NSAN LUCA 17

1Ra Jesu bi 'ñembabi yá nxadi: ―Nza̱ntho da nja 'raya t'øt'e pa da japi da nts'oca ya ja̱'i, pe ¡huecate nú'a̱ ra ja̱'i to'o da japi da 'yøt'a 'nara ts'oqui ma'na! 2Ma'na xá hño nú'a̱ ra ja̱'i'a̱ dra ts'ʉtuahma̱ 'nara do strá hñʉ ja rá 'yʉga ne dra føta ja ra ndehe, pa te hønsɛ da japi da 'yøt'a ra ts'oqui ma'na rá miqu'eiui nú'a̱ hinxa zɛditho rá jamfri. 3Hangue nugui dí xi'ahʉ gui nsuhʉ. Nu'bʉ 'nari cuhʉ da 'yø't'ahʉ 'nara nts'o'mʉi, zofohʉ, hña̱cuahʉ. Nu'bʉ da ñobri, pumbabihʉ. 4Masque da 'yø't'ahʉ ra nts'o'mʉi yoto 'mi'qui de ra pa, ne 'bʉ da 'ñehe da 'ya'ahʉ ra pumbate cada ra 'mi'qui, pumbabihʉ. 5Ha nuyá apostol ra Jesu bi 'ñembabi: ―Xupca ma jamfrihe. 6Nepʉ ra zi Hmu Jesu bi 'ñembabi: ―Nu'bʉ xi majua̱ni gri pɛ'tshʉ ra jamfri masque ngu 'nara zi nda dega mostasa rá nda̱ngui, nu'bʉ́ da za gui 'ñembabihʉ nuna da̱nga 'bai gá za: “C'ʉts'i de habʉ guí 'bai ne rí ma gui nt'ʉt'a ja ra ndehe,” ha nura za'a̱ da 'yø't'a'ihʉ co nú'a̱ ri jamfrihʉ. 7Ra Jesu bi 'ñembabi nehe'ʉ: ―'Bʉ 'nara ja̱'i di 'bʉ 'nará 'bɛgo xqui menga 'bɛfi ja ra hua̱hi o ra 'ba'yo, ¿ha gue da t'embabi 'bestho: “Thogui hñudi gui ñuni”? 8Hina. Nu'á̱ da t'embabi: “'Mɛt'o gui hoca ra nt'oxi, ne hñoquigue pa gui 'raqui te ga tsi. Nepʉ 'mɛfa gui ñunigue nehe.” 9¿Ha guí beñhʉ da t'umba njama̱di ra 'bɛgo de nú'a̱ 'bɛpabi da 'yøt'e? Hina. 10Njabʉ nehe nu xcrí juahʉ gui pɛphʉ rá 'bɛfi Ajua̱ xa 'bɛp'ahʉ, rí 'ñepi gui 'ñeñhʉ: “Hiní 'ñepcahe gui 'yacje ra jama̱di ngue'a̱ 'nadyá 'bɛgothohe ne hønsɛ stá pɛhe nú'a̱ mri 'ñepcaguihe ga pɛhe.” 11De guehni bi thogui ra Jesu bi sigui rá 'ñu pa mri ma Jerusale, bi 'ranga madetho de yoho ya hai, 'na rá thuhu Nsamaria, ha nu ma'na Galilea. 12Y ya de mi ma da zønga ja 'nara zi hnini, bi bøni pa bá tsʉdi'a̱ 'rɛt'a ya 'ñøhø mi tsʉdi ra lepra nú'a̱ mi tsit'atho ra ngø, ne nu'ʉ́ bi gohi zi yabʉtho de gue'a̱, ngue'a̱ xuá nts'uni yá hñeni. 13Nepʉ bi ma'ti'ʉ bi 'ñembi: ―Jesu, ma zi Xahnate'ihe, dá nja ri nthecate de guecje. 14Nepʉ nu mi hyanda ra Jesu bi 'ñembabi'ʉ: ―Rí maha ua 'ñudihʉ ja ya macja̱. Nepʉ nu'ʉ́ bi ma, ne de má 'ñu bi ña̱ni de yá hñeni'ʉ. 15Y 'na de gue'ʉ de mi za gue bi ña̱ni, bi mengui mi xøcambeni Ajua̱ co ya hmafi. 16Ne bi ndandiña̱hmu ja rá ua ra Jesu ne bi mɛgui rá hmi asta ja ra hai pa bi umba njama̱di ngue'a̱ xqui 'yøthe'a̱. Y nú'a̱ ra 'ñøhø'a̱ mrá me Nsamaria. 17Y nura Jesu bi 'ñani ne bi 'ñena: ―¿Ha gue hingue mi 'rɛt'a bi ña̱ni? ¿Habʉ bi ma nú'ʉ má gʉto? 18¿Ha gue hønsɛ núni hingrá me Israel bá pengui ri xøcambeni Ajua̱? 19Nepʉ ra Jesu bi 'ñembabi nú'a̱ ra 'ñøhø: ―'Bai rí ma, ya xcá ña̱ni ngue'a̱ xcá camfrigui. 20Nepʉ ya fariseo bi 'yambabi ra Jesu ha'mʉ mi ma da zøhø rá hmanda Ajua̱ nuua ja ra ximhai. Nepʉ nu'á̱ bi da̱di ne bi 'ñembabi: ―Nurá hmanda Ajua̱ hinga 'nara t'øt'e pa da hnequi. 21Nixi da za da t'eñ'ahʉ: “Xi jaua”, o “Bí jani”. Nurá hmanda Ajua̱ ya xa zøhø ne ya 'bʉi con gue'ahʉ. 22Nepʉ nu'á̱ bi 'ñembabi yá nxadi nehe: ―Ma da zøhø ra pa gui nehma̱hʉ gui hyanthʉ da zøhø 'bestho nú'a̱ ra da̱nga pa, pa gui hyanthʉ da yopa 'ñehe pa da nda̱ Nú'a̱ To'o e bi Nja̱'i, pe hindi tat'atho ya pa pa gue'a̱. 23Ne ma da t'eñ'ahʉ: “Xi 'bʉcua”, o “Xi bí 'bʉhni”. Pe oxqui pahʉ ma gui c'a̱'tshʉ, ne oxqui tɛnihʉ nú'ʉ to'o da xi'ahʉ njabʉ. 24Ngue'a̱ ngu guí hanthʉ 'nara huɛi nú'a̱ masɛctho da yot'i maxøgue mahets'i, ma da njabʉ nehe nú'a̱ ra pa'a̱ stua yopa pengui Nú'a̱ To'o e bi Nja̱'i. 25Pe mahyoni 'mɛt'o da thogui ndunthi ya ts'othogui. Ne ma da ʉtsa gatho ya ja̱'i nú'ʉ 'bʉi de nuya pabya. 26Ngu nú'a̱ bi nja de nuya pa'ʉ de mi 'bʉi ra Noé, ma da njabʉ nehe nu stua yopa ehe Nú'a̱ To'o e bi Nja̱'i. 27Nu'ʉ́ mri ñuni, mi tsithe, ne mi øt'a ntha̱ti ngu xi yá nza̱i, ne hinte mi jamasu'ʉ asta nura pa'a̱ bi yʉt'a ra Noé ja ra arca, ne mi da̱mfri'ʉ bi ñuxa ra dehe maxøgue ra ximhai, y gatho ya ja̱'i bi ja̱t'i. 28Bi njabʉ nehe nuya pa'ʉ mi 'bʉ ra Lot. Ya ja̱'i mi øt'e ngu xi myá nza̱i, mi ñuni mi tsithe, mi mpa ne mi ntai, mi mpot'i ne mi høngu. 29Pe nu de mi bønga ra Lot de ra hnini Sodoma, bi 'ua̱ ya tsibi ne ra asufre, y bi du dega nza̱t'i gatho ya ja̱'i de nú'a̱ ra hnini'a̱. 30Ma da njabʉ nehe nú'a̱ ra pa'a̱ stua yopa pengui Nú'a̱ To'o e bi Nja̱'i. 31De nura pa'a̱, 'bʉ 'na di 'ba ja ra patio de rá ngu, hinda yʉt'a mbo rá ngu pa da hña̱ts'i nú'a̱ te di pɛ'tsi. Y nu'a̱ tó'o di 'yo ja rá hua̱hi, ya hinda yopa menga ja rá ngu. 32Benihʉ de hanja bi ndo'u rá 'bɛhña̱ ra Lot ngue'a̱ bi ñegui bi hyanda nú'a̱ ra hnini bi zopʉ. 33Nu'a̱ tó'o ne da su rá te, da 'bɛdi, pe nu'a̱ tó'o da unga rá te po rá nguequi, nu'á̱ ma da mɛ'tsa ma'na ra hoga te pa nza̱ntho. 34Nehe dí xi'ahʉ gue nú'a̱ ra xuui'a̱ 'bʉ yoho di 'bonga 'nadbʉ ja yá a̱ha̱, 'na da ts'its'i, ha nu ma'na da ts'ogui. 35'Bʉ yoho ya gʉni di cʉni mahyɛgui, 'na da ts'its'i, ha nu ma'na da ts'ogui. 36'Bʉ yoho ya 'ñøhø di 'yo ja yá 'bɛfi 'nadbʉ ja ra hua̱hi, 'na da ts'its'i, ha nu ma'na da ts'ogui. 37Nu mi 'yøde njabʉ ya apostol bi 'yambabi ra Jesu ne bi 'ñembi: ―¿Habʉ ma dua nja nú'a̱ gá ma̱, ma zi Hmu'ihe? Nepʉ nu'á̱ bi da̱di ne bi 'ñembabi'ʉ: ―Nuni habʉ di 'bɛni nú'a̱ xa du, ja ma da munts'ni ya pada pa da zi'ʉ.

will be added

X\