NSAN LUCA 4

1Mi uadi bi nxistehe ra Jesu bi ma de guehni ja ra da̱the Jordá mi ha̱npa rá ts'ɛdi ra Ma̱ca Nda̱hi. Nepʉ ra Ma̱ca Nda̱hi bi zits'i ja 'nara mbonthi. 2Ne ja bá 'bʉhni ñote ma pa. Y de guehni bi zø ra ts'onda̱hi habʉ mi 'bʉi'a̱ pa da xaxi pa xa̱ma̱ xa ts'ocuahma̱ rá mfeni'a̱. Ne nura Jesu hinte xqui zi de nú'ʉ ñote ma pa'ʉ, ja 'mɛfa bi zʉ ra thuhu. 3Nepʉ de mi zʉ ra thuhu'a̱, ra ts'onda̱hi bi 'ñembabi: ―'Bʉ go gue'i rá T'ʉ'i Ajua̱, japabi xa̱ da nthuhme nuna ra do. 4Ha nura Jesu bi da̱di ne bi 'ñembabi: ―Xa nt'ofo ja ra Ma̱ca T'ofo habʉ ena njaua: “Hingue hønsɛ po ra thuhme da za da 'mʉ ra ja̱'i, gatho nú'a̱ ma̱ Ajua̱ go gue'a̱ umba rá te ra ja̱'i.” 5Nepʉ de guehni ra ts'onda̱hi bi zixa ra Jesu ja 'nara t'øhø xi xmá hñets'i pa bi 'ñutua gatho ya hnini de maxøgue ra ximhai, y 'bestho ra ora'a̱ bi hnequi gatho ya hnini. 6Y nura ts'onda̱hi bi 'ñembi: ―Nugui da za ga 'ra'a gatho ra ts'ɛdi ne gatho ra da̱nga nsu de nuya ya hnini, ngue'a̱ go xa t'ɛntc'a ma 'yɛ gathoyʉ, y nugui da za ga umbabi to'o go ga nega. 7Hønsɛ 'bʉ gui ndandiña̱hmu ne gui nsundagui, gatho go da 'yo ri 'yɛyʉ. 8Pe nura Jesu bi da̱di ne bi 'ñembabi: ―'Uegue de guequi, nu'i Satá. Ngue'a̱ xa nt'ofo ja ra Ma̱ca T'ofo gue Ajua̱ ri Hmu go gue'a̱ gui nsunda, ne hønsɛ'a̱ gui pɛpabi. 9Nepʉ de guehni ra ts'onda̱hi bi zixa ra Jesu ja ra hnini Jerusale ne bi pø'tsa asta xi maña̱ ra nda̱nija̱ ne bi 'ñembabi: ―'Bʉ go gue'i rá T'ʉ'i Ajua̱, 'yɛnga ra sagui pa rí ga'ti xa̱. 10Cabo xa nt'ofo ja ra Ma̱ca T'ofo habʉ ena: Ajua̱ dua pɛhna yá ɛnxɛ pa da su'a'i. 11Ne da mip'a ri 'yɛ pa njabʉ hingui tsama'ñʉ ri ua nu xcrí tsønga ja ra hai. 12Nu'bʉ́ ra Jesu bi da̱di ne bi 'ñena: ―Nehe xa nt'ofo ja ra Ma̱ca T'ofo habʉ ena: “Oguí xaxa Ajua̱ ri Hmu pa gui 'ñena gue da max'i.” 13Y nu mi uadi ra ts'onda̱hi bi 'yøt'a gatho ngu nú'a̱ xqui 'yɛ'mbi pa xa hyathma̱ ra Jesu, nu'á̱ bi 'uegue de ra Jesu 'raya pa. 14De guehni ra Jesu bi menga pa ja rá hai Galilea mi ha̱npa rá ts'ɛdi ra Ma̱ca Nda̱hi, y bi 'ño rá 'bede'a̱ ja gatho rá ngʉni nura hai'a̱. 15Y nú'á̱ mi cʉt'a ja ya nija̱ pa mi utuate, ne gatho ya ja̱'i mi e'tsua rá nsu'a̱. 16Nepʉ nura Jesu bi ma pa Nasare nú'a̱ ra hnini habʉ xqui nte'a̱. Y ra pa dega tsaya bi yʉt'a ja ra nija̱ ngu mrá nza̱i'a̱, ne ja bi 'maini pa da hñe'ta ra Ma̱ca T'ofo. 17Ne bi t'umbabi nú'a̱ ra t'ofo xqui 'yofo ra ba̱di Isaía, y de mi tʉngui'a̱ bi hyonga nú'a̱ ra xɛni habʉ ena njaua: 18Nurá Ma̱ca Nda̱hi Ajua̱ 'bʉi con guequi, ngue'a̱ Ajua̱ xa hñuxcagui pa e ga xipa ra hoga nt'øde nú'ʉ ya hyoya, ne xuá pɛncagui pa ga hu'mba yá mʉi nú'ʉ to'o tu yá mʉi, ne pa e ga pønga nú'ʉ to'o o nts'a̱hni de ja ra ts'oqui, ne pa ga japi da xo yá da ya goda, ne pa e ga ña̱nga nú'ʉ ri sufri de nú'a̱ t'ø'tuabi, 19ne pa e ga ma̱ gue núbya mapaya ya xa zø ra pa pa Ajua̱ da pøhø ya ja̱'i po rá hma̱te. 20Nepʉ mi uadi ra Jesu bi hñe'ta nuya ya noya, bi mants'a ra Ma̱ca T'ofo, ne bi umba nú'a̱ ra maste de ra nija̱. Y bi hñudi'a̱, y gatho nú'ʉ xqui munts'ni ja ra nija̱ xi mi nʉ'ti'a̱. 21Nepʉ nu'á̱ bi mʉdi bi zofo'ʉ ne bi 'ñembabi'ʉ: ―Nubyá ya bi njabʉ ngu nú'a̱ ja juadi dá he'ta ja ra Ma̱ca T'ofo. 22Y gatho nú'ʉ mi 'bʉhni xi mri 'yø de nú'ʉ ya hoga noya mi ma̱nga ra Jesu, ne xi mi ña̱mahño'ʉ de gue'a̱. Ne mi 'ñémbabi'ʉ 'na ngu ma'na: ―¡Conque go guehni rá t'ʉ ra Jose! 23Nu'bʉ́ ra Jesu bi 'ñembabi'ʉ: ―Dí pa̱di xá hño gue nu'ahʉ́ ma gui 'ñengaguihʉ: “'Bʉ xi majua̱ni grá medico, 'ñøthesɛ.” Y nehe ma gui 'ñengaguihʉ: “'Yøt'e nehe de guecua ja ma haihʉ ngu nú'a̱ stá øhe xcá 'yøt'a Ncapernau.” 24Ne de gue'a̱ bi sigui bi ña̱ ra Jesu bi 'ñembabi'ʉ: ―Xi majua̱ni dí xi'ahʉ gue ni 'nará 'mɛhni Ajua̱ hingui hma̱di de ja rá haisɛ. 25Dí xi'ahʉ gue nuya pa'ʉ mi 'bʉi ra ba̱di Elía mi 'bʉ ndunthi ya viuda nehe ja ra hnini de Israel. Y nuya pa'ʉ hinxqui 'ua̱i hñu njɛya made, hangue xi xqui nja 'nara da̱nga thuhu ja gatho nuna ra hai. 26Pe nu Ajua̱ himbi mɛhna ra Elía pa da t'ini ja yá ngu nú'ʉ ya viuda mi 'bʉ ja ya hnini de Israel. Ajua̱ bi mɛhni'a̱ ma'nambʉ ja rá ngu 'nara viuda nú'a̱ mi 'bʉ ja ra t'ʉca hnini Sarepta gueta ra da̱nga hnini Sidó. 27Nehe de nuya pa'ʉ mi 'bʉi ra ba̱di Eliseo, ndunthi ya me Israel mi hena ra lepra, pe ni 'na de gue'ʉ himbi ña̱ni de nú'a̱ ra hñeni'a̱, hønsɛ ra Naamán nú'a̱ mrá me Siria, nsøc'a̱ go gue'a̱ bi ña̱ni de ra lepra mi tsʉdi. 28Nu mi 'yøde nuya ya noya gatho nú'ʉ xqui munts'ni mbo ra nija̱ bi bø yá cuɛ'ʉ. 29Ne bi 'mai'ʉ bi gʉca ra Jesu de ja yá hnini'ʉ, ne bi zits'i ja rá hyo ra hnini habʉ mi ja 'nara ma'ye, y de guehni mi nehma̱'ʉ xa føte pa rí ga'ti. 30Pe nura Jesu bi 'rantho madetho de ra hmuntsja̱'i ne bi ma. 31Nepʉ nura Jesu bi ma Ncapernau ma'na ra hnini de ra hai Galilea, ne ja bá xahnani ya ja̱'i nura pa dega tsaya. 32Y gatho ya ja̱'i xi mri 'yø de nú'a̱ mi udi'a̱ ngue'a̱ mi zote co 'raya noya xi mi pɛ'tsa ndunthi ra ts'ɛdi. 33Y nuni ja ra nija̱ habʉ xqui munts'i'ʉ xqui zøhø 'nara 'ñøhø mi pɛ'tsa 'nara ts'onda̱hi. Nepʉ nu'á̱ bi dø 'nara hmafi ne bi ña̱ nts'ɛdi bi 'ñena: 34―Nu'i Jesu grá me Nasare, hyɛgaguiheua. ¿Hanja xcuá ehe pa hønsɛ e gui juatcaguihe? Ngue'a̱ nugui dí pa̱di to'o'i, go gue'i rá Ma̱ca T'ʉ'i Ajua̱. 35Nura ora'a̱ ra Jesu bi zʉi nú'a̱ ra ts'onda̱hi ne bi 'ñembi: ―¡Co'ta ri ne, pøni de nuna ra 'ñøhø! Nepʉ nura ts'onda̱hi bi føma nú'a̱ ra 'ñøhø de ja yá thandi ya ja̱'i, nepʉ bi bønga ra ts'onda̱hi bi ma nsinque te bi 'yø'tuabi nú'a̱ ra 'ñøhø'a̱. 36Y gatho ya ja̱'i bi ntsu ne mri 'ñémbabi 'na ngu ma'na: ―¡Xi te ma ts'ɛdi ha̱ni gue co nuyá noya ri 'bɛpa ya ts'onda̱hi da bøni, y nu'ʉ́ øte! 37Y gatho rá nthets'i nú'a̱ ra hai'a̱ bi 'ño ra 'bede de nú'a̱ bi 'yøt'a ra Jesu. 38Nepʉ ra Jesu bi bøni de guehni ja ra nija̱ ne bi ma ja rá ngu ra Simu. Ne mi 'bɛnga rá to ra Simu xi mi umba ra nzø nts'ɛdi. Nepʉ bri ba̱ntebi ra Jesu gue da nu nura da'thi'a̱. 39Nu'bú ra Jesu bi ma bá nu, bi ndoqui ne bi japa ra nzø da ntsaya. Y 'bestho ra ora'a̱ bi tsayabi ra nzø, ne bi nanga nú'a̱ ra 'bɛhña̱ pa bi hyocui te da zi'ʉ. 40Ngu bi yʉ ra hyadi nú'a̱ ra pa'a̱, gatho to'o mi hena nu'a̱raza ra hñeni bi ts'ixa habʉ mbi 'bʉ ra Jesu. Nepʉ nu'á̱ mi huxa yá 'yɛ ja 'rama'na ya da'thi, y gatho mi ña̱ni 'bestho. 41Nehe ndunthi ya da'thi nú'ʉ mi pɛ'tsa ya ts'onda̱hi mi ɛmbabi, ne asta mi mafi'ʉ mi ena: ―Nu'i go gue'i rá T'ʉ'i Ajua̱. Pe nura Jesu mi tsʉi nú'ʉ ya ts'onda̱hi ne himi hopi da ña̱, ngue'a̱ nu'ʉ́ mi pa̱di gue go mi gue'a̱ ra Cristo nú'a̱ bá pɛhna Ajua̱ pa da nda̱. 42Rá hyax'a̱ 'nitho ra Jesu bi bøni de ra hnini Ncapernau bi ma ja 'nara mbonthi habʉ hinto mi 'bʉi. Pe nuya ja̱'i xi bi 'ño bi hyoni'a̱ asta xi bi zøni habʉ mi 'bʉi'a̱, ngue'a̱ nu'ʉ́ himi ne da hyɛgui da ma'a̱. 43Pe nura Jesu bi 'ñembabi'ʉ: ―Mahyoni ga ma ga umba ra hoga nt'øde ma'ra ya hnini gue ya xa zø ra Nda̱ de mahets'i pa da nda̱, ngue'a̱ pa gue'a̱ xuá 'bɛncagui pa ga e ga ma̱. 44Njabʉ mi 'yo ra Jesu ne mi cʉt'a ja ya nija̱ nuni Galilea pa mi unga ra hoga nt'øde.

will be added

X\