NSANJUA 4

1Ha nura Jesu bi ba̱di gue nuya fariseo xqui 'yøde'ʉ gue ma'na mi ndunthi yá nxadi'a̱ ne ma'na mi øt'a ra sistehe'a̱ que ra Xuua. 2Masque ra Jesu hingo mi øt'a ra sistehe'a̱, pe nuyá nxadi ha̱. 3Y nu mi 'yøde ra Jesu gue mi hma̱nga njabʉ, bi bøni de guehni Judea pa bi mengui Galilea. 4Ne mi pɛ'tsi da 'randa Nsamaria. 5Ne bi zønga ja ra t'ʉca hnini Sicar de Nsamaria guetbʉ habʉ mi o rá hai ndu ra Cobo nú'a̱ xqui zocua ndu ra Jose rá t'ʉ. 6Ne ja mi jani 'nara poso nú'a̱ bi gohui rá thuhu ra Cobo. Nepʉ nura Jesu ja bi ntsayani ngue'a̱ xqui zabi ja ra 'ñu. Y ya mi ngu nzʉnga 'rato nde. 7Nepʉ de guehni bi zøhø 'nara 'bɛhña̱ mrá me Nsamaria, e da 'yat'a ra dehe ja ra poso. Ha nura Jesu bi 'yadi ne bi 'ñembabi: ―'Raca ts'ʉ ra zi dehe ga tsi. 8Ha nuyá nxadi'a̱ xqui ma tai pa da dai te da zi'ʉ. 9Y nú'a̱ ra 'bɛhña̱ me Nsamaria bi 'ñembabi ra Jesu: ―¿Hanja guí acagui ra dehe, gue nu'i grá xodyo ha nuga drá me Nsamaria? (Bi 'ñembi njabʉ ngue'a̱ ya xodyo himi tsa nixi da ña̱ui ya me Nsamaria.) 10Nu'bʉ́ ra Jesu bi da̱di ne bi 'ñembabi: ―Nu'bʉ gri pa̱hma̱ nú'a̱ unga Ajua̱, ne 'bʉ gri pa̱hma̱ nú'a̱ to'o a'a'i ra dehe, nu'bʉ́ go xcá 'yacagui, ne nuga stá 'ra'a'i ra dehe dega te pa nza̱ntho. 11Ha nura 'bɛhña̱ bi 'ñembabi: ―Ndada, hingrí hña̱ con te gui 'yat'a ra dehe, ha nura poso xá hñe. Nu'bʉ́, ¿habʉ ja nú'a̱ ra dehe dega te guí engagui? 12¿Ha gue ma'na ja ri nsugue que ndu ma dadahʉ ra Cobo, nú'a̱ to'o bi zogahe nuna poso? Y nu'á̱ ja mi tsitheua co yá t'ʉ ne co yá mbo'oni. 13Nu'bʉ́ nura Jesu bi da̱di ne bi 'ñembabi: ―Nuto gatho da zi nuni ra dehe da yopa zʉ ra nduthe. 14Ha nu'a̱ tó'o da zi nú'a̱ ra dehe dí ungá, hinhya'mʉ da yopa zʉ ra nduthe, ngue'a̱ nú'a̱ ra dehe ga umbabi, da nja ngu 'nara pøthe ja rá coraso, di pøhø pa da umba ra te pa nza̱ntho. 15Nu'bʉ́ nura 'bɛhña̱ bi 'ñembabi: ―Ndada, 'raca ts'ʉ de nú'a̱ ra zi dehe pa hinhya'mʉ da yopa zʉca ra nduthe, ne pa hinhya'mʉ ga eheua ma'na'qui ga 'ñai. 16Ha ra Jesu bi 'ñembabi: ―Gue da rí ma ua tsi ri da̱me. 17Nu'bʉ́ nú'a̱ ra 'bɛhña̱ bi da̱di ne bi 'ñembabi: ―Jo'o ma da̱me. Ha nura Jesu bi 'ñembabi: ―Majua̱ni nú'a̱ guí ma̱ gue jo'o ri da̱me. 18Pe xcá pɛ'tsa cʉt'a ri da̱me ne nú'a̱ ra 'ñøhø guí 'bʉhuibya, hingo ri da̱me'a̱. Hangue majua̱ni nú'a̱ guí ma̱ gue jo'o ri da̱me. 19Nu'bʉ́ nura 'bɛhña̱ bi 'ñembabi: ―Ndada, pøde go gue'e 'nará 'mɛhni'i Ajua̱. 20Nu'bʉ́ te xi guí ma̱ngue de ndu ma dadahʉ bi xøcambeni Ajua̱ nuni ja ra t'øhøni, ha nu'ahʉ gyá xodyohʉ guí ma̱ñhʉ gue mahyoni dra søcambeni Ajua̱ nsøctho de guehni Jerusale. 21Ha nura Jesu bi 'ñembabi: ―Na̱ná̱, camfri nú'a̱ dí xi'a'i, gue ma da zø ra pa gui xøcambenihʉ Ajua̱ ra Dada pe ya hinga nuni ja ra t'øhø, nixi de guehni Jerusale. 22Nu'ahʉ hinguí pa̱hʉ nú'a̱ guí xøcambenihʉ. Pe nuje ha̱, dí pa̱he nú'a̱ dí xøcambenihe, ngue'a̱ ra pøhøte bá ehe de ja ya xodyo. 23Mi ma da zø ra pa y ya bi zøhø gue nu'ʉ tó'o xi majua̱ni da xøcambeni Ajua̱ ra Dada, ma da xøcambeni dega jamfri ne ngu rí 'ñehe. Ne Ajua̱ ra Dada ri ho dra søcambeni'a̱ njabʉ. 24Ajua̱ go gue'a̱ dega Nda̱hi ne hingui hnequi, hangue nu'a̱ tó'o da xøcambeni'a̱, mahyoni da xøcambeni dega jamfri ne ngu rí 'ñehe. 25Nu'bʉ́ nura 'bɛhña̱ bi 'ñembabi: ―Nuga dí pa̱di gue ma da 'ñehe ra Mesía go ra Cristo nú'a̱ ma da mɛhna Ajua̱ pa da nda̱. Ne nu stí zø'a̱ gatho go ma da xicjʉ'a̱. 26Ha ra Jesu bi 'ñembabi: ―Nuga go guecsɛ dí ña̱uibya. 27Y nura ora'a̱ bi zøhø yá nxadi, ne nu'ʉ́ bi 'yø ngue'a̱ ra Jesu mi ña̱ui 'nara 'bɛhña̱. Pe nu'ʉ́ hinte bi 'yambabi ra Jesu te mi ambabi nixi hanja mi ña̱ui'a̱. 28Nu'bʉ́ nura 'bɛhña̱ bi zopʉ rá xøni ne bi menga ja ra hnini ne bi 'ñembabi nú'ʉ mi 'bʉhni: 29―Maha ma gui hyanthʉ nú'a̱ to'o xa xictho te gatho stá øt'e. ¿Ha hingo di gue'a̱ ra Cristo 'bʉ, nú'a̱ mi ma da mɛhna Ajua̱ pa da nda̱? 30Nepʉ nuya ja̱'i'ʉ bá ehe pa e da c'a̱'tsa ra Jesu. 31Ha nu mi ma nú'a̱ ra 'bɛhña̱, nuyá nxadi ra Jesu bi ba̱ntebi ne bi 'ñembabi: ―Xahnate, bá e gui ñuni. 32Pe nu'á̱ bi 'ñembabi'ʉ: ―Dí pɛ'tsa 'nara hñuni ma ga tsi, nú'a̱ nixi guí pa̱hʉ. 33Ne nuyá nxadi bi 'ñémbabi'ʉ 'na ngu 'na: ―¿Ua to xpá hña̱mpi te da zi 'bʉ? 34Ha ra Jesu bi 'ñembabi'ʉ: ―Numa hñuniga gue'a̱ ga ø'tuabi rá paha nú'a̱ to'o bá pɛncagui ne ga pɛpa rá 'bɛfi asta hinga juati. 35Guí ma̱ñhʉ gue di 'bɛ goho nza̱na̱ pa da nja ra sofo, ¿ha ngue ha̱? Pe nuga dí xi'ahʉ: Ndi, hyanthʉ ya 'bot'i ya xa ña̱ts'i pa da sofo. 36Nuya xofo ha̱ni yá tha̱ha̱ ne jʉts'i 'nara hoga sofo. Hangue nuya xofo ma da johyaui ya mot'i. Njabʉtho nehe nú'ʉ to'o da tʉnga ma noya, ma da hña̱nga yá tha̱ha̱ ne da munts'a ya ja̱'i pa da mɛ'tsa ra te pa nza̱ntho. 37Nja ngu enga ya ja̱'i: “'Na'ño to'o pot'i, 'na'ño to'o xofo.” 38Hangue nuga stá pɛñ'a'ihʉ pa gui muntshʉ ya ja̱'i, ngu 'nara sofo nú'a̱ hinxcá pɛfihʉ. Ma'ra xa mpɛfi, ha nu'ahʉ́ guí xopabihʉ yá 'bot'i'ʉ. 39Ne ndunthi ya mengu nú'a̱ ra hnini'a̱ de Nsamaria bi gamfri gue ra Jesu go mi gue'a̱ xqui mɛhna Ajua̱ pa da nda̱, ngue'a̱ nura 'bɛhña̱ xqui damajua̱ni ne xqui 'ñena gue nu'á̱ xa xiptho gatho nú'a̱ te xqui 'yøt'e. 40Hangue nu mi zøhni ya me Nsamaria habʉ mi 'bʉ ra Jesu, bi ba̱ntebi gue da 'mʉhui'ʉ, hangue nu'á̱ bi 'mʉhui'ʉ yo pa. 41Ne xi ndunthi ma'ra bi gamfri ra Jesu ngue'a̱ go mi zofosɛ'a̱. 42Ha nu'ʉ́ bi 'ñembabi nú'a̱ ra 'bɛhña̱: ―Nubyá dí camfrihe hingue hønsɛ ngue'a̱ go gá xicje, dí camfrihe ngue'a̱ ya stá øsɛhe te xa ma̱, ne dí pa̱he gue xi majua̱ni go guehni ra Pøhøte de ya ja̱'i gatho rá ngʉni ra ximhai. 43Ha nu mi thogui nú'ʉ yo pa, ra Jesu bi ma pa ja rá hai Galilea. 44Ne nu'á̱ xqui ma̱nsɛ ne xqui 'ñena: “Ni 'nará 'mɛhni Ajua̱ hingui hnumansu ja rá hai.” 45Ha nu mi zønga Galilea'a̱ nuya mengu de guehni bi umba ntsaya ngue'a̱ xqui hyandi'ʉ gatho ya da̱nga nt'udi xqui 'yøt'e'a̱ nuni ja ra ngo Jerusale, ngue'a̱ nehe nuya mengu rá hai xqui ma ja nú'a̱ ra ngo'a̱. 46Nepʉ nura Jesu bi yopa zønga ma'na'qui nuni Ncaná de Galilea habʉ xqui 'yøt'e da mvinu ra dehe. Y nuni Ncapernau mi 'bʉhni 'nará da̱nga maste ra nda̱ ne mri hñenga rá t'ʉ. 47Y nu'á̱ bi 'yøde gue ra Jesu xqui menga de Judea ne ya xqui zønga Galilea, hangue bi ma há mi 'bʉ'a̱ pa bá ba̱ntebi da mɛui ja rá ngu pa da 'yøthebi rá t'ʉ ngue'a̱ ya mi nedu hma̱ha̱. 48Nu'bʉ́ ra Jesu bi 'ñembabi: ―Nu'bʉ hingui hyanthʉ ya da̱nga nt'udi ne ya da̱nga t'øt'e, hingui camfrihʉ. 49Ha nura da̱nga maste bi 'ñembabi: ―Ndada, maha, pa hinda du ma zi t'ʉ. 50Nu'bʉ́ ra Jesu bi 'ñembabi: ―Grí ma, ya 'bʉi xá hño ri t'ʉ. Ha nu'á̱ bi gamfri nú'a̱ bi xipa ra Jesu, ne bi gʉ rá 'ñu bi ma. 51Y de mri ne ra 'ñu bi 'ñe yá 'bɛgo bi da̱di ne bi 'ñembabi: ―Ya 'bʉi xá hño ri t'ʉ. 52Hangue nu'á̱ bi 'yambabi'ʉ ne bi 'ñembabi: ―¿Te ma ora bi mʉdi bi tsayabi ra hñeni? Ha nu'ʉ́ bi 'ñembabi: ―Mande ngu nzʉnga yoto bi tsayabi ra nzø. 53Nu'bʉ́ nura dada bi beni gue mi gue'a̱ ra ora xqui xipabi ra Jesu gue ya mi 'bʉi xá hño rá t'ʉ. Hangue nu'á̱ ne gatho nú'ʉ mi 'bʉi ja rá ngu bi gamfri gue ra Jesu go mi gue'a̱ xqui mɛhna Ajua̱ pa da nda̱. 54Go gue'a̱ rá ñoho ra da̱nga nt'udi bi 'yøt'a ra Jesu nuni Galilea ne go bi 'yøt'e'a̱ de bá penga Judea.

will be added

X\