NSAN MARCO 11

1Ra Jesu ne yá nxadi ya mi ma da zønga Jerusale, ne mi 'yo guetbʉ de Betfage ne Betania, nehe guetbʉ ra t'øhø 'bo Olivo, hangue ra Jesu bi mɛhna yoho yá nxadi pa da 'mɛt'o, 2ne bi 'ñembabi'ʉ: ―Grí maha ja nuni ra t'ʉca hnini bí jani, ne nu xcrí tsøñhʉni gui tsʉhʉ 'nara zi burru di tha̱t'i nú'a̱ hinto xa tøguetho. Bá xo'thʉ ne bá tsincahʉua. 3Ha nu'bʉ to'o da 'yañ'ahʉ ne da 'ñeñ'ahʉ hanja guí øthʉ njabʉ, 'ñembabihʉ: “Ra zi Hmu bí honi, nepʉ 'mɛfa ma ga yopa tsin'ahe ma'na'qui,” gui 'ñembabihʉ njabʉ. 4Nu'bʉ́ nú'ʉ yoho yá nxadi bi ma ja nú'a̱ ra t'ʉca hnini, ne ja bá tsʉhni 'nara zi burru mi tha̱t'a møte ja 'nara gosthi ja rá hyo ra 'ñu, ne bá xo'ti'ʉ. 5Y mi 'bahni 'raya ja̱'i bi 'ñembabi'ʉ: ―¿Te gui japhʉ nú'a̱ ra burru guí xo'thʉ? 6Ha nuya nxadi bi da̱di ngu xqui xipa ra Jesu, hangue nú'ʉ ya ja̱'i bi hyopi bi zits'i. 7Nepʉ nu'ʉ́ bá tsimpa ra Jesu nú'a̱ ra burru, y bi hña̱ca yá pat'i'ʉ pa bi xi'tsua ra burru pa bi tøgue'a̱. 8Nepʉ ra hmuntsja̱'i bi hña̱ca yá pat'i pa bi mø ja ra 'ñu, ha nu ma'ra mi toca ya 'yɛza pa mi pøgue nehe ja ra 'ñu. 9Y nú'ʉ to'o mri 'bɛfa ne mri 'bɛt'o mi thø ya hmafi mi ena: ―¡Xá nsunda núni xpá mɛncahʉ Ajua̱! ¡Ajua̱ da ja̱pni! 10¡Ajua̱ da ja̱pi núni ma da nda̱! Nuni go guehni ra nda̱ xqui hña̱'tuabi ndu ma dadahʉ ra nda̱ Davi. ¡Xá nsunda Ajua̱ bí 'bʉi mahets'i! 11Nepʉ ra Jesu bi yʉt'a Jerusale ne gá yʉt'a ja ra nda̱nija̱, ne bi hyanda xá hño gatho nú'a̱ mi jani mbo ra nda̱nija̱. Y coñ'a ya bi nde, nu'á̱ bi bøni de guehni bi ma Betania co nú'ʉ 'rɛt'amayoho yá nxadi. 12Y rá hyax'a̱ ra Jesu ne yá nxadi bi bønga de Betania, y de má 'ñu bi zʉ ra thuhu'a̱. 13Ne dega yabʉ bi hyanda 'nara 'bai gá igo mi c'amtho, hangue bi ma bá c'a̱'tshma̱ ua mi tø yá igo. Pe nu mi zønini hinte bi zʉdi, mi 'ra'ta yá xi ngue'a̱ mri 'bɛtho da nøgue. 14Hangue ra Jesu bi 'ñembabi ra 'bai gá igo: ―Hinhya'mʉ ma da yopa nøgue ri igo. Ha yá nxadi bi 'yøde nú'a̱ bi ma̱. 15Nepʉ bi yopa zøñ'ʉ Jerusale, y ra Jesu bi yopa yʉt'a ja ra nda̱nija̱ ne bi mʉdi bi 'yɛnga gatho nú'ʉ mi 'bʉhni mri mpa ne mri ntai mbo ra nija̱. Bi pʉnts'ua yá mexa nú'ʉ ya mpatboja̱ ne yá thuhni nú'ʉ to'o mi pa ya domitsu. 16Ne ya himbi hopi to bi thoguini pa da hña̱xa ya t'øt'e. 17Nepʉ nu'á̱ bi xipabi ya ja̱'i ne bi 'ñembabi: ―¿Ha hinguí pa̱hʉ gue xa nt'ofo ja ra Ma̱ca T'ofo ne ena: “Numa ngu rá thuhu ra ngu dega nsadi pa gatho ya hnini”? Ha nu'ahʉ́ go xcá 'yøt'athohʉ ra ngu dega mfe. 18Nu'bʉ́ ya xahnate de ra ley ne ya nda̱ gá macja̱ bi 'yøde nú'a̱ bi ma̱nga ra Jesu, hangue nu'ʉ́ bi 'ñʉ'ti pa da hyohma̱'a̱, ngue'a̱ mi tsu'ʉ da hña̱nba yá nsu, ngue'a̱ gatho ya ja̱'i xi mri ho nú'ʉ ya noya mi udi'a̱. 19Ha nu mi put'a ra nde, ra Jesu ne yá nxadi bi bønga de guehni Jerusale. 20Ha nurá hyax'a̱ de mi xudi bi thoguini ma'na'qui habʉ mi 'bai nú'a̱ ra igo xqui zʉi ra Jesu, ne bi hyandi'ʉ gue ya xqui 'yot'i gatho, asta yá 'yʉ. 21Ra ora'a̱ ra Pedro bi benga nú'ʉ ya noya xqui ma̱nga ra Jesu, ne bi 'ñembabi'a̱: ―Ma Xahnate'i, handi, nuna 'bai gá igo gá xipi gue ya hinhya'mʉ ma da yopa nøgue yá igo, ya xa 'yot'i. 22Nu'bʉ́ ra Jesu bi 'ñembabi'ʉ: ―Camfrihʉ Ajua̱. 23Xi majua̱ni dí xi'ahʉ gue 'bʉ to'o ja ndunthi rá jamfri ne hinda dʉhʉ, da za da 'ñembabi nuna ra t'øhø gue da mponi dí ma ja ra ndehe, ne da njabʉ ngu nú'a̱ da 'yadi. 24Hangue nuga dí xi'ahʉ gue nu'a̱ gatho gui 'yaphʉ Ajua̱ ra Dada, camfrihʉ gue nu'á̱ xa 'yø't'ahʉ ri t'adihʉ, y nú'a̱ gui 'yaphʉ da 'ra'ahʉ. 25Pe ora gui 'yaphʉ'a̱, 'bʉ to xa 'yø't'ahʉ 'nara nts'o'mʉi, pumbahʉ, pa njabʉ Ajua̱ ra Dada bí 'bʉi mahets'i da pun'a ri ts'oquihʉ nehe nú'a̱ xcá 'yøthʉ. 26Ngue'a̱ nu'bʉ hingui pumbahʉ nú'ʉ to'o xa 'yø't'ahʉ 'nara nts'o'mʉi, Ajua̱ ra Dada bí 'bʉi mahets'i hinda pun'a ri ts'oquihʉ nehe. 27Nepʉ bi yopa mengui'ʉ pa Jerusale, y ra Jesu bi yopa yʉt'a ja ra nda̱nija̱, ne bi joni habʉ mi 'bai'a̱ ya nda̱ gá macja̱ ne ya xahnate de ra ley ne ya nda̱xjua nda̱. 28Nepʉ nu'ʉ́ bi 'yambabi ne bi 'ñembabi: ―¿To'o rá hmanda'a̱ pa gui 'yøt'a nuya ya t'øt'eya? ¿O to'o xa 'ra'a nsɛqui? 29Ha nura Jesu bi da̱di ne bi 'ñembabi'ʉ: ―Dí ne ga an'ahʉ 'nara nt'ani nehe. Nu'bʉ gui xicaguihʉ, necagui ga xi'ahʉ to'o rá hmanda'a̱ pa dá øt'a njabʉ. 30¿Xi to'o bi hñuxa ra Xuua pa bi nxi'tsate? ¿Ha gue Ajua̱ o ya ja̱'i? 31Nu'bʉ́ nu'ʉ́ mri 'ñémsɛ 'na ngu ma'na: ―Nu'bʉ ga emfʉ gue go Ajua̱ bi hñuxa ra Xuua, nu'bʉ́ nuní da 'ñenjʉ gue hanja hindá camfrihʉ nú'a̱ mi ma̱ñ'a̱. 32Ha nu'bʉ ga emfʉ gue go ya ja̱'i xa hñuts'i, xi'bʉ da bø rá cuɛ ra hnini. Mi ma̱ñ'ʉ njabʉ ngue'a̱ mi tsu ya ja̱'i, ngue'a̱ gatho'ʉ mi ena gue nura Xuua go mi gue'a̱ 'nará 'mɛhni Ajua̱. 33Hangue nu'ʉ́ bi da̱di ne bi 'ñembabi ra Jesu: ―Hina hindí pa̱he. Nu'bʉ́ ra Jesu bi da̱di ne bi 'ñena: ―Nu'bʉ́ nixi gueque hinga xi'ahʉ nehe to'o rá hmanda pa dá øt'a njabʉ.

will be added

X\