NSAN LUCA 21

1Ha nura Jesu mi 'bʉhni ja ra nda̱nija̱ ne mi handa gatho nú'ʉ xi mi ja ndunthi te mi pɛ'tsi gue mi ʉt'a yá boja̱ ja ra 'mɛ'tsboja̱ de ra nija̱. 2Nehe bi hyanda 'nara viuda xi mrá zi hyoya bi 'yɛnt'ni yoho ya zi boja̱ dega cobre. 3Nepʉ nura Jesu bi 'ñena: ―Xi majua̱ni dí xi'ahʉ, gue nuna zi hyoya viuda xa unga ma'na ndunthi que nú'ʉ ma'ra, 4ngue'a̱ nu'ʉ́ bi uni pe de nú'ʉ yá mbongui, pe nuní, masque co rá zi nhyoya, bi unga gatho nú'a̱ mi pɛ'tsi pa xa zihma̱. 5Nepʉ bi 'yøde ra Jesu gue 'ra de nú'ʉ mi 'bʉhni mri mpede de ra nda̱nija̱, mi ma̱ñ'ʉ gue mri hnequi xi mahotho co 'raya hoga do xqui thoqui, ne xica t'øt'e xqui thuxni dega 'baha. Nepʉ ra Jesu bi 'ñembabi'ʉ: 6―Xi majua̱ni dí xi'ahʉ, gue ma da zø ra pa gatho núyʉ guí hanthʉ ma da yøt'e gatho, ne hinda gohi 'nara do maña̱ de rá midoui. 7Nepʉ nu'ʉ́ bi 'yambabi ne bi 'ñembi: ―Ma Xahnate'ihe, ¿ha'mʉ ma da nja nú'a̱ gá ma̱? ¿Te ma seña ma da hnequi nu sta zø ra pa da njabʉ? 8Nu'bʉ́ ra Jesu bi 'ñena: ―Nsuhʉ, oxqui hophʉ to'o da hya'ahʉ, ngue'a̱ ma da 'ñepʉ ndunthi da bepca ma thuhu ne da 'ñena: “Go guequi drá Cristo, ya xa zø ra pa pa ga nda̱.” Pe oxqui ma gui camfribihʉ'ʉ. 9Y nehe nu xcrí 'yøhʉ gue di ja ya tuhni habʉraza ne ya ts'othogui habʉraza ya hai, oxqui ntsuhʉ, ngue'a̱ mahyoni da njabʉ, pe beñhʉ gue tobia hindi gue'a̱ rá nga̱ts'i ra ximhai. 10Ne bi sigui bi 'ñembabi'ʉ: ―Ma da ntuhna ya hnini co ma'ra yá mihniniui, ne ya hai co ma'ra yá mihaiui. 11Ne ma da nja ndunthi ya da̱nga mbimhai ne ya da̱nga thuhu, ne ma da nja ndunthi ya ts'o hñeni habʉraza. Ha nu maña̱ mahets'i ma da hneca 'raya nt'udi nú'ʉ asta dri unga ra ntsu. 12Pe ante da nja nú'a̱ dí xi'ahʉ, ma dra t'ʉtsa'ihʉ ne dra jʉ'ahʉ, ma da ts'ix'a'ihʉ ja ya nija̱, ne ma da jo'a'ihʉ fadi, ne ma da ts'ix'ahʉ ja ya da̱nga nda̱ ne ja ya gobierhnu po rá nguecagui. 13Ne ja guehni ja ma gui ma̱ñhʉni gue majua̱ni xcá camfriguihʉ. 14Oxqui beñhʉ 'mɛt'o nú'a̱ te ma gui ma̱ñhʉ, nixi nú'a̱ ma gui tha̱dihʉ pa gui ña̱nga ri tehʉ, 15ngue'a̱ nugui go ma ga 'ra'ahʉ ya noya gui ma̱ñhʉ, ne ra mfa̱di. Y njabʉ nuri ncontra hinda za da da̱'ahʉ. 16Ngue'a̱ nusɛ ri dadahʉ, ne ri cuhʉ, ne nú'ʉ ma'ra ja te ri njahʉ, ne ri amigohʉ, go gue'ʉ ma da ña̱p'ahʉ. 'Ra de gue'ahʉ ma da tho'ahʉ, 17ne gatho ya ja̱'i ma da ʉtsa'ihʉ po rá nguecagui, 18pe hinda za te da 'yø't'ahʉ, nixi da c'ʉ'ts'ahʉ ni 'nari sta̱hʉ 'bʉ hingo rá paha Ajua̱ njabʉ. 19Y nu'bʉ gui tsɛthʉ nú'a̱ da t'ø't'ahʉ, nu'bʉ́ gui tsʉhʉ ra te pa nza̱ntho. 20Nu xcrí hyanthʉ ra hnini Jerusale di 'bʉhni ya soldado gatho ja rá nthets'i, nu'bʉ́ gui pa̱hʉ gue 'bestho ma dra nhuati. 21Ha nu'ʉ di 'bʉi ja ra hai Judea mahyoni 'bestho da 'bat'i ja ya t'øhø, ha nu'ʉ tó'o di 'bʉi mbo ra hnini Jerusale, mahyoni 'bestho da bøni. Ha nu'ʉ tó'o di 'yo thi de ra hnini, ostí ma da mengui da yʉt'i. 22Ngue'a̱ nuya pa'ʉ ma da hnequi rá cuɛ Ajua̱ ne ma da nja ya ts'othogui ngu nú'a̱ ma̱nga ra Ma̱ca T'ofo. 23¡Huecate nú'ʉ ya 'bɛhña̱ di da'thi ne nú'ʉ dya nzʉ nuya pa'ʉ! Ngue'a̱ ma da nja ndunthi ya da̱nga ʉgui, go gue'a̱ 'nará da̱nga cuɛ Ajua̱ pa nú'ʉ ya me Jerusale. 24Ngue'a̱ nu 'ra ma da du ja ra tuhni, ha nu ma'ra ma dra jʉ ne da ts'ixa nts'a̱hni yabʉ ja ma'ra ya hai. Ne ya nzøhø ja̱'i ma da sigui da manda ra hnini Jerusale, asta hinda uadi nú'ʉ ya pa da umba nsɛqui Ajua̱ da nda̱'ʉ. 25De nú'ʉ ya pa'ʉ ma da hneca ya nt'udi. Ma da nja te da nja ja ra hyadi ne ja ra za̱na̱ ne ja ya tsø. Y gatho ya ja̱'i de maxøgue ra ximhai ma da mpumfri co ra da̱nga ntsu nu sta ñʉni ra ndehe sta mpʉnts'i. 26Ha nuya ja̱'i asta di tu yá ts'ɛdi co ra da̱nga ntsu de gatho nú'a̱ ma da nja de guecua ja ra ximhai. Ha nu mahets'i asta da mbi nehe. 27Nepʉ ma da thandi Nú'a̱ To'o e bi Nja̱'i dua yopa pengui ja ya guui co rá da̱nga ts'ɛdi Ajua̱ xi strá nsunda. 28Nu xcrí hyanthʉ da mʉdi da nja nú'a̱ dí xi'ahʉ, oxqui ntsuhʉ, jʉxa ri thandihʉ pa mahets'i, ngue'a̱ 'bestho ja dí 'ñehni ri Ña̱ntehʉ. 29Ne bi xipabi 'nara 'bede'ʉ ne bi 'ñembabi: ―Hyanthʉ ra 'bai gá igo o ma'ra ya nda̱po, 30ora ya da bøhø yá 'roho, guí pa̱hʉ gue ya ma da zøhø ra pahyadi. 31Njabʉ nehe nu xcrí hyanthʉ núya stá xi'ahʉ, pa̱hʉ gue ra Nda̱ de mahets'i ya 'bʉi guetbʉ pa dua yopa ehe ja ra ximhai pa da nda̱. 32Xi majua̱ni dí xi'ahʉ, gatho nuya ya t'øt'eya ma da mʉdi da nja ante da du nú'ʉ 'bʉibya ja ra ximhai. 33Mahets'i ne ra ximhai ma da uadi da thogui, pe numa noya hinhya'mʉ da uadi, pɛ'tsi da njabʉ ngu nú'a̱ dá ma̱. 34Nsuhʉ, ne oxqui hophʉ ri mfenihʉ da megui po rá ngue ra nts'o'yo ne ra ntixfani ne ma'ra ya ts'ot'øt'e, ne oxqui tu ri mʉihʉ de nú'a̱ te da 'yø't'ahʉ ra 'bɛdi. Nsuhʉ pa hingue xcrí tha̱mfrihʉ da zøhø nú'a̱ ra pa'a̱. 35Ngue'a̱ ma da njabʉ ndunthi nú'ʉ 'bʉi habʉraza rá ngʉni ra ximhai, sta da̱mfri da zøhø ra pa, da nja ngu 'nara trampa da da̱ma njot'i. 36Hangue ndø'mhʉ ne 'yaphʉ ndunthi Ajua̱ pa da za gui c'othʉ de gatho nuya ya ts'ot'øt'e ma da nja, ne pa njabʉ da za gui 'bʉhʉ xá hño ja rá thandi Nú'a̱ To'o e bi Nja̱'i. 37Ra Jesu mi xahna ya ja̱'i dega pa ja ra nda̱nija̱, ha nu dega xuui mi pa ja ra t'øhø 'bo Olivo. 38Y gatho ya ja̱'i mi tsøhø hyastho xi 'nitho ja ra nda̱nija̱ pa mi øde nú'a̱ mi ma̱ñ'a̱.

will be added

X\