NSAN LUCA 10

1Nepʉ 'mɛfa ra Jesu bi huahna má hñu'rate ne 'rɛt'a yá nxadi pa bi mɛhni dega yoho da 'mɛt'o'ʉ pa ja ya hnini habʉ mi ma da thogui'a̱. 2Ne bi 'ñembabi: ―Xi majua̱ni dí xi'ahʉ, xi ndunthi ra sofo pe ts'ʉtho ya xofo. Hangue 'yaphʉ Ajua̱ nú'a̱ to'o rá mɛti ra sofo dua pɛhna ndunthi ya mɛfi pa da gʉ'tsua rá sofo. 3Y nubyá nu'ahʉ ma ga pɛhn'a'ihʉ gui maha ngu ya zi dɛti madetho de ya mi'ño, hangue xi da nsuhʉ. 4Ne oxqui ha̱xhʉ ni 'nari buxahʉ, nixi ri boja̱hʉ, nixi ri ponga zɛsthihʉ. Ne oxqui 'baihʉ gui nzɛnjuatehʉ 'mɛt'o ja ri 'ñuhʉ. 5Ora gui cʉthʉ ja 'nara ngu gui nzɛnjuatehʉ njaua: “Ajua̱ da ja̱p'ahʉ pa gui 'bʉhʉ te rá 'ñentho.” 6Ha nu'bʉ ya mengu de nura ngu'a̱ ne da 'mʉ 'nara hoga'mʉi, nu'bʉ́ Ajua̱ da ja̱pi'ʉ ngu gá xiphʉ. Ha nu'bʉ hina, Ajua̱ hinda ja̱pi'ʉ. 7Nu habʉ da t'a'ahʉ ntsaya, ja gui cohʉni ne nu'ʉ́ da 'uiñ'ahʉ, ngue'a̱ 'nara mɛfi rí 'ñepi da t'umbabi te da zi ne gatho nú'a̱ te honi. Y ja gui 'bʉthʉni, oxqui 'yohʉ dega nengu. 8'Bʉ gui tsøñhʉ ja 'nara hnini ne da t'a'ahʉ ntsaya, tsihʉ gatho nú'a̱ da t'a'ahʉ. 9'Yøthehʉ ya da'thi nú'ʉ di 'bʉhni, ne xiphʉ ya mengu de guehni gue ra Nda̱ de mahets'i ya xa 'ñepʉ pa da nda̱. 10Pe nu'bʉ gui tsøñhʉ ja 'nara hnini ne hinda t'a'ahʉ ntsaya, 'bahʉ habʉ da 'yøde'ihʉ ya ja̱'i de guehni ne gui 'ñemfʉ'ʉ: 11“Ma ga hua̱the ma uahe pa da hyø nú'a̱ ra hai xa ncueta de nuna ri hninihʉ, ngue'a̱ hinxcá camfriguihe nú'a̱ stá xi'ahe. Pe pa̱hʉ xá hño gue ra Nda̱ de mahets'i ya xa 'ñepʉ pa da nda̱, y nuje ya hindí tha̱he de ri ts'oquihʉ.” 12Dí xi'ahʉ gue nura pa de ra ntha̱nguɛnda ma'na ma da nda̱ngui rá castigo nura hnini'a̱ que ra hnini Sodoma nú'a̱ bi huata Ajua̱. 13¡Huecate'ihʉ nú'ahʉ gyá menguhʉ Corasí, ne nú'ahʉ gyá me Betsaidahʉ! Ngue'a̱ nu'bʉ ya mengu de ra hnini Tiro ne de ra hnini Sidó xa hyanthma̱ha̱ nuya milagro xcá hyanthʉbya, nú'ʉ́ xa ñobrihma̱'ʉ de yá ts'oqui ne xa hñehma̱ co ya he dega dumʉi, ne xa ncoxhma̱ ra 'bospi dega ntsø'mi. 14Pe nura pa'a̱ sta tha̱p'ahʉ nguɛnda, ma'na ma da nda̱ngui ri castigohʉ que ra hnini Tiro ne Sidó. 15Ha nú'ahʉ gyá menguhʉ Ncapernau, guí hu ri mʉihʉ gue rí 'ñep'ahʉ gui maha mahets'i, pe hina, ngue'a̱ nu'ahʉ ya xa t'ɛp'a'ihʉ pa gui maha ja ra nidu. 16Nepʉ bi xipabi yá 'mɛhni: ―Nu'a̱ tó'o da 'yøde nú'a̱ gui ma̱ñhʉ, go øtcagui, y nu'a̱ tó'o hinda 'yøde nú'a̱ gui ma̱ñhʉ, hingo øtcagui, y nu'a̱ tó'o hingui øtcagui, hingui øta nú'a̱ to'o bá pɛncagui. 17Nepʉ nu de bá penga nú'ʉ hñu'rate ne 'rɛt'a yá 'mɛhni bi zøhø co ndunthi ra johya ne bi 'ñembabi ra Jesu: ―Ma zi Hmu'ihe, asta ya ts'onda̱hi xa 'yøtcahe, ngue'a̱ stá ɛñhe'ʉ de ri thuhu. 18Ha nura Jesu bi 'ñembabi'ʉ: ―Ha̱ha̱, majua̱ni dá handa ra Satá bá tagui de mahets'i ngu 'nara huɛi. 19Y nugui stá 'ra'ahʉ ra ts'ɛdi pa gui nethʉ ya qu'eña̱ ne ya penzʉ, ne pa gui ta̱pabihʉ gatho rá ts'ɛdi ra ts'onda̱hi, nsinque te da 'yø't'ahʉ. 20Pe ogrí johyahʉ ngue'a̱ xa 'yø't'ahʉ ya ts'onda̱hi, johyahʉ ngue'a̱ nuri thuhuhʉ bí nt'ofo nuni mahets'i. 21Ra ora'a̱ ra Jesu xi bi johya co rá ts'ɛdi ra Ma̱ca Nda̱hi ne bi 'ñena: ―Ma Dada'i, go grá Nda̱ de mahets'i ne de gatho ra ximhai, dí xøcambeni'i ngue'a̱ xcá utuabi ri noya núyʉ nja ngu ya zi ba̱tsi, y hingo xcá utuabi ya ba̱mhya̱ ne ya nimfeni. Y nu'i ma Dada'i, xcá 'yøt'a njabʉ ngue'a̱ gue'a̱ ri paha'a̱. 22Mi uadi bi ma̱nga ra Jesu njabʉ bi 'ñena: ―Ma Dada xa 'yɛntc'agui gatho ja ma 'yɛ. Hinto pa̱tcagui ma 'mʉi, hønsɛ Ajua̱ ma Dada go gue'a̱ pa̱tca ma 'mʉi. Ne hinto pa̱tua rá 'mʉi ma Dada, hønsɛgui go dí pa̱di, ne nú'ʉ to'o stá huahni pa da ba̱di. 23Ne bi mpʉnts'i bi hyanda yá nxadi ne bi 'ñembi 'nambʉ sɛhɛ'ʉ: ―Johyahʉ ngue'a̱ guí hanthʉ nú'a̱ te dí øt'e. 24Ngue'a̱ nugui dí xi'ahʉ gue ndunthi yá 'mɛhni Ajua̱ ne ya nda̱ mi 'bʉi maya'bʉ mi nehma̱ xa hyanda ngu nú'a̱ guí hanthʉbya, pe himbi za bi hyant'ʉ, ne mi nehma̱ xa 'yøde ngu nú'a̱ guí øhʉbya, pe himbi za bi 'yøde'ʉ. 25Nepʉ de gue'a̱ 'nara xahnate de ra ley bi ma bá c'a̱'tsa ra Jesu pa da 'yø'tua 'nara nt'ani pa da nu te da da̱di'a̱, ne bi 'yambabi bi 'ñembi: ―Ma Xahnate'i, ¿te mahyoni ga øt'e pa ga tsʉdi ra te pa nza̱ntho? 26Nu'bʉ́ ra Jesu bi da̱di ne bi 'ñena: ―¿Te ma̱nga nú'a̱ xa t'ofo ja ra ley? ¿Te xcá pa̱di de guí he'ti? 27Nura xahnate de ra ley bi da̱di ne bi 'ñena: ―Ena njaua: Ma̱di Ajua̱ ri Hmu bí 'bʉ mahets'i con gatho ri mfeni, con gatho ri coraso, con gatho ri ts'ɛdi, ne con gatho ri mʉi, ne ma̱di ri miqu'eiui ne gui su ngu grí nsu sɛhɛ. 28Nepʉ ra Jesu bi 'ñembabi: ―Gue'a̱ majua̱ni nú'a̱ xcá ma̱. Nu'bʉ gatho gue'a̱ guí øt'e, nu'bʉ́ gui tsʉdi ra te pa nza̱ntho. 29Pe nura xahnate de ra ley himi ne to da c'a'tsua rá nt'ani, hangue bi yopa 'yambi ne bi 'ñembabi: ―¿To'o ma miqu'ei'be? 30Nepʉ ra Jesu bi da̱di ne bi 'ñembi: ―'Nara pa 'nara 'ñøhø mri ne ra 'ñu, xqui 'ñe de Jerusale pa mri ma ja ra hnini Jericó, y de má 'ñu bi daca 'raya dacate, ne bi hña̱mbabi gatho nú'a̱ te mi ha̱, asta yá dutu bi møcuabi, ne xi bi hna'mbabi'a̱, ne bi ts'ohni ya mi nedu. 31Nepʉ de gue'a̱ bi toca bi 'rani 'nara macja̱ ja nú'a̱ ra 'ñu'a̱, ne nu mi hyandi mi 'bɛni ja ra nenga'ñu nú'a̱ ra 'ñøhø xqui hna'mbi, nu'bʉ́ nu'á̱ bá catatho 'na lado bi thoguitho. 32Nehe bi 'rani 'nara maste de ra nija̱ nú'ʉ t'embi ya levita, ne'a̱ bi hyandatho nú'a̱ ra 'ñøhø mi 'bɛni, y nu'á̱ bi cata 'nambʉ bi thotho nehe. 33Nepʉ ja nú'a̱ ra 'ñu'a̱ bi 'rani 'nara me Nsamaria. Nu mi hyanda nú'a̱ ra 'ñøhø mi 'bɛni, xi bi huequi. 34Nepʉ bi joni bá c'a̱'tsi, ne bi go'tsuabi ra aceite co ra vinu habʉ xqui ts'ɛnbabi, ne bi du'tuabi. Nepʉ bi 'yɛnts'a ja rá burru, ne bi zixa asta ja 'nara meso, ne ja guehni bi su. 35Nepʉ rá hyax'a̱ ante da ma de guehni nú'a̱ ra me Nsamaria bi hña̱i yoho ya t'axboja̱ ja rá buxa, ne bi umbabi nú'a̱ ra me meso, ne bi 'ñembabi: “Dí tsoc'aua ts'ʉ nuna 'ñøhø gui su. Y nu'bʉ gá gasta má ts'ʉ ra boja̱, nu xcrá yopa pengui ga ju't'a'i.” 36Nu mi uadi ra Jesu bi ma̱nga njabʉ, bi 'yamba ra xahnate de ra ley ne bi 'ñembi: ―De nú'ʉ hñu ya 'ñøhø, ¿to'o 'na de gue'ʉ mrá miqu'eiui xi majua̱ni nú'a̱ ra 'ñøhø xqui thaqui? 37Nepʉ nura xahnate de ra ley bi 'ñembabi: ―Nú'a̱ to'o bi nja rá nthecate de gue'a̱. Nu'bʉ́ nura Jesu bi 'ñembabi: ―Ha̱ha̱, gue'a̱ mahyoni gui 'yøt'e nehe. 38De guehni ra Jesu bi thogui rá 'ñu, nepʉ bi zønga ja 'nara hnini. Y nuni ja mi 'bʉhni 'nara 'bɛhña̱ mrá thuhu ra Marta, y nu'á̱ bi umba ntsaya ra Jesu ja rá ngu. 39Ra Marta mi 'bʉ 'nará cu mrá thuhu ra Maria. Y nu'á̱ bi hñudi de rí ga'ti yá ua ra Jesu pa da 'yøde nú'a̱ mi ma̱ñ'a̱. 40Pe nura Marta xi mi ja ndunthi te da mɛfi ja ra ngu. Ne bi da̱st'i habʉ mi 'bʉ ra Jesu ne bi 'ñembabi: ―Ma zi Hmu'i, ¿hinguí handi gue ma cu bi zogasɛ gatho ra 'bɛfi? Xipabi ts'ʉ da e da maxcagui. 41Pe nura Jesu bi 'ñembabi ra Marta: ―Marta, xi guí xøna ri 'bɛfi ne guí tu ri mʉi ngue'a̱ ndunthi ri 'bɛfi, 42pe hønsɛ 'nara 'bɛfi mahyoni gui 'yøt'e, ngu nuna hoga 'bɛfi xa huahna ra Maria, y hinda za to'o da hña̱cuabi.

will be added

X\