NSAN LUCA 20

1'Nara pa ra Jesu mi 'bʉi ja ra nda̱nija̱ mi zofo ya ja̱'i de ra hoga nt'øde. Nepʉ bi zøhø ya nda̱ gá macja̱ ne ya xahnate de ra ley ne ya nda̱xjua nda̱. 2Nepʉ nu'ʉ́ bi 'ñembabi: ―Dí ne gui xicje to'o xuá mɛhn'a'i pa gui 'yøt'a nuya ya t'øt'eya, ne con te ma nsɛqui guí øt'a njabʉ. 3Nepʉ nura Jesu bi 'ñembabi: ―Nequi ma ga an'ahʉ 'nara nt'ani: 4¿To'o xqui umba ra ts'ɛdi ra Xuua pa bi 'yøt'a ra sistehe? ¿Ha gue Ajua̱, o ya ja̱'i? 5Nu'bʉ́ nu'ʉ́ bi mʉdi bri 'ñámbabi 'na ngu ma'na ne bi 'ñémbi: ―¿Te ga ma̱ñhʉbya? Nu'bʉ ga emfʉ gue Ajua̱ bi umba ra ts'ɛdi, ma da 'ñengaguihʉ: “Nu'bʉ́ ¿hanja hingá camfrihʉ?” 6Ha nu'bʉ ga emfʉ gue ya ja̱'i, nu'bʉ́ nu'ʉ́ da bø yá cuɛ ne da hyojʉ dega nc'ahni, ngue'a̱ nu'ʉ́ beni gue ra Xuua xqui mɛhna Ajua̱. 7Nu'bʉ́ nu'ʉ́ bi 'ñembabi gue himi pa̱di to'o xqui umba ra ts'ɛdi ra Xuua pa mi øt'a ra sistehe. 8Hangue nura Jesu bi 'ñembabi'ʉ: ―Nixi guequi, hinga xi'ahʉ con te ma nsɛqui dí øt'a njaua. 9Nepʉ nura Jesu bi mʉdi bi xipa ya ja̱'i 'nara 'bede ne bi 'ñembabi: ―Mi 'bʉi 'nara 'ñøhø xqui ga̱xa ndunthi ya 'bai gá obxi ja yá hua̱hi. Y de gue'a̱ bi umba nhyandi rá ua̱'obxi 'raya hyanthua̱hi. Ha nu'á̱ bi ma de guehni gá ma ja ma'na ra hai ndunthi ya pa. 10Nu mi zøhø ra pa pa da nja ra sofo de ya obxi, bi mɛhna 'nará 'bɛgo nú'a̱ to'o mrá me ua̱'obxi pa da 'yapabi nú'a̱ mri 'ñepabi'a̱. Pe ya hyanthua̱hi bi guui dega mfɛi nú'a̱ ra 'bɛgo ne hinte bi umbabi. 11Pe nura me ua̱'obxi bi mɛhna ma'na rá 'bɛgo, nehe'a̱ bi t'ø'tua ya nts'o'mʉi ne bi juui dega mfɛi ne hinte bi t'umbabi nehe. 12Nepʉ bi mɛhna ma'na, pe nú'ʉ ya hyanthua̱hi bi gʉ bi na'mbi asta bi zɛni ne bi guui'ʉ. 13Nepʉ nura me ua̱'obxi bi bensɛ ja rá mfeni ne bi 'ñena: “Xibya, ¿te ga øt'e? Ma ga pɛhna ma hma̱ca t'ʉ, xa̱ma̱ nu stí hyandi'ʉ gue go di gue'a̱ ma t'ʉ, xa̱ma̱ da 'yøte.” 14Pe nú'ʉ ya ts'o hyanthua̱hi mi hyandua rá t'ʉ ra me ua̱'obxi bi zøhø, bi 'ñémbabi'ʉ: “Nuni go guehni ma da gohui yá hai rá dada, pe ma ga jʉhʉ ga hohʉ pa go ga cohʉ gatho ya hai.” 15Hangue nu'ʉ́ bi gʉ nú'a̱ ra t'ʉ ne bi pøni de ja ra hua̱hi ne bi hyo'ʉ. Nu'bʉ́ ra Jesu bi 'yambabi ya ja̱'i ne bi 'ñembi: ―¿Te guí beñhʉ ma da 'yøt'a nú'a̱ ra me ua̱'obxi co nú'ʉ ya ts'o hyanthua̱hi? 16Nu'á̱ ma da 'ñehe ne da hyo gatho'ʉ, ne da umbabi ya hai ma'ra ya hyanthua̱hi. Nu mi 'yøde njabʉ gatho ya ja̱'i bi 'ñena: ―¡Xa̱ma̱ Ajua̱ hinda hopi da njabʉ! 17Nepʉ ra Jesu bi hyandi'ʉ ne bi 'ñembabi: ―Nu'bʉ́, ¿te ne da ma̱ nú'a̱ huxa ja ra Ma̱ca T'ofo habʉ ena njaua?: Nú'a̱ ra do bi føtbʉ hma̱ha̱ 'na lado nuya hyøngu, nubya gue'a̱ ra mʉdi do de rá nija̱ Ajua̱. 18Nu'a̱ tó'o da fe'tsa nura do'a̱, da 'uaca yá ndo'yo, ha nu'a̱ tó'o da zɛ'mi, da qu'ɛ'ti. 19Ya nda̱ gá macja̱ ne ya xahnate de ra ley xi mi nehma̱ xa gʉ ra Jesu nura ora'a̱, ngue'a̱ bi zo yá mfeni'ʉ gue nú'a̱ ra 'bede xqui ma̱ñ'a̱, nu'á̱ xqui ma̱ pa gue'ʉ, pe nu'ʉ́ mi tsu ya ja̱'i da bø yá cuɛ. 20Hangue bi mɛhna 'raya 'yacate nú'ʉ mri 'ñet'a hoja̱'i, pa xa̱ma̱ xa 'yøde xa ña̱ma'ñʉ ra Jesu, pa njabʉ xa za xa ña̱pabi co ra gobierhnu. 21Hangue nu'ʉ́ bi 'yø'tua 'nara nt'ani ne bi 'ñembabi: ―Ma zi Xahnate'ihe, dí pa̱he gue nu'i guí ma̱ ne guí udi nú'a̱ xá hño, ne hinguí huahna nú'a̱ to'o guí ø'tua ra hño, ngue'a̱ nu'i guí udi rá 'ñu Ajua̱ nú'a̱ majua̱ni. 22Dí ne gui xicaguihe, ¿ha gue rí 'ñepi ga juthe nú'a̱ ra boja̱ adi ra nda̱ Cesa, o hina? 23Pe ra Jesu mi pa̱tuatho yá ts'omfeni'ʉ, bi 'ñembabi: ―¿Hanja guí ne gui hyacaguihʉ? 24'Ñutcahʉ 'nara boja̱ xa̱. ¿To'o rá c'oi núna tøcua, ne to'o rá thuhuna̱? Nu'bʉ́ nu'ʉ́ bi da̱di ne bi 'ñembabi: ―Rá c'oi ne rá thuhu ra nda̱ Cesa. 25Nu'bʉ́ nu'á̱ bi 'ñembabi: ―Umfʉ ra nda̱ Cesa nú'a̱ rí 'ñepabi, ne umfʉ Ajua̱ nú'a̱ rí 'ñepabi'a̱. 26Pe nu'ʉ́ himbi dinba ni 'nara ts'onoya ja yá thandi ya ja̱'i ngu nú'a̱ mi ne'ʉ, asta go bi 'yø'ʉ de nú'a̱ gá da̱di ra Jesu, ne bi go'tatho yá ne'ʉ. 27'Mɛfa 'raya ja̱'i nú'ʉ t'embi ya saduceo bi ma bá c'a̱'tsa ra Jesu. Nú'ʉ́ ena gue hinda ma da yopa nte nú'ʉ xa du. Ne nu'ʉ́ bi 'ñembabi ra Jesu: 28―Ma Xahnate'ihe, ra Moise bi zogui nt'ofo gue 'bʉ 'nara 'ñøhø da du ne da zogui rá 'bɛhña̱ ne himbi mɛ'tsua ni 'nara ba̱tsi, nu'bʉ́ nurá cu nú'a̱ ra 'ñøhø bi du, mahyoni da ntha̱tui nú'a̱ ra 'bɛhña̱ bi gohisɛ, pa 'bʉ da mɛ'tsa ya ba̱tsi da thu'mba rá thuhu ngu rá thuhu ndu rá 'bɛt'o da̱me. 29'Na'qui mi 'bʉi yoto ya 'ñøhø mri ncu. Nu'a̱ rá mʉdi bi ntha̱ti pe 'mɛfa bi du, ne ni 'nara ba̱tsi himbi mɛ'tsua rá 'bɛhña̱. 30Y nura 'bɛhña̱'a̱ bi ntha̱tui ma'na rá cu ndu rá da̱me, ne'a̱ bi du, ne ni 'nara ba̱tsi himbi zocuabi. 31Nepʉ nurá hñu rá cu ndu rá da̱me bi ntha̱tui nehe nú'a̱ ra 'bɛhña̱. Y bi njabʉ 'rama'na asta bi du gatho nú'ʉ yoto, ha nu gatho'ʉ ni 'nara ba̱tsi himbi zocuabi nú'a̱ ra 'bɛhña̱. 32Ne 'mɛfa bi du nehe nú'a̱ ra 'bɛhña̱. 33Hangue xi de stí yopa nte de ra du'ʉ, ¿to'o 'na de gue nú'ʉ yoto bi ntha̱tui dí 'mʉhui mahets'i? 34Nepʉ ra Jesu bi 'ñembabi: ―Nuua ja ra ximhai ya 'ñøhø ne ya 'bɛhña̱ ri ntha̱ti. 35Pe nu sta yopa nte de ra du ne stí 'mʉhni mahets'i nú'ʉ rí 'ñepi da 'mʉhni, ya hinda ma da ntha̱ti'ʉ, 36ngue'a̱ ya hinda ma da du ma'na'qui. Ne ma da 'mʉ ngu ya ɛnxɛ, ne dyá t'ʉ Ajua̱ ngue'a̱ ya da yopa nte'ʉ de ra du. 37Nusɛ ra Moise xicaguihʉ ja ra Ma̱ca T'ofo gue ma da yopa nte nú'ʉ xa du, ne ja guehnitho ma̱ de nú'a̱ ra nda̱po mi zø, gue ja bi 'ñembabini Ajua̱ gue go gue'a̱ rá Ajua̱ ra Abrá, ne de ra Isaac, ne de ra Cobo nú'ʉ ya xqui du. 38Pe Ajua̱ hingrá Ajua̱ de nú'ʉ xa du, go rá Ajua̱ de nú'ʉ te. Hangue ra Abrá ne ra Isaac ne ra Cobo bí te ja rá thandi Ajua̱, ne gatho ya ja̱'i te ja rá thandi'a̱. 39Nepʉ 'raya xahnate de ra ley bi 'ñembabi: ―Majua̱ni nú'a̱ gá ma̱, ma Xahnate'ihe. 40Y de guehni ya hinte bi yopa 'yamba ma'na'qui'ʉ. 41Ra Jesu bi 'ñembabi'ʉ: ―¿Hanja guí ma̱ñhʉ gue nú'a̱ ra Cristo bá pɛhna Ajua̱ pa da nda̱ gue rá t'ʉ ra Davi? 42Gue nura Davi bi 'ñena njaua ja ra Ma̱ca T'ofo de ya Salmo: Ajua̱ ra Dada bi 'ñembabi ma zi Hmu: “Bá e gui hñudiua ja ma 'ñɛi, 43asta hinga tsihn'a'i gatho ri ncontra pa da gohi'ʉ de rí ga'ti ri ua.” 44Nepʉ ra Jesu bi 'ñena: ―Nu'bʉ ra Cristo go drá t'ʉhma̱ ra Davi, nu'bʉ́ ¿hanja bi 'ñenga ra Davi gue go rá Hmu? 45Nepʉ ra Jesu bi zofo yá nxadi, y gatho ya ja̱'i bi 'yøde. Ne bi 'ñembabi: 46―Nsuhʉ, oxqui øthʉ ngu nú'a̱ øt'a ya xahnate de ra ley, ri ho da 'ño co 'raya he xá ma pa da numansu ya ja̱'i'ʉ. Ne ri ho dra zɛnjua co ndunthi ra t'equ'ei ja ya tai, ne ri ho da gʉ ya mʉdi hudi ja ya nija̱, ne go gue'ʉ huahna ya mʉdi hudi habʉ ja ra hñuni. 47Ne ha̱nbabi nú'a̱ pɛ'tsa ya viuda asta yá ngu nehe, ne pa hinda fa̱tua yá ts'ot'øt'e'ʉ, øt'a yá sadi xi xá ma, pe nú'ʉ́ go gue'ʉ ma da hña̱nga 'nara castigo ma'na ra da̱ngui.

will be added

X\