NSAN LUCA 24

1Ra mʉdi pa de ra semana nú'a̱ ndomingo mi xudi xi 'nitho nú'ʉ ya 'bɛhña̱ bi ma pa ja ra nt'agui ne bi hña̱xa nú'a̱ ra hoga ñʉni xqui hyoqui'ʉ, ne bi mɛui ma'ra yá mi'bɛhña̱ui. 2Y nu mi zøni'ʉ bi zʉdi xqui t'ent'a nú'a̱ ra do xqui jothma̱ ra nt'agui. 3Ne bi yʉt'i ja ra nt'agui'ʉ pe himbi zʉtuani rá ndo'yo ra zi Hmu Jesu. 4Ne nu'ʉ́ xi bi du yá mʉi ne himi pa̱ te da 'yøt'ʉ, ne mi da̱mfri'ʉ bi hyandi mi 'bahni yoho ya 'ñøhø xqui hñe t'axi asta mri huɛxqui. 5Pe nu'ʉ́ co ra ntsu bi ñe'mitho, himbi gʉxa yá da. Ha nú'ʉ ya 'ñøhø bi 'ñembabi'ʉ: ―¿Hanja e guí hoñhʉua ja ya nt'agui nú'a̱ te? 6Hinjo'oua, ya xa yopa nte. Beñhʉ nú'a̱ bi xi'ahʉ nú'bʉ nguí 'bʉhʉ Galilea. 7Bi 'ñeñ'ahʉ gue Nú'a̱ To'o e bi Nja̱'i mi pɛ'tsi da t'ɛnt'ua ja yá 'yɛ ya ts'oja̱'i nú'ʉ to'o mi ma da pont'i'a̱, pe rá hñupa mi ma da yopa nte'a̱ de ra du. 8Hangue nu'ʉ́ bi beni 'bestho de nú'ʉ ya noya xqui xipa ra Jesu. 9Ha nu mi menc'ʉ de ja ra nt'agui bi ma bá xipa gatho nú'ʉ 'rɛt'ama'ra ya apostol ne gatho ma'ra nú'ʉ to'o mri dɛnhma̱ ra Jesu. 10Nú'ʉ to'o bi hña̱'tsua ra noya ya apostol go ra Maria Magdalena ne ra Juana ne ra Maria rá na̱na̱ ra Cobo, ne nú'ʉ ma'ra ya 'bɛhña̱. 11Pe nuyá apostol ra Jesu himbi gamfri'ʉ, ne bi 'ñembabi nú'ʉ ya 'bɛhña̱ gue xqui 'bɛ yá mfeni. 12Pe ra Pedro bi nest'ihi bá c'a̱'tsa ra nt'agui, y nu mi zøni'a̱ bi ndoqui bi hyanda mbo ra nt'agui gue hønsɛ nú'a̱ ra dutu xqui 'bant'a ra Jesu mi 'bønga 'na lado. Y nu'á̱ bi menga habʉ mi 'bʉi, ne himi pa̱di te da beni de nú'a̱ xqui nja. 13Guet'a̱ ra pa'a̱ yoho yá nxadi ra Jesu mri ne ra 'ñu mri ma pa ja ra hnini Emaú, mi pɛ'tsa ngu 'rɛt'ama'ra kilometro rá ñabʉ de Jerusale. 14De mri ne ra 'ñu mi mpetue de gatho nú'a̱ xqui nja. 15Ha de ts'a mri mpetue de nú'a̱ xqui nja, ra Jesu bi zʉdi'ʉ ne bi ncompaui má 'ñu. 16Ne masque mri 'ñoui'ʉ pe himbi za bi ba̱di'ʉ ua go mi gue'a̱. 17Ha ra Jesu bi 'yambabi'ʉ ne bi 'ñembi: ―¿Te rá 'bɛ guí 'yo má 'ñu guí ma̱ñhʉ? ¿Hanja guí tu ri mʉihʉ? 18'Na de gue'ʉ mrá thuhu ra Cleofa bi da̱di ne bi 'ñembabi: ―Gatho ya ja̱'i pa̱di nú'a̱ bi nja nuni Jerusale de nuya pabya. ¿Hanja hinte xcá pa̱digue? 19Nepʉ ra Jesu bi 'ñembabi: ―¿Te 'bɛ'a̱ xa nja? Y nu'ʉ́ bi 'ñembabi: ―Ha hinxcá 'yøde de ra Jesu me Nasare, gue'a̱ mi 'nará 'mɛhni Ajua̱, ne mi ha̱npa rá ts'ɛdi'a̱ pa mi ña̱ ne pa mi øt'a ya da̱nga t'øt'e ja yá thandi ya ja̱'i ne Ajua̱. 20Ha nuya nda̱ gá macja̱ ne nú'ʉ ma nda̱hʉ de ma hninihʉ bi gʉ ne bi 'yɛnt'ua ja yá 'yɛ ra Pilato pa bi manda da tho'a̱ ja 'nara pont'i. 21Nuje ndí beñhe ne ndí tø'mhe gue go gue'a̱ mi ma da ña̱njʉ nújʉ dyá me Israelhʉ, pe xi núbya ya pɛ'tsa hñu pa xa du. 22Ha 'raya 'bɛhña̱ de guecje bi ma maxudi xi 'nitho ja ra nt'agui pa bá c'a̱'tsi, nepʉ picaguihe ena gue ya himi 'bɛni rá ndo'yo ra Jesu. 23Ne ena gue xqui hyanda 'raya ɛnxɛ nú'ʉ bi xipi gue ya xqui yopa nte de ra du. 24Ne de gue'a̱ bi ma 'rama compahe pa bá c'a̱'tsa ra nt'agui y eñ'ʉ gue bi zʉdi ngu nú'a̱ xqui ma̱nga ya 'bɛhña̱, ne eñ'ʉ nehe gue nixi gue'ʉ himbi hyanda ra Jesu. 25Nepʉ ra Jesu bi 'ñembabi'ʉ: ―¿Hanja hinxcá beñhʉ nú'a̱ xcá hñe'thʉ ja ra Ma̱ca T'ofo, ne hanja hinxcá camfrihʉ nú'a̱ bi ma̱nga yá 'mɛhni Ajua̱? 26¿Ha gue hingue mi mahyoni da thogui njabʉ ra Cristo nú'a̱ xuá mɛhna Ajua̱ pa da nda̱, nepʉ da yopa menga mahets'i pa da t'umba rá hudi dega nsu? 27Nepʉ nu'á̱ bi mʉdi bi xipabi'ʉ nú'a̱ ma̱nga ra Ma̱ca T'ofo habʉ ma̱ de ra Cristo nú'a̱ rá 'mɛhni Ajua̱ pa da nda̱, desde ra mʉdi t'ofo de ra Moise ne gatho nú'a̱ bi ma̱nga ma'ra yá 'mɛhni Ajua̱. 28Ha nu mi zøni nú'a̱ ra hnini habʉ mri ma'ʉ, ra Jesu bi 'yøt'e ngu mi ma da thoguitho. 29Nepʉ nu'ʉ́ bi za̱mi da 'ñoxi con gue'ʉ ne bi 'ñembabi: ―Cohi con guecje, ngue'a̱ ya bi nde ne ya ma da nxuui. Ha nura Jesu bi yʉt'i ja yá ngu'ʉ pa da gohi con gue'ʉ. 30Ne nu'ʉ́ bi hñudi ja ra mexa pa da nt'oxi. Nepʉ ra Jesu bi gʉ ra thuhme ne bi ja̱pabi, ne bi heque pa bi umbabi'ʉ. 31Nú'a̱ ra ora'a̱ bi ba̱di'ʉ gue go mi gue'a̱ ra Jesu, pe nu'á̱ 'bestho bi 'mɛditho de gue'ʉ. 32Ne mri 'ñémbabi'ʉ: ―¡Ne xi majua̱ni ndí tsahʉ 'nara johya ja ma corasohʉ nú'bʉ mi xicaguihʉ má 'ñu de ra Ma̱ca T'ofo! 33Nepʉ nu'ʉ́ 'bestho bi gʉ yá 'ñu bi menga pa Jerusale. Ne ja bi zʉdini nú'ʉ 'rɛt'ama'ra ya apostol xqui munts'i ne ma'ra ya nxadi. 34Ne bi t'embabi nú'ʉ yoho: ―Xi majua̱ni xa yopa nte ma zi Hmuhʉ, ngue'a̱ ra Simu bi hyandi, ne xa xicaguihe. 35Nepʉ nú'ʉ yoho bi metuabi nú'a̱ xqui nja ja ra 'ñu, ne hanja bi ba̱di'ʉ ra Jesu nura ora mi hyeca ra thuhme. 36Ts'a mi ña̱tho de nú'a̱ xqui hyandi'ʉ ne nú'a̱ xqui nja, mi da̱mfri'ʉ ra Jesu mi 'bahni madetho de gue'ʉ, ne bi 'ñembabi: ―'Bʉhʉ te rá 'ñentho. 37Pe nu'ʉ́ xi bi ntsu, ne mi hu yá mʉi gue mi handa 'nara thedi. 38Pe ra Jesu bi 'ñembabi: ―¿Hanja guí tsuhʉ? ¿Pa te guí beñhʉ ja ri mfenihʉ njabʉ? 39Hyandga ma 'yɛhʉ ne ma ua, go guecagui drá Jesu. Thangaguihʉ ne hyandgahʉ xá hño, ngue'a̱ 'nara nda̱hi hingui pɛ'tsa ra ngø nixi ra ndo'yo ngu guí hanthʉ dí pɛ'tsi. 40Y nu mi uadi bi ma̱nga njabʉ, bi 'ñutuabi'ʉ yá 'yɛ ne yá ua. 41Pe nu'ʉ́ himi tsa da gamfri ngue'a̱ ngu xqui mpumfri'ʉ co ra johya, ne himi pa̱di te da beni'ʉ. Nu'bʉ́ nu'á̱ bi 'ñembabi'ʉ: ―¿Ha gue ja te ga tsihʉ? 42Nepʉ nu'ʉ́ bi umba 'na xɛni ra hua̱ xqui hña̱xi, ne 'na xɛni ra t'afi dega colmena. 43Y nu'á̱ bi hña̱ni ne bi zi de ja yá thandi'ʉ. 44Nepʉ bi 'ñembabi'ʉ: ―Ya stá thogui nú'a̱ dá xi'ahʉ nú'bʉ ndí 'bʉi con gue'ahʉ, ngue'a̱ mi mahyoni da njabʉ gatho nú'a̱ xa nt'ofo ja rá ley ra Moise, ne nú'a̱ bi ma̱nga ma'ra yá 'mɛhni Ajua̱, ne nú'a̱ ma̱nga ja ya Salmo. 45Nepʉ nu'á̱ bi xipabi'ʉ nú'a̱ ma̱nga ra Ma̱ca T'ofo pa bi za bi zo yá mfeni, 46ne bi 'ñembabi: ―Njaua xa nt'ofo gue ra Cristo nú'a̱ xuá mɛhna Ajua̱ pa da nda̱, mi mahyoni da du, ne rá hñupa mi mahyoni da yopa nte de ra du. 47Y nehe ena gue co rá ts'ɛdi de rá thuhu'a̱ ma da hma̱ de gue'a̱ gatho rá ngʉni ra ximhai, da mʉdi de guecua Jerusale da ts'ofo ya ja̱'i gue da ñobri pa dra pumba yá ts'oqui. 48Y nu'ahʉbya, ma gui damajua̱nihʉ de nuya ya t'øt'e xcá hyanthʉ. 49Y nugui ma ga pɛhn'a'ihʉ ra Ma̱ca Nda̱hi nú'a̱ xa ña̱'t'ahʉ ma Dada. Pe ja da cohʉua ja ra hnini Jerusale asta hingui hña̱ñhʉ nú'a̱ ra ts'ɛdi'a̱ ma dua ehe de mahets'i. 50Nepʉ ra Jesu bi zixa gatho yá apostol bi bøni de ra hnini Jerusale pa rí ma'ʉ ja 'nara zi t'ʉca hnini rá thuhu Betania, y nu'á̱ ja bá jʉxni yá 'yɛ pa bi ja̱pabi'ʉ. 51Y nu mi uadi bi ja̱pabi'ʉ, nu'á̱ bi 'uegue de gue'ʉ, bi ts'its'i pa mahets'i. 52Y nu'ʉ́ 'mɛfa de xqui xøcambeni ra zi Hmu Jesu, bi mengui'ʉ pa Jerusale co ndunthi ra johya. 53De guehni nza̱ntho mi 'bʉi ja ra nda̱nija̱ mri xøcambeni Ajua̱. Njabʉ gue'a̱.

will be added

X\