NSANJUA 12

1Y mri 'bɛ 'rato ma pa pa da dat'a ra ngo de ra pascua, nura Jesu bi ma pa Betania habʉ mi 'bʉ ra Lasaro nú'a̱ xqui gʉts'i de rá du. 2Y ja bi t'ø'tuani 'nara nt'oxi ra Jesu. Ra Marta go mrá møxmexa, ne nura Lasaro mi huhuini ra Jesu ja ra mexa co ma'ra ya ja̱'i. 3Nepʉ ra Maria mri hña̱ nde litro ra hoga ñʉni mi 'ra'ta ra nardo ne xi mri muui ndunthi, ne bi go'tsuabi ja yá ua ra Jesu, nepʉ bi o'tuabi co yá sta̱, ne bi mfont'a nú'a̱ ra ñʉni gatho mbo ra ngu. 4Nu'bʉ́ ra Juda Iscariote nú'a̱ mrá t'ʉ ra Simu ne 'namrá nxadi ra Jesu, ne go gue'a̱ mi ma da da'a̱, bi 'ñena: 5―¿Hanja himbi 'ba nú'a̱ ra hoga ñʉni'a̱ xi xá ma̱di? Xa za xa 'bahma̱ po hñu nthebe denario, ne nura boja̱'a̱ xa thecuahma̱ ya zi hyoya. 6Nura Juda bi ma̱ njabʉ ngue'a̱ mrá be, ne ngue'a̱ go mi pɛ'tsa ra ncʉboja̱ ne mi jʉ nú'a̱ go mi ne de ja ra buxa, ne hingue xi majua̱ni mri hueca ya hyoya'a̱. 7Pe nura Jesu bi 'ñembabi ra Juda: ―Ote guí xipabi. Nuní bi goscagui nuna ñʉni ja ma ua pa nura pa'a̱ de ma nt'agui. 8Ngue'a̱ nuya hyoya nza̱ntho ma da 'mʉi con gue'ahʉ, pe nuga hinga nza̱ntho ma ga 'bʉiua con gue'ahʉ. 9Nepʉ xi ndunthi ya xodyo bi sipabi gue ra Jesu mi 'bʉhni Betania, ne bi ma'ʉ pa bá c'a̱'tsi'a̱, y hingue hønsɛ pa da c'a̱'tsa ra Jesu, nehe pa bá handa ra Lasaro nú'a̱ xqui gʉxa ra Jesu de rá du. 10Nu'bʉ́ nuya nda̱ gá macja̱ bi 'ñʉ'ti pa da hyohma̱ ra Lasaro nehe. 11Ngue'a̱ po rá ngue ra Lasaro ndunthi ya xodyo xqui 'uegue de gue'ʉ ne bi gamfri'ʉ ra Jesu. 12Ha nurá hyax'a̱ gatho ya ja̱'i nú'ʉ xqui ma ra ngo de ra pascua nuni Jerusale bi 'yøde gue ra Jesu mi ma da zøni de guehni. 13Ne nu'ʉ́ bi doca ya dɛnthi ne bi ma bá tha̱di ra Jesu ne mi manta'ʉ mi ena: ―¡Xá nsunda Ajua̱! ¡Ajua̱ da ja̱pi nuni to'o bá ehe de rá thuhu'a̱! ¡Ajua̱ da ja̱pi nuni ma Nda̱hʉ nújʉ dyá me Israelhʉ! 14Ha nura Jesu bi zʉdi 'nara zi t'ʉbru ne bi tøgue'a̱ pa bi nja ngu nú'a̱ xqui t'ofo ja ra Ma̱ca T'ofo habʉ ena: 15Oxqui ntsuhʉ, nú'ahʉ gyá menguhʉ Sión; ndi, hyanthʉ, xa 'ñepʉ ri Nda̱hʉ, bra tøgue 'nara zi t'ʉbru. 16Ha nuyá nxadi hinga 'bestho ra ora'a̱ bi zo yá mfeni hanja xqui njabʉ. Pe nú'bʉ mi yopa nte ra Jesu ne bi yopa menga mahets'i, nu'bʉ́ ha̱, bi beni yá nxadi gue xqui t'ofo njabʉ de gue'a̱, ne xqui njabʉ ngu nú'a̱ xqui t'ofo. 17Nú'ʉ ya ja̱'i mi 'bʉhni nura ora'a̱ ra Jesu bi xipa ra Lasaro da bøni de ra nt'agui ne bi gʉts'i de ra du, nu'ʉ́ xqui 'yonga ra 'bede de nú'a̱ xqui hyant'ʉ. 18Hangue ndunthi ya ja̱'i xqui bøni de ra hnini pa bá tha̱di ra Jesu ngue'a̱ xqui 'yøde de nú'a̱ ra da̱nga nt'udi xqui nja. 19Nepʉ ya fariseo mri 'ñémsɛ'ʉ: ―¡Ha ngue dí xi'ahʉ gue hinda za te gui 'yøthʉ! Ndi, gatho ya ja̱'i di dɛnini, hinda za to da za̱miyʉ. 20Nehe 'raya me Grecia xqui ma Jerusale ja nú'a̱ ra ngo pa da xøcambeni'ʉ Ajua̱. 21Y nú'ʉ ya me Grecia bi ma bá tsʉdi ra Lipe nú'a̱ mrá me Betsaida de ra hai Galilea, ne bi 'ñembabi: ―Ndada, dí nehma̱he ga ña̱he co ra Jesu. 22Nepʉ bi ma nura Lipe bá xipabi ra Andre, ne ri yoho'ʉ bi ma bá xipa ra Jesu. 23Ha ra Jesu bi da̱di ne bi 'ñena: ―Ya bi zø ra ora pa da du Nú'a̱ To'o e bi Nja̱'i ne da yopa menga pa mahets'i. 24Xi majua̱ni dí xi'ahʉ, 'bʉ 'nara nda dega trigo 'bɛ'tsitho ne hinda 'bot'a ja ra hai, hinda nxa̱ndi. Pe nu'bʉ xa 'bot'i, ma da unga ndunthi ra sofo. 25Nu'a̱ tó'o da ma̱di rá te, ma da 'bɛdi, pe nu'a̱ tó'o hingui ma̱di rá te nuua ja ra ximhai, nú'á̱ go gue'a̱ ma da mɛ'tsa rá te pa nza̱ntho. 26Nu'a̱ tó'o da mɛpcagui, mahyoni da dɛngagui, y nu habʉ ga 'bʉiga da 'mʉhni nehe. Ha nu'a̱ tó'o da mɛpcagui, ma Dada ma da 'ñe'tsua rá nsu. 27Nubyá xi dí tu ma mʉi. ¿Te ma ga apa Ajua̱ ma Dada? ¿Ha ga xipa njaua: “Ma Dada'i, ña̱ngagui de nú'a̱ ma ga thogui nuna ra orabya”? Pe hinda za ga embi njabʉ, ngue'a̱ pa guehna stá ehe. 28Ma Dada'i, 'yøt'e nú'a̱ go ri paha pa dra nsunda'i ri thuhu. 'Bestho ra ora'a̱ bi nt'øde 'nara noya de mahets'i nú'a̱ bi 'ñena: ―Ya stá øt'e ne ma ga yopa øt'a ma'na'qui. 29Ha nura hmuntsja̱'i mi 'bahni ra ora'a̱ bi 'yøde nú'a̱ ra noya de mahets'i, ne 'ra bi 'ñena gue mi 'nara ngani, ha nu ma'ra mi ena gue 'nara ɛnxɛ bi zofo'a̱. 30Nepʉ nura Jesu bi da̱di ne bi 'ñena: ―Hingo po rá ngueque xa nt'øde nú'a̱ ra noya, hønsɛ po rá ngue'ahʉ. 31Nubyá nú'ʉ ya meximhai hinda ne da gamfrigui ma dra t'ɛ'mbabi pa dra castiga'ʉ, ne ma dra tha̱cuabi rá ts'ɛdi ra ts'onda̱hi nú'a̱ ri nda̱ ja nuna ra ximhai. 32Nuga ma dra ts'ʉtcagui maña̱ ja 'nara ponza pa da thogagui, y nu sta t'øtque njabʉ, ma da gamfrigui ndunthi ya ja̱'i po rá ngue ma du. 33Nu'á̱ bi ma̱nga njabʉ pa da fa̱di te ma du mi ma da du'a̱. 34Nepʉ nuya ja̱'i bi da̱di ne bi 'ñena: ―Nu'i guí ena gue go gue'e Nú'a̱ To'o e bi Nja̱'i, ne nuje ndí hu ma mʉihe gue go guet'a̱ ra Cristo nú'a̱ mi ma da mɛhna Ajua̱ pa da nda̱. Pe nu'i guí ena gue mahyoni ma dra ts'ʉta maña̱ ja ra ponza Nú'a̱ To'o e bi Nja̱'i. Pe nura ley ma̱ gue ra Cristo ma da 'mʉi pa nza̱ntho. Nu'bʉ́ ¿te rá 'bɛfi Nú'a̱ To'o e bi Nja̱'i? ¿Ha go gue'a̱ nú'a̱ mi ma da mɛhna Ajua̱ pa da nda̱? 35Nu'bʉ́ ra Jesu bi 'ñembabi'ʉ: ―Nuga drá ñot'i dí yo't'a ri mfenihʉ. Pe ya ts'ʉtho ya pa dí 'bʉi con gue'ahʉ. Hangue mientra dí 'bʉi con gue'ahʉ, tɛngaguihʉ, pa hingui njahʉ ngu nú'a̱ to'o bi zʉ ra 'bɛxuui, ngue'a̱ nu'a̱ tó'o 'yo ja ra 'bɛxuui hingui pa̱di habʉ rí ma. 36De dí 'bʉiua pa ga yo't'a'ihʉ, camfriguihʉ, pa njabʉ dyá mɛti'ihʉ ra ñot'i. Ha nu mi uadi bi ma̱nga njabʉ ra Jesu, bi 'uegue de gue'ʉ bi ma bá 'bʉi habʉ hinda ba̱di'ʉ. 37Masque ra Jesu xqui 'yøt'a ndunthi ya da̱nga nt'udi ja yá thandi nuya xodyo, pe nu'ʉ́ himbi gamfri. 38Bi njabʉ ngu nú'a̱ xqui 'yofo ra ba̱di Isaía habʉ ena: Ma zi Hmu'i, ¿to ja gue'a̱ xa gamfri ma noyahʉ? ¿To ja gue'a̱ xa gamfri'i ngue'a̱ xcá 'yøt'a ya da̱nga nt'udi? 39Nu'ʉ́ himi tsa da gamfri ngue'a̱ bi njabʉ ngu nú'a̱ xqui 'yofo ra ba̱di Isaía ja ma'na ra xɛni habʉ ena: 40Ajua̱ bi go'tua yá da'ʉ ne bi japi bi megui yá mfeni, pa himbi hyandi co yá da, nixi bi ba̱di co yá mfeni, pa himbi ñobri'ʉ ne pa njabʉ nuga himbi za dá pøhø'ʉ. 41Ra Isaía bi ma̱nga njabʉ de ra Jesu ngue'a̱ xqui hyandua rá nsunda'a̱, hangue mi ma̱ de gue'a̱. 42Masque njabʉ, pe asta 'raya nda̱ gá xodyo nehe bi gamfri gue ra Jesu go gue'a̱ xpá mɛhna Ajua̱ pa da nda̱, pe nu'ʉ́ hinto bi xipabi ngue'a̱ mi tsu ya fariseo da 'yɛni'ʉ de ra nija̱. 43Ngue'a̱ nu'ʉ́ ma'na mi ne da pønga yá hmi ja yá thandi ya ja̱'i que ja rá thandi Ajua̱. 44Ra Jesu bi ña̱ nts'ɛdi ne bi 'ñena: ―Nu'a̱ tó'o camfrigui, hingue hønsɛ camfriguiga, nehe camfri nú'a̱ to'o bá pɛncagui. 45Ne nu'a̱ tó'o handga ma 'mʉi, ja ra uɛnda handua rá 'mʉi nú'a̱ to'o bá pɛncagui. 46Nuga go guecagui drá ñot'i stá eheua ja ra ximhai pa nuto gatho da gamfrigui ga pøni de ja ra 'bɛxuui. 47Nu'a̱ tó'o øde nú'a̱ dí ma̱, ne hinda ne da 'yøt'e, nuga hingo ma ga ɛ'mbi pa da ma ja ra nidu, ngue'a̱ nuga stá ehe pa ga pøhø ya ja̱'i, hingue pa ga ɛ'mbi da ma ja ra nidu. 48Nu'a̱ tó'o hingui numansugui ne hingui ne da gamfri nú'a̱ dí ma̱, go gue'a̱ ma da t'ɛ'mbi pa ja ra nidu, ne numa noya go gue'a̱ ma da 'yɛ'mbi nú'a̱ ra pa de ra nga̱xhmai. 49Ngue'a̱ nuga hinstá bensɛ nú'a̱ dí ma̱. Ma Dada nú'a̱ to'o bá pɛncagui go gue'a̱ xa 'bɛpcagui pa ga xi'ahʉ nú'a̱ bi xiqui. 50Ne dí pa̱di gue nú'ʉ ya noya xa 'bɛpqui ga ma̱ go gue'ʉ unga ra te pa nza̱ntho. Hangue dí xi'ahʉ ngu nú'a̱ xa xicagui ma Dada.

will be added

X\