NSANJUA 9

1Ra Jesu mi 'yo ja 'nara 'ñu, ne de guehni bi hyanda 'nara 'ñøhø ya mrá goda desde rá 'bʉi. 2Ha nuyá nxadi bi 'yambabi ne bi 'ñena: ―Xahnate, ¿to'o bi 'yøt'a 'nara ts'oqui pa bi 'mʉi njani, nuni o rá dada o rá na̱na̱? 3Nura Jesu bi da̱di ne bi 'ñena: ―Hingo xa 'yøt'a ra ts'oquini, ni rá dada nixi rá na̱na̱ pa bi 'mʉi njani mrá goda. Xa njabʉ hønsɛ pa da hnequi rá ts'ɛdi Ajua̱ de nú'a̱ ma da t'ø'tuabini. 4Núbya ma patho mahyoni ga pɛpa rá 'bɛfi nú'a̱ to'o bá pɛncagui, ngue'a̱ ma da zø ra xuui, ne nu'bʉ́ ya hinda za to da mpɛfi. 5De núbya dí 'bʉcua ja ra ximhai go guecagui drá ñot'i dí yo'tua yá mfeni ya ja̱'i. 6Nu mi uadi bi ma̱nga njabʉ'a̱, bi zo rá jihni ja ra hai ne bi mant'a ts'ʉ ra zi hai pa bi go'tsuabi ja yá da ra goda. 7Ne bi 'ñembabi: ―Grí ma bá nxʉca ja ra mothe Siloé. ―Nura thuhu'a̱ pøni da 'ñena, xa 'bɛhni. Nepʉ nu'á̱ bi ma bá nxʉqui, ha nu mi mengui ya mi handi. 8Nepʉ yá 'nangu ne nú'ʉ to'o xqui hyanda ma'mɛt'o gue mrá goda'a̱ bi 'ñémbabi'ʉ: ―Go guehni mi hudi mi pɛti, ¿ha ngue ha̱? 9Ha 'ra mi ena: ―Go guehni. Ha nu ma'ra mi ena: ―Hina. Pøde rí hña̱ts'i ha̱, pe hingo guehni. Ha nu'á̱ bi da̱di ne bi 'ñena: ―Majua̱ni go guecaguihma̱. 10Nu'bʉ́ nuya ja̱'i bi 'yambabi ne bi 'ñembi: ―¿Hanja tsa guí handbya? 11Nu'bʉ́ nu'á̱ bi da̱di ne bi 'ñena: ―Nú'a̱ ra 'ñøhø rá thuhu ra Jesu go gue'a̱ bi gosca ra bøhai ja ma da ne bi 'ñengagui: “Grí ma bá nxʉca Siloé.” Nepʉ nuga dá ma dá nxʉqui, hangue 'bestho ra ora'a̱ dá handi. 12Ha nu'ʉ́ bi 'yambabi ne bi 'ñembi: ―¿Habʉ bí 'bʉ'a̱? Ne nu'á̱ bi 'ñena: ―Hindí pa̱di. 13Nepʉ nuya ja̱'i'ʉ bi zi'tsua ya fariseo nú'a̱ ra 'ñøhø mrá goda. 14Ha nú'a̱ ra pa'a̱ ra Jesu bi mant'a ts'ʉ ra hai co rá jihni pa bi go'tsua yá da nú'a̱ ra goda pa bi umba rá thandi, go mrá pa dega tsaya. 15Nehe ya fariseo bi 'yambabi ra goda hanja xqui nja pa ya mi handi. Ne nu'á̱ bi 'ñembabi'ʉ: ―Nú'a̱ ra 'ñøhø rá thuhu ra Jesu bi gosca ra bøhai ja ma da, ne dá nxʉqui, y hangue dí handbya. 16Ha nu 'raya fariseo bi 'ñena: ―Nú'a̱ ra 'ñøhø'a̱ hinxqui 'ñehe de Ajua̱ ngue'a̱ hingui jamasu ra pa dega tsaya. Pe nu ma'ra mi ena: ―Nu'bʉ 'nadra 'yøt'ats'oquihma̱, hinda za da 'yøt'a nuya ya da̱nga nt'udi nguna̱. Ne 'rama'na'ño mi ma̱ñ'ʉ. 17Hangue nu'ʉ́ bi yopa 'yø'tua ya nt'ani ra goda ne bi 'ñembabi: ―Xi'a'i, ¿te go guí ma̱ngue de nú'a̱ to'o bi xoc'a ri da? Nu'á̱ bi 'ñena: ―Nuga dí ena gue go gue'a̱ 'nará 'mɛhni Ajua̱. 18Pe nuya nda̱ gá xodyo'ʉ himi camfri gue go mi gue'a̱ mrá goda ne ya xqui xo yá da, hangue nu'ʉ́ bi zompa rá dada ne rá na̱na̱. 19Nepʉ bi 'yambabi'ʉ ne bi 'ñena: ―¿Ha go gue'a̱ ri t'ʉhʉ guí ma̱ñhʉ gue ya mrá goda desde mi 'mʉi? ¿Hanja handbya 'bʉ? 20Ha nurá dada ne rá na̱na̱'a̱ bi da̱di ne bi 'ñena: ―Dí pa̱he xá hño gue go gue'a̱ ma t'ʉhe, ne desde mi 'mʉi ya mrá goda. 21Pe hindí pa̱he hanja xa za xa hyandibya, nixi dí pa̱he to'o bi xocua yá da. Ya tsøxa yá jɛya'a̱, go da 'yamfʉ'a̱, nu'á̱ da za da xi'asɛhʉ. 22Gue'a̱ bi da̱di rá dada ne rá na̱na̱ nguetho mi tsu yá nda̱'ʉ, ngue'a̱ nuyá nda̱'ʉ ya xqui go 'nara cohi gue nu'a̱ tó'o da ma̱ gue ra Jesu go gue'a̱ majua̱ni ra Cristo rá 'mɛhni Ajua̱ pa e da nda̱, nú'á̱ da t'ɛni de ja ra nija̱. 23Hangue nurá dada ne rá na̱na̱ xqui 'ñena: “Ya tsøxa yá jɛya'a̱, ne da za gui 'yambasɛhʉ.” 24Ha nuya nda̱ gá xodyo bi yopa zohna nú'a̱ mrá goda ne bi 'ñembabi: ―Xøcambeni Ajua̱ ne xicje nú'a̱ majua̱ni. Ngue'a̱ nuje dí pa̱he gue nú'a̱ ra 'ñøhø'a̱ to'o xa xoc'a ri da, go gue'a̱ 'nara 'yøt'ats'oqui. 25Ha nura goda bi da̱di ne bi 'ñena: ―Nuga hindí pa̱di ua ra 'yøt'ats'oqui o hina. Hønsɛ nú'a̱ dí pa̱di, gue ndrá goda, ha nubyá ya dí handi. 26Ha nu'ʉ́ bi yopa 'yambabi'a̱ ne bi 'ñembi: ―¿Te bi 'yø't'a'i nú'a̱ ra 'ñøhø mri xoc'a ri da? 27Nu'bʉ́ nu'á̱ bi da̱di ne bi 'ñembabi'ʉ: ―Ya stá xi'ahʉ ne hinguí ne gui camfrihʉ. ¿Hanja guí ne ga yopa xi'ahʉ ma'na'qui? ¿Ha guí nehʉ gue ne'a'ihʉ dyá nxadi'ihʉ'a̱? 28Ha nu'ʉ́ bi zani'a̱ ne bi 'ñembabi: ―Nu'i go rá nxadi'i'a̱, ha nuje yá nxadiguihe ra Moise. 29Nuje dí pa̱he gue Ajua̱ mi ña̱ui ra Moise, pe nura 'ñøhø'a̱ guí ena, hindí pa̱he habʉ xqui 'ñehe'a̱. 30Ha nura goda bi da̱di ne bi 'ñembabi'ʉ: ―¡Tengu gue nu'ahʉ hinguí pa̱hʉ habʉ xqui 'ñehe, ha nu'á̱ bi xoga ma da! 31Ngue'a̱ dí pa̱hʉ gue Ajua̱ øtuabi yá t'adi nú'a̱ to'o tsu'a̱ ne ø'tuabi rá paha'a̱, pe nuyá t'adi ya 'yøt'ats'oqui hingui øtuabi. 32Ngue'a̱ hinhya'mʉ stá øhʉ to xa xocua yá da 'nara ja̱'i nú'a̱ ya mrá goda desde mi 'mʉi. 33'Bʉ nú'a̱ ra 'ñøhø'a̱ hinxqui 'ñehma̱ de Ajua̱, hinda za da 'yøthma̱ njabʉ'a̱. 34Ha nu'ʉ́ bi da̱di ne bi 'ñembabi: ―Nu'i desde ngá 'bʉi ya ngrá 'yøt'ats'oqui, y njabʉ ¿xi nguí ne gui xancaguihe? Nepʉ nu'ʉ́ bi 'yɛnga de ja ra nija̱. 35Ha nura Jesu bi 'yøde gue xqui t'ɛnga de ja ra nija̱ nú'a̱ mrá goda, bi hyoni, y nu mi yopa zʉdi bi 'ñembabi: ―Nu'i, ¿ha guí camfribi rá T'ʉ Ajua̱? 36Nu'bʉ́ nu'á̱ bi da̱di ne bi 'ñena: ―Ndada, ¿to'o'a̱ pa da za ga camfri? 37Ha nura Jesu bi 'ñembabi'a̱: ―Ya xcá hyandi, ne nú'a̱ to'o guí ña̱uibya go guesɛ'a̱. 38Nu'bʉ́ nú'a̱ mrá goda bi 'ñena: ―Ma zi Hmu'i, dí camfri'i. Ne 'bestho bi ndandiña̱hmu pa bi nsunda'a̱. 39Ne ra Jesu bi 'ñena: ―Nuga stá eheua ja nuna ra ximhai pa ga øt'a ra ts'ʉtbi, pa nu'ʉ tó'o xa ngoda ja yá mfeni, ga xocua yá mfeni pa da ba̱di, ha nu'ʉ tó'o beni gue ja yá mfa̱di, nja ngu nú'ʉ to'o xa xo yá da, ga japi da ngoda'ʉ. 40Ha 'raya fariseo nú'ʉ mi 'bahuini'a̱ bi 'yøde nú'a̱ te mi ma̱ñ'a̱, ne bi 'ñembabi: ―¿Ha gue necje dyá godahe? 41Nu'bʉ́ ra Jesu bi 'ñembabi'ʉ: ―'Bʉ gri godahma̱ha̱hʉ, nu'bʉ́ hingri tuhma̱ ri ts'oquihʉ. Pe nu'ahʉ́ guí eñhʉ gue guí hanthʉ, hangue grí tuhʉ ri ts'oquihʉ.

will be added

X\