1 Ante da nja mahets'i ne ra ximhai, nú'a̱ to'o go ra Noya ya mi 'bʉi, y nu'á̱ mi 'bʉhui Ajua̱, ne nu'á̱ go guesɛ'a̱ Ajua̱. 2 Rá mʉdi mi othotho gatho nú'a̱ te ja, pe nú'a̱ to'o go ra Noya ya mi 'bʉhui Ajua̱. 3 Y Ajua̱ bi 'yɛnt'ua ja rá 'yɛ'a̱ pa go bi hyoca te gatho ja; y nu'bʉ nú'á̱ hinte xa hyoqui, nu'bʉ́ hinte di jahma̱. 4 Ne go gue'a̱ to'o ri unga ra te pa nza̱ntho, ne go gue'a̱ ra ñot'i nú'a̱ ri yo'tua yá mfeni ya ja̱'i. 5 Ha nura ñot'i'a̱, ri yot'a ja ra 'bɛxuui, ne nura 'bɛxuui hinxa za xa nta̱te. 6 Mi 'bʉi 'nara 'ñøhø mrá thuhu ra Xuua bá pɛhna Ajua̱ pa da zofo ya ja̱'i. 7 Ne nu'á̱ bá 'bɛhni pa da damajua̱ni de nú'a̱ ra ñot'i, pa da gamfrihma̱ gatho ya ja̱'i ngue'a̱ go mri damajua̱ni'a̱. 8 Ra Xuua hingo mi gue'a̱ ra ñot'i, hønsɛ bá 'bɛhni pa da damajua̱ni de ra ñot'i. 9 Nú'a̱ to'o go ra ñot'i xi majua̱ni, bá ehe de guecua ja ra ximhai ne go gue'a̱ ri yo'tua yá mfeni gatho ya ja̱'i. 10 Nú'a̱ to'o bi hyoca ra ximhai, ja bi 'ñe bi 'mʉcua ja ra ximhai, pe nuya ja̱'i himbi ba̱di ua go mi gue'a̱ to'o bi hyoca ra ximhai. 11 Bá ehma̱ de guecua ja rá ximhai'a̱, pe nuya mengu rá hai himbi numansu'a̱. 12 Pe nu'ʉ tó'o bi numansu ne bi gamfribi rá thuhu'a̱, nu'á̱ bi umbabi ra ts'ɛdi pa bi mba̱tsi de Ajua̱. 13 Ha nú'ʉ to'o gatho xa gamfri'a̱, ya xa yopa 'mʉi ma'ra'yo, hingue dega ji, nixi dega ngø, nixi de rá paha 'nara 'ñøhø, hønsɛ Ajua̱ go gue'a̱ xa 'yøt'e pa xa yopa 'mʉi. 14 Nú'a̱ to'o ra Noya bá e bi nja̱'i, ne bi 'mʉi con guecjʉ, ne xi mrá hoja̱'i, ne nza̱ntho mi ma̱nga nú'a̱ majua̱ni. Ne dá handuahe rá nsunda'a̱, go gue'a̱ rá nsunda Ajua̱ ra Dada nú'a̱ pɛ'tsa rá 'ra T'ʉ nehe. 15 Hangue nura Xuua bi damajua̱ni de gue'a̱ ne bi ña̱ nts'ɛdi bi 'ñena: ―Go gue'a̱ nú'a̱ ndí xi'ahʉ, gue 'mɛfa de gueque mi ma da 'ñehe ma'na, nú'a̱ ma'na ja rá nsu, ngue'a̱ nú'á̱ ya go mi 'bʉi rá mʉdi de gueque. 16 Gathoguihʉ stá ha̱ñhʉ de yá hño'a̱, ne hinhya'mʉ ri 'bɛtcahʉ rá hñoja̱'i'a̱. 17 Ha nu Ajua̱ xqui hñuxa ra Moise pa go bi 'ñutcahʉ tengu rá ley'a̱, pe nubyá bá pɛhna ra Jesucristo pa bá ha̱ncahʉ rá hñoja̱'i, ne nú'á̱ go gue'a̱ bi 'ñudi gatho maxøgue nú'a̱ majua̱ni. 18 Hinhya'mʉ to xa hyanda Ajua̱ ra Dada, pe nurá hma̱ca 'ra T'ʉ'a̱ bi 'ñutcahʉ tengu rá 'mʉi'a̱. 19 Ha nuya nda̱ gá xodyo mi 'bʉhni Jerusale bi mɛhna 'raya macja̱ ne 'rayá mfats'i'ʉ nú'ʉ mi t'embi ya levita, pa da c'a̱'tsa ra Xuua pa da 'yambabi ua go mi gue'a̱ ra Cristo nú'a̱ mi ma da mɛhna Ajua̱ pa da nda̱. 20 Ha nura Xuua bi ma̱nga nú'a̱ majua̱ni, himbi ncøni ne bi 'ñena: ―Hina, hingo guecagui drá Cristo. 21 Nepʉ nu'ʉ́ bi 'ñembabi: ―Nu'bʉ́ ¿to'o'i? ¿Ha gue go gue'e grá ba̱di Elía? Nu'bʉ́ ra Xuua bi 'ñena: ―Hina, hingo guecagui. Ha nu'ʉ́ bi yopa 'ñembabi ma'na'qui: ―¿Ha gue go gue'e rá da̱nga 'mɛhni'i Ajua̱ nú'a̱ ma da 'ñehe? Ha nu'á̱ bi da̱di ne bi 'ñena: ―Hina. 22 Ha nu'ʉ́ bi 'ñembabi: ―Nu'bʉ́ ¿to'o'i ne te ri 'bɛfigue? Xi da xicje pa ma ga xiphe nehe nú'ʉ to'o bá pɛncahe. 23 Ha nura Xuua bi 'ñembabi'ʉ: ―Nuga, hønsɛ 'nadrá 'mɛhni pa ga ma̱nga ja ra mbonthi nú'ʉ ya noya bi ma̱nga ra ba̱di Isaía ne bi 'ñena: “Jua̱ñhʉ rá 'ñu ra Zidada.” Hangue dí xi'ahʉ, ntsø'mhʉ, ngue'a̱ ya xa 'ñepʉ pa da nda̱. 24 Ha nuya ja̱'i xqui 'bɛhni myá fariseo'ʉ. 25 Hangue nu'ʉ́ bi 'yambabi ra Xuua ne bi 'ñembabi: ―'Bʉ hingo gue'e grá Cristo, nixi grá ba̱di Elía, nixi rá da̱nga 'mɛhni'i Ajua̱ nú'a̱ ma da 'ñehe, nu'bʉ́ ¿hanja guí xi'tsate? 26 Ha nura Xuua bi da̱di ne bi 'ñena: ―Nuga bá 'bɛncagui pa ga xi'ts'a'ihʉ co ra dehe. Pe 'bʉi 'na con gue'ahʉ nú'a̱ nixi guí pa̱tua rá 'bɛfi. 27 Go gue'a̱ bra 'bɛfa de gueque, ne ma'na ra da̱ngui rá nsu de gueque, nixi dí 'ñepqui ngugui ga xo'tua rá ntha̱sthi de yá thiza'a̱. 28 Njabʉ bi ma̱nga ra Xuua nuni ri'nandi de ja ra da̱the Jordá ja ra hai Betabara habʉ mi xi'tsate'a̱. 29 Nurá hyax'a̱ ra Xuua bi hyanda ra Jesu mbra e da zʉdi ne bi 'ñembabi ya ja̱'i: ―Ndi, hyanthʉ núni bá pɛhna Ajua̱, nja ngu 'nara zi t'ʉca dɛti nú'ʉ tho dega hña̱'ti, y go guehni pu'tua yá ts'oqui ya ja̱'i. 30 Ne go guehni ndí xi'ahʉ mi ma da 'ñehe 'mɛfa de gueque ne ma'na ra da̱ngui rá nsu, ngue'a̱ ya go mi 'bʉini rá mʉdi de gueque. 31 Nuga hindí pa̱tuahma̱ tengu rá 'bɛfini, pe bá 'bɛncagui ga xi'ts'a'ihʉ co ra dehe pa njabʉ gatho'ihʉ gyá me Israelhʉ da za gui pa̱hʉ gue go guehni ra Cristo xpá mɛhna Ajua̱ pa da nda̱. 32 Nehe ra Xuua bi ma̱ de nú'a̱ te xqui nja ne bi 'ñena: ―Nuga dá handa ra Ma̱ca Nda̱hi bá ca̱i de mahets'i ngu 'nara zi domitsu, e bi zʉdini. 33 Nuga hindí pa̱tuahma̱ tengu rá 'bɛfini, pe nú'a̱ to'o bá pɛncagui ga xi'ts'a'ihʉ co ra dehe go gue'a̱ bi 'ñengagui: “Ma gui hyanda ra Ma̱ca Nda̱hi dua ca̱i de mahets'i, e da zʉdi 'nara zi 'ñøhø pa da 'mʉhui, y nu'á̱ go gue'a̱ ma da xi'ts'ahʉ dega Ma̱ca Nda̱hi.” 34 Nuga stá handi hangue drí damajua̱ni gue go guehni rá T'ʉ Ajua̱. 35 Ha nurá hyax'a̱ ra Xuua mi 'bahni ma'na'qui co yoho yá nxadi. 36 Nepʉ bi hyanda ra Jesu mi 'yoni ne bi 'ñena: ―Ndi, hyanthʉ núni bá pɛhna Ajua̱, nja ngu 'nara zi t'ʉca dɛti nú'ʉ tho dega hña̱'ti. 37 Ha nú'ʉ yoho yá nxadi ra Xuua mi 'yøde njabʉ, 'bestho bi dɛni'ʉ ra Jesu. 38 Nepʉ nura Jesu bi mpʉnts'i ne bi hyandi mri dɛni'ʉ ne bi 'ñembabi: ―¿Te 'bɛ grí 'ñehʉ? Ha nu'ʉ́ bi 'yambabi ne bi 'ñembi: ―Xahnate, ¿habʉ guí 'bʉigue? 39 Nu'bʉ́ nu'á̱ bi 'ñembabi: ―Maha pa gui pa̱hʉ habʉ dí 'bʉi. Y bi mɛui'ʉ pa bi ba̱di habʉ mbi 'bʉi'a̱. Bi zøni ngu nzʉnga 'rɛt'a ne bi 'mʉhuini gatho ra pa. 40 Ha nú'ʉ yoho ya nxadi xqui 'yøde nú'a̱ bi ma̱nga ra Xuua ne xqui dɛna ra Jesu, 'na de gue'ʉ mrá thuhu ra Andre ne mrá cu ra Simu Pedro. 41 Nú'a̱ ra Andre'a̱ bi ma bá da̱ma c'a̱'tsa ra Simu Pedro ne bi 'ñembabi: ―Stá hanthe ne stá pa̱he ra Cristo nú'a̱ xpá mɛhna Ajua̱ pa da nda̱. 42 Nepʉ bi zits'i'a̱ pa habʉ mbi 'bʉ ra Jesu. Ha nura Jesu mi hyanda ra Simu bi 'ñembabi'a̱: ―Nu'i grá Simu rá t'ʉ'i ra Joná. Nubyá go dí hup'a'i grá Pedro. ―Nú'a̱ ra thuhu'a̱ rí bøni da 'ñena 'nara do. 43 Ha nurá hyax'a̱ ra Jesu mi beni da ma pa Galilea, pe 'mɛt'o bi ma bá c'a̱'tsa ra Lipe ne bi 'ñembabi: ―Bá ehe tɛngagui pa ma nxadi'i. 44 Ha nura Lipe mrá me Betsaida habʉ mrá mengu ra Andre ne ra Pedro. 45 Nepʉ nura Lipe bi ma bá c'a̱'tsa ra Natanael ne bi 'ñembabi: ―Stá hanthe ne stá pa̱hebya ra Cristo nú'a̱ mi ma da mɛhna Ajua̱ pa da nda̱ ngu bi 'yofo ra Moise ja ra ley ne ngu bi 'yofo ma'ra yá 'mɛhni Ajua̱ maya'bʉ, ne go gue'a̱ ra Jesu rá t'ʉ ra Jose ra me Nasare. 46 Ha nura Natanael bi 'ñembabi: ―Pøde hinda za da bønga 'na xi di ja rá nsu nuni Nasare. Nu'bʉ́ ra Lipe bi 'ñembabi: ―Maha pa gui hyandi 'bʉ hingui camfri. 47 Ha nura Jesu mi hyanda ra Natanael bra e da zʉdi bi 'ñena: ―Ndi, hyanthʉ go guehni 'nara me Israel, nuni xi majua̱ni camfri Ajua̱, y hingrá hyate. 48 Nu'bʉ́ nura Natanael bi 'ñembabi ra Jesu: ―¿Hanja guí pa̱cagui? Ha nura Jesu bi 'ñembabi'a̱: ―Himi xi'atho ra Lipe pa e gui c'a̱scagui, dá hant'a'i nguí 'bai ja rá ua 'nara 'bai gá igo. 49 Nu'bʉ́ ra Natanael bi da̱di ne bi 'ñembabi: ―Xahnate, nu'i go gue'e xi majua̱ni rá T'ʉ'i Ajua̱, ne go gue'e grá Nda̱ de ya me Israel. 50 Nepʉ nura Jesu bi da̱di ne bi 'ñembabi: ―¿Ha gue guí camfrigui hønsɛ ngue'a̱ dá xi'a'i gue dá hant'a'i ja rá ua ra igo? Ma gui hyanda ma'ra ya t'øt'e ma'na dya da̱ngui de nú'a̱ dá xi'a'i. 51 Ne bi 'ñembabi'ʉ: ―Xi majua̱ni dí xi'ahʉ gue ma gui hyanthʉ da xogui mahets'i, ne gui hyanduahʉ yá ɛnxɛ Ajua̱ di pøts'e ne di ca̱i nuua habʉ di 'bʉi Nú'a̱ To'o e bi Nja̱'i.
