NSAN LUCA 23

1Y de guehni gatho nuya nda̱ bi 'mai'ʉ bi zixa ra Jesu ja ra Pilato. 2Y nuni ja bi mʉdini bi ña̱pabi'ʉ ne bi 'ñena: ―Ya stá tsʉhe nuna 'ñøhø mi 'yoni mi ʉ'ta ya ja̱'i gue hinda gut'a yá njut'i ja ra nda̱ Cesa, nehe xa 'ñensɛ gue go guehni ra Cristo xuá mɛhna Ajua̱ pa da nda̱, 'na̱. 3Hangue nura Pilato bi 'ñembabi: ―¿Ha go gue'i grá nda̱ de ya xodyo? Ha nura Jesu bi da̱di ne bi 'ñena: ―Ha̱ha̱, go guequi, ngu gá ma̱. 4Ha nura Pilato bi 'ñembabi ya nda̱ gá macja̱ ne gatho ya ja̱'i: ―Hinte ma ts'oqui dí tsʉtuabi nuna ra 'ñøhø. 5Pe nu'ʉ́ ma'na mi ña̱te nts'ɛdi, ne bi 'ñena: ―Nuni go guehni xa 'ño xa 'yʉ'ta ya ja̱'i habʉraza de ra hai Judea, bá fʉdi desde Galilea asta bi zøhø de guecua Jerusale. 6Nu mi 'yøde njabʉ ra Pilato bi 'yambabi ya ja̱'i ua mrá me Galilea ra Jesu. 7Y nu'ʉ́ bi 'ñena gue ja mrá menguni'a̱, hangue nura Pilato bi mɛhni 'bestho'a̱ ja ra Erode, ngue'a̱ go gue'a̱ mrá nda̱ de ja ra hai Galilea, pe nú'ʉ ya pa'ʉ xqui zøhø ra Erode ne ja mi 'bʉhni Jerusale. 8Nu mi hyanda ra Jesu ra nda̱ Erode, xi bi johya'a̱ ngue'a̱ ya mi pɛ'tsa ndunthi ya pa xi mi ne da hyandi'a̱ ngue'a̱ xqui 'yøde xqui hma̱ ndunthi de gue'a̱. Ne mi ne da hyandi da 'yøt'a 'nara milagro. 9Y nu'á̱ bi 'yamba ndunthi ya nt'ani, pe ra Jesu hinte bi da̱di. 10Ja mi 'bʉhni nehe ya nda̱ gá macja̱ ne ya xahnate de ra ley, y ma'na xi mi ña̱te'ʉ. 11Nepʉ nura Erode co yá soldado bi nthedetho de gue'a̱. Nepʉ bi 'yø'tua ra nt'eni bi hyete ngu 'ñena 'nara nda̱ co 'nara hoga he mahotho. Nepʉ nura Erode bi yopa mɛhna ra Jesu ma'na'qui pa ja ra Pilato. 12Ra Pilato ne ra Erode mri 'ñʉtsahma̱'ʉ, pe nú'a̱ ra pa'a̱ bi má̱di'ʉ. 13Nepʉ nura Pilato bi zohna gatho ya nda̱ gá macja̱ ne gatho ya nda̱ de ra hnini, ne gatho ma'ra ya ja̱'i, 14ne bi 'ñembabi'ʉ: ―Nu'ahʉ go uá tsincahʉua nuna ra 'ñøhø guí eñhʉ gue ʉ'ta ya ja̱'i, pe nugui stá ø'tua ya nt'ani ja ri thandihʉ, y xcá 'yøhʉ gue hinstá tsʉtua ni 'nara ts'oqui de nú'a̱ guí ma̱ñhʉ xa 'yøt'e. 15Nixi ra nda̱ Erode himbá tsʉtuabi ni 'nara ts'oqui, hangue bá yopa pɛhna ma'na'qui pa guecua. Ya nubyá gá pa̱hʉ gue nuní hinte ma ts'oqui xa 'yøt'e pa gui ña̱phʉ gue rí 'ñepi da tho. 16Hangue nugui, hønsɛ ma ga manda dra fɛt'i, nepʉ ga hɛgui. 17Ra Pilato mi pɛ'tsi da hyɛgui 'nara 'yofadi cada ra ngo de ra pascua, ngue'a̱ gue'a̱ myá nza̱i nuya gobierhnu de Judea. 18Pe gatho nú'ʉ ya ja̱'i mi 'bʉhni bi mʉdi bi dø ya hmafi ne bi 'ñena: ―Hindí nehe gui thøgue ra Jesu, go da thøgue ra Barraba. 19Nura Barraba xqui jot'a fadi ngue'a̱ xqui gʉxa ya ja̱'i pa da 'ñøt'atuhni ja ra hnini, ne ngue'a̱ xqui hñote. 20Pe nura Pilato go mi ne da hyɛgui ra Jesu, hangue bi yopa zofo ya ja̱'i ma'na'qui. 21Pe nu'ʉ́ bi mafi ma'na nts'ɛdi ne bi 'ñena: ―¡Nu'a̱ dí xi'ahe, gue gui pont'i, gui pont'i! 22Nurá hñu'qui bi 'ñembabi'ʉ ra Pilato: ―¿Hanja? ¿Te ma ts'oqui xa 'yøt'ni? Nugui hindí tsʉtua ni 'nara ts'oqui nú'a̱ rí 'ñepi da tho. Dí xi'ahʉ gue ma ga manda dra fɛt'i, nepʉ ga hɛgui. 23Pe nu'ʉ́ bi dø ya hmafi ma'na'qui, ne bi ja bi 'yadi gue dra pont'i'a̱. Ne co yá hmafi nú'ʉ ya nda̱ gá macja̱ ne ma'ra ya ja̱'i, bi zʉ yá ts'ɛdi ngu mi ne'ʉ. 24Hangue nura Pilato bi 'yø'tua nú'a̱ myá hne'ʉ. 25Hangue go bi hyɛgui nú'a̱ ra 'ñøhø xqui 'yadi ya ja̱'i, nú'a̱ mrá thuhu Barraba xqui jot'a fadi ngue'a̱ mrá da̱ga 'yøt'atuhni ne mrá hyote. Ha nura Jesu bi t'ɛnt'ua yá 'yɛ ya ja̱'i pa da hyo. 26Y de bi ts'ixa ra Jesu pa dra pont'i, de má 'ñu bi nthɛui 'nara 'ñøhø mrá me Cirene mrá thuhu ra Simu xqui menga ja ra mbonthi, go gue'a̱ bri japi bi duxa ra pont'i ne bi 'mɛfa de ja ra Jesu. 27Ne mri dɛni ndunthi ya ja̱'i, y ndunthi ya 'bɛhña̱ xi mi zoni ne mri mantho'ʉ por gue'a̱. 28Pe ra Jesu bi hyandi'ʉ ne bi 'ñembi: ―Nu'ahʉ 'bɛhña̱hʉ me Jerusale, oguí zoñhʉ por guequi, nzonihʉ de gue'asɛhʉ ne por gatho ri ba̱tsihʉ, 29ngue'a̱ ma da zø ra pa da 'ñena ya ja̱'i: “Rá mat'a Ajua̱ nú'ʉ to'o hinxa mɛ'tsa ni 'nara ba̱tsi nixi xa nzʉ.” 30Y nuya pa'ʉ ya ja̱'i ma da mafi ne da 'ñembabi ya da̱nga t'øhø ne ya t'ʉca t'øhø: “Yøt'e pa gui cobgahe pa hinda zʉcaguihe rá cuɛ Ajua̱.” 31Xi majua̱ni ma da thogui'ʉ ya ts'othogui, ngue'a̱ nu'bʉ nugui dí sufri ha hinte ma ts'oqui dí tu, xihma̱ nú'ʉ tu ya ts'oqui. 32Nehe bi ts'ixa má yoho ya 'ñøhø nú'ʉ xqui t'ɛ'mbi da tho nehe ngue'a̱ 'namyá nduts'oqui. Bi ts'its'i pa da tho mahyɛgui co ra Jesu. 33Ha nu mi zønga ja 'nara zi t'øhø rá thuhu Ña̱xmadu, ja bri pont'ini ra Jesu co nú'ʉ má yoho ya 'ñøhø, 'na bri 'ba'ma ja rá 'ñɛi, ha nu'a̱ ma'na ja rá nga̱ha̱. 34Y nu de mi zʉhni ra Jesu ja ra pont'i, nu'á̱ bi 'ñena: ―Ma Dada'i, pumbabi gatho nuyʉ ya ja̱'i bi 'yøtca njaua, ngue'a̱ nuyʉ́ hingui pa̱di nú'a̱ øt'e. Ha nú'ʉ ya soldado mi 'bʉhni bi ma ra ta̱ha̱'ʉ pa da nu to'o gue'a̱ da da̱ha̱ 'na de nuyá he ra Jesu. 35Y ndunthi ya ja̱'i mi 'bahni bi hyandi bri pont'a ra Jesu, ne asta ya nda̱ gá xodyo mi øtbuhlatho de gue'a̱ ne mi ena: ―Ma'ra ha̱, bi pøhø, pe nu'bʉ xi majua̱ni go guehni ra Cristo xuá mɛhna Ajua̱ pa da nda̱, dí ne ga hanthʉbya da mpøhøsɛ. 36Nehe nuya soldado mi øtbuhlatho de gue'a̱, mi umbabi ra ju'tsa vinu pa da zi, 37ne mi embabi'ʉ: ―'Bʉ xi majua̱ni go gue'i grá Nda̱ de ya xodyo, mpøhøsɛ núbya xa̱. 38Ne xqui thøtua ja rá ña̱ ra pont'i 'nara t'ofo xqui t'ofo dega griego, ne dega lati, ne dega ebreo, mi ena njaua: “Go guehna ra Nda̱ de ya xodyo.” 39Nepʉ 'na de gue nú'ʉ ya nduts'oqui xqui 'bont'i nehe mahyɛgui, bi ña̱ma'ñʉ de gue'a̱ ne bi 'ñembabi: ―'Bʉ xi majua̱ni go gue'i grá Cristo xuá mɛhn'a'i Ajua̱ pa gui nda̱, mpøhøsɛ ne pøhøguihe. 40Pe nú'a̱ ma'na ra nduts'oqui xqui 'bont'i nehe, bi zʉi nú'a̱ bi ña̱ma'ñʉ, ne bi 'ñembabi: ―¿Ha hinguí tsu Ajua̱ pa gá ma̱nga njabʉ? 41Guí nu gue dí sufrihʉua mahyɛgui, pe nujʉ́ rí 'ñepi ga sufrihʉ pa ga juthʉ nú'a̱ stá øthʉ, pe nuni ra 'ñøhø hinxa 'yøt'a ni 'nara ts'oqui. 42Nepʉ nu'á̱ bi 'ñembabi ra Jesu: ―Gui bengagui nu xcrí hudi ja ri hudi dega hmanda. 43Ra Jesu bi da̱di ne bi 'ñembabi: ―Nugui dí xi'a'i gue núbya 'bestho ma gui 'bʉi con guecagui nuni mahets'i. 44Y ngu mi nde ma pa bi 'mɛxuui maxøgue ra ximhai, pa asta ngu nzʉnga hñu nde, 45ngue'a̱ nura hyadi himbi yot'i, ha nura da̱nga xʉni dutu mi naxa mbo ra nda̱nija̱ pa mi cot'a habʉ ma'na xmá nsunda, bi xøgue desde maña̱ asta rí ga'ti. 46Nepʉ ra Jesu bi ña̱ nts'ɛdi ne bi 'ñena: ―Ma Dada'i, nubyá dí ɛnt'a'i ma te ja ri 'yɛ. Ne mi uadi bi ma̱nga njabʉ, 'bestho bi du. 47Ha nu mi hyanda njabʉ ra nda̱ gá soldado bi xøcambeni Ajua̱ ne bi 'ñena: ―Xi majua̱ni nuna 'ñøhøni hinte ma ts'oqui mi tu. 48Gatho nú'ʉ ya ja̱'i mi 'bʉhni de mi uadi mi hyanda gatho nú'a̱ xqui nja, bi ma de guehni co ndunthi ra dumʉi. 49Pe gatho nú'ʉ ya ja̱'i myá mpa̱di ra Jesu, ne 'raya 'bɛhña̱ xqui dɛni desde Galilea, bi gohi zi yabʉtho mi handa gatho nú'a̱ bi nja. 50Mi 'bʉ 'nara 'ñøhø xi mrá hoja̱'i mrá thuhu ra Jose, mrá mengu de ra hnini Arimatea de ra hai Judea. Nu'á̱ mrá nda̱ nehe de ra hmunts'a nda̱ gá xodyo. 51Pe nu'á̱ mi tø'mi da hyandua rá hmanda Ajua̱, hangue nu'á̱ himbi ne bi mfaxui yá minda̱ui ngu nú'a̱ xqui ncohi'ʉ ja yá hmunts'i. 52Hangue nu'á̱ bi ma bá c'a̱'tsa ra Pilato pa bá apabi ra nsɛqui da 'yacua rá ndo'yo ra Jesu. 53Nepʉ bi ca̱'ma ja ra pont'i, bi mant'a co 'nara hoga dutu, ne bá pɛgui ja 'nara 'ra'yo nt'agui nú'a̱ xqui thoca ja 'nara medo, y ja nú'a̱ ra nt'agui'a̱ hinxqui nt'aguini ni 'nara ja̱'i. 54Y nura pa'a̱ go mrá pa dega nthoqui, ne ya mi ma da mʉdi ra pa dega tsaya. 55Ha nuya 'bɛhña̱ nú'ʉ xqui dɛna ra Jesu desde Galilea bi ma pa bá handa habʉ xqui t'agui ra Jesu ne hanja xqui 'bɛcuabi rá ndo'yo. 56Ha nu mi menga ja yá ngu'ʉ, bi hyoca 'raya hoga ñʉni ne 'raya njots'i. Y bi ntsaya'ʉ nú'a̱ nsabdo ngu mi ma̱nga ra ley.

will be added

X\