui da su ngu ri nsusɛ 'na. Gue'a̱ ma'na xá hño que nú'a̱ da hyo ya mbo'oni 'na ne da tsa̱t'i pa da 'bahabi Ajua̱. 34Nu'bʉ́ ra Jesu bi 'yøde gue nú'a̱ ra 'ñøhø xqui da̱di co 'nara hoga mfeni, hangue bi 'ñembi: ―Ya ts'ʉtho grí 'bɛdi pa gui cʉt'a ja rá hmanda Ajua̱. Y ya hinto bi rezga bi 'yø'tua ma'ra ya nt'ani ra Jesu. 35Ha nu de mi xahnate ra Jesu ja ra nda̱nija̱ bi 'ñena: ―¿Hanja enga ya xahnate de ra ley gue ra Cristo ma dí 'ñehe de ja yá ja̱'i ndu ra nda̱ Davi? 36Nura Ma̱ca Nda̱hi bi 'bɛpa ndu ra nda̱ Davi bi 'yofo nuya ya noya ja ra Ma̱ca T'ofo habʉ ena njaua: Ajua̱ ra Dada bi 'ñembabi ma zi Hmu: “Bá ehe gui hñudiua ja ma 'ñɛi asta hinga tsiñ'a'i gatho ri ncontra pa da gohi'ʉ de nja'ti ri ua.” 37Ha nu'bʉ go drá t'ʉhma̱ ra Davi nura Cristo, nu'bʉ́ ¿hanja bi 'ñenga ra Davi gue go rá Hmu? Y nura hmuntsja̱'i xi bi ho nú'a̱ te mi ma̱nga ra Jesu. 38Ha nu de mi xahna ya ja̱'i ra Jesu bi 'ñembabi: ―Jamasuhʉ pa hingui 'yøthʉ ngu nú'a̱ øt'a ya xahnate de ra ley. Nu'ʉ́ ri ho da hye yá he xi xá ma, ne ri ho'ʉ da zɛngua ya ja̱'i co ra t'equ'ei ora 'yo'ʉ ja ra tai. 39Ha nu ja yá nija̱'ʉ ri ho da hñudi ja ya mʉdi hudi, ne ri ho da t'ini rá mʉdi ja ya ngo. 40Nehe xi øt'a yá nsadi co ndunthi ya noya, qué pa da hña̱mba yá ngu ya viuda nsinque da zo yá mfeni ya ja̱'i. Nuya xahnate'ʉ ma da hña̱nga yá castigo ma'na ra da̱ngui. 41Nepʉ ra Jesu bi hñudi habʉ mi ja ya 'mɛ'tsboja̱ ja ra nda̱nija̱ pa mi handa nú'ʉ ya ja̱'i to'o mi ɛnt'ini yá ofrenda. Ha mi handa ndunthi ya rico mi unga yá da̱nga ofrenda. 42Nepʉ bi zøhø 'nara viuda xi mrá zi hyoya, ne bi 'yɛnt'ni yoho ya zi boja̱ dega cobre nú'ʉ hints'ʉ mri muui. 43Hangue nura Jesu bi ma'ta yá nxadi ne bi 'ñembabi: ―Xi majua̱ni dí xi'ahʉ gue nuna zi hyoya viuda ma'na xa unga 'nara ofrenda xi ra da̱ngui ja rá thandi Ajua̱ que gatho nú'ʉ to'o ma'na xa 'yɛnt'a ndunthi yá ofrenda ja ya 'mɛ'tsboja̱. 44Ngue'a̱ gatho nú'ʉ ma'ra to'o xa unga yá ofrenda xa uni de nú'a̱ ya xa bonguabi, pe nuna zi hyoya viuda thogui 'nara da̱nga hñoya pe xa unga gatho nú'a̱ xqui mɛ'tsi pa da dai te da zi hma̱ha̱.

will be added

X\