NSAN LUCA 6

1'Nara pa dega tsaya ra Jesu mi 'ñoui yá nxadi bi 'ranga ja 'raya hua̱hi habʉ xqui 'bot'a ra trigo. Ha nuyá nxadi mi tocua yá nga̱ha̱ ne mi ta̱qui mi tsi. 2Nepʉ 'raya fariseo bi hyandi ne bi 'yambi bi 'ñembabi: ―¿Hanja guí øthʉ nú'a̱ hingui ho da t'øt'e núbya ra pa dega tsaya? 3Ha nura Jesu bi da̱di ne bi 'ñembabi'ʉ: ―¿Ha hinxcá hñe'thʉ ja ra Ma̱ca T'ofo habʉ ma̱ de nú'a̱ bi 'yøt'a ndu ra Davi co ma'ra yá compa nú'bʉ mi zʉ ra thuhu'ʉ? 4Ma̱ gue nu'á̱ bi yʉt'a ja rá nija̱ Ajua̱ pa bi hña̱xa nú'ʉ ya thuhme xqui thuxa ja rá thandi Ajua̱, ne bi zi'a̱ ne bi umbi bi zi gatho nú'ʉ ma'ra yá compa mri 'ñoui. Ha nú'ʉ ya thuhme'ʉ hønsɛ ya macja̱ mri 'ñepi da zihma̱. 5Nehe ra Jesu bi 'ñembabi'ʉ: ―Nú'a̱ To'o bi e bi Nja̱'i ha̱ ra ts'ɛdi pa da manda masque ra pa dega tsaya. 6Nepʉ ma'na ra pa dega tsaya ra Jesu bi yʉt'a ja ra nija̱ ne bi mʉdi bi nxahnate. Ne mi 'bʉhni 'nara ts'onate xqui 'yot'a rá 'yɛ ra 'ñɛi. 7Ha nuya xahnate de ra ley ne ya fariseo mi aca ra Jesu pa da hyandi ua da 'yøthe nú'a̱ ra 'ñøhø ra pa dega tsaya, pa njabʉ xa za hanja xa ña̱pabi. 8Pe nu'á̱ bi ba̱tuatho yá mfeni'ʉ, ne bi 'ñembabi nú'a̱ ra 'ñøhø xqui 'yot'a rá 'yɛ: ―'Bai ne bá e gui 'ba madetho habʉ da hyant'a'i gatho. Ha nú'a̱ ra 'ñøhø 'bestho bi 'mai ne bi ma bá 'ba madetho habʉ bi za bi thandi xá hño. 9Nepʉ nura Jesu bi 'ñembabi nú'ʉ ya xahnate de ra ley ne ya fariseo: ―Ma ga ø't'a'ihʉ 'nara nt'ani: ¿Nda'a̱ ja ra nsɛqui da t'øt'e ra pa dega tsaya, ra hñoja̱'i o ra nts'o'mʉi? ¿Ha gue da za da t'øthe 'nara da'thi o da thɛpʉtho? 10Nepʉ nu'á̱ bi nʉ'ta gatho nú'ʉ mi 'bahni ne bi 'ñembabi nú'a̱ ra 'ñøhø: ―Tʉnga ri 'yɛ. Y nú'a̱ ra 'ñøhø bi tʉnga rá 'yɛ nú'a̱ xqui 'yot'i, ne 'bestho ra ora'a̱ bi ña̱ni nú'a̱ rá 'yɛ'a̱. 11Nepʉ ya fariseo ne ya xahnate de ra ley mi 'bʉhni xi bi bø yá cuɛ ne bi mʉdi bi 'ñámbi 'na ngu ma'na te da za da 'yø'tua ra Jesu. 12Ja nuya pa'ʉ bi bøxa ra Jesu ja 'nara t'øhø pa bá apabi Ajua̱ rá Dada, y ja guehni bá ora'a̱ gatho ra xuui. 13Nepʉ rá hyax'a̱ 'nitho bi zohna gatho yá nxadi, ne bi huahna 'rɛt'amayoho de gue'ʉ pa bi hñuts'i dega apostol. 14Ha nuya guehya yá thuhu'ʉ: ra Simu nú'a̱ bi thu'mbabi nehe ra Pedro; ne ra Andre rá cu ra Pedro; ra Cobo ne ra Xuua, ne ra Lipe ne ra Tolo, 15ne ra Teo ne ra Toma, ne nú'a̱ ma'na ra Cobo rá t'ʉ ra Alfeo; ne ma'na ra Simu nú'a̱ xqui 'ñoui ya cananista; 16ra Juda nú'a̱ rá cu ra Cobo; ne ra Juda Iscariote nú'a̱ to'o 'mɛfa bi da ra Jesu. 17Nepʉ nura Jesu bá ca̱i de ja ra t'øhø bra 'ñoui nú'ʉ 'rɛt'amayoho yá apostol, ne bi zøhø'ʉ ja 'nara 'batha habʉ xqui munts'a ndunthi ma'ra yá nxadi ne ndunthi ya ja̱'i nú'ʉ myá me Jerusale ne ma'ra ya hnini de ra hai Judea, ha nu ma'ra xqui 'ñehe de ra hnini Tiro ne de Sidó de ja rá hyo ra ndehe. Nuya ja̱'i'ʉ bá ehe pa bi 'yøde nú'a̱ mi ma̱nga ra Jesu ne pa bi 'yøthebi yá hñeni. 18Ne mi ɛmbabi ya ts'onda̱hi nú'ʉ to'o mi pɛ'tsi. 19Y gatho ya ja̱'i xi mi nehma̱ da dʉnga ra Jesu, ngue'a̱ nu'á̱ co rá ts'ɛdi mi ha̱ca gatho ya hñeni. 20Nepʉ nura Jesu bi hyanda yá nxadi ne bi 'ñembabi: ―Nú'ahʉ gyá hyoyahʉ, xa ja̱p'a'ihʉ Ajua̱ ngue'a̱ xa 'ra'ahʉ gatho ya ja̱pi nú'ʉ ja habʉ ri manda'a̱. 21Nú'ahʉ guí thohʉbya ra thuhu, xa ja̱p'a'ihʉ Ajua̱ ngue'a̱ hinte ma da 'bɛ't'ahʉ. Nú'ahʉ guí tu ri mʉihʉbya, xa ja̱p'a'ihʉ Ajua̱, ngue'a̱ ma da hñup'a ri mʉihʉ pa xi gui johyahʉ. 22Ajua̱ da ja̱p'ahʉ nu stí ʉtsa'ihʉ ya ja̱'i, ne nu stí 'yɛñ'ahʉ co ya nt'ʉtsate, ne stí zañ'a'ihʉ asta ni pa dí 'yø't'a ri thuhuhʉ, ngue'a̱ nu'ʉ́ ma da beni gue xá nts'o'ahʉ po rá ngue Nú'a̱ To'o bi e bi Nja̱'i. 23Nú'ʉ ya pa xcrí thohʉ njabʉ, xi da johyahʉ ngue'a̱ ma gui hña̱ñhʉ 'nara tha̱ha̱ xi ra da̱ngui nuni mahets'i. Nú'ʉ ya ja̱'i ma da 'yø't'a'ihʉ njabʉ, njabʉ nehe bi 'yøt'a ndu yá xita co nú'ʉ yá 'mɛhni Ajua̱ mi 'bʉi maya'bʉ. 24Pe huecate nú'ʉ to'o xi ri johyabya co ya hño de guecua ja ra ximhai, pe rá nga̱ts'i ya hinda ma da johya co nuya hño pɛ'tsi. 25Huecate nú'ʉ to'o hingui tho ra thuhubya, ngue'a̱ 'mɛfa ha̱, ma da tho ra thuhu. Huecate nú'ʉ to'o xi ri johyabya, ngue'a̱ 'mɛfa ma xi da nzoni'ʉ co ra dumʉi. 26Huecate nú'ʉ to'o xi t'e'tsua yá nsu masque hingui øt'e xá hño. Nu'ʉ tó'o e'tsua yá nsu, njabʉ nehe bi 'yøt'a ndu yá xita'ʉ co ya hyate ba̱di maya'bʉ. 27Pe nú'ahʉ guí øcaguihʉ, dí xi'ahʉ gue gui ma̱di ri ncontrahʉ, ne 'yø'tuahʉ ra hño nú'ʉ to'o ri ʉtsa'ihʉ. 28'Yaphʉ Ajua̱ da ja̱pi nú'ʉ to'o tsañ'ahʉ, ne 'yaphʉ Ajua̱ pa nú'ʉ to'o ña̱ma'ñʉ de gue'ahʉ. 29Ha nu'bʉ to'o da 'ra'ahʉ 'nara mpɛ'ti ja ri hmihʉ, umbahʉ ma'na lado ri hmihʉ pa da mɛ't'ahʉ nehe, oguí nø'tuahʉ. Ha nu'bʉ to'o da hña̱n'a ri pat'ihʉ, pø ri pahnihʉ nehe, gui umfʉ da hña̱ts'i. 30Ha nu'bʉ to'o te da 'ya'a'ihʉ, umfʉ, o nu'bʉ da hña̱n'ahʉ 'nara t'øt'e dri mɛtihʉ, oxqui ha̱mbabihʉ. 31Nu'a̱ guí nehʉ da 'yø't'ahʉ ya ja̱'i, 'yø'tuahʉ njabʉ nehe'ʉ. 32Nu'bʉ nu'ahʉ grí ma̱dihʉ hønsɛ to'o ri ma̱'a'ihʉ, hinte ri muui nú'a̱ guí øthʉ, ngue'a̱ asta ya ts'o'mʉi gá ja̱'i øt'a njabʉ nehe. 33O nu'bʉ guí ø'tuahʉ ra hño hønsɛ nú'ʉ to'o ø't'ahʉ ra hño, nixi gue'a̱ hinte ri muui nú'a̱ guí øthʉ, ngue'a̱ asta ya ts'o'mʉi gá ja̱'i øt'a njabʉ nehe. 34Ha nu'bʉ guí hmiphʉ ri boja̱hʉ hønsɛ nú'ʉ to'o guí pa̱hʉ da gu't'a'ihʉ, hinte ri muui nú'a̱ guí øthʉ njabʉ, ngue'a̱ asta nuya ts'o'mʉi gá ja̱'i øt'a njabʉ nehe, hmipabi yá mits'o'mʉiui nú'ʉ to'o tø'mi'ʉ da gu'tuabi. 35Pe nu'ahʉ́ ma̱di ri ncontrahʉ, ne gui 'yø'tuahʉ ra hño, ne gui hmihʉ nú'a̱ dra mi'ahʉ nsinque gui tø'mhʉ dra jo'ts'ahʉ. Ngue'a̱ 'bʉ gui øthʉ njabʉ, nu'bʉ́ ha̱, ma gui hña̱nga 'nari da̱nga tha̱ha̱hʉ. Y njabʉ ha̱, grí hña̱xhʉ Ajua̱ bí 'bʉi mahets'i, ngue'a̱ nu'á̱ ra hoja̱'i co ya ts'o'mʉi ne co nú'ʉ otho yá jama̱di. 36Hangue nu'ahʉ pɛ'tsuahʉ ra nthecate gatho ya ja̱'i ngu øt'a Ajua̱ ra Dada. 37Oguí 'yøhʉ ri miqu'eihʉ de nú'a̱ te øt'e, ngue'a̱ Ajua̱ handatho nú'a̱ te guí øthʉ nehe. Nixi oguí nønga ri miqu'eihʉ, ngue'a̱ Ajua̱ go gue'a̱ ma da hña̱p'ahʉ nguɛnda de gatho nú'a̱ te guí øthʉ. Pumbabihʉ de nú'a̱ ø't'ahʉ ya ja̱'i, y Ajua̱ da pun'a'ihʉ nehe. 38Ø'tuahʉ ra hño ri miqu'eihʉ, ne Ajua̱ da 'yø't'ahʉ ra hño nehe. Co nú'a̱ ra t'ɛni xcá 'yɛmbahʉ ma'ra, con gue'a̱ ra t'ɛni ma da 'yɛn'ahʉ Ajua̱ nehe. Hangue nu'bʉ gui ø'tua ndunthi ya hño ri miqu'eihʉ, Ajua̱ ma da co'ts'ahʉ ma'na ndunthi. 39Nepʉ nu'á̱ bi xipabi'ʉ 'nara 'bede ne bi 'ñembabi: ―¿Ha gue da za 'nara goda da gʉhna ma'na rá migodaui? ¿Ha gue hinda daguiui mahyɛgui? 40Ne bi 'ñembabi nehe: ―Ni 'nara ja̱'i nú'a̱ ja ri nxadi, ma'na di pa̱di que rá xahnate, pe nu sta uadi da nxadi xá hño, nu'bʉ́ ha̱, da nja rá mfa̱di ngu rá xahnate nehe. 41¿Hanja guí handua rá ts'oqui ri cu, nja ngu 'nara zi paxi o ja rá da'a̱, ne hanja hingo guí handa nú'a̱ ra da̱nga ts'oqui nja ngu 'nara xɛca za o ja ri dague? 42Ne ¿hanja da za gui 'ñembabi ri cu: “Hocagui ga ha̱p'a ra paxi o ja ri da”, ne hanja hingo guí handa nú'a̱ ra xɛca za o ja ri dague? ¡Nu'i 'nagrá yohmi! hña̱i 'mɛt'o nú'a̱ ra za o mbo ri da, pa njabʉ da za gui hyanda xá hño ne gui hña̱'mba ra paxi o mbo rá da ri cu. 43Ni 'nara hoga 'bai gá za hingui tsa da unga ya ts'o fruta, nixi 'nara ts'o 'bai gá za hingui tsa da unga ya hoga fruta. 44Gatho ya 'bai gá za fa̱ditho po yá fruta, nda'a̱ xá hño, y nda'a̱ hingui ho. Ngue'a̱ nura 'bai gá 'mini hingui tsa da unga ya igo, nixi ya cam'yo hingui tsa da unga ya obxi. 45Njabʉ nehe 'nara hoja̱'i nza̱ntho øt'a nú'a̱ xá hño, ngue'a̱ nza̱ntho benga ya hoga mfeni. Ha nura ts'o'mʉi gá ja̱'i nza̱ntho øt'a nú'a̱ hinxá hño, ngue'a̱ ja rá mfeni nza̱ntho beni xá nts'o. Njabʉ nehe nú'a̱ ma̱, bí ehe de ja rá mfeni. 46¿Hanja nza̱ntho guí engaguihʉ: “Ma zi Hmu'ihe, ma zi Hmu'ihe”, ne hinguí øthʉ nú'a̱ dí xi'ahʉ? 47Nu'a̱ tó'o da 'ñehe da 'yøde nú'a̱ dí ma̱ ne da 'yøt'e, ma ga xi'ahʉ to'o ri nhyɛcuaui. 48Nu'á̱ ri nhyɛcuaui 'nara 'ñøhø nú'a̱ bi xe'ta habʉ da hyocua rá ua rá ngu asta bi zʉdi ra medo, ne ja bi hyocni rá ngu. Ne nu mi 'ua̱ ya da̱'ye ne bi zø ya nzøthe bi 'rani habʉ mi ja rá ngu, pe nú'a̱ ra ngu'a̱ himbi hyømi ngue'a̱ xqui thocua rá ua ja ra medo. 49Pe nu'a̱ tó'o da 'yøde nú'a̱ dí ma̱ ne hinda 'yøt'e nú'a̱ dí 'bɛpabi, ri nhyɛcuaui nú'a̱ ra 'ñøhø bi tøta rá ngu maña̱ ja ra haitho, himbi 'yacua rá ua mbo ra hai, y nu mi zøhø ya nzøthe co rá ts'ɛdi bi hyøma nú'a̱ ra ngu'a̱, y bi nhuati gatho.

will be added

X\