NSAN LUCA 9

1Ra Jesu bi munts'a nú'ʉ 'rɛt'amayoho yá nxadi pa bi umba ra ts'ɛdi pa da 'yɛmba nu'a̱raza ra ts'onda̱hi nuya ja̱'i, ne da 'yøthebi yá hñeni. 2De guehni bi mɛhni'ʉ pa da 'yøthe gatho ya da'thi ne da ma̱nga ra hoga nt'øde gue ya bi zø ra Nda̱ de mahets'i pa da nda̱. 3Ne bi 'ñembabi'ʉ: ―Ote xqui ha̱xhʉ pa ja ra 'ñu, oxqui ha̱xhʉ ri bordohʉ, nixi 'nara buxa, nixi nú'a̱ te gui tsihʉ, nixi ra boja̱, nixi ri mponga dutuhʉ. 4Y nu'a̱ ra ngu habʉ da t'a'ahʉ ntsaya, ja gui 'bʉhʉni asta nú'a̱ ra pa'a̱ gui yopa jʉ ri 'ñuhʉ. 5Y nu'a̱ ra hnini habʉ hinda ne da t'a'ahʉ ntsaya, pøñhʉ de guehni, ne hua̱thʉ ra hai nú'a̱ di tu ri uahʉ, y nú'á̱ gue'a̱ 'nara seña gue ya hingo guí tha̱dihʉ de yá ts'oqui'ʉ. 6Y mi uadi bi xipa ra Jesu te da 'yøt'e'ʉ, bi nxani'ʉ bi ma habʉraza ya hnini, bi ma̱nga ra hoga nt'øde y mi øthebi yá hñeni ya ja̱'i habʉraza mi tsøñ'ʉ. 7Ra nda̱ Erode bi zo rá gu nú'a̱ mi øt'a ra Jesu, ne himi pa̱di te da beni'a̱, ngue'a̱ 'rama'na'ño mi ma̱nga ya ja̱'i. 'Ra mi ena gue mi gue'a̱ ra Xuua Xi'tsate xqui yopa nte de ra du, 8ha nu ma'ra mi ena gue mi gue'a̱ ra ba̱di Elía xqui yopa nte ma'na'qui, ha nu ma'ra mi ena gue mi gue'a̱ 'na de gue nú'ʉ ma'ra yá 'mɛhni Ajua̱ mi 'bʉ maya'bʉ xqui yopa nte de ra du. 9Y nura nda̱ Erode bi 'ñena: ―Conque go nucsɛ dá manda bi thɛcua rá ña̱xu ra Xuua. Nu'bʉ́ ¿to'o nú'a̱ xi ja ndunthi rá 'bede? Y ra nda̱ Erode xi mi ne da hyandi'a̱. 10Nu mi menga yá nxadi ra Jesu, bi xipabi'a̱ gatho nú'a̱ xqui 'yøt'e'ʉ. Nepʉ ra Jesu bi zits'i bi mɛui'ʉ ja 'nara luga habʉ mi jo'o ya ja̱'i gueta ra hnini Betsaida. 11Pe mi ba̱di ya ja̱'i gue mi pani'a̱, bi dɛni'ʉ. Pe ra Jesu himbi co'tsi'ʉ, nu'a̱ bi 'yøt'e, bi mʉdi bi xipabi de hanja ri manda Ajua̱, ne mi øthe gatho nú'ʉ mri hñeni. 12Ne de mi nde nú'a̱ ra pa'a̱, nú'ʉ 'rɛt'amayoho yá nxadi bi ma bá tsʉdi ra Jesu ne bi 'ñembabi: ―Da za gui pɛhna ya ja̱'i da ma ja ya hnini ne ja ma'ra ya luga hinga yabʉ pa dua honi habʉ da ntsaya ne da hyoni te da zi, ngue'a̱ nuua habʉ dí 'bʉhʉ otho ni 'nara ngu y nixi te da ts'i. 13Pe nura Jesu bi 'ñembabi'ʉ: ―Nu'ahʉ go da umfʉ te da ziyʉ. Nepʉ nu'ʉ́ bi da̱di ne bi 'ñembabi: ―Otho te ga umfe, hønsɛ cʉt'a ya thuhme drí hña̱he, ne yoho ya zi hua̱, o ga mahe ga tambahe te da zi ri gathoyʉ. 14Xi mi ndunthi ya ja̱'i, sɛhɛ ya 'ñøhø ngu mi cʉt'a 'mo. Pe nura Jesu bi 'ñembabi yá nxadi: ―'Ñehʉ dá hñudi ya zi hmunts'i ngu dega nde nthebe. 15Njabʉ bi 'yøt'e'ʉ, ne bi hñudi gatho. 16Ha nura Jesu bi gʉ nú'ʉ cʉt'a ya thuhme ne nú'ʉ yoho ya hua̱, ne bi nøts'e pa mahets'i bi 'yapa Ajua̱ rá Dada da ja̱pi. Nepʉ bi hyecuabi bi umbabi yá nxadi pa da hyecuabi ya ja̱'i. 17Gatho ya ja̱'i bi ñuni ne xi bi niña̱. Nepʉ bi hmunts'a ya sɛca thuhme xqui bongui y bi ñuxa 'rɛt'amayoho ya 'bøts'e. 18'Nara pa ra Jesu bi 'uehuisɛ yá nxadi ne bi 'yapabi Ajua̱'a̱. Nepʉ bi 'yambabi yá nxadi bi 'ñembabi: ―¿Te guí øhʉ ma̱nga ya ja̱'i de guequi? ¿Xi to'ogui, ena? 19Ha nu'ʉ́ bi da̱di ne bi 'ñembabi: ―'Ra ena go gue'i grá Xuua Xi'tsate, ha nu ma'ra ena go gue'i grá ba̱di Elía, ha nu ma'ra ena go gue'i 'na de nú'ʉ ma'ra yá 'mɛhni Ajua̱ mi 'bʉ maya'bʉ ne xa yopa nte de ra du. 20Nepʉ nura Jesu bi 'ñembabi'ʉ: ―Pe xi nu'ahʉ, ¿to'o guí ma̱ñhʉ gue go guequi? Nu'bʉ́ ra Pedro bi da̱di ne bi 'ñena: ―Nu'i go gue'i grá Cristo xuá pɛhn'a'i Ajua̱ pa gui nda̱. 21Pe nura Jesu bi hñu'mba ra hña̱'ʉ gue hinto da xipabi mi to'o'a̱. 22Ne bi 'ñembabi: ―Nú'a̱ To'o bi e bi Nja̱'i pɛ'tsi da thogui ndunthi ya ts'othogui, y ya nda̱xjua nda̱ ne ya nda̱ gá macja̱ ne ya xahnate de ra ley ma da ʉtsa ne hinda ma da gamfri, ne ma da hyo'ʉ. Pe rá hñupa ma da yopa nte ma'na'qui de ra du. 23Nepʉ 'mɛfa bi zofo ra hmuntsja̱'i xqui munts'ni ne bi 'ñembabi: ―Nu'a̱ tó'o da ne da dɛngagui pa dua nxadi, odi øt'a nú'a̱ go rá paha sɛhɛ, mahyoni 'nara pa ngu 'nara pa da zɛta gatho nú'a̱ da 'ñepabi asta rá du, ne dá dɛngagui. 24Ngue'a̱ nu'a̱ tó'o ne da su rá te ma da 'bɛdi, pe nu'a̱ tó'o da unga rá te po rá nguequi, nú'á̱ ma da mɛ'tsa rá te pa nza̱ntho. 25¿Te ri muui 'bʉ 'nara ja̱'i drá mɛti gatho ra ximhai y nura ja̱'i'a̱ da 'mɛdi pa nza̱ntho? 26Ngue'a̱ nu'a̱ tó'o da ntsa da ña̱ de guequi ne da ntsa da ma̱nga ma noya, necagui nehe núgui dá e dá nja̱'i, ma ga ma̱ gue hindí pa̱ca'a̱ nu xcrá yopa pengaua pa ga nda̱ co rá nsunda ma Dada ne de ya ma̱ca ɛnxɛ. 27Xi majua̱ni dí xi'ahʉ gue 'ra de gue'ahʉ guí 'bʉhʉua, hingui ma gui tuhʉ asta hingui hyanduahʉ rá nsunda ra Nda̱ de mahets'i. 28Rá hña̱to ma pa'a̱ de xqui ma̱nga ra Jesu njabʉ, bi bøxa ja 'nara t'øhø pa da 'yapabi Ajua̱ rá Dada, ne bi zixa ra Pedro, ra Cobo ne ra Xuua. 29Y de mri ora'a̱, bi mpadi rá hmi, ha nuyá dutu xi bi t'axqui asta mri huɛxqui. 30Y de guehni bi hneca yoho ya 'ñøhø mri 'bahni mi ña̱ui, y go mi gue'a̱ ndu ra Moise ne ndu ra Elía. 31Ne nu'ʉ́ xqui go'ma 'nara hyats'i habʉ mi 'bai, ne mi ña̱'ʉ de hanja mi ma da du ra Jesu de guehni ja ra hnini Jerusale. 32Nura Pedro ne nú'ʉ mri 'ñoui xi mi tsʉhma̱ ra t'a̱ha̱'ʉ, pe bi ma ra t'a̱ha̱ nu mi hyanda nura hyats'i mi hnequi ja ra Jesu, ne bi hyandi mi 'bahni nú'ʉ yoho ya 'ñøhø con gue'a̱. 33Y nú'ʉ yoho ya 'ñøhø de ya mi ma da edi ra Jesu, nu'bʉ́ ra Pedro bi 'ñembabi: ―Ma zi Xahnate'i, ¡xá hño ga 'bʉhʉua! Te guí ma̱, ga hocje hñu ya zi ja̱'tsi, 'na pa gue'i, 'na pa ra Moise, ha nu'a̱ ma'na pa ra Elía. Pe nura Pedro himi pa̱di nú'a̱ mi ma̱. 34Y nura ora ts'a mi ma̱nga njabʉ'a̱, bi zø 'nara guui bi go'ma habʉ mi 'bai'ʉ. Y nu mi go'ma ra guui'ʉ, xi bi ntsu. 35Nepʉ de ja ra guui bi nt'øde 'nara noya bi 'ñena njaua: ―Nuni go guehni ma hma̱ca T'ʉ. 'Yøhʉ nú'a̱ da xi'ahʉni. 36Y nu mi uadi bi nt'øde nú'a̱ ra noya, bi hyandi'ʉ gue ya hønsɛ ra Jesu mi 'basɛni, y nu'ʉ́ ya hinte bi ma̱, y nuya pa'ʉ hinto bi xipabi de nú'a̱ xqui hyandi'ʉ. 37Rá hyax'a̱ bá ca̱i'ʉ de ja ra t'øhø, y de guehni bi ma ndunthi ya ja̱'i pa bá c'a̱'tsa ra Jesu. 38Nepʉ 'nara 'ñøhø mi pani ja ra hmuntsja̱'i bi ña̱ nts'ɛdi ne bi 'ñembabi ra Jesu: ―Xahnate, 'yøtca ra ma̱te e gui nutca ts'ʉ ma t'ʉ, ngue'a̱ hønsɛna̱ dí pɛ'tsi, 39y pɛ'tsa 'nara ts'onda̱hi ri japi da mafi, ne da nta̱ni ne da ndu sɛhɛ, ne ri japi asta da 'yɛnts'a ra fʉgui rá ne. Nts'ɛdi xi ri ʉni, y xi xá hñei da døgue. 40Ya dá xipahma̱ ri nxadi da 'yɛmbahma̱, pe hinxa za xa 'yɛmbabi. 41Nu'bʉ́ nura Jesu bi 'ñena: ―¡Nu'ahʉ 'nagyá 'ña̱gamfrihʉ ne gyá ts'oja̱'ihʉ! ¡Asta ha'mʉ ma ga tsɛ't'a ri 'ña̱jamfrihʉ! Nepʉ bi 'ñembabi nú'a̱ ra 'ñøhø: ―Bá tsincaua ri t'ʉ. 42Pe nu mi ts'i'tsua ra Jesu nú'a̱ ra ts'ʉnt'ʉ, ra ts'onda̱hi bi fømi pa ja ra hai ne bi japi bi nta̱ni ne bi ndu sɛhɛ. Pe nura Jesu bi 'yɛnga nú'a̱ ra ts'onda̱hi, ne 'bestho nú'a̱ ra ora'a̱ bi ña̱ni nú'a̱ ra ts'ʉnt'ʉ, ne bi yopa dapa rá dada. 43Y gatho ya ja̱'i xi bi 'yø de nú'a̱ rá da̱nga ts'ɛdi Ajua̱ xqui hnequi. De nuya pa'ʉ xi mri 'yø ya ja̱'i de gatho nú'a̱ xqui 'yøt'a ra Jesu, nu'á̱ bi 'ñembabi yá nxadi: 44―'Yøhʉ xá hño núna ma ga xi'ahʉ ne oxqui pumfrihʉ: Nú'a̱ To'o bi e bi Nja̱'i ma dra da ja yá 'yɛ ya ja̱'i pa da 'yø'tua nú'a̱ go da ne'ʉ. 45Pe nuyá nxadi himbi ba̱di te mri bønga nú'a̱ bi xipabi'ʉ, ngue'a̱ himi tsa da zo yá mfeni'ʉ. Ne nu'ʉ́ mi tsu da 'yambabi te mri bønga nú'a̱ xqui xipabi'ʉ. 46Nepʉ nuya nxadi bi mʉdi mri 'ñámbabi 'na ngu ma'na to'o de gue'ʉ mi ma da ua'a̱ da ma̱. 47Pe nura Jesu bi ba̱tho de nú'a̱ mi beni'ʉ hangue nu'á̱ bi ma'ta 'nara zi ba̱tsi bi 'ba'ma ja rá hyo'a̱, 48ne bi 'ñembabi'ʉ: ―Nu'a̱ tó'o de ma thuhu da numansu 'nara zi ba̱tsi ngu nuna, nugui go ri numansugui, y nu'a̱ tó'o ri numansugui, go ri numansu nú'a̱ to'o bá pɛncagui. Ngue'a̱ nu'a̱ tó'o hinda 'ñets'i, nú'á̱ go gue'a̱ da nda̱ngui rá nsu. 49Nepʉ nura Xuua bi 'ñembabi'a̱: ―Ma zi Xahnate'i, stá hanthe 'nara 'ñøhø de ri thuhu ɛnga ya ts'onda̱hi, y nuje stá ha̱cuabihe ngue'a̱ nu'á̱ hingui 'yo con guecjʉ. 50Pe nura Jesu bi 'ñembabi'a̱: ―Oguí ha̱cuahʉ, ngue'a̱ nu'ʉ tó'o hingui ʉtsaguihʉ, go rí maxcaguihʉ. 51De ya mi ma da zø ra pa da yopa mengui ra Jesu pa mahets'i, 'na mfenitho bi gʉ ra 'ñu bi ma pa Jerusale. 52Ne bi mɛhna to'o bi 'mɛt'o pa da ma ja 'nara hnini de ra hai Nsamaria pa da hyoni habʉ da 'ñoxi'ʉ. 53Pe nuya mengu de guehni himbi ne bi umba ntsaya'ʉ ngue'a̱ mri njua̱'ñu pa Jerusale. 54Pe nu mi ba̱di njabʉ ra Cobo ne ra Xuua nú'ʉ yoho de yá nxadi, bi 'ñembabi: ―Ma zi Hmu'ihe, ¿ha hinguí ne ga adihʉ dua ca̱i ya tsibi de mahets'i pa da tsa̱t'a nuna hnini ngu nú'a̱ bi 'yøt'a ndu ra ba̱di Elía? 55Mi ma̱nga njabʉ'ʉ, nura Jesu bi nʉ'ti ne bi zʉi bi 'ñembabi: ―Nu'ahʉ́, nixi guí pa̱hʉ te ma nda̱hi guí ha̱npahʉ rá ts'ɛdi pa guí ma̱ñhʉ njabʉ. 56Nú'a̱ To'o bá e bi Nja̱'i, himbá ehe pa da hña̱cua yá te ya ja̱'i, nú'á̱ bá ehe pa da pøhøbi. Nepʉ nu'ʉ́ bi thogui pa ma'na ra t'ʉca hnini. 57Y de guehni má 'ñu 'nara 'ñøhø bi 'ñembabi ra Jesu: ―Ma zi Hmu'i, dí ne ga tɛn'a'i habʉraza gui ma. 58Ra Jesu bi da̱di ne bi 'ñembabi: ―Nuya haho ja yá hña̱do, ha nuya ts'ints'ʉ ja yá 'bafi, pe Nú'a̱ To'o bá e bi Nja̱'i otho nixi rá ngu pa habʉ da ntsaya. 59Nepʉ bi 'ñembabi ma'na ra 'ñøhø: ―Bá ehe ga mɛ pa dua nxadi'i. Ha nu'á̱ bi da̱di ne bi 'ñembabi: ―Ma zi Hmu'i, dí ne gui 'raca nsɛqui ga ma ga agui 'mɛt'o ma dada, nepʉ ga pengui ga tɛn'a'i. 60Nu'bʉ́ nura Jesu bi da̱di ne bi 'ñembabi: ―Tsopʉ nú'ʉ xa du da 'ya yá mi'ña̱gamfriui, pe nu'i bá ehe pa gui ma gui ma̱nga ra hoga noya gue ya xa zøhø ra Nda̱ de mahets'i pa da nda̱. 61Nepʉ bi 'ñembabi ra Jesu ma'na ra 'ñøhø: ―Ma zi Hmu'i, necagui dí ne ga tɛn'a'i, pe 'raca nsɛqui 'mɛt'o ma ga edi ya mengu de ja ma ngu. 62Pe nura Jesu bi 'ñembabi: ―'Bʉ 'nara ua̱fri hɛca 'nara the ne da ñegui, nurá the ya hinda ma manjua̱ntho. Njabʉ nehe nu'a̱ tó'o ø'tua rá 'bɛfi Ajua̱ ne da beni gatho nú'a̱ bi zogui, hinte ri muui pa ja rá hmanda Ajua̱.

will be added

X\