NSANJUA 10

1Xi majua̱ni dí xi'ahʉ, nu'a̱ tó'o hingui cʉt'a ja ra gosthi ngu'ño, ne tonts'a ma'na lado pa da yʉt'i, go gue'a̱ 'nara be ne 'nara dacate. 2Nú'a̱ to'o taca ya dɛti, go gue'a̱ ra ma'yo, ne go gue'a̱ cʉt'a po ja ra gosthi. 3Nura nsugosthi xoca ra gosthi pa da yʉt'a ra ma'yo, ha nuya dɛti pa̱tuatho rá noya, ha nu'á̱ da zopa yá thuhu nú'ʉ yá mɛti'a̱ pa da pøni'ʉ. 4Ha nu stí pønga gatho nuyá mɛti'a̱, nu'á̱ di 'bɛt'o ne ma'ti'ʉ, ne nuyá dɛti di dɛni'a̱ ngue'a̱ pa̱tuatho rá noya. 5Ngue'a̱ nuya dɛti hingui tɛna ma'na'ño ra ma'yo, nu'ʉ́ da ne'tsua ra 'rihi da ma, ngue'a̱ hingui pa̱tua rá noya'a̱. 6Ra Jesu bi xipabi'ʉ nuna ra 'bede, pe nu'ʉ́ himbi zo yá mfeni te mri bønga nú'a̱ bi xipabi'ʉ. 7Nepʉ ra Jesu bi yopa 'ñembabi'ʉ: ―Xi majua̱ni dí xi'ahʉ, nuga go guecagui drá gosthi habʉ thogui ya dɛti. 8Gatho nú'ʉ to'o bá 'bɛt'o de gueque go gue'ʉ myá be ne myá dacate ngue'a̱ mi ne da hyat'a ma dɛti pa da dɛni'ʉ. Pe numa dɛti himbi 'yøtuabi nú'a̱ mi ma̱ñ'ʉ, ngue'a̱ hingo myá mɛti'ʉ. 9Nuga go guecagui drá gosthi. Nu'a̱ tó'o da yʉt'a ja nuna ra gosthina̱ da mpøhø, ne nu'á̱ da nja ngu 'nara zi dɛti di cʉt'i di pøni pa da ñuni. 10'Nara be bí ehe hønsɛ pa da mpe, ne pa da hñote, ne pa da huata ra taxo. Pe nuga stá ehe pa ga umba yá te ya ja̱'i, ne nura te'a̱ go 'nara hoga te pa nza̱ntho. 11Nuga go guecagui drá hoga ma'yo, ngue'a̱ 'nara hoga ma'yo da unga rá te po rá ngue yá dɛti. 12Pe 'nara ma'yo 'mɛgo nú'a̱ su ya dɛti hønsɛ pa da hña̱nga rá tha̱ha̱, nu'á̱ 'bʉ da hyanda 'nara mi'ño bra 'ñehe pa e da za ya dɛti, nu'á̱ da ne'tsua ra 'rihi da ma ne da zopʉ ya dɛti ngue'a̱ hingo yá mɛti y hingo xi majua̱ni yá ma'yo'ʉ. Ha nura mi'ño da pɛnt'i 'raya dɛti, ha nu ma'ra habʉraza da nxani'ʉ. 13Njabʉ nú'a̱ ra ma'yo 'mɛgo da nest'ihi da ma ngue'a̱ hingui tu rá mʉi de ya dɛti ngue'a̱ nu'á̱ 'nara 'bɛgotho. 14- 15Nuga go guecagui drá hoga ma'yo. Ngu pa̱cagui ma Dada ne dí pa̱ca'a̱, njabʉ nehe dí pa̱di ma dɛti ne nu'ʉ́ pa̱cagui nehe, ngue'a̱ ma mɛtiga'ʉ, ne ma ga unga ma te po rá ngue'ʉ. 16Nehe 'bʉi ma'ra ma dɛti nú'ʉ hingyá mengu de nuna ra ngu'ño, ne nu'ʉ́ mahyoni ga tsi nehe. Ne nu'ʉ́ da 'yøscagui nu xcrá zofo, ne da 'ñehe'ʉ, ne njabʉ da 'nadra taxo ne da 'nadra ma'yo, y nura ma'yo'a̱ go guecsɛgui. 17Ajua̱ ma Dada xi ri ma̱cagui ngue'a̱ ma ga unga ma te pa ga tu, ha nu xcrá tu, ma ga yopa nte ma'na'qui. 18Pe hinto ma da hña̱ga ma te, ma ga tusɛ. Dí ha̱ ra ts'ɛdi pa ga tusɛ, ne dí ha̱ ra ts'ɛdi pa ga yopa nte ma'na'qui. Njabʉ bá 'bɛpcagui ma Dada. 19Ha nuya xodyo 'rama'na'ño mi ma̱nga ma'na'qui'ʉ ngue'a̱ bi 'yøde te mi ma̱nga ra Jesu. 20Ndunthi de gue'ʉ bi 'ñena: ―Nuní 'ñoui ra ts'onda̱hi ne xa 'bɛ rá mfeni. ¿Hanja guí øxhʉ nú'a̱ te ma̱? 21Ha nu ma'ra mi ena: ―Nuya noya ma̱ni hingyá noya dega ts'onda̱hi. ¿Ha gue ra ts'onda̱hi da za da xocuahma̱ yá da 'nara goda? 22Ne nuni Jerusale ja bi t'øt'ni 'nara ngo, ne nú'a̱ ra ngo'a̱ gue'a̱ 'nara feni de nú'a̱ ra pa bi yopa 'na'yo ma'na'qui ra nda̱nija̱ nú'a̱ xqui yopa tha̱ni. Ha nuya pa'ʉ myá pa dega tsɛ. 23Ha ra Jesu mi 'yoni ja ra porta nú'a̱ mrá thuhu Salomó, go 'namrá porta nú'a̱ ra nda̱nija̱'a̱. 24Ha nuya nda̱ gá xodyo bi 'yɛnt'a madetho'a̱ ne bi 'yambabi: ―¿Ha'mʉ ma gui hñubga ma mʉihe? 'Bʉ xi majua̱ni go gue'e grá Cristo rá 'mɛhni'i Ajua̱ pa gui nda̱, xi da xicje majua̱ni pa ga pa̱he. 25Nu'bʉ́ ra Jesu bi da̱tuabi'ʉ ne bi 'ñembi: ―Ya stá xi'a'ihʉ ne nu'ahʉ́ hinxcá camfrihʉ. Nuya 'bɛfi dí pɛfi de rá thuhu ma Dada, go gue'ʉ udi to'ogui. 26Pe nu'ahʉ hinguí camfrihʉ nguetho hingo ma dɛti'ihʉ, ngu ya stá xi'ahʉ. 27Numa dɛtiga øde nú'a̱ dí ma̱, ne nuga dí pa̱ca'ʉ, ne nu'ʉ́ tɛngagui. 28Nuga dí umbabi'ʉ ra te pa nza̱ntho, ne hinhya'mʉ da 'mɛdi, nixi hinto da zingagui de ma 'yɛ. 29Numa Dada nú'a̱ to'o xa 'racagui'ʉ, ma'na ja rá ts'ɛdi de gatho, ne hinda za to da zinbabi'ʉ de rá 'yɛ'a̱. 30Nuga ne ma Dada dí 'natho'be. 31Nu mi ña̱ njabʉ nura Jesu, nuya nda̱ gá xodyo bi yopa gʉxa ya do pa xa hyohma̱ dega nc'ahni'a̱. 32Nu'bʉ́ ra Jesu bi 'ñembabi'ʉ: ―Ndunthi ya hoga 'bɛfi stá øt'e ja ri thandihʉ nú'ʉ xpá 'ñehe de ma Dada. ¿Nda'a̱ de gue nú'ʉ ya 'bɛfi stá øt'e hinxá hño pa guí ne gui c'ancahʉ? 33Nu'bʉ́ nu'ʉ́ bi da̱di ne bi 'ñena: ―Hinga po rá ngue 'nara hoga 'bɛfi dí ne ga c'an'ahe, hønsɛ ngue'a̱ guí ha̱cuabi rá nsu Ajua̱, ngue'a̱ nu'i 'nagrá 'ñøhø nguje ne grí nhyɛcuaui Ajua̱. 34Nu'bʉ́ ra Jesu bi da̱di ne bi 'ñena: ―Xa t'ofo ja ri leyhʉ gue Ajua̱ bi zofo ya nzaya nú'ʉ xqui hñuts'i'a̱, ne bi 'ñembi'ʉ: “Nu'ahʉ gyá ajua̱hʉ.” 35Y nú'a̱ xa t'ofo ja ra Ma̱ca T'ofo hingui tsa to da ma̱ gue hinga majua̱ni. Ya gue Ajua̱ bi 'ñembabi gue go ya ajua̱ nú'ʉ to'o bi hña̱ni rá noya'a̱, 36xihma̱ nú'a̱ to'o bi hñuxa Ajua̱ ne bá pɛhniua ja ra ximhai, ¿hanja guí ma̱ñhʉ gue ha̱cua rá nsu Ajua̱ ngue'a̱ bi 'ñena gue rá T'ʉ'a̱? 37Nuga dí øt'a ya t'øt'e ngu øt'a ma Dada. Pe nu'bʉ hindí øt'a ngu øt'a ma Dada, oguí camfriguihʉ. 38Pe nuga dí øt'a ya t'øt'e nú'ʉ bí ehe ja ma Dada, hangue masque hingo gui camfriguihʉ gue go gueque ngu nú'a̱ stá xi'ahʉ, go da camfrihʉ gue nú'ʉ ya t'øt'e dí øt'e bí ehe de Ajua̱, pa njabʉ nehe xi da hñu ri mʉihʉ gui pa̱hʉ gue Ajua̱ ma Dada 'bʉi con gueque ne nuga dí 'bʉi con gue'a̱. 39Nu'bʉ́ ya nda̱ gá xodyo ma'na'qui bi 'ramanu pa xa gʉhma̱'a̱, pe nu'á̱ bi ma'a̱, himbi za te bi 'yø'tua'ʉ. 40Nepʉ nura Jesu bi mengui pa ri'nandi ra da̱the Jordá habʉ mi øt'a ra sistehe ra Xuua ma'mɛt'o, ne ja bá 'bʉhni'a̱. 41Ne ndunthi ya mengu de guehni bi ma bá c'a̱'tsi ne mi eñ'ʉ: ―Nura Xuua hinte ma da̱nga nt'udi bi 'yøt'e, pe gatho nú'a̱ bi xicjʉ de ra Jesu, majua̱ni xa njabʉ. 42Y ja guehni ndunthi ya ja̱'i bi gamfri gue ra Jesu go mi gue'a̱ xpá mɛhna Ajua̱ pa da nda̱.

will be added

X\