NSAN LUCA 5

1'Nara pa ra Jesu mi 'bʉ ja rá hyo ra ndehe de Genesare, y nuni bi zøni ndunthi ya ja̱'i ne bi munts'i habʉ mi 'bʉi'a̱, asta mri ts'i'mi'a̱ ngue'a̱ nu'ʉ́ mi ne da 'yøtua rá noya Ajua̱. 2Nepʉ nura Jesu bi hyanda yoho ya motsa gueta rá hyo ra ndehe hinto mi oni, ngue'a̱ nú'ʉ ya mɛhua̱ mi cʉni xqui bøni de guehni pa da menga yá xit'a̱ ja rá hyo ra ndehe. 3Nepʉ nura Jesu bi yʉt'a ja 'na de nú'ʉ ya motsa nú'a̱ mrá mɛti ra Simu, ne bi 'yapa ra ma̱te ra Simu da 'yɛt'a ra motsa má ts'ʉ mbo ra dehe, ngue'a̱ xi mi ts'i'ma ya ja̱'i. Y bi hñudi ra Jesu mbo ra motsa ne desde guehni bi yopa zofo ya ja̱'i. 4Y de mi uadi bi zofo ya ja̱'i bi 'ñembabi ra Simu: ―'Yɛt'a ra motsa pa habʉ ma'na strá hñe ra dehe, ne ja gui ca̱thʉni ri xit'a̱hʉ pa gui mpɛhua̱hʉ. 5Ha nura Simu bi da̱di ne bi 'ñembabi: ―Ma zi Xahnate'i, stá 'yoheua gatho ra xuui, stá mpɛhua̱he pe hinte stá jʉhe. Pe nubyá go guí xicje gue ga ca̱the ma xit'a̱he ja ra dehe, ma ga ca̱the. 6Ha nura Simu ne nú'ʉ ma'ra mi oui mbo ra motsa bi ga̱t'a yá xit'a̱ mbo ra dehe, y mi hña̱i xi bá ñuts'i co ya hua̱ asta bi mʉdi bi ntʉnihma̱ co yá hñʉ ya hua̱. 7Nepʉ nu'ʉ́ bi 'ñutua ra seña nú'ʉ ma'ra yá compa mbi o ja ma'na ra motsa pa e da mats'i. Y nu'ʉ́ bá ehe 'bestho ne bi ñu'tsa nú'ʉ yoho ya motsa co ya hua̱, asta mi ne da yʉi ja ra dehe co yá hñʉ ya hua̱. 8Y nu mi hyanda ra Simu njabʉ, bi ndandiña̱hmu ja rá ua ra Jesu ne bi 'ñembabi: ―Hiní 'ñepqui ga 'ñoui, ngue'a̱ nugui 'nadrá 'yøt'ats'oqui. 9Bi 'ñena njabʉ ngue'a̱ ngu xi bi ntsu ngue'a̱ bi gʉ ndunthi ya hua̱, ne gatho nú'ʉ ma'ra mi oui mbo ra motsa ngu bi ntsu nehe'ʉ. 10Ne nú'ʉ ma'ra mri mfaxui ra Simu ja ra 'bɛhua̱, go ra Cobo ne ra Xuua nú'ʉ yá t'ʉ ra Sebedeo, gatho ne'ʉ ngu xi bi ntsu. Pe nura Jesu bi 'ñembabi ra Simu: ―Oguí tsu, ngue'a̱ desde nubya ma ga 'ra'a'i ma'na ri 'bɛfi pa gui mpɛhua̱ dega ja̱'i. 11Nu'bʉ́ nu'ʉ́ bi 'yɛt'a yá motsa pa asta ja rá ña̱ni ra ndehe ne ja bi zohni yá motsa con gatho yá mpɛfi dega 'bɛhua̱, nepʉ nu'ʉ́ bi dɛna ra Jesu bi mɛui. 12'Nara pa mi 'yo ra Jesu ja 'nara hnini, ne ja mi 'bʉhni 'nara 'ñøhø mi hena ra lepra, ne xi mi tsi'ti. Y nu mi hyanda ra Jesu, bi ma bá tsʉdi ne bi ndandiña̱hmu ne asta bi mɛgui rá hmi ja ra hai, ne bi 'ñembabi: ―Nú'i ri t'equ'ei Ndada, 'bʉ gui nehma̱, da za gui 'yøthegui. 13Nepʉ nura Jesu bi hñu'tsua rá 'yɛ, ne bi 'ñembabi: ―Ha̱ha̱, dí ne ga øthe'i. Y nubyá ya xcá ña̱ni. Y nu mi uadi bi ma̱nga njabʉ, 'bestho ra ora'a̱ bi ña̱ni de nú'a̱ ra hñeni. 14Ha nura Jesu bi hñu'mba ra hña̱ gue hinto da xipabi de nú'a̱ xqui 'yø'tuabi, ne bi 'ñembabi: ―Hønsɛ nu'a̱ mahyoni gui 'yøt'e, rí ma bá 'ñudi ja ra macja̱ pa da hyandi gue ya xcá ña̱ni. Ne unga ri hña̱'ti ngu nú'a̱ bi manda ra Moise, gue'a̱ 'nara seña pa da hyanda ya ja̱'i gue ya xcá ña̱ni. 15Pe ma'na mri ntʉnga ra 'bede de nú'a̱ mi øt'a ra Jesu, ne nza̱ntho mi munts'a ya ja̱'i pa da 'yøde nú'a̱ mi ma̱ñ'a̱ ne pa da 'yøthebi yá hñeni. 16Ha nura Jesu njat'a̱ mi 'uesɛhɛ habʉ mi jo'o ya ja̱'i pa mbi apabi Ajua̱ rá Dada. 17'Nara pa ra Jesu mi xahna ya ja̱'i, ne mi huhni 'raya fariseo ne 'raya xahnate de ra ley xqui 'ñehe de Jerusale ne de habʉraza ma'ra ya hnini de ra hai Judea ne de Galilea. Y ra Jesu mi ha̱npa rá ts'ɛdi Ajua̱ pa mi øthe gatho ya da'thi. 18Nepʉ bi zøhø 'raya 'ñøhø mri du 'nara da'thi xqui 'yɛnts'a ja 'nara 'bebo. Nú'a̱ ra da'thi'a̱ himi tsa da 'ña̱ni ngue'a̱ mi tuda rá ndo'yo. Y nú'ʉ to'o mri du mi ne da cʉ'ta mbo ja ra ngu asta habʉ mi 'bʉ ra Jesu pa da 'yøthe'a̱. 19Pe himbi zʉdi habʉ da yʉt'i'ʉ ngue'a̱ xi mi ja ra nts'i'mi. Hangue bi bøxa maña̱ ra ngu, y bá heca 'na xɛni ra techo pa bi za bi ca̱'ma ra da'thi co rá 'bebo pa habʉ mi 'bai ra Jesu mbo ra ngu madetho de ra mundo ja̱'i. 20Ha nu mi hyanda ra Jesu gue nu'ʉ́ mi ja yá jamfri, bi 'ñembabi ra da'thi: ―'Yøde, nuri ts'oqui ya stá pun'a'i. 21Nepʉ nuya xahnate de ra ley ne ya fariseo nú'ʉ mi huhni bi 'ñensɛ ja yá mfeni'ʉ: “¿Hanja nuni ra 'ñøhø ri 'ñet'a Ajua̱? Ngue'a̱ jo'o ma'na to'o da unga ra pumbate de ya ts'oqui, hønsɛ Ajua̱.” 22Pe nura Jesu bi ba̱tua yá mfeni'ʉ, hangue bi 'ñembabi: ―¿Hanja guí beñhʉ njabʉ? 23¿Nda'a̱ ma'na hinxá hñei ga embi, ri ts'oqui ya stá pun'a'i, o ga embi, nangui rí ma? 24Pe pa gui pa̱hʉ gue Nú'a̱ To'o bi e bi Nja̱'i ja rá ts'ɛdi de guecua ja ra ximhai pa da unga ra pumbate de ya ts'oqui, ma ga øt'a njaua: Nu'bʉ́ bi 'ñembabi ra da'thi: ―Nangui, jʉxa ri 'bebo, rí ma ri ngu. 25Hangue 'bestho nú'a̱ ra ora'a̱ ra da'thi bi nangui ja yá thandi gatho nú'ʉ mi 'bʉhni, ne bi gʉxa rá 'bebo ne bi ma rá ngu mri xøcambeni Ajua̱. 26Y gatho ya ja̱'i xi mri 'yø de nú'a̱ xqui nja y mri xøcambeni Ajua̱'ʉ. Ne xi mi tsu'ʉ de nú'a̱ xqui hyandi ne mi ena'ʉ: ―Nubya stá hanthʉ 'raya da̱nga t'øt'e nú'a̱ hinhya'mʉ stá hanthʉ xa nja. 27'Mɛfa de gue'a̱ ra Jesu bi bøni ne bi hyanda 'nara ngʉxboja̱ rá thuhu ra Leví mi hudi ja rá mexa. Nepʉ bi 'ñembabi: ―Bá ehe, tɛngagui. 28Nu'bʉ́ ra Leví bi 'mai 'bestho ne bi zohni rá 'bɛfi, ne bi dɛna ra Jesu bi mɛui. 29Ne 'mɛfa, ra Leví bi 'yø'tua 'nara da̱nga ngo ra Jesu ja rá ngu, y bi zøhni ndunthi ma'ra ya ngʉxboja̱ nehe, nehe bi zøhni ma'ra ya ja̱'i ne bi hñudi ja ra mexa mahyɛgui con gue'ʉ. 30Nepʉ nuya fariseo ne 'raya xahnate de ra ley nú'ʉ myá fariseo nehe, bi mʉdi bi ña̱ma'ñʉ de yá nxadi ra Jesu ne bi 'ñembabi'ʉ: ―¿Hanja grí ñuñhʉ ne grí ntsihʉ co nuyʉ ya 'ña̱tsa ngʉxboja̱ ne ma'ra ya 'yøt'ats'oqui? 31Pe nura Jesu bi da̱di ne bi 'ñembabi: ―Nu'ʉ tó'o 'bʉi xá hño ne hindri hñeni, hingui honga ra 'ñethi, pe nu'ʉ tó'o ri hñeni ha̱, honi to'o da 'yøthe. 32Nugui stuá ehe pa ga zofo ya 'yøt'ats'oqui pa da ñobri de yá ts'oqui, hingue stuá ehe pa ga zofo nú'ʉ to'o beni gue 'bʉi xá hño ja rá thandi Ajua̱. 33Nepʉ nu'ʉ́ bi 'yø'tua ma'na ra nt'ani ra Jesu ne bi 'ñembabi: ―¿Hanja ri ayuna ne ri ora ndunthi nú'ʉ yá nxadi ra Xuua ne yá nxadi ya fariseo, ha nuri nxadigue nza̱ntho ri ñuni ne tsithe? 34Nepʉ nura Jesu bi da̱di ne bi 'ñembabi'ʉ: ―¿Ha gue da za gui japhʉ da ayuna nú'ʉ 'bʉ ja 'nara ngo dega ntha̱ti 'bʉ 'bʉhnitho ra na̱vio con gue'ʉ? Hina, hinda za. 35Pe ma da zø ra pa da ts'i'tsuabi ra na̱vio, ya hinda 'mʉi con gue'ʉ, nu'bʉ́ ha̱, gue'bʉ ma da ayuna'ʉ nehe. 36Nehe bi xipabi ma'na ra 'bede bi 'ñembabi: ―Ni 'nara ja̱'i hingui hɛnga rá 'ra'yo he pa da mø'ta rá zɛhe. Nu'bʉ to'o da 'yøt'a njabʉ, nu'bʉ́ da ts'onga rá 'ra'yo he, y nehe nura xɛca 'ra'yo dutu hinda hogui xá hño ja nura zɛhe. 37Nehe nixi hinto xit'a ra 'ra'yo vinu ja 'nara zɛbota, ngue'a̱ nura 'ra'yo vinu da føca ra zɛbota, y njabʉ da ts'oca ra bota y da mfanga ra vinu. 38Hangue mahyoni da sit'a ra 'ra'yo vinu ja 'nara 'ra'yo bota pa njabʉ hinte da ja ra vinu nixi ra bota. 39Nu'a̱ tó'o tsi nú'a̱ ra vinu ya pɛ'tsa ya pa xa thoqui, hinda ne da zi ra 'ra'yo vinu, ngue'a̱ ena gue ma'na xá cʉhi nú'a̱ ya pɛ'tsa ya pa xa thoqui.

will be added

X\