NSAN MARCO 10

1Nepʉ ra Jesu bi bønga de Ncapernau, ne bi 'ño ja ra hai Judea ne ja ra hai ri'nandi ra da̱the Jordá. Y nehe ja guehni bi munts'ni ndunthi ya ja̱'i, ne ra Jesu bi mʉdi bi xahni ngu mrá nza̱i'a̱. 2Nu'bʉ́ bi jonga 'raya fariseo pa da xaxi, hangue bi 'yamba 'nara nt'ani bi 'ñembabi: ―¿Ha gue ja ra nsɛqui da hyɛpʉ rá 'bɛhña̱ 'nara 'ñøhø? 3Nu'bʉ́ ra Jesu bi 'yambabi'ʉ nehe, ne bi 'ñembabi: ―Xi ra Moise, ¿te bi xi'ahʉ de gue'a̱? 4Y ya fariseo bi da̱di ne bi 'ñena: ―Nura Moise bi unga nsɛqui gue da thoca 'nara t'ofo dega nxuni, ne njabʉ ha̱, da za da nxungüi rá 'bɛhña̱ 'nara 'ñøhø. 5Nu'bʉ́ ra Jesu bi 'ñembabi'ʉ: ―Nura Moise bi unga nsɛqui gue da t'øt'a njabʉ ngue'a̱ nu'ahʉ́ xi xa megui ri corasohʉ. 6Pe desde rá mʉdi himi njabʉ, ngue'a̱ ra Ma̱ca T'ofo ena gue Ajua̱ “bi hyoca ra 'ñøhø ne ra 'bɛhña̱”. 7“Hangue 'nara 'ñøhø da zopʉ rá dada ne rá na̱na̱ pa go da 'mʉhui rá 'bɛhña̱, 8y de ri yoho, ya da 'natho.” Njabʉ ma̱nga ra Ma̱ca T'ofo. Hangue nú'a̱ ra 'ñøhø ne nú'a̱ ra 'bɛhña̱ ya ri 'natho, hingue ri yoho. 9Hangue nú'ʉ xa pɛhna Ajua̱, ni 'nara ja̱'i hinda za da 'ueque'ʉ. 10Y nu mi menc'ʉ pa ja ra ngu habʉ xqui mihi, yá nxadi ra Jesu bi 'yambi'ʉ nehe de ra nxuni. 11Hangue nu'á̱ bi 'ñembabi'ʉ: ―Nu'a̱ tó'o da hyɛpʉ rá 'bɛhña̱ ne da ntha̱tui ma'na, ya bi 'yøt'a 'nara ts'oqui ngue'a̱ xa hyɛpʉ nú'a̱ rá mʉdi 'bɛhña̱ xa ntha̱tui. 12Ha nu'bʉ 'nara 'bɛhña̱ da hyɛpʉ rá da̱me ne da ntha̱tui ma'na ra 'ñøhø, ya bi 'yøt'a 'nara ts'oqui ngue'a̱ xa hyɛpʉ nú'a̱ rá mʉdi da̱me xa ntha̱tui. 13'Mɛfa, bi ts'i'tsua ya ba̱tsi ra Jesu pa da hñuxa rá 'yɛ ja gue'ʉ pa da ja̱pi. Pe nuyá nxadi bi mʉdi bi guui nú'ʉ to'o mri zi ya ba̱tsi. 14Pe nu mi hyanda ra Jesu gue mi øt'a njabʉ yá nxadi, nu'á̱ bi bø rá cuɛ ne bi 'ñembabi'ʉ: ―Oguí ha̱cuahʉ ya zi ba̱tsi da 'ñe da zʉcagui, ngue'a̱ nu'ʉ tó'o da 'mʉi ja rá hmanda Ajua̱, mahyoni da nja ngu nuya ya zi ba̱tsi. 15Xi majua̱ni dí xi'ahʉ, nu'a̱ tó'o hinda nja ngu 'nara zi ba̱tsi pa da 'mʉi ja rá hmanda Ajua̱, hinda za da yʉt'a ja rá hmanda Ajua̱. 16Nepʉ ra Jesu bi dɛxa ya zi ba̱tsi ne bi hñuxa yá 'yɛ ja gue'ʉ ne bi 'yapabi Ajua̱ rá Dada da ja̱pi'ʉ. 17Y de ya mi 'ba'ñu ra Jesu, bi zøhø 'nara 'ñøhø mbra nest'ihi, ne bi ndandiña̱hmu ja yá ua'a̱ ne bi 'ñembabi: ―Nu'i Xahnate, 'nagrá hoja̱'i, ¿te 'bɛ da za ga øt'e pa da za ga tsʉ ra te pa nza̱ntho? 18Ha nura Jesu bi 'ñembabi: ―¿Hanja guí engagui drá hoja̱'i? Hønsɛ 'natho to'o ra hoja̱'i, y nú'á̱ go gue'a̱ Ajua̱. 19Ya guí pa̱di nda'ʉ gue'ʉ ya hmanda: “Oxqui ntsinga medintha̱ti, oxqui hñote, oxqui mpe, oxqui jʉ'tsua ya nc'uamba ri miqu'eiui, oxqui hat'a ri miqu'eiui, umba ra t'equ'ei ri dada ne ri na̱na̱ ne su'ʉ.” 20Nu'bʉ́ nú'a̱ ra 'ñøhø bi da̱di ne bi 'ñena: ―Xahnate, gatho nuya hmandaya stá øt'e desde stá mba̱tsi. 21Nu'bʉ́ ra Jesu bi hyandi dega hma̱te ne bi 'ñembabi: ―'Natho nú'a̱ grí 'bɛdi gui 'yøt'e. Guí ma gui pa gatho nú'a̱ guí pɛ'tsi ne gui hyecuabi ya hyoya. Njabʉ ha̱, da za gui hña̱nga ya hoga hño de mahets'i. Nepʉ gui ehe gui tɛngagui ne gui tsɛta gatho nú'a̱ da 'ñe'a'i asta ri du. 22Pe nu mi 'yøde'a̱ nú'ʉ ya noya bi xipa ra Jesu, xi bi du rá mʉi y bi ma njabʉ co ra dumʉi, ngue'a̱ xi mrá rico. 23Nu'bʉ́ ra Jesu bi mpʉnts'i ne bi hyanda yá nxadi, nepʉ bi 'ñembabi'ʉ: ―¡Xi rá hñei da yʉt'a 'nara rico ja rá hmanda Ajua̱! 24Ha nuyá nxadi himi pa̱di te da beni de nú'a̱ xqui ma̱ñ'a̱. Hangue nu'á̱ bi yopa xipa ma'na'qui ne bi 'ñembi: ―Ma zi t'ʉ'ihʉ, ¡xi rá hñei da yʉt'a ja rá hmanda Ajua̱ nú'ʉ to'o hu yá mʉi gue co nú'a̱ te pɛ'tsi ma da mpøhø! 25Ma'na hinxá hñei da thogui 'nara cameyo ja rá gu 'nara 'yofri que 'nara rico da yʉt'a ja rá hmanda Ajua̱. 26Hangue nuyá nxadi'a̱ ma'na himi pa̱di te da beni, ne mri 'ñémbabi 'na ngu ma'na: ―Nu'bʉ njabʉ, ¿to'o ja da za da mpøhø? 27Nu'bʉ́ ra Jesu bi nhyandui'ʉ ne bi 'ñembi: ―Ya ja̱'i hingui tsa da mpøhø sɛhɛ, pe co rá mfats'i Ajua̱ ha̱, ngue'a̱ pa Ajua̱ hinte rá hñei. 28Nepʉ de gue'a̱ bi da̱di ra Pedro ne bi 'ñembabi: ―Nuje stá tsohebʉ gatho nú'a̱ te ndí pɛ'tshe pa dá tɛn'ahe. 29Nu'bʉ́ ra Jesu bi da̱di ne bi 'ñembabi'ʉ: ―Xi majua̱ni dí xi'ahʉ, nu'ʉ tó'o da zogui yá ngu, yá cu, yá nju, yá dada, yá na̱na̱, yá ba̱tsi, ne yá hai po rá ngueque ne po rá ngue ra ma̱ca noya, 30nu'ʉ́ ma da hña̱nga núbya mapaya 'na nthebe de nú'a̱ te xa zogui, ngu yá ngu, yá cu, yá nju, yá na̱na̱, yá ba̱tsi, yá hai, masque co ndunthi ra nt'ʉtsate, y nepʉ rá ñoho ra 'mʉi ma da hña̱nga 'nara hoga te pa nza̱ntho. 31Pe nu'ʉ tó'o ya da̱nguibya, nura pa'a̱ ma da notsi'ʉ, ha nu'ʉ tó'o ya notsibya, nura pa'a̱ ma da nda̱ngui'ʉ. 32Nura Jesu bi ne ra 'ñu co yá nxadi pa bi ma Jerusale. Y nú'á̱ go bi 'mɛt'o'a̱ de gue'ʉ, y nu'ʉ́ himi pa̱di te da beni de gue'a̱. Hangue nu'ʉ́ ngu mi tsu, ne mri 'bɛfatho de gue'a̱. Nepʉ nura Jesu bi 'ueca 'nambʉ nú'ʉ 'rɛt'amayoho yá nxadi pa bi yopa xipabi gatho nú'a̱ mi ma da thogui'a̱. 33Ne bi 'ñembabi'ʉ: ―Nubya drá maha Jerusale, ne dí ne ga 'ra'ahʉ nt'øde de Nú'a̱ To'o bi e bi Nja̱'i. Nú'á̱ ma dra da de guehni ja yá 'yɛ ya nda̱ gá macja̱ ne ya xahnate de ra ley, ne nu'ʉ́ ma da 'yɛ'mbi da hyo, ne ma da 'yɛnt'uabi ja yá 'yɛ nú'ʉ hingyá xodyo pa da hyo'a̱. 34Nu'ʉ́ ma da 'yø'tua ra buhla ne da na'mbi ne da zots'i, nepʉ ja da hyo'a̱. Pe rá hñupa ma da yopa nte de rá du. 35Nepʉ nura Cobo ne ra Xuua nú'ʉ yá t'ʉ ra Sebedeo bi joni ja ra Jesu ne bi 'ñembabi: ―Ma zi Xahnate'ihe, dí ne gui øtcahe ra ma̱te gui 'racje nú'a̱ ma ga a'a'ihe. 36Nu'bʉ́ nu'á̱ bi da̱tuabi'ʉ ne bi 'ñembabi: ―¿Te rá 'bɛ guí ne ga ø't'ahʉ? 37Y nu'ʉ́ bi 'ñena: ―Dí nehe ga hudihe 'na ja ri 'ñɛi, 'na ja ri nga̱ha̱, nu xcrí hñudi ja ri hudi de ri ts'ʉtbi. 38Pe ra Jesu bi 'ñembabi'ʉ: ―Nixi hinguí pa̱hʉ nú'a̱ guí ahʉ. 'Bʉ guí ahʉ njabʉ, ¿ha guí hanthʉ gui tsɛthʉ ya ts'othogui ngu nú'ʉ ma ga thoguiga, ne gui tsɛthʉ ya ʉgui ngu nú'ʉ ma ga tsɛtca? 39Ha nu'ʉ́ bi da̱di ne bi 'ñembabi: ―Ha̱ha̱, ga tsɛthe. Nu'bʉ́ ra Jesu bi 'ñembabi'ʉ: ―Majua̱ni ma gui tsɛthʉ ya ts'othogui ne ma gui tsɛthʉ ya ʉgui ngu nú'ʉ ma ga tsɛtca. 40Pe nuga hingo ma ga huancá to'o ma da hñudi ja ma 'ñɛi ne ja ma nga̱ha̱. Numa Dada go gue'a̱ pa̱di to'o ma da hñudini. 41Pe nu mi 'yøde nú'ʉ má 'rɛt'a ya nxadi gue ra Cobo ne ra Xuua mi adi da hñuhui ra Jesu, nu'ʉ́ bi bø yá cuɛ ngue'a̱ hanja go mi adi da hñuhni'ʉ. 42Nu'bʉ́ ra Jesu bi zohna yá nxadi ne bi 'ñembabi: ―Guí pa̱hʉ xá hño gue nuya da̱nga nda̱ de guecua ja ra ximhai ri manda gatho yá hnini, ne nú'a̱ go da ma̱ñ'ʉ go gue'a̱ da t'øt'e. 43Pe nu'ahʉ́ oxqui ma gui 'yøthʉ njabʉ. 'Bʉ 'na de gue'ahʉ guí ne gui nda̱nguihʉ, mahyoni go gui pɛphʉ nuyʉ ma'ra. 44Ne nu'bʉ 'na de gue'ahʉ guí ne gui nda̱hʉ de nuyʉ ma'ra, mahyoni go gui 'mɛgohʉ. 45Nú'a̱ To'o bi e bi Nja̱'i, nu'á̱ hinxpá 'ñehe pa go da 'bɛpabi, nu'á̱ xpá 'ñehe pa go da 'mɛgo ne pa da unga rá te pa da gu'tua gatho yá ts'oqui ya ja̱'i. 46Nepʉ ra Jesu bi zønga Jericó co yá nxadi, ne 'bestho bi bøni de guehni ne bi dɛni 'nara hmuntsja̱'i. Y nuni ja ra ña̱nga 'ñu mi huhni 'nara goda mrá thuhu ra Bartimeo mrá t'ʉ ra Timeo, mi huhni mi pɛti. 47Y nu mi 'yøde gue go mi gue'a̱ ra Jesu me Nasare nú'a̱ ya mi ma da thohni, nu'bʉ́ nu'á̱ bi mʉdi bi mafi ne bi 'ñena: ―¡Nu'i Jesu, rá T'ʉ'i ndu ra nda̱ Davi, huegagui! 48Pe ndunthi ya ja̱'i bi zʉi ne bi 'ñembabi da go'ta rá ne. Pe nu'á̱ ma'na xi mi mafi nts'ɛdi mi ena: ―¡Nu'i rá T'ʉ'i ndu ra nda̱ Davi, huegagui! 49Mi 'yøde ra Jesu 'bestho bi 'mai, ne bi mɛhni to da tsimpa nú'a̱ ra goda. Y nu'ʉ́ bá ma'ti'a̱ ne bi 'ñembabi: ―'Bai bá ehe, oguí tu ri mʉi, bí tøp'a'i 'na̱. 50Nu'bʉ́ nu'á̱ 'bestho bi hña̱ca rá pat'i ne bi da̱ma 'mai bi ma bá tsʉ ra Jesu. 51Y ra Jesu bi 'ñembabi: ―¿Te 'bɛ guí ne ga ø't'a'i? Ha nura goda bi da̱di ne bi 'ñembabi: ―Ma Xahnate'i, dí ne ga yopa handi ma'na'qui. 52Ha nura Jesu bi 'ñembabi: ―Grí ma, co ri jamfri ya xcá ña̱ni. Y 'bestho ra ora'a̱ bi za bi hyandi, ne bi dɛna ra Jesu.

will be added

X\