NSAN LUCA 18

1Ra Jesu bi xipa 'nara 'bede yá nxadi gue mahyoni da 'yapabi Ajua̱ nza̱ntho nsinque da zabi. 2Ne bi 'ñembi: ―Mi 'bʉi 'nara nzaya ja 'nara hnini, himi tsu Ajua̱ ne ni 'nara ja̱'i himi tsu. 3Ne de nú'a̱ ra hnini'a̱ mi 'bʉi 'nara viuda nehe, nza̱ntho mi pa da c'a̱'tsa nú'a̱ ra nzaya pa da ña̱ni de rá ncontra'a̱. 4Pe bi thogui ndunthi ya pa nura nzaya himbi umba ra mfats'i nú'a̱ ra viuda. Pe 'mɛfa bi 'ño rá mfenisɛ nú'a̱ ra nzaya ne bi 'ñena: “Masque nugui hindí tsu Ajua̱, nixi 'nara ja̱'i hindí tsu, 5pe hingo rá ngue'a̱ ma ga øta nú'a̱ xica ra viuda, pa hingue xi stí tsøtcatho ma mʉi.” 6Ra zi Hmu Jesu bi 'ñena: ―Guehna bi ma̱nga nú'a̱ ra ts'o nzaya. 7Xihma̱ Ajua̱, ¿ha gue hinda ña̱ni nú'ʉ to'o xa huahni, nú'ʉ apabi'a̱ ma pa ra xuui? ¿Ha gue hinda mats'i 'bestho'ʉ? 8Dí xi'ahʉ gue ha̱, 'bestho da mats'i. Xi sta yopa mengui Nú'a̱ To'o e bi Nja̱'i, ¿ha gue da zʉdi ndunthi to'o di camfri 'bʉ? Ya hina. 9Ra Jesu bi ma̱nga ma'na ra 'bede pa nú'ʉ to'o ri 'ñets'i gue ya hoja̱'i ne xi ya denate, ne bi 'ñena: 10―Yoho ya 'ñøhø bi ma ja ra nija̱ pa da 'yapabi Ajua̱, 'na mrá fariseo, ha nu ma'na mrá 'ña̱tsa ngʉxboja̱. 11Ha nura fariseo bi 'yapabi Ajua̱ má 'bai ne mi ena njaua: “Dí jama̱di ma Zidada'i, ngue'a̱ nugui hindí nja ngu ya 'yøt'ats'oqui, ya be, ya ts'o'mʉi ne ya zinga medintha̱ti, nixi dí nja ngu nuni ra 'ña̱tsa ngʉxboja̱ 'bahni. 12Nugui dí ayuna yo'qui ra semana, ne nza̱ntho dí 'ra'a 'rɛt'a centavo cada ra bɛxo nú'a̱ dí ta̱ha̱,” njabʉ bi 'ñena. 13Pe nú'a̱ ra 'ña̱tsa ngʉxboja̱ bi gohi ts'ʉ zi yabʉ de ra fariseo, ne nixi bi ne bi gʉxa yá da pa mahets'i ngue'a̱ mi pa̱di gue xi mrá nduts'oqui, pe xi mi apabi Ajua̱ con gatho rá mʉi ne mi ena: “¡Ma Zidada'i, dá nja ri nthecate de guequi, ngue'a̱ xi majua̱ni nugui 'nadrá da̱nga 'yøt'ats'oqui!” 14Hangue bi 'ñenga ra Jesu: ―Dí xi'ahʉ gue nú'a̱ ra 'ña̱tsa ngʉxboja̱ bi zʉdi ra pumbate de yá ts'oqui, ne bi menga ja rá ngu ya hinte má ts'oqui mi tu. Pe nura fariseo himbi zʉdi ra pumbate de yá ts'oqui. Ngue'a̱ nu'a̱ tó'o ri 'ñexasɛ, nú'á̱ go gue'a̱ ma da 'bɛ rá tsa. Ha nu'a̱ tó'o hini 'ñexasɛ, nú'á̱ 'mɛfa ma da t'e'tsua rá nsu. 15Bá ts'impabi ya zi ba̱tsi ra Jesu pa da hñuxa yá 'yɛ ne da ja̱pabi'ʉ. Pe nu mi hyanda njabʉ yá nxadi bi zʉi nú'ʉ to'o mri zi yá ba̱tsi. 16Ha nura Jesu bi 'ñembabi'ʉ: ―Hophʉ ya ba̱tsi da e da zʉcagui, oguí ha̱cuahʉ, ngue'a̱ nu'ʉ tó'o da 'mʉi ja rá hmanda Ajua̱, mahyoni da nja ngu nuya ya zi ba̱tsi. 17Nehe dí xi'ahʉ gue nu'a̱ tó'o hinda nja ngu 'nara zi ba̱tsi pa da 'mʉi ja rá hmanda Ajua̱, hinda za da yʉt'a ja rá hmanda Ajua̱. 18Ne de gue'a̱ 'nara nda̱ de ja ra nija̱ bi 'yambabi ra Jesu ne bi 'ñembi: ―Nu'i Xahnate, 'nagrá hoja̱'i, ¿te da za ga øt'e pa ga tsʉdi ra te pa nza̱ntho? 19Ha nura Jesu bi 'ñembabi: ―¿Hanja guí engagui gue drá hoja̱'i? Jo'o ma'na ra hoja̱'i, hønsɛ Ajua̱. 20Nu'i guí pa̱di xá hño ya hmanda de ra ley habʉ ena: “Oxqui ntsinga medintha̱ti, oxqui nhyote, oxcrí mpe, ne oxqui jʉ'tsua ya nc'uamba ri miqu'eiui, ne umba ra t'equ'ei ri dada ne ri na̱na̱ ne su'ʉ.” 21Ha nú'a̱ ra 'ñøhø bi 'ñena: ―Gatho núyá stá øt'e desde ndí ba̱tsi. 22Ha nu mi 'yøde ra Jesu njabʉ, bi 'ñembabi: ―Ri 'bɛdi gui 'yøt'a ma'na. Rí ma gui pa gatho nú'a̱ guí pɛ'tsi, ne gui hecuabi ya hyoya. Njabʉ ha̱, ma grí tsʉdi ya hño de mahets'i. Ne bá ehe gui tɛngagui. 23Pe nu mi 'yøde njabʉ nú'a̱ ra nda̱ xi bi du rá mʉi ngue'a̱ xi mrá da̱nga rico. 24Nu mi hyanda ra Jesu gue xi bi du rá mʉi, bi 'ñena: ―¡Xi xá hñei da yʉt'a 'nara rico ja rá hmanda Ajua̱! 25Ma'na hingui hei da thogui 'nara da̱nga mbo'ni ngu ra cameyo ja rá gu 'nara 'yofri que 'nara rico da yʉt'a ja rá hmanda Ajua̱. 26Ha nú'ʉ to'o bi 'yøde nu mi ma̱nga njabʉ, bi 'ñena: ―Nu'bʉ njabʉ, ¿to'o'a̱ da za da mpøhø? 27Nura Jesu bi 'ñembabi: ―Nu'a̱ jʉmpabi xá hñei ya ja̱'i, pa Ajua̱ otho 'nara t'øt'e strá hñei. 28Nepʉ nura Pedro bi 'ñembabi: ―Ma zi Hmu'ihe, nuje stuá tsoguihe gatho nú'a̱ ndí pɛ'tshe pa go stuá tɛn'ahe. 29Nepʉ ra Jesu bi 'ñembabi: ―Majua̱ni dí xi'ahʉ, nu'a̱ tó'o da zogui rá ngu, o rá dada, o rá na̱na̱, o yá cu, o rá 'bɛhña̱, o yá ba̱tsi po rá ngue ra ma̱ca noya, 30nu'á̱ ma da hña̱ni nuua ja ra ximhai ma'na ndunthi que nú'a̱ xa zogui, ne 'mɛfa ma da hña̱nga ra te pa nza̱ntho nuni mahets'i. 31Y nura Jesu bi 'ueque 'nambʉ nú'ʉ 'rɛt'amayoho yá nxadi, ne bi 'ñembabi: ―Nubya grá maha pa Jerusale habʉ ma da nja ngu nú'a̱ xa 'yofo yá 'mɛhni Ajua̱ de nú'a̱ ma da thogui Nú'a̱ To'o bi e bi Nja̱'i. 32Ma da t'ɛnt'ua ja yá 'yɛ ya ja̱'i nú'ʉ hingyá me Israel, ne nu'ʉ́ ma da 'yø'tua ra nt'eni, ne ma da ña̱ma'ñʉ de gue'a̱, ne ma da zots'i. 33Nu'ʉ́ ma da na'mbi nepʉ da hyo, pe nurá hñupa ma da yopa nte de ra du ma'na'qui. 34Pe nuya nxadi himi tso yá mfeni de nú'a̱ mi xipabi ra Jesu, nixi himi tsa da ba̱di'ʉ de nú'a̱ mi ma̱ñ'a̱. 35De ya mi ma da zønga ra Jesu ja ra hnini Jericó, mi huhni 'nara goda ja ra 'ñu, mi pɛti. 36Ha nu mi 'yøde'a̱ gue mi pani ndunthi ya ja̱'i, nu'á̱ bi 'ñani te rá 'bɛ'a̱ xqui nja. 37Nepʉ nu'á̱ bi sipabi gue mi pani ra Jesu me Nasare. 38Nu'bʉ́ nu'á̱ bi ña̱ nts'ɛdi ne bi 'ñena: ―¡Nu'i Jesu, rá T'ʉ'i ra nda̱ Davi, dá nja ri nthecate de guequi! 39Ha nuya ja̱'i mri 'bɛt'o mi tsʉi ne mi embi gue da go'ta rá ne, pe nu'á̱ ma'na mri mafi nts'ɛdi ne mi ena: ―¡Rá T'ʉ'i ra Davi, huegagui! 40Nepʉ ra Jesu bi gohi bi 'mai ne bi mɛhni to'o bá tsi. Y nu mi zøhø habʉ mi 'bai'a̱, bi 'yambabi ne bi 'ñembi: 41―¿Te guí ne ga ø't'a'i? Ha nura goda bi da̱di ne bi 'ñena: ―Dí ne ga handi, Ndada. 42Y ra Jesu bi 'ñembabi: ―¡Nubya ha̱ xa njabʉ ngu nú'a̱ guí ne! Xcá ña̱ni ngue'a̱ xcá camfrigui. 43'Bestho ra ora'a̱ ra goda bi za bi hyandi, ne bi dɛna ra Jesu, mi xøcambeni Ajua̱. Y gatho nú'ʉ ya ja̱'i bi hyandi njabʉ, ne'ʉ bi xøcambeni Ajua̱ nehe.

will be added

X\