NSANJUA 19

1Hangue ra Pilato bi manda bri fɛt'a ra Jesu. 2Nepʉ nuya soldado mi 'bʉhni bi met'a 'nara corona dega 'bini, ne bi hñu'tsuabi ja rá ña̱xu ra Jesu ne bi hyete 'nara thɛnga dutu. 3Nepʉ bi 'ñembabi'a̱: ―¡'Bʉi pa nza̱ntho nu'i ri t'equ'ei rá Nda̱'i ya xodyo! Nepʉ nu'ʉ́ mi umba ya mpɛ'ti'a̱. 4Ha nura Pilato bi bønga møte ma'na'qui ne bi 'ñembabi ya xodyo: ―Ndi, dra zin'a'ihʉua pa gui pa̱hʉ gue hinte ma ts'oqui dí tsʉtuabini. 5Ha ra Jesu bi bønga møte mi hu'tsa nú'a̱ ra corona dega 'bini ne mi he nú'a̱ ra thɛnga dutu. Nepʉ ra Pilato bi 'ñemba ya xodyo: ―¡Xi 'bacua nuna 'ñøhø! 6Ha nuya nda̱ gá macja̱ ne ya gʉnts'a̱hni mi mantho'ʉ nu mi hyanda ra Jesu, ne mi eñ'ʉ: ―Nuní drá pont'i, drá pont'i pa da du. Nu'bʉ́ ra Pilato bi 'ñembabi'ʉ: ―Tsixhʉ, go da bá ponthʉ, ngue'a̱ nuga hinte ma ts'oqui dí tsʉtuabini. 7Nepʉ nuya xodyo bi da̱di ne bi 'ñena: ―Nuje dí pɛ'tshe 'nara ley, ne nura ley'a̱ ma̱ gue nuní dí 'ñepi da du, ngue'a̱ xa 'ñet'a T'ʉ de Ajua̱. 8Ha nu mi 'yøde ra Pilato nú'a̱ mi ma̱ñ'ʉ, ma'na bi ntsu'a̱. 9Hangue bi zixa ra Jesu ma'na'qui mbo ja ra ts'ʉtbi ne bi 'yambabi bi 'ñembi: ―¿To'o rá 'mɛhni'i? Pe nura Jesu hinte bi da̱di. 10Hangue ra Pilato bi 'ñembabi'a̱: ―¿Ha gue hinte guí tha̱di? ¿Ha gue hinguí pa̱di gue dí ha̱ ra ts'ɛdi pa ga pont'a'i o pa ga hɛc'a'i? 11Nu'bʉ́ nura Jesu bi da̱di ne bi 'ñena: ―Ni 'nara ts'ɛdi hinguí ha̱ pa da za te gui 'yøtcagui 'bʉ hingo Ajua̱ da 'ra'a ra ts'ɛdi. Hangue nú'a̱ to'o xa dagagui ja ri 'yɛ, nú'á̱ go gue'a̱ ma'na tu ra ts'oqui que nu'i. 12Hangue desde ra ora'a̱, ra Pilato mi ne da hyɛguihma̱'a̱, pe nuya xodyo himi tsaya ra hmafi ne mi ena'ʉ: ―¡Nu'bʉ nu'i gui hyɛgui nú'a̱ ra 'ñøhø'a̱, nu'bʉ́ hingrí amigo ra da̱nga nda̱ Cesa, ngue'a̱ gatho nú'a̱ to'o da 'ñet'a nda̱ gue'a̱ rá ncontra ra Cesa! 13Ha nu mi 'yøde ra Pilato nú'a̱ mi ma̱ñ'ʉ, nu'bʉ́ nu'á̱ bi manda da ts'ixa ra Jesu pa møte, nepʉ nehe'a̱ bi bøni pa bá hudi ja rá hudi dega ts'ʉtbi ja ra luga mrá thuhu Gabata dega ebreo, rí bøni da 'ñena rá thuhu ra T'ʉt'ado. 14Y nú'a̱ ra pa'a̱ mrá pa dega nthoqui de ra ngo dega pascua, ne ngu mi nzʉnga 'rato xudi. Nepʉ ra Pilato bi 'ñembabi ya xodyo: ―¡Ndi, 'bacua ri Nda̱hʉ! 15Pe nu'ʉ́ bi yopa mafi'ʉ ma'na'qui ne bi 'ñena: ―¡Tsits'i, bá pont'i, ne ja dí duni! Nepʉ ra Pilato bi 'ñembabi'ʉ: ―¿Ha gue guí nehʉ ga pont'a nuna ri Nda̱hʉ? Nepʉ nuya nda̱ gá macja̱ bi da̱di ne bi 'ñena: ―Nura Cesa hønsɛ go gue'a̱ ma nda̱he, y jo'o ma'na. 16Hangue ra Pilato bi 'yɛnt'ua ja yá 'yɛ ya xodyo pa dra pont'i'a̱. Hangue nu'ʉ́ bi zinga ra Jesu ne bi zits'i pa da pont'i ngu mi ne'ʉ. 17Ne ra Jesu bi bøni mi ndude rá ponza. Ne bi ts'its'i pa ja ra t'øhø rá thuhu Ña̱xmadu, dega ebreo rá thuhu Golgota. 18Ne ja brá pont'ini'a̱ co má yoho ya 'ñøhø, 'na cada rá hyo, ha ra Jesu bi 'yoda madetho de gue'ʉ. 19Y ja ra ponza habʉ bri pont'a ra Jesu xqui thøta 'nara xithɛ ne mi huxni 'raya noya nú'a̱ bi manda ra Pilato da t'ofo. Mi ena njabʉ: “Ra Jesu ra me Nasare, rá Nda̱ ya xodyo.” 20Ne ndunthi ya xodyo bi hñe'ta nú'ʉ ya noya, ngue'a̱ habʉ bri pont'a ra Jesu mi guetbʉ ra hnini Jerusale, y nú'ʉ ya noya'ʉ xqui t'ofo dega ebreo, ne dega griego, ne dega lati. 21Ne nuyá nda̱ gá macja̱ ya xodyo bi ma bá embabi ra Pilato: ―¿Hanja gá ofo njabʉ gue go gue'a̱ rá Nda̱ ya xodyo? 'Yofo gue nu'á̱ mi ma̱nsɛ gue rá Nda̱ ya xodyo. 22Ha nura Pilato bi da̱di ne bi 'ñena: ―Nu'a̱ stá ofo, ya stá ofo. 23Ha nu mi uadi bi pont'a ra Jesu nuya soldado, bi gʉmpa yá dutu ra Jesu nú'ʉ xqui 'bøcuabi. Mi goho ya soldado, ne bi hñegue 'ra 'na xɛni nuya dutu'ʉ. Ne bi gʉmpa rá mahe nú'a̱ himi pɛ'tsa ni 'nará nt'ɛdi, mi xøgue ra xʉni. 24Nepʉ nu'ʉ́ bi 'ñémbabi'ʉ 'na ngu 'na: ―Hinga ma ga tʉñhʉ, ma ga rifahʉ pa ga nuhʉ to'o drá mɛti. Hangue bi njabʉ ngu ma̱nga ra Ma̱ca T'ofo habʉ ena: “Bi nhyegue 'ra 'na xɛni ma dutu, ne bi rifagui nú'a̱ ma'na ma he.” Ne gue'a̱ bi 'yøt'a ya soldado. 25Y guetbʉ ja ra ponza mi 'bahni rá na̱na̱ ra Jesu, ne 'nara 'bɛhña̱ nú'a̱ mrá cu rá na̱na̱ ra Jesu, ne ra Maria rá 'bɛhña̱ ra Cleofa, ne ra Maria Magdalena. 26Ha nu mi hyanda ra Jesu rá na̱na̱ mi 'bahuini nú'a̱ rá hma̱ca nxadi'a̱, nu'bʉ́ nu'á̱ bi 'ñembabi rá na̱na̱: ―Nubyá 'yøt'a ra uɛnda gue nú'a̱ guí 'bahuibʉ go gue'a̱ dri t'ʉbya'a̱. 27Nepʉ ra Jesu bi 'ñembabi nehe nú'a̱ rá hma̱ca nxadi: ―Ne'i, 'yøt'a ra uɛnda gue nú'a̱ guí 'bahuibʉ go gue'a̱ dri na̱na̱bya'a̱. Y desde gue'bʉ, nura hma̱ca nxadi bi zits'i'a̱ ja rá ngu pa bi japamasu. 28Y ra Jesu mi pa̱di gue ya bi uadi gatho, nepʉ pa bi nja ngu nú'a̱ ma̱nga ra Ma̱ca T'ofo, nu'á̱ bi 'ñena: ―Tsʉca ra nduthe. 29Ha mi jani 'nara mohi mi po ra ju'tsa vinu. Nepʉ bri 'bo'mba 'nara sponja co nura ju'tsa vinu ne bri thøta ja 'nara ts'ʉt'o dega isopo, nepʉ bi 'bø'tse asta ja rá ne ra Jesu. 30Ha nu mi zi nura ju'tsa vinu ra Jesu bi 'ñena: ―Ja xa uadiua gatho nú'a̱ xra 'bɛpcagui. Ne 'bestho ra ora'a̱ bi ñe'mi ne bi du. 31Ha mrá pa ra nthoqui de ra ngo dega pascua, hangue nuya nda̱ gá xodyo bi ma bá ba̱ntebi ra Pilato pa da manda dra thempa yá ua nú'ʉ xqui 'bont'i ne da ja̱'mba yá ndo'yo de guehni, pa njabʉ ni 'nara anima hinda gohi ja ra ponza nura pa dega tsaya, ngue'a̱ nú'a̱ ra pa dega tsaya gue'a̱ ra da̱ngo. 32Hangue nuya soldado bi uat'i habʉ mi zʉdi 'na de nú'ʉ ya be xqui 'bont'i mahyɛgui co ra Jesu pa bi thempabi yá ua, nepʉ bri jabʉ nehe nú'a̱ ma'na ra be. 33Pe nu mi uat'i habʉ xqui 'bont'a ra Jesu, nu'á̱ ya himbi thempa yá ua ngue'a̱ bi hyandi'ʉ gue ya xqui du'a̱. 34Pe 'nara soldado bi umba 'nara nsʉni ja rá hyo rá tiña̱ co 'nara lansa, nepʉ 'bestho bi bønga ra ji ne ra dehe. 35Ha nú'a̱ to'o pedena̱, go 'na to'o bi hyandi, y núna ma̱ go guehna majua̱ni, pa gui camfrihʉ nehe. 36Bi njabʉ pa bi nja ngu ma̱nga ra Ma̱ca T'ofo habʉ ena: “Hindra thempabi ni 'nará ndo'yo'a̱.” 37Y nehe bi njabʉ ngu ma̱nga ra Ma̱ca T'ofo habʉ ena: “Ya ja̱'i bi hyandi nú'a̱ bi sʉnsɛ'ʉ.” 38Nepʉ ra Jose mrá me Arimatea bi ma bá ba̱ntebi ra Pilato pa da 'yapa nsɛqui da ca̱'mba rá zi ndo'yo ra Jesu de ja ra ponza ne da duts'i'a̱. Ra Jose xqui gamfri ra Jesu, masque mant'a̱guitho ngue'a̱ mi tsu yá mixodyoui. Ne ra Pilato bi umba nsɛqui, hangue bi ma bá ca̱'mba rá ndo'yo ra Jesu de ja ra ponza ne bi duts'i. 39Nehe ra Nicodemo nú'a̱ xqui ma da c'a̱'tsa ra Jesu dega xuui, nehe bi mani habʉ xqui 'bont'i'a̱. Nu'á̱ mi hña̱ ra mirra mi ntha̱nts'i co ra aloe, mi pɛ'tsa 'natema'rɛt'a kilo rá hñʉ. 40Nepʉ nu'ʉ́ bi du'tsua rá zi ndo'yo ra Jesu, ne bi mant'i co ya xʉni dutu nú'ʉ xqui t'ʉxa nú'a̱ ra mirra ne ra aloe, ngue'a̱ mi njabʉ yá nza̱i yá nt'agui ya xodyo. 41Y nu habʉ bri pont'i'a̱, mi jʉmpa guetbʉ 'nara ua̱za habʉ mi ja 'nara cʉts'i pa ra nt'agui, ne hinto xqui nt'aguitho ja nura cʉts'i'a̱. 42Hangue ja bá aguini'ʉ ra Jesu ngue'a̱ guehni bi gʉmpa guetbʉ'ʉ de habʉ xqui 'bont'i'a̱, ne ngue'a̱ ya mi ma da mʉdi ra pa dega tsaya de ya xodyo.

will be added

X\