NSAN LUCA 19

1Nepʉ nura Jesu bi yʉt'a ja ra hnini Jericó ne mri 'yo mi thogui made ra hnini. 2Ne de guehni mi 'bʉ 'nara 'ñøhø xi mrá rico mrá thuhu ra Saqueo, gue'a̱ mrá nda̱ de nuya 'ña̱tsa ngʉxboja̱. 3Nura Saqueo mi ne da hyanda ra Jesu pa da ba̱di to'o'a̱, pe himi tsa ngue'a̱ himrá he'tsa ja̱'i y mi 'ñoui ndunthi ya ja̱'i ra Jesu, hangue himi tsa da hyandi'a̱. 4Nepʉ nu'á̱ bi nest'ihi bi 'mɛt'o bi bøxa maña̱ ja 'nara da̱nga 'bai gá za pa da za da hyanda ra Jesu, ngue'a̱ ja ma dí 'rani'a̱. 5Nu mi thogui ra Jesu de guehni, bi hyandi gue ja mi tøhni'a̱. Ne bi 'ñembabi: ―Nu'i Saqueo, bá da̱ma ca̱i, ngue'a̱ nubya dí ne ga tsøñ'a'i ja ri ngu. 6Nepʉ nura Saqueo mant'a̱ bi da̱ma ga̱i ne co ndunthi ra johya bi zixa ra Jesu ja rá ngu. 7Ha nu mi hyanda njabʉ ya ja̱'i, bi mʉdi bi nøñ'ʉ ra Jesu ngue'a̱ bi ma bá cʉt'a ja rá ngu 'nara ts'oja̱'i. 8Nepʉ nura Saqueo bi 'ñembabi ra Jesu: ―Ma zi Hmu'i, ma ga hecua ya hyoya made de numa hño dí pɛ'tsi, ne 'bʉ to'o stá hat'i, ma ga ju'tua goho 'mi'qui de nú'a̱ stá hat'i. 9Ha nura Jesu bi 'ñembabi: ―Núbya rapaya xa zøhø ra mpøhø nuua ja ri ngu, ngue'a̱ ne'i xqui 'ñehe desde yá ja̱'i ndu ra Abrá. 10Ngue'a̱ Nú'a̱ To'o bi e bi Nja̱'i, bá ehe pa da hyoni ne da pøhø nú'ʉ xa 'mɛdi. 11Nu mi uadi bi ma̱nga ra Jesu njabʉ, bi mʉdi bi xipabi ya ja̱'i 'nara 'bede, ngue'a̱ ya mi ma da zønga Jerusale y nú'ʉ ya ja̱'i mi hu yá mʉi gue mi ma da hnequi 'bestho rá hmanda Ajua̱ nu stí zøni. 12Hangue nura Jesu bi 'ñembabi: ―Mi 'bʉi 'nara 'ñøhø mrá t'ʉ 'nara nda̱. Nú'á̱ bi ma yabʉ ja ma'na ra hnini pa da thuts'i dega nda̱ ja rá hai, nepʉ da yopa mengui pa da nda̱. 13Pe ante da ma'a̱, bi zohna nú'ʉ 'rɛt'a yá 'bɛgo pa da umbabi 'ra 'nara boja̱, y mahyɛgui rá ndunthi bi umbabi cada 'na de gue'ʉ. Nepʉ bi 'ñembabi: “'Yøthʉ ra thoni co nú'a̱ dá 'ra'ahʉ pa da xu ri boja̱hʉ asta hinga pengui.” Ne bi gʉ rá 'ñu bi ma. 14Pe nú'ʉ ya ja̱'i de rá hai nú'ʉ to'o mi ʉtsa, bi mɛhna 'raya 'mɛhni pa da ma nehe habʉ mri ma'a̱ pa xa̱ma̱ hinxa thuts'i dega nda̱ de yá hai'ʉ. 15Pe nu'á̱ bi t'umbabi ra ts'ɛdi pa da nda̱, ne bi menga ja rá hai. Ha nu mi zøhø'a̱ bi manda bi ts'ohna gatho nú'ʉ to'o xqui umbabi ra boja̱, pa da ba̱di hangu xqui da̱ha̱ cada 'na de gue'ʉ. 16Nu'a̱ rá mʉdi bi zøhø bi 'ñena: “Nú'i ri t'equ'ei Nda̱, nuri boja̱ gá 'raqui xa xu má 'rɛt'a yá ndunthi de nú'a̱ gá 'raqui.” 17Ha nura nda̱ bi 'ñembabi: “Xá hño, xi grá hoga 'bɛgo, xcá japi xa xu nú'a̱ 'na tʉi dá 'ra'i. Nubya ma ga hux'a'i dega nda̱ pa gui manda 'rɛt'a ya hnini,” bi 'ñembi. 18Ha nu'a̱ ma'na ra 'bɛgo bi 'ñena: “Nú'i ri t'equ'ei Nda̱, nuri boja̱ gá 'raqui xa xu má cʉt'a yá ndunthi de nú'a̱ gá 'raqui.” 19Nu'bʉ́ ra nda̱ bi 'ñembabi nehe: “Ne'i ma ga hux'a'i dega nda̱ pa gui manda cʉt'a ya hnini.” 20Nepʉ bi zøhø nú'a̱ ma'na bi 'ñembabi: “Nú'i ri t'equ'ei Nda̱, jaua ri boja̱ núna gá 'raqui. Dá tu'ti ne dá pɛ'tsi xá hño pa hindá 'bɛdi. 21Dá ntsu xa bø ri cuɛ ngue'a̱ nu'i guí japi da mpɛfi 'na ndunthi, ne guí jʉ guí pɛ'tsi nú'a̱ hingo xcá pɛfi, ne guí xofo nú'a̱ hinxcá pot'i.” 22Nepʉ nura nda̱ bi 'ñembabi: “Nu'i 'nagrá ts'o'bɛgo, co nú'a̱ ri noya gá ma̱ gá nts'oquisɛ. Nu'bʉ gá pa̱di gue drí ja'ahʉ gui mpɛhʉ nts'ɛdi ne dí jʉ dí pɛ'tsi nú'a̱ hinstá pɛfi, ne dí xofo nú'a̱ hinstá pot'i, 23nu'bʉ́ ¿hanja hingá tsogui ma boja̱ ja ra banco pa xa xu rá tha̱ha̱?” 24Nepʉ bi 'ñembabi nú'ʉ ma'ra ya 'bɛgo mi 'bʉhni: “Hña̱mfʉ nú'a̱ ra boja̱ ne umbabihʉ nú'a̱ to'o bi xu 'rɛt'a 'mi'qui rá ndunthi ra boja̱.” 25Pe nu'ʉ́ bi 'ñembabi: “Nú'i ri t'equ'ei Nda̱, pe nu'á̱ ya pɛ'tsa 'rɛt'a ya boja̱.” 26Ha nura nda̱ bi da̱di ne bi 'ñena: “Dí xi'ahʉ gue nu'a̱ tó'o pa̱di da xu nú'a̱ t'umbi, da t'umbabi ma'na, pe nu'a̱ hingui pa̱di da xu nú'a̱ t'umbi, da tha̱mbabi nú'a̱ ts'ʉ di pɛ'tsi. 27Ha nú'ʉ ma ncontra himi ne gue go ga nda̱, bá tsincahʉua gatho, ne hyohʉ ja ma thandi.” 28De mi uadi bi ma̱nga njabʉ ra Jesu, bi thogui gá ma pa Jerusale. 29Y de ya mi ma da zønga ja ra hnini Betfage ne ra hnini Betania, gueta ra t'øhø rá thuhu 'bo Olivo, bi mɛhna yoho yá nxadi, 30ne bi 'ñembabi: ―Rí maha ja nuni ra hnini bí jani, ne nu xcrí tsøñhʉni ma gui tsʉhʉ 'nara zi burru di tha̱t'i de guehni, nú'a̱ hinto xa tøguetho. Gui xo'thʉ ne ua tsincahʉua. 31Nu'bʉ to'o da 'yan'ahʉ hanja guí xo'thʉ, 'ñembabihʉ: “Ma zi Hmuhe bí honi.” 32Nepʉ nú'ʉ yoho yá nxadi bi ma ne bi zʉdi ngu xqui xipa ra Jesu. 33Y ts'a mi xo'ti'ʉ, nú'ʉ to'o myá mɛti bi 'ñembi: ―¿Te gui japhʉ ra burru guí xo'thʉ? 34Nepʉ nu'ʉ́ bi da̱di ne bi 'ñena: ―Ma zi Hmuhe bí honi. 35Nu'bʉ́ bi ts'i'tsuabi'a̱ nura zi burru, ne nu mi zøni'ʉ bi xi'tsua yá pat'i'ʉ pa bi tøgue'a̱. 36Ne de mri ne ra 'ñu ra Jesu, ya ja̱'i mi ha̱ca yá pat'i pa mi pøgue ja ra 'ñu habʉ mi thogui'a̱. 37Ne nu mi donts'a ja ra t'øhø 'bo Olivo pa da ga̱i, gatho nú'ʉ mri dɛni'a̱ bi mʉdi bi mafi co ra johya ne mi xøcambeni Ajua̱ ngue'a̱ xqui hyant'ʉ ya da̱nga nt'udi nú'ʉ xqui 'yøt'a ra Jesu. 38Ne mi ena'ʉ: ―¡Nja̱pi ra da̱nga Nda̱ nuni xuá mɛncahʉ Ajua̱! ¡Xi rá nsunda ra hoga'mʉi nuni mahets'i, ne ma da njabʉ de guecua ja ra ximhai nehe! ¡Xi rá nsunda Ajua̱! 39Nepʉ 'ra de nuya fariseo mi pani ja ya ja̱'i bi 'ñembabi ra Jesu: ―Xahnate, dí nehe gui hña̱cua nuyʉ ya ja̱'i grí 'ñoui, hinda mafi. 40Pe nura Jesu bi da̱di ne bi 'ñembabi: ―Dí xi'ahʉ gue nu'bʉ núyʉ da go'ta yá ne, nu'bʉ́ da za da mafi asta ya do. 41Nu mi zøhø ra Jesu gueta ra hnini Jerusale, bi hyandi ne bi huequi ne bi nzoni, 42bi 'ñena: ―¡Nu'ahʉ me Jerusale, 'bʉ di tsohma̱ ri mfenihʉ gue xa zøhø ra pa pa gui mpøhøhma̱hʉ! Pe nubyá hinda za gui pa̱hʉ, ngue'a̱ xra t'a̱c'a ri mfenihʉ. 43Ma da zø ya pa xá nts'o pa gue'ahʉ, ngue'a̱ nuri ncontrahʉ ma da go't'athohʉ, ne da the'ts'athohʉ, ne hingui c'othʉ de ja yá 'yɛ'ʉ. 44Ne da hyo'ahʉ ne gatho ri ba̱tsihʉ, ne ma da nhuata ri hninihʉ, ne hinda ma da gohi ni 'nara do maña̱ de rá midoui. Nú'á̱ gue'a̱ ma gui thoguihʉ ngue'a̱ hingá pa̱di gá hña̱ñhʉ nuna ra mpøhø Ajua̱ bá pɛhn'ahʉ. 45Nepʉ ra Jesu bi yʉt'a ja ra nda̱nija̱ ne bi mʉdi bi 'yɛnga gatho nú'ʉ to'o mi 'bʉhni mri mpa ne mri ntai de guehni, 46ne bi 'ñembabi: ―Ja ra Ma̱ca T'ofo Ajua̱ ena njaua: “Numa ngu ra ngu pa da søcambenigui”; pe nu'ahʉ́ xcá 'yøt'athohʉ ra ngu dega mfe. 47Hyastho ra Jesu mi 'bʉhni ja ra nda̱nija̱ ne mi xahna ya ja̱'i, pe nuya nda̱ gá macja̱ ne ya xahnate de ra ley ne gatho ya nda̱ de ra hnini, gatho'ʉ mi honi hanja da za da hyo'a̱. 48Pe himi tsa da 'yøt'a njabʉ'ʉ ngue'a̱ gatho ya ja̱'i mi huxa nt'øde de nú'a̱ mi ma̱ñ'a̱.

will be added

X\