NSAN MARCO 1

1Rá ma̱ca hoga t'øde ra Jesucristo rá T'ʉ Ajua̱ bi mʉdi njaua: 2Ra ba̱di Isaía bi 'yofo nuya ya noya ya maya'bʉ gue Ajua̱ bi xipabi da 'yofo: Ndi, nuga drá Ajua̱ dí pɛhna ma 'mɛhni pa da 'mɛt'o de gue'e pa da hyoc'a ri 'ñu. 3Nuna ra 'mɛhni go guehna ma da ña̱ nts'ɛdi ja ra mbonthi ne da 'ñembabi ya ja̱'i njaua: “Hyocjʉ ra 'ñu pa da tho ma Hmuhʉ, ne jua̱ñhʉ ya ts'aca'ñu.” 4Y nu mi 'ñehe ra Xuua Xi'tsate bi njabʉ ngu nú'a̱ xqui ma̱nga Ajua̱, bi 'mʉ ja ra mbonthi ne mi xipa ya ja̱'i mi ena: “Ñobrihʉ ne nxistehehʉ y Ajua̱ da pun'ahʉ ri ts'oquihʉ.” 5Ha gatho nuya ja̱'i mi 'bʉ ja ra hnini Jerusale ne gatho rá ngʉni de ra hai Judea mi pa habʉ mi 'bʉ ra Xuua pa mi øde'ʉ nuya noya mi ma̱ñ'a̱ ne pa mri njua̱ni de yá ts'oqui ja rá thandi Ajua̱. Y ra Xuua mi xi'tsi'ʉ ja ra da̱the Jordá. 6Y nú'á̱ mi nhye dega xicameyo, ne mi ngʉt'a 'nara ngʉt'i dega xifri. Mi tsi ya hoga nc'oto ne ra t'afi dega sefi. 7Y mi zofo ya ja̱'i ne mi embabi'ʉ: ―Ya xa 'ñepʉ bra 'bɛfa de gueque 'na to'o ma'na ja rá ts'ɛdi de gueque nú'a̱ hindí 'ñepcagui ngugui ga xo'tua yá ntha̱sthi yá thiza. 8Xi majua̱ni nuga dí xi'ts'a'ihʉ co ra dehe, pe nu'á̱ ma da xi'ts'a'ihʉ co ra Ma̱ca Nda̱hi. 9Y nú'bʉ mi xi'tsate ra Xuua, bi 'ñehe ra Jesu de ra hnini Nasare de ra hai Galilea ne bi ma ja ra da̱the Jordá, ne ja bá xi'tsini ra Xuua. 10Y ngu mi bøxa ra Jesu de ja ra dehe habʉ xqui nxistehe, bi hyandi bi xogui mahets'i y bá ca̱i rá Ma̱ca Nda̱hi Ajua̱ ngu 'nara zi domitsu, ne bi zøhø ja gue'a̱. 11Nepʉ bi nt'øde 'nara noya de mahets'i ne bi 'ñena: ―Go gue'e ma hma̱ca T'ʉ'i, ne xi dí hop'a ri 'mʉi. 12Nu'bʉ́ 'bestho ra Ma̱ca Nda̱hi bi zixa ra Jesu ja ra mbonthi. 13Y nuni ja bá 'bʉhni ñote ma pa habʉ mi 'bʉ ya mba̱nga zu'ue. Ne ra Satá mi xaxa ra Jesu pa da nts'ocjhma̱ha̱. Y nu mi uadi nú'ʉ ñote ma pa, ya ɛnxɛ bá ha̱mpi te da zi. 14Ha nú'bʉ mi jot'a fadi ra Xuua, ra Jesu bi zøhø ja ra hai Galilea, ne mi ma̱nga ra hoga noya gue ya xa zøhø ra Nda̱ de mahets'i xpá e pa da nda̱ de guecua ja ra ximhai. 15Ne mi ena: ―Ya bi zø ya pa ne 'bestho ma da nda̱ de guecua ra Nda̱ de mahets'i, hangue ñobrihʉ ne camfrihʉ ra ma̱ca noya. 16'Nara pa mi 'yoni ra Jesu ja ra ña̱nga ndehe Galilea ne ja bá handri ra Simu ne ra Andre rá cu mi ɛnt'a yá xit'a̱ ja ra ndehe pa da mpɛhua̱ ngue'a̱ nu'ʉ́ myá mɛhua̱'ʉ. 17Nu'bʉ́ ra Jesu bi 'ñembi'ʉ: ―Bá ehʉ, tɛngaguihʉ y nuga ga u't'ahʉ gui mpɛhua̱hʉ dega ja̱'i. 18Hangue nu'ʉ́ 'bestho bi zohni yá xit'a̱ ne bi dɛna ra Jesu. 19Nepʉ ra Jesu bi thogui má ts'ʉ ringuehni ne bi hyanda ra Cobo ne ra Xuua yá t'ʉ ra Sebedeo mi o mbo ra motsa mi pø'ta yá xit'a̱. 20Nu'bʉ́ bi zofo'ʉ, y nu'ʉ́ bi zohni yá dada ja ra motsa co yá 'bɛgo ne bi dɛni'ʉ ra Jesu. 21Nepʉ bi ma'ʉ ja ra hnini Ncapernau, ne nu mi dat'a nsabdo ra pa dega tsaya, ra Jesu bi yʉt'a ja ra nija̱ ne mi xahna ya ja̱'i. 22Ha nu'ʉ́ bi 'yø de nú'a̱ mi ma̱ ngue'a̱ mi xahni'ʉ ngu 'na to'o mi ha̱ ra ts'ɛdi pa da t'øt'e nú'a̱ ma̱, y hingue ngu nú'ʉ ya xahnate de yá ley'ʉ. 23Ne ja xqui zøhni ja yá nija̱'ʉ 'nara 'ñøhø mi pɛ'tsa 'nara ts'onda̱hi, ne nu'á̱ bi mafi bi 'ñena: 24―Nu'i Jesu grá me Nasare, ¿te ma gui 'yøtcahe? ¿Ha gue xcá ehe pa gui huatcahe? Dí pa̱he to'o'i, nu'i go gue'e rá Ma̱ca T'ʉ'i Ajua̱. 25Nu'bʉ́ ra Jesu bi zʉi nura ts'onda̱hi ne bi 'ñembi: ―¡Co'ta ri ne, pøni de nuna ra 'ñøhø! 26Nepʉ nura ts'onda̱hi bi japa nú'a̱ ra 'ñøhø da ndusɛ, ne bi mafi nts'ɛdi, ne bi bøni de gue'a̱. 27Hangue gatho ya ja̱'i bi 'yø ne bi 'ñémsɛ'ʉ 'na ngu ma'na: ―¿Te rí bønga nuna? ¿Te ma 'ra'yo nt'udibyana̱? ¿Te ma ts'ɛdi ha̱ni? ¡Ngue'a̱ nuní 'bɛpa ya ts'onda̱hi da bøni y nu'ʉ́ øtuabi! 28Hangue habʉraza ja ra hai Galilea xi bi da̱ma 'ño ra noya de nú'a̱ xqui 'yøt'a ra Jesu. 29Y mi bønga ra Jesu de ra nija̱ bi ma ja rá ngu ra Simu ne ra Andre nú'ʉ mi 'ñoui, bi mɛui'ʉ ra Cobo ne ra Xuua. 30Ha nurá to ra Simu mi 'bɛni mi umba ra nzø, ne nu'ʉ́ 'bestho bi xipa ra Jesu gue mi hñeni'a̱. 31Nu'bʉ́ ra Jesu bi ma bi gʉts'i de 'nará 'yɛ, bi 'ba'mi, ne 'bestho ra ora'a̱ bi tsayabi ra nzø, nepʉ nú'a̱ ra 'bɛhña̱ bi umbabi te da zi'ʉ. 32Ha nura pa'a̱ de mi nde bá ts'impabi ra Jesu gatho nú'ʉ to'o mi hñeni ne nuto mi pɛ'tsa ya ts'onda̱hi. 33Y gatho ya ja̱'i de ra hnini bi munts'a ja ra gosthingu habʉ mi 'bʉ ra Jesu. 34Y nu'á̱ bi 'yøthe ndunthi ya ja̱'i to'o mi pɛ'tsa 'rama'na'ño ya hñeni, ne bi 'yɛni ndunthi ya ts'onda̱hi, ne himi hopi da ña̱ ya ts'onda̱hi ngue'a̱ nu'ʉ́ mi pa̱di to'o'a̱. 35Rá hyax'a̱ ra Jesu bi nangui hamxuditho ne bi bøni bi ma ja ra mbonthi ne ja bá apabini Ajua̱ rá Dada. 36'Mɛfa bi ma ra Simu ne nú'ʉ to'o mi 'ñoui, bi ma bá honi'a̱. 37Y nu mi zʉdi'a̱ bi 'ñembi: ―Ndunthi ya ja̱'i hoñ'a'i. 38Pe ra Jesu bi 'ñena: ―Maha ja ya t'ʉca hnini nú'ʉ ja nthets'i de guecua pa ga zofo'ʉ nehe, ngue'a̱ pa gue'a̱ stá ehe. 39Nu'bʉ́ bi ma gatho ja rá nthets'i ra hai Galilea, ne ra Jesu bi zofo ya ja̱'i ja yá nija̱, ne bi 'yɛnga ya ts'onda̱hi. 40'Nara 'ñøhø mi tsʉ 'nara hñeni rá thuhu ra lepra nú'a̱ tsit'atho ra ngø, bi 'ñehe bi ndandiña̱hmu ja rá thandi ra Jesu ne bi ba̱ntebi bi 'ñembi: ―Nu'bʉ gui nehma̱, nu'í ja ri ts'ɛdi pa gui 'yøthegui de nuna hñeni tsʉqui. 41Nu'bʉ́ ra Jesu bi huequi ne bi hñu'tsuabi rá 'yɛ ne bi 'ñembabi: ―Ha̱ha̱ dí ne, y ya gá ña̱ni. 42Ha nu mi ma̱nga ra Jesu njabʉ, nu habʉ xqui 'ya, 'bestho bi 'yostho ne bi 'mʉi xi xá hño rá ndo'yo. 43- 44Nu'bʉ́ ra Jesu bi hñu'mba ra hña̱ ne bi 'ñembi: ―Jamasu gue ni 'na hinto gui xipi. Hønsɛ nu'a̱ dí ne, grí ma ja ra nija̱ gui 'ñudi ja ra macja̱ ne ja guehni ma gui unga ra 'baha nú'a̱ bi ma̱nga ra Moise da t'uni, y njabʉ da fa̱di gue ya xcá ña̱ni de ri hñeni. Nepʉ bi 'bɛpa nú'a̱ ra 'ñøhø da ma. 45Pe nu mi ma nú'a̱ ra 'ñøhø bi mʉdi bi xipa gatho ya ja̱'i nú'a̱ xqui t'ø'tuabi ne xi bi 'yonga ra 'bede. Hangue ra Jesu ya himi tsa da yʉt'a ja ya hnini pa da zofo ya ja̱'i ngue'a̱ xi xqui munts'a ndunthi. Ne hangue nu'á̱ mi 'bʉitho ja ya mbonthi, y nehe mi pani ndunthi ya ja̱'i de habʉraza pa mi c'a̱'tsi'a̱.

will be added

X\