NSANJUA 21

1'Mɛfa ra Jesu bi yopa hnequi habʉ mi 'bʉi yá nxadi ja ra ndehe rá thuhu Tiberia. Ne bi yopa hnequi njaua: 2Ra Simu Pedro mi 'bʉhui 'nadbʉ ra Toma nú'a̱ mi t'embi ra Go, ne ra Natanael nú'a̱ ra me Ncaná de Galilea, ne yá t'ʉ ra Sebedeo, ne má yoho yá nxadi ra Jesu, gatho'ʉ 'nadbʉ mi 'bʉi. 3Ha ra Simu Pedro bi 'ñembabi'ʉ: ―Ma ga ma ra 'bɛhua̱. Ha nú'ʉ ma'ra nehe bi 'ñena: ―Ga maha nehe. Nepʉ bi ma'ʉ ne bi yʉt'a ja 'nara motsa, pe nura xuui'a̱ hinte bi gʉ'ʉ. 4Ha nu mi hyats'i mi 'bahni ra Jesu ja rá hyo ra ndehe, pe nuya nxadi himi pa̱di ua go mi gue'a̱ ra Jesu. 5Nepʉ nu'á̱ bi 'ñembabi'ʉ: ―Ts'ʉnt'ʉhʉ, ¿ha hinte xcá jʉhʉ? Nu'ʉ́ bi da̱di ne bi 'ñena: ―Otho. 6Ha nu'á̱ bi 'ñembabi'ʉ: ―Ca̱thʉ ra xit'a̱ po ja ra 'ñɛi de ja ra motsa ne njabʉ da za gui jʉhʉ. Hangue nu'ʉ́ bi ga̱t'a ra xit'a̱, ne nu mi gʉts'i xi mi ñuxa ya hua̱ asta himi tsɛdi da pø'tse'ʉ co yá hñʉ ya hua̱ mi cʉ. 7Nu'bʉ́ nú'a̱ rá hma̱ca nxadi ra Jesu bi 'ñembabi ra Pedro: ―¡Go guehni ma zi Hmuhʉ! Ha ngu mi 'yøde ra Pedro gue go mi gue'a̱ ra zi Hmu, nu'bʉ́ bi da̱ma hñuxa rá he nú'a̱ xqui hña̱qui, ne bi hñøt'a ja ra ndehe pa bi zønga ja ra ña̱nthe habʉ mi 'ba ra Jesu. 8Ne nu ma'ra ya nxadi bi 'yɛt'a ra motsa pa ja ra ña̱ni, mri gʉt'atho'ʉ ra xit'a̱ nú'a̱ mi ñuxa ya hua̱, ngue'a̱ himi yabʉ pa ja ra ña̱ni, ngu mi 'na nthebe metro rá yabʉ. 9Ha nu mi bøni'ʉ de ra motsa, bi hyanda 'raya dɛspi mi zøni, ne ja mi oxni 'nara hua̱ mi ntha̱xi, nehe mi jani 'raya thuhme. 10Nu'bʉ́ ra Jesu bi 'ñembabi'ʉ: ―Bá ha̱hʉ 'raya hua̱ nú'ʉ ja juadi gá jʉhʉ. 11Nu'bʉ́ ra Simu Pedro bi yʉt'a ja ra motsa ne bi pønga ra xit'a̱ ja ra ña̱nthe nú'a̱ mi ñuxa ya da̱nga hua̱, mi 'na nthebe made ne hñu yá ndunthi'ʉ. Y masque mi ndunthi ya hua̱ pe ra xit'a̱ himbi ntʉni. 12Ha nura Jesu bi 'ñembabi'ʉ: ―Bá e gui ntacohʉ. Ha nuya nxadi mri ntsapabi da 'yambi to'o'a̱, ngue'a̱ mi pa̱di'ʉ gue go mi gue'a̱ ra zi Hmu. 13Nepʉ nura Jesu bi joni ja ra tsibi bi hña̱ca ya thuhme ne bi umbabi'ʉ; njabʉ nehe bi 'yøt'e co ra hua̱. 14Ya rá hñu'qui'a̱ xqui 'ñudi ra Jesu ja yá nxadi nu de ya xqui yopa nte de ra du. 15Nu mi ua ntaco'ʉ ra Jesu bi 'yambabi ra Simu Pedro ne bi 'ñembi: ―Nugue Simu, rá t'ʉ'i ra Joná, ¿ha gue ma'na go grí ma̱cagui de guehyʉ ma'ra? Ha nu'á̱ bi 'ñembabi: ―Ha̱ha̱, ma zi Hmu'i, nu'i guí pa̱di gue drí ma̱'i. Ne nu'á̱ bi 'ñembabi: ―Supca ma zi t'ʉca dɛti. 16Nepʉ rá ño'qui ra Jesu bi 'yambabi ma'na'qui, bi 'ñembabi: ―Nugue Simu, rá t'ʉ'i ra Joná, ¿ha grí ma̱cagui? Ra Pedro bi da̱di ne bi 'ñembi: ―Ha̱ha̱, ma zi Hmu'i, nu'i guí pa̱di gue drí ma̱'i. Ne nu'á̱ bi 'ñembabi: ―Supca xá hño ma zi dɛti. 17Nepʉ rá hñu'qui bi 'yambabi ma'na'qui, ne bi 'ñembabi: ―Nugue Simu, rá t'ʉ'i ra Joná, ¿ha grí ma̱cagui? Ra ora'a̱ bi du rá mʉi ra Pedro ngue'a̱ ya rá hñu'qui bi 'yambabi ua mi ma̱di'a̱, ne bi 'ñembabi: ―Ma zi Hmu'i, nu'i gatho go guí pa̱di, ne guí pa̱di gue xi drí ma̱'i. Nu'bʉ́ ra Jesu bi 'ñembabi: ―Supca xá hño ma zi dɛti. 18Xi majua̱ni dí xi'a'i, nú'bʉ nguí nts'ʉnt'ʉ nguí hesɛ ri he ne nguí 'yo habʉ go nguí ne. Pe nu xcrí nda̱xjua ma gui tʉnga ri 'yɛ, ne ma'na to ma da hye't'a'i ri he, ne da zix'a'i habʉ hingo gui negue. 19Bi ma̱nga njabʉ'a̱ pa bi xipi te ma du mi ma da du ra Pedro pa da hnequi rá nsunda Ajua̱. Ne nu mi ma̱nga njabʉ bi 'ñembabi: ―¡Tɛngagui! 20Nepʉ nura Pedro bi ñegui ne bi hyandi gue mi dɛna nú'a̱ rá hma̱ca nxadi ra Jesu, nú'a̱ xqui hñudi ja rá hyo ra Jesu nú'bʉ mi nt'oxi'ʉ ne xqui 'yambabi to'o mi ma da da'a̱. 21Ne nu'bʉ́ ra Pedro nu mi hyant'a̱ bi 'yambabi ra Jesu: ―Ma zi Hmu'i, xi nuni, ¿te go ma da jani? 22Nu'bʉ́ ra Jesu bi da̱di: ―Nu'bʉ go ga negá nuni da 'mʉi asta ra pa ga pengui, ¿te go grí 'ñanigue? Nu'i go da tɛngagui. 23Hangue nuna ra 'bedena̱ bi 'ño ja gatho ya gamfri, ne bi beni'ʉ gue nura nxadi'a̱ himi ma da du. Pe ra Jesu himbi 'ñena gue himi ma da du, hønsɛ bi 'ñena: “Nu'bʉ go ga negá nuni da 'mʉi asta ra pa ga pengui, ¿te go grí 'ñanigue?” 24Nú'a̱ ra hma̱ca nxadi'a̱ go gue'a̱ di damajua̱ni de nuya ya t'øt'e bi nja, ne bi 'yofo ja nuna ra t'ofo. Ne dí pa̱he gue nú'a̱ bi 'yofo gue'a̱ majua̱ni. 25Nehe ja ndunthi ma'ra ya t'øt'e nú'ʉ bi 'yøt'a ra Jesu. 'Bʉ to da 'yofo gatho'ʉ dí beni gue nuya t'ofo'ʉ hinda 'ñɛni gatho maxøgue rá ngʉni ra ximhai. Njabʉ gue'a̱.

will be added

X\