NSANJUA 6

1Nepʉ de gue'a̱ ra Jesu bi 'ranga ri'nandi ra ndehe Galilea, nú'a̱ rá thuhu nehe Tiberia. 2Ha mri dɛna ndunthi ya ja̱'i ngue'a̱ mi handa ya da̱nga nt'udi nú'ʉ mi ø'tua ya da'thi mi ña̱ni. 3Nu'bʉ́ ra Jesu bi bøxa ja 'nara t'øhø ne ja bá huhuini yá nxadi. 4Ne ya mi ma da dat'a ra pa de ra pascua 'nará ngo ya xodyo. 5Nu'bʉ́ ra Jesu bi hyanda nú'ʉ ya ja̱'i mi ndunthi xqui dɛni'a̱, nepʉ nu'á̱ bi 'ñemba ra Lipe: ―¿Habʉ ga tañhʉ ra thuhme 'bʉ, pa ga 'uiñhʉ gatho nuya ja̱'iyʉ? 6Ra Jesu xa bi ne bi ma̱nga njabʉ pa bi nu te xa da̱di hma̱ha̱ ra Lipe, ngue'a̱ nu'á̱ ya mi pa̱disɛ te mi ma da 'yøt'e. 7Ha nura Lipe bi da̱di ne bi 'ñembabi: ―Pøde nixi co yo nthebe denario ra thuhme ga tañhʉ, hinda uadi, ua 'ra 'na zi xɛni da ziyʉ. 8Nepʉ 'nará nxadi ra Jesu mrá thuhu ra Andre, go gue'a̱ mrá cu ra Simu Pedro, bi 'ñembabi ra Jesu: 9―'Bʉcua 'nara ts'ʉnt'ʉ ha̱ cʉt'a ya thuhme dega cebada ne yoho ya zi hua̱, ¿pe te ri ma̱ña? 10Nu'bʉ́ nura Jesu bi 'ñembabi yá nxadi: ―Xiphʉ gatho ya ja̱'i da hñudi. Y mi jani 'nara 'bot'ɛi, ne ja bi hñuhni'ʉ, ne ngu mi cʉt'a 'mo sɛhɛ ya 'ñøhø. Ya 'bɛhña̱ ne ya ba̱tsi himi pa 'mede. 11Nepʉ nura Jesu bi gʉ nú'ʉ ya thuhme, ne bi umba njama̱di Ajua̱ de nú'a̱ ra thuhme ma da zi'ʉ, ne ja ngá umba yá nxadi nepʉ ya nxadi bi umba nuya ja̱'i mi huhni. Ne guet'atho bi 'yøt'e co nuya zi hua̱, ne bi zi'ʉ asta xi bi niña̱. 12Ha nu mi uadi'ʉ, ra Jesu bi 'ñembabi yá nxadi: ―Bá muntshʉ gatho ya zi xɛni nú'ʉ bi bongui, pa hinte da 'mɛdi. 13Ha nu'ʉ́ bi munts'a gatho ya zi xɛca thuhme xqui 'bonguabi'ʉ de nú'ʉ cʉt'a ya thuhme dega cebada. Ne bi ñuxa 'rɛt'amayoho ya 'bøts'e co nuya xɛca thuhme bi bongui. 14Ha nu mi hyanda ya ja̱'i nú'a̱ ra da̱nga nt'udi xqui 'yøt'a ra Jesu, nu'ʉ́ bi 'ñena: ―Xi majua̱ni go guehni rá da̱nga 'mɛhni Ajua̱ nú'a̱ mi hma̱ da 'ñecua ja ra ximhai. 15Pe ra Jesu mi pa̱tho gue mi ne'ʉ da zixhma̱ha̱ pa da nda̱hma̱'a̱ de gue'ʉ, hangue nu'a̱ bi 'yøt'e, bi ma de guehni bi yopa bøxa ma'na'qui ja nú'a̱ ra t'øhø'a̱ ri sɛhɛ. 16Y de mi nde, yá nxadi'a̱ bi ma pa ja ra ndehe. 17Nepʉ de guehni bi yʉt'a ja 'nara motsa pa bi ma'ʉ Ncapernau de ri'nandi ra ndehe. Ha ya xmá 'mɛxuui, ha ra Jesu hinxqui mengtho de ja ra t'øhø. 18Ne bi mʉdi bi 'ño 'nara bʉnthi xi mri a̱nga ra dehe. 19Y ya xqui 'ño ngu cʉt'a o 'rato kilometro de ja ra dehe, nepʉ bi hyant'ʉ ra Jesu mbra 'yotho maña̱ de ra dehe pa da e da zʉdi'ʉ, ne nu'ʉ́ xi bi ntsu. 20Pe nu'á̱ bi 'ñembabi'ʉ: ―¡Nuga go guecagui, oguí tsuhʉ! 21Nepʉ nu'ʉ́ co ra johya bi pø'tsa ja ra motsa ne bi zits'i, ne 'bestho bi zøñ'ʉ co ra motsa ja ra hai habʉ mri ma'ʉ. 22Ha nurá hyax'a̱ nú'ʉ ya ja̱'i xqui gohni ri'nandi ra ndehe ne xqui hyandi gue 'nada ra motsa mi 'bahni, ne xqui ba̱di gue nuyá nxadi ra Jesu bi masɛ'ʉ ja nú'a̱ ra motsa, ne ra Jesu himbi mɛui'ʉ. 23Ne guetbʉ habʉ xqui zi ra thuhme'ʉ nu mi umba njama̱di Ajua̱ nura Jesu, ja bi zøhni ma'ra ya motsa xqui 'ñehe Tiberia. 24Hangue nu mi hyandi'ʉ gue ya mi jo'oni ra Jesu nixi yá nxadi, nu'bʉ́ nu'ʉ́ 'bestho bi yʉt'a ja nú'ʉ ya motsa ne bi ma pa Ncapernau pa da hyonga ra Jesu. 25Y ja bá tsʉhni'ʉ ra Jesu ri'nandi ra ndehe ne bi 'ñembabi'ʉ: ―Xahnate, ¿ha'mʉ gá tsøhø de guecua, desde manxuui o ja nubya? 26Ha nura Jesu bi da̱di ne bi 'ñembabi: ―Xi majua̱ni dí xi'ahʉ, guí hongaguihʉ ngue'a̱ dá 'uiñ'a'ihʉ ne gá niña̱hʉ, hingue ngue'a̱ gá hyanthʉ ya da̱nga nt'udi. 27Guí øthʉ ra ts'ɛdi pa gui tsʉhʉ nú'a̱ te gui tsihʉ, pe nu'á̱ 'bestho da thegue. Ma'na xá hño 'yøthʉ ra ts'ɛdi gui tsʉhʉ nú'a̱ ra nzaqui unga ra te pa nza̱ntho, y nu'á̱ hinhya'mʉ da thegue. Go gue'a̱ ra nzaqui da 'ra'ahʉ Nú'a̱ To'o e bi Nja̱'i. Ne Ajua̱ ra Dada xa 'ñu't'a'ihʉ gue xa umba ra ts'ɛdi'a̱ pa da 'ra'ahʉ nú'a̱ ra nzaqui'a̱. 28Ha nu'ʉ́ bi 'ñembabi: ―Nu'bʉ́ ¿te mahyoni ga øthe pa njabʉ da za ga øthe ngu nú'a̱ xa 'bɛpcahe Ajua̱, pa njabʉ da za ga tsʉhe nú'a̱ ra nzaqui guí engaguihe? 29Nepʉ nura Jesu bi da̱di ne bi 'ñembabi'ʉ: ―Nu'a̱ mahyoni gui 'yøthʉ pa da za gui 'yøthʉ ngu nú'a̱ xa 'bɛp'ahʉ Ajua̱, camfrihʉ nú'a̱ to'o xpá mɛhni'a̱. 30Ha nuya ja̱'i bi 'ñembabi'a̱: ―Nu'bʉ́ ¿te ma da̱nga nt'udi da za gui 'yøt'e pa ga hanthe ne ga camfri'ihe? ¿Nda'a̱ ra da̱nga t'øt'e ma gui 'yøt'egue? 31Maya'bʉ ndu ma dadahʉ ra Moise mri zi nú'ʉ ma'ra ndu ma dadahʉ ja ra 'yo'mtha, y ja bi zini'ʉ ra thuhme rá thuhu ra maná, ngu xa t'ofo ja ra Ma̱ca T'ofo habʉ ena: “Nu'á̱ bá pɛmpabi ra thuhme de mahets'i pa bi zi'ʉ.” 32Ha nura Jesu bi 'ñembabi'ʉ: ―Xi majua̱ni dí xi'ahʉ: Hingo ra Moise bi umbabi'ʉ nú'a̱ ra thuhme bá ehe de mahets'i nú'a̱ bi zi'ʉ. Numa Dada go gue'a̱ bi mɛmpabi'ʉ. Y go guet'a̱ bá pɛn'ahʉbya ra thuhme de mahets'i nú'a̱ unga ra te pa nza̱ntho. 33Nú'a̱ ra thuhme bá pɛn'ahʉ Ajua̱, go gue'a̱ rá T'ʉ bá ca̱i de mahets'i, ne go gue'a̱ umba ra meximhai ra te pa nza̱ntho. 34Nu'bʉ́ nuya ja̱'i bi 'ñembabi: ―Ndada, oxqui ma gui 'bɛtcahe nú'a̱ ra thuhme'a̱. 35Ha nura Jesu bi 'ñembabi'ʉ: ―Nuga go guecagui drá thuhme dega te pa nza̱ntho. Nu'a̱ tó'o da 'ñe da zʉcagui hinhya'mʉ da zʉ ra thuhu, ha nu'a̱ tó'o da gamfrigui hinhya'mʉ da zʉ ra nduthe. 36Pe nuga ya stá xi'ahʉ gue masque ya xcá hyandgaguihʉ pe hinguí camfriguihʉ. 37Gatho nú'ʉ to'o xa 'racagui Ajua̱ ma Dada da 'ñehe da zʉcagui, ha nu'a̱ tó'o da 'ñehe da zʉcagui hinga co'tsi. 38Ngue'a̱ nuga stá ca̱i de mahets'i pa ga ø'tua rá paha nú'a̱ to'o bá pɛncagui, hingue nú'a̱ go ma pahasɛ. 39Nurá paha ma Dada nú'a̱ to'o bá pɛncagui gue nú'ʉ to gatho xa 'racagui ni 'na de gue'ʉ hinga 'bɛdi, ne nura pa de ra nga̱xhmai, ma ga jʉts'i'ʉ pa rí nja yá te pa nza̱ntho. 40Ne nurá paha nú'a̱ to'o bá pɛncagui gue da nja yá te pa nza̱ntho nuto da ba̱di to'ogui ne da gamfrigui, ne nura pa de ra nga̱xhmai, ma ga jʉts'i'ʉ pa rí nja yá te pa nza̱ntho. 41Nu'bʉ́ nuya xodyo bi nønga ra Jesu ngue'a̱ mi ena: “Nuga go guecagui drá thuhme stá ca̱i de mahets'i.” 42Ne mi eñ'ʉ: ―Go guehni ra Jesu rá t'ʉ ra Jose, ¿ha ngue ha̱? Nujʉ dí pa̱dihʉ to'o rá dada ne rá na̱na̱ni. Nu'bʉ́ ¿hanja ena gue bá ca̱i de mahets'i? 43Ha ra Jesu bi da̱di ne bi 'ñembabi'ʉ: ―Oguí nøntehʉ de nú'a̱ stá xi'ahʉ. 44Ngue'a̱ ni 'na hinto tsa da 'ñe da zʉcagui 'bʉ hingo Ajua̱ ma Dada nú'a̱ to'o bá pɛncagui da zopa rá mfeni pa e da zʉcagui, ne go gue'ʉ ma ga jʉts'i nura pa de ra nga̱xhmai pa rí nja yá te pa nza̱ntho. 45Njaua xa t'ofo ja yá t'ofo yá 'mɛhni Ajua̱ habʉ ena: “Ajua̱ ma da 'ñuta gatho ya ja̱'i,” ena njabʉ. Hangue gatho nú'ʉ to'o da hñuxa nt'øde te ma̱nga ma Dada ne da zo ja yá mfeni, nú'ʉ́ go gue'ʉ da 'ñe da zʉcagui. 46Hingo dí xi'ahʉ gue to'o xa hyanda Ajua̱ ra Dada, ngue'a̱ hønsɛgui stá handi'a̱, ngue'a̱ stá ehe de gue'a̱. 47Xi majua̱ni dí xi'ahʉ, nu'a̱ tó'o camfrigui pɛ'tsa ra te pa nza̱ntho. 48Nuga go guecagui drá thuhme dega te pa nza̱ntho. 49Maya'bʉ nú'ʉ ndu ri dadahʉ bi zi ra maná nu mi 'bʉi ja ra 'yo'mtha, pe nu'ʉ́ bi du'ʉ. 50Pe nú'a̱ ra thuhme dí ma̱ngá, hingue ngu nú'a̱ ra thuhme bi zi nú'ʉ bi du. Nú'a̱ ra thuhme dí ma̱ngá bá ehe de mahets'i pa nuto'o da zi hinhya'mʉ da du. 51Nuga go guecagui drá thuhme dí te, dá ehe de mahets'i. Nu'a̱ tó'o da zi nú'a̱ ra thuhme dí ma̱ngá, da nja rá te pa nza̱ntho. Ha nú'a̱ ra thuhme dí ma̱ngá, go guehna ma ndo'yo nú'a̱ ma ga da pa da nja yá te pa nza̱ntho ya meximhai. 52Ha nuya xodyo bi 'ñémbabi'ʉ 'na ngu ma'na: ―¿Hanja da za da 'racjʉ rá ndo'yosɛni pa ga tsihʉ? 53Ra Jesu bi 'ñembabi'ʉ: ―Xi majua̱ni dí xi'ahʉ, 'bʉ hingui tsipabihʉ rá ngø ne rá ji Nú'a̱ To'o e bi Nja̱'i, hinda nja ri tehʉ pa nza̱ntho. 54Nu'a̱ tó'o da zicagui ma ngø ne ma ji, gue'a̱ da nja rá te pa nza̱ntho, ne nura pa de ra nga̱xhmai nuga ga jʉts'i'a̱ pa rí nja rá te pa nza̱ntho. 55Ngue'a̱ ma ngø nja ngu ra nzaqui, ne ma ji nja ngu ra dehe nú'a̱ ts'i pa da nte 'na. Pe numa ngø ne ma ji hingue ngu nuya nzaqui'ʉ, ngue'a̱ numa ngø ne ma ji unga ra te pa nza̱ntho. 56Nu'a̱ tó'o da zicagui ma ngø ne ma ji, go gue'a̱ da 'mʉi con gueque, ha nuga ga 'bʉi con gue'a̱. 57Ajua̱ ma Dada nú'a̱ to'o bá pɛncagui, nu'á̱ te, hangue nuga dí te nehe ngue'a̱ nu'á̱ te'a̱. Njabʉ nehe nu'a̱ tó'o da zigágui, nu'á̱ ma da nja rá te ngue'a̱ dí tega. 58Nuga go guecagui drá thuhme stá ehe de mahets'i. Pe hingo dí nja ngu nú'a̱ ra maná nú'a̱ bi zi ndu ri dadahʉ ne bi du. Ngue'a̱ nu'a̱ tó'o da zigágui núga drá thuhme, da nja rá te pa nza̱ntho. 59Njabʉ bi ma̱nga ra Jesu nu mi xahnate ja ra nija̱ nuni Ncapernau. 60Ha ndunthi de nú'ʉ to'o mi 'ñoui'a̱ ne myá nxadihma̱, mi 'yøde'ʉ bi ma̱nga ra Jesu njabʉ, bi 'ñena'ʉ: ―Xi hindrí hohʉ nú'a̱ ma̱ni. ¿To ja gue'a̱ da gamfribini? 61Ha nura Jesu bi ba̱tho gue nu'ʉ́ mi nønte de nú'a̱ xqui ma̱ñ'a̱, hangue nu'á̱ bi 'ñembabi'ʉ: ―¿Ha gue hingrí hohʉ nú'a̱ stá ma̱? 62¿Xi te gui beñhʉ nú'bʉ xcrí hyanthʉ da yo menga pa mahets'i Nú'a̱ To'o e bi Nja̱'i? 63Nú'a̱ ra nzaqui dí ma̱, go gue'a̱ ra nzaqui pa ri nda̱hihʉ, hingo pa ri ndo'yohʉ. Ngue'a̱ nú'a̱ ra nzaqui guí tsihʉ pa ri ndo'yohʉ hinte di muui pa gui tsʉhʉ ra te pa nza̱ntho. Y nuya noya stá xi'ahʉ go gue'ʉ ra nzaqui pa ri nda̱hihʉ, ne go gue'ʉ di 'ra'ahʉ ra te pa nza̱ntho. 64Pe 'ra de gue'ahʉ hinguí camfrihʉ. Ra Jesu bi ma̱nga njabʉ ngue'a̱ desde rá mʉdi ya mi pa̱tho nú'ʉ to'o himi camfri'a̱, ne ya mi pa̱tho to'o mi ma da da'a̱. 65Nehe bi 'ñena: ―Xa njabʉ ngu nú'a̱ ya stá xi'ahʉ gue hinda za to da 'ñesɛ da zʉqui 'bʉ hingo Ajua̱ ma Dada da zopa rá mfeni pa da e da zʉcagui. 66Nepʉ ndunthi de nú'ʉ to'o mri 'ñoui ne myá nxadihma̱ bi 'uegue'ʉ, ya himbi dɛni'a̱. 67Hangue nura Jesu bi 'ñembabi nú'ʉ 'rɛt'amayoho yá nxadi xqui huahni: ―Xi'ahʉ, ¿ha gue ma gui 'ueguehʉ nehe? 68Ha nura Simu Pedro bi da̱di ne bi 'ñembabi'a̱: ―Ma zi Hmu'ihe, ¿to'o ja ga tɛñhe? gue hønsɛ'i guí ma̱nga ya noya de ra te pa nza̱ntho. 69Ha nuje stá camfrihe ne stá pa̱he gue go gue'e grá Cristo, rá T'ʉ'i Ajua̱ nú'a̱ te, xpá mɛn'a'i pa gui nda̱. 70Nepʉ nura Jesu bi da̱di ne bi 'ñembabi'ʉ: ―Nu'ahʉ guí 'rɛt'amayohohʉ stá huan'ahʉ, ¿ha ngue ha̱? Pe 'yobʉ 'na de gue'ahʉ ri 'ñoui ra ts'onda̱hi. 71Nu'á̱ bi ma̱ de ra Juda Iscariote rá t'ʉ ra Simu, ngue'a̱ go mi gue'a̱ mi ma da da'a̱, masque go mi gue'a̱ 'na de nú'ʉ 'rɛt'amayoho ya nxadi.

will be added

X\